Maarhk 11

1ᐁᐊᓂ​ᐯᔓ​ᐃᔖᐙᒡ ᒉᕒᐆᓴᓬᐊᒥᕽ Jerusalem, ᑫᑳ ᐁᐊᓂ​ᐅᑎᑕᒧᐙᒡ ᐯᐸᒋ Bethphage ᑲᔦ ᐯᑕᓂ Bethany ᐁᐃᔑᓂᑳᑌᓂᑭᓐ ᐆᑌᓇᐌᓴᓐ, ᐃᐃᒫ ᓀᐗᑕᑎᓐ ᑳᔭᔮᓂᑭᓐ ᐋᓬᐃᑉ Olive ᑭᑎᑳᓈᑎᑯᑳᕽ ᐁᐃᔑᓂᑳᑌᓂᒃ ᐱᑾᑎᓈ, ᒋᓴᔅ ᐃᑕᔥ ᐅᑮᓃᑳᓂᓂᔕᐙᐞ ᓃᔑᓐ ᐅᑭᑭᓄᐊᒪᐙᑲᓇᐞ 2ᐁᐃᓈᒡ: ᐃᔖᒃ ᐃᐃᒫ ᐌᑎ ᐆᑌᓇᐌᓯᕽ ᑳᐯᔓᐊᔮᒃ, ᐅᑎᓈᐞ᙮ ᐊᓂ​ᐊᐲᒋᑕᑯᔑᓀᒃ ᐃᑯ ᑭᑲᐙᐸᒫᐙ ᒫᔑᒥᑕᑎᒨᔅ, ᐐᑳ ᐊᐎᔭᓐ ᐁᑮ​ᑌᓴᐱᓄᑖᑯᓯᒃ᙮ ᒦ ᐊᐌ ᐋᐸᐙᑫᒃ, ᐲᓈᑫᒃ ᐃᑕᔥ᙮ 3ᑮᔥᐱᓐ ᐊᐎᔭ ᐃᓂᓀᒃ: ᐌᑯᓀᓐ ᐃᐃ ᐌᒋ​ᐃᔑᒋᑫᔦᒃ? ᐅᐅ ᑭᑲᐃᑭᑐᒻ: ᑳᑎᐯᒋᑫᒡ ᐅᓇᑕᐌᓂᒫᓐ, ᔐᒫᒃ ᐃᑕᔥ ᐅᑲ​ᐱᑮᐌᓂᔕᐙᓐ, ᐃᓂᒃ, ᐅᑮᐃᓈᐞ ᒋᓴᔅ ᐃᐃ ᓃᔑᓐ ᐅᑭᑭᓄᐊᒪᐙᑲᓇᐞ᙮ 4ᒦᑕᔥ ᑳᐃᔑ​ᐃᔖᐙᒡ᙮ ᒦᑕᔥ ᑳᑮᐙᐸᒫᐙᒡ ᐃᓂ ᒫᔑᒥᑕᑎᒨᓴᓐ ᐁᓴᑳᑾᐱᓱᓂᒡ ᐃᐃᒫ ᒌᑭᔥᒀᓐᑦ ᓈᐎᑲᓇ᙮ ᒦᑕᔥ ᑳᐃᔑ​ᐋᐸᐙᐙᒡ᙮ 5ᐊᐎᔭᐞ ᐃᑕᔥ ᐃᐃᒫ ᑳᓈᓃᐸᐎᓂᒡ ᐅᑮ​ᑲᓅᓂᑯᐙᐞ: ᐋᓐ ᐁᔑᒋᑫᔦᒃ ᐁᐋᐸᐌᒃ ᐊᐊ ᒫᔑᒥᑕᑎᒨᔅ? ᐅᑮᐃᑰᐙᐞ᙮ 6ᒦᑕᔥ ᑳᐃᔑ​ᓇᑴᑕᐙᐙᒡ ᑳᑮᐃᑯᐙᒡ ᒋᓴᓲᓐ᙮ ᒦᑕᔥ ᑳᐃᔑ​ᐴᓂᒥᑯᐙᒡ᙮ 7ᒦᑕᔥ ᐃᐃ ᑳᐃᔑ​ᐲᑕᒪᐙᐙᒡ ᒋᓴᓲᓐ ᐃᓂ ᒫᔑᒥᑕᑎᒨᓴᓐ᙮ ᐅᐗᑮᒋᑯᓇᔮᓂᐙᓐ ᐅᑮᐊᐸᑭᑑᓈᐙᓐ ᐗᑭᑖᐎᑲᓐ᙮ ᒦᑕᔥ ᑳᐃᔑᑌᓴᐱᒡ ᒋᓴᔅ᙮ 8ᓃᐱᐗᐞ ᑲᔦ ᐅᑮ​ᑕᔗᑭᓯᑑᓈᐙᓐ ᐅᐗᑮᒋᑯᓇᔮᓂᐙᓐ ᒦᑲᓈᕽ᙮ ᐋᓂᓐᑦ ᑲᔦ ᐅᑮᐅᒋ​ᑮᔥᑮᔥᑭᑲᐋᓈᐙᓐ ᐌᑎ ᐅᐱᒣᔭᐄ ᐗᑎᑾᓀᓴᓐ ᑳᔭᓃᐲᔑᐗᓂᓂᑭᓐ, ᐁᑮ​ᑕᔗᑭᐸᑭᓯᑑᐙᒡ ᒦᑲᓈᕽ᙮ 9ᐃᑭ ᑕᔥ ᑳᓃᑳᓃᐙᒡ ᑲᔦ ᐅᑖᓈᕽ ᑳᐱᒥᔭᔮᐙᒡ ᑮᐊᓂ​ᔖᔖᑯᐌᐗᒃ: ᓇᓈᑯᒥᒃ ᑭᔐᒪᓂᑑ! ᑮᐃᑭᑐᐗᒃ᙮ ᑕᔕᐌᑖᑯᓯ ᐊᐌ ᑳᐱᑕᑯᔑᕽ ᐁᐱ​ᐅᒋᓂᔕᐅᑯᒡ ᑳᑎᐯᒋᑫᓂᒡ! ᑮᐃᑭᑐᐗᒃ᙮ 10ᑭᔐᒪᓂᑑᓐ ᐅᑲ​ᔕᐌᑕᒫᑰᓐ ᐅᑖᓂᑫᑭᒫᐎᐎᓐ ᐊᐊ ᑌᐱᑦ David ᑭᑫᑌᔭᐋᒥᓈᐸᓐ᙮ ᐐᐸ ᑕᐱᓈᐱᓭᓂ ᐅᑑᑭᒫᐎᐎᓐ! ᑮᐃᑭᑐᐗᒃ᙮ ᑭᒋᓇᓈᑯᒥᒃ ᑭᔐᒪᓂᑑ! ᑮᐃᔑ​ᔖᔖᑯᐌᐗᒃ᙮ 11ᒦᑕᔥ ᐁᑮ​ᒉᑭᔥᑳᒡ ᐃᐃᒫ ᒉᕒᐆᓴᓬᐊᒥᕽ, ᑮᐲᑎᑫ ᒋᓴᔅ ᐃᐃᒫ ᒎᐗᐞ ᐅᑭᒋᐊᓇᒥᐁᐎᑲᒥᑯᓃᕽ᙮ ᑳᐃᔥᒀ​ᐙᐙᐸᑕᕽ ᐃᐃᒫ ᐲᑎᒃ ᒥᓂᒃ ᑫᑰᓐ ᐃᐃᒫ ᐁᔮᓂᒃ, ᒦᑕᔥ ᑮᐊᓂ​ᒫᒑ ᑲᔦ ᐅᑭᑭᓄᐊᒪᐙᑲᓇᐞ ᒥᑖᔑᓃᔑᓐ, ᐁᑮᐊᓂ​ᐃᔖᐙᒡ ᐆᑌᓇᐌᓯᕽ, ᐯᑕᓂ ᑳᐃᔑ​ᐐᑌᓂᒃ᙮ ᐋᓃᔥ ᐋᔕ ᑮᐊᓂ​ᓈᒋᐅᓈᑯᔑᓂᓂ᙮ 12ᒦᑕᔥ ᐁᓂ​ᐙᐸᓂᓂᒃ ᐁᐊᓂᐅᒋ​ᒫᒑᐙᒡ ᐯᑕᓃᕽ Bethany, ᑮᓅᑌᔅᑲᑌ ᒋᓴᔅ᙮ 13ᐅᑮ​ᑌᐹᐸᒫᓐ ᐃᑕᔥ ᐁᐸᑕᑭᓱᓂᒡ ᑭᑎᑳᓈᑎᑰᓐ, ᐱᒃ fig ᐁᐃᔑᐐᓱᓂᒡ ᑎᓄᐙᑎᑰᓐ, ᐁᐊᓃᐲᔑᐎᓂᒡ᙮ ᒦᑕᔥ ᐁᐊᓂ​ᓈᓯᑲᐙᒡ, ᑕᑲ ᑫᑰᓐ ᒋᑮᒥᑲᕽ ᐁᐐ​ᐊᒧᒥᓀᒡ᙮ ᐁᐅᑎᓵᒡ ᐃᑕᔥ, ᑳᐐᓐ ᑫᑰᓐ ᐅᑮᒥᑲᓰᓐ᙮ ᑮᒥᒋᐊᓃᐲᔑᐎᐗᓐ᙮ ᐋᓃᔥ ᑳ ᒪᔑ ᒋᑮ​ᔔᒥᓂᐎᓂᒡ᙮ 14ᐅᑮᐅᒋ​ᑲᓅᓈᓐ ᐃᑕᔥ ᐃᓂ ᒥᑎᑰᓐ: ᑫᑯ ᒦᓇᐙ ᐐᑳ ᐊᐎᔭ ᑕᐅᒋ​ᐊᒧᒥᓀᓰ, ᐅᑮᐃᓈᓐ᙮ ᐅᑮᓅᑖᑰᐞ ᐃᑕᔥ ᐅᑭᑭᓄᐊᒪᐙᑲᓇᐞ᙮ 15ᐊᐲ ᑕᔥ ᒦᓇᐙ ᐁᓂ​ᑕᑯᔑᓄᐙᒡ ᒉᕒᐆᓴᓬᐊᒥᕽ Jerusalem, ᑮᐲᑎᑫ ᒋᓴᔅ ᐃᐃᒫ ᒎᐗᐞ ᐅᑭᒋᐊᓇᒥᐁᐎᑲᒥᑯᓃᕽ᙮ ᒦᑕᔥ ᐅᑮᒫᒌ​ᓵᓵᑭᒋᓂᔕᐙᐞ ᐃᓂᐌᓂᐗᐞ ᑳᑕᔑ​ᐊᑖᐌᓂᒡ ᑲᔦ ᑳᑕᓇᑖᐙᑫᓂᒡ ᑭᒋᐊᓇᒥᐁᐎᑲᒥᑯᕽ᙮ ᐅᑮᐅᐱᒣᐌᐱᓇᒪᐙᐞ ᐅᑕᑖᓱᓈᑯᓂ ᐃᓂᐌᓂᐗᐞ ᑳᒣᔥᑯᑑᓂᑫᓂᒡ, ᑲᔦ ᐅᑌᓴᐱᐎᓂᓂ ᐃᓂᐌᓂᐗᐞ ᑳᔭᑖᐙᑫᓂᒡ ᐅᒦᒦᓴᐞ᙮ 16ᑳᐐᓐ ᑲᔦ ᐅᑮᐸᑭᑎᓇᒪᐙᓰᓐ ᐊᐎᔭᓐ ᒋᔖᐳᐎᑑᓂᒡ ᐅᐲᓇᐃᑲᓂᓂ ᐃᐃᒫ ᑭᒋᐊᓇᒥᐁᐎᑲᒥᑯᕽ᙮ 17ᒦ ᑳᐃᔑ​ᑭᑭᓄᐊᒪᐙᒡ ᐃᐃ ᑳᑕᓀᓄᓂᒡ ᐁᐃᑭᑐᒡ: ᐃᔑᐲᐃᑳᑌ ᐅᔕ, ᑭᔐᒪᓂᑑ ᐁᐃᑭᑐᒡ: ᓃᓐ ᓂᐙᑳᐃᑲᓐ ᑕᐃᔑᓂᑳᑌ ᐊᓇᒥᐁᐎᑲᒥᒃ ᑲᑭᓇ ᐊᐎᔭ ᐁᑕᓶᐙᓇᑭᓯᒡ ᐊᑮᕽ ᒋᑕᔑ​ᐊᓇᒥᐋᒡ, ᐃᔑᐲᐃᑳᑌ᙮ ᑮᓇᐙ ᑕᔥ ᐐᓐ ᑭᑮᐋᒋᑑᒻ, ᑖᐱᔥᑰ ᒋᐅᑳᓱᐎᑲᒥᑯᐙᒡ ᐅᒪᑲᑗᒃ! ᐅᑮᐃᓈᐞ᙮ 18ᐃᑭ ᑕᔥ ᑭᒋᐊᓇᒥᐁᐎᑭᒫᒃ, ᐃᑭ ᑲᔦ ᑳᑭᑭᓄᐊᒫᑫᐙᒡ ᐅᓇᔓᐌᐎᓐ, ᐅᑮᓅᑖᓈᐙ ᐃᐌ ᑳᑮᐃᔑᒋᑫᓂᒡ ᐃᓂ ᒋᓴᓲᓐ᙮ ᔑᑾᔥ ᐅᑮᐋᑐᓀᐋᓈᐙ ᐋᓃᓐ ᑫᔑ​ᓂᓯᒥᓐᒡ᙮ ᐋᓃᔥ ᐅᑮ​ᑯᓵᐙᓐ᙮ ᐋᓃᔥ ᑲᑭᓇ ᐯᒫᑎᓯᐙᒡ ᐅᑮᒫᒪᑳᓯᑕᐙᐙᓐ ᒋᓴᓲᓐ ᐁᑮ​ᑭᑭᓄᐊᒫᑫᓂᒡ᙮ 19ᐊᐲ ᑕᔥ ᐁᓂ​ᑎᐱᑲᓂᓂᒃ ᑮᒫᒑᐗᒃ ᒋᓴᔅ ᑲᔦ ᐅᑭᑭᓄᐊᒪᐙᑲᓇᐞ ᐅᒋ ᐃᒫ ᐆᑌᓈᕽ᙮ 20ᐁᓂ​ᑭᔐᐹᐗᑲᓂᓂᒃ ᐃᑕᔥ ᐁᐱᒥᔭᔮᐙᒡ ᐅᑮᐙᐸᒫᐙᓐ ᐃᓂ ᑭᑎᑳᓈᑎᑰᓐ ᐋᔕ ᐁᐹᓱᓂᒡ ᐐᑫ, ᐊᐴᔥᑫ ᐃᐃᒫ ᐅᒌᐱᑳᓂᕽ᙮ 21ᐲᑕᕒ Peter ᐃᑕᔥ ᑮᒫᒥᑲᐎ, ᐁᐃᓈᒡ ᒋᓴᓲᓐ: ᐅᑭᑭᓄᐊᒫᑫ, ᐃᓇᔥᑫ ᑭᑮᐃᓈ ᒋᓂᔑᐗᓈᑎᓯᒡ ᐊᐊ ᑭᑎᑳᓈᑎᒃ᙮ ᐋᔕ ᐹᓲ! ᑮᐃᑭᑐ᙮ 22ᒋᓴᔅ ᐃᑕᔥ ᐅᑮᐃᓈᐞ ᐅᑭᑭᓄᐊᒪᐙᑲᓇᐞ: ᐊᐯᓂᒧᓄᑕᐎᒃ ᑭᔐᒪᓂᑑ᙮ 23ᑌᐺ ᑭᐐᑕᒪᐎᓂᓂᒻ, ᐊᐌᓀᓐ ᐃᑯ ᑫᐃᑕᒧᑴᓐ ᐅᐅ ᐱᑾᑎᓈ: ᐊᐎ​ᐸᑯᐲᓭᓐ ᐃᐃᒫ ᑭᒋᑲᒦᕽ! ᐁᐃᑕᕽ, ᐁᑳ ᓃᔡᔭᑫᑕᓯᒃ, ᑌᐺᔦᑕᕽ ᐃᐃ ᒋᐃᔑᐌᐸᓂᓂᒃ ᐅᑎᑭᑐᐎᓐ, ᑌᐺ ᑕᐃᔑ​ᐙᐸᑕᐃᑰᐎᓯ᙮ 24ᒦᐃᐌ ᑳᐅᒋ​ᐃᓂᓇᑰᒃ: ᐊᓇᒥᐋᔦᒃ, ᐌᑯᓀᓐ ᐃᑯ ᑫᑲᑴᑗᔦᒃ, ᑌᐺᔦᑕᒧᒃ ᐋᔕ ᐁᑮ​ᑌᐱᓇᒣᒃ, ᑭᑲᐙᐸᑕᐃᑰᒻ᙮ 25ᔑᑾ ᐊᐲ ᓃᐸᐎᐊᓇᒥᐋᔦᒃ ᑲᔦ ᐊᐎᔭ ᓂᔥᑫᓂᒣᒃ, ᐊᑲᐌ ᐴᓀᑕᒪᐎᒃ᙮ ᒦᑕᔥ ᑭᑌᑌᐙ ᑭᒋᑮᔑᑯᕽ ᑳᔭᔮᒡ ᒋᐴᓀᑕᒪᐎᓀᒃ ᑫᑮᓇᐙ ᑭᒪᒋᑑᑕᒧᐎᓂᐙᓐ᙮ 27ᒦᓇᐙ ᑕᔥ ᑮᐱᑕᑯᔑᓅᒃ ᐃᐃᒫ ᒉᕒᐆᓴᓬᐊᒥᕽ Jerusalem᙮ ᒦᑕᔥ ᐃᐃᒫ ᐲᑎᒃ ᐁᐱᒧᓭᒡ ᒋᓴᔅ ᒎᐗᐞ ᐅᑭᒋᐊᓇᒥᐁᐎᑲᒥᑯᓃᕽ ᐅᑮᐱ​ᑲᓅᓂᑰᐞ ᑭᒋᐊᓇᒥᐁᐎᑭᒫᐞ ᑲᔦ ᐃᓂᐌᓂᐗᐞ ᑳᑭᑭᓄᐊᒫᑫᓂᒡ ᐅᓇᔓᐌᐎᓐ, ᑲᔦ ᐃᐃ ᒎᐗᐞ ᐅᓃᑳᓂᓰᒥᓂ᙮ 28ᒦᑕᔥ ᐅᑲᑴᒋᒥᑰᐞ: ᐋᑎ ᐌᒋ​ᐃᓈᑯᓂᑰᔭᓐ ᒋᐃᔑᒋᑫᔭᓐ ᐅᓄ ᑫᑰᓇᓐ? ᐊᐌᓀᓐ ᑳᐃᓈᑯᓂᒃ ᒋᑑᑕᒪᓐ? ᐅᑮᐃᑰᐞ᙮ 29ᒦᑕᔥ ᑳᐃᓈᒡ ᒋᓴᔅ: ᑫᓃᓐ ᐯᔑᒃ ᑭᑲᑴᒋᒥᓂᓂᒻ, ᓇᑴᑕᐎᔑᒃ᙮ ᒦᑕᔥ ᑭᑲᐐᑕᒪᐎᓂᓂᒻ ᐋᑎ ᐅᐅ ᐌᒋ​ᐃᔑᒋᑫᔮᓐ᙮ 30ᐊᐌᓀᓇᓐ ᑳᑮᐃᓈᑯᓂᑯᒡ ᐊᐌ ᒞᓐ John ᒋᓰᑲᐊᑖᑫᒡ? ᑯᒫ ᑭᔐᒪᓂᑑᓐ, ᑯᒫ ᑲᔦ ᐃᓂᓂᐗᐞ? ᓇᑴᑕᐎᔑᒃ! ᐅᑮᐃᓈᐞ ᒋᓴᔅ᙮ 31ᒦᑕᔥ ᑮ​ᑲᑴᒋᑎᐗᒃ ᐁᐃᑭᑐᐙᒡ: ᑭᔐᒪᓂᑑ ᑳᑮᐃᓈᑯᓂᑯᒡ ᐋᓇ​ᐃᓇᕽ, ᑭᑖ​ᐃᑯᓈᓐ: ᐋᓃᔥ ᑳᐅᒋ​ᑌᐺᑕᐙᓯᐌᒃ? 32ᑳᐐᓐ ᐃᑕᔥ ᑭᑖᐃᑭᑐᓰᒥᓐ ᐃᓂᓂᐗᐞ ᐅᑮ​ᐃᓈᑯᓂᑰᐞ ᐊᐊ ᒞᓐ, ᑮᐃᑭᑐᐗᒃ᙮ ᐋᓃᔥ ᐅᑮ​ᑯᓵᐙᐞ ᐃᐃ ᐯᒫᑎᓯᓂᒡ, ᑲᑭᓇ ᐊᐎᔭ ᐁᑮᐃᓇᑭᒫᓂᒡ ᒞᓇᓐ ᐁᑎᓄᐎᓂᒡ ᐯᔑᒃ ᑳᑲᓅᑕᒪᐙᓂᒡ ᑭᔐᒪᓂᑑᓐ᙮ 33ᒦᑕᔥ ᑳᐃᔑ​ᓇᑴᑕᐙᐙᒡ ᐃᓂ ᒋᓴᓲᓐ: ᑳᐐᓐ ᓂᑭᑫᓂᒫᓯᐙᓈᓐ, ᐊᐌᑴᓇᓐ ᑳᑮᐃᓈᑯᓂᑯᒡ ᐊᐊ ᒞᓐ ᒋᓰᑲᐊᑖᑫᒡ, ᐅᑮᐃᓈᐙᓐ᙮ ᒦᑕᔥ ᑳᐃᑯᐙᒡ: ᒦᔥ ᐃᐃ ᑳᐐᓐ ᑫᓃᓐ ᑭᑲᐐᑕᒪᐎᓯᓅᓂᓂᒻ ᐋᑎ ᑳᐅᒋ​ᐃᓈᑯᓂᑰᔮᓐ ᒋᐃᔑᒋᑫᔮᓐ, ᐅᑮᐃᑯᐙᓐ᙮

will be added

X\