1 ᒦ ᐃᐌ ᒥᓍᒋᒧᐎᓐ ᑳᐃᔑᑎᐹᒋᒥᓐᒡ ᐊᐊᐌ ᒋᓴᔅ X ᐌᑯᓯᓯᒥᑯᒡ ᑭᔐᒪᓂᑑᓐ᙮ ᒦᐃᐌ ᑳᐃᔑᒫᒋᓭᒃ ᐃᐃ ᑎᐹᒋᒧᐎᓐ, 2 ᒪᔮ ᑳᐃᓇᑌᓂᒃ ᐅᑑᔑᐲᐃᑫᐎᓐ ᐋᐃᓭᔭ Isaiah ᐅᑎᐹᒋᒧ ᐌᔥᑲᒡ ᑳᑮᑲᓅᑕᒪᐙᒡ ᑭᔐᒪᓂᑑᓐ᙮ ᓃᓐ ᑭᔐᒪᓂᑑ ᓂᓃᑳᓂᓂᔕᐙ ᓂᐐᑕᒫᑫᐎᓂᓃᒻ᙮ ᓇᑲᐌ ᑭᑲᑾᔮᒋᑕᒫᒃ ᒦᑲᓇ ᑫᔑᑕᑶᔑᓇᓐ, ᐃᔑᐲᐃᑳᑌ᙮ 3 ᔑᑾ ᑮᐃᑭᑐ ᐋᐃᓭᔭ: ᒪᑗᐊᔮ ᐊᐎᔭ ᐱᑾᑕᑲᒥᑳᕽ ᐁᔖᔖᑯᐌᒡ: ᑾᔮᒋᑕᒪᐎᒃ ᐅᒦᑲᓈᒻ ᐊᐊ ᑌᐯᒋᑫᒡ, ᒋᑾᔭᑾᒧᓂᓂᒃ ᑫᐃᔑᐱᒥᐊᔮᒡ, ᐃᑭᑑᒪᑲᓐ᙮ 4 ᐹᓂᒫ ᑕᔥ ᐊᐊ ᒞᓐ John ᓰᑲᐊᑖᑫᐎᓂᓂ ᑮᓈᓈᑯᓯ ᐃᐃᒫ ᐱᑾᑕᑲᒥᑳᕽ᙮ ᑮᐃᔑᐐᑕᒫᑫ ᑕᔥ ᐁᐃᑭᑐᒡ: ᑴᑭᐱᒫᑎᓯᒃ, ᓰᑲᐊᑖᓱᒃ, ᑭᔐᒪᓂᑑ ᑭᑲᐴᓀᑕᒫᑯᐙ ᑭᒪᒋᑑᑕᒧᐎᓂᐙᓐ, ᑮᐃᑭᑐ᙮ 5 ᒥᓯᐌ ᑯ ᑮᐱᐅᒌᐗᒃ ᐊᐎᔭᒃ ᐃᐃᒫ ᒎᑏᔮᐎᐊᑮᕽ Judea ᑲᔦ ᑯ ᐃᐃᒫ ᒉᕒᐆᓴᓬᐊᒦᐎᐆᑌᓈᕽ Jerusalem, ᐁᑮᐱᓈᓯᑕᐙᐙᒡ ᐃᓂ ᒞᓇᓐ᙮ ᔑᑾ ᐁᑮᐱᑕᑎᐹᑐᑕᒧᐙᒡ ᐅᒪᒋᑑᑕᒧᐎᓂᐙᓐ, ᐅᑮᓰᑲᐊᑖᑯᐙᓐ ᐃᓂ ᒞᓇᓐ ᐃᐃᒫ ᒞᕒᑕᓇᐎᓰᐲᕽ Jordan᙮ 6 ᔑᑾ ᐅᑖᑰᐅᓐ ᐊᐊ ᒞᓐ, ᐱᒀᐎᑲᓀᐎᒥᑕᑎᒻ ᐅᐲᐗᔨᕽ ᑮᐅᒌᒪᑲᓂᓂ ᑎᓄᐌᑭᓐ ᑳᑭᑭᔥᑲᕽ, ᐁᑮᑭᑎᒫᑭᓈᑯᓯᒡ ᐁᑮᐃᔑᐅᒡ᙮ ᔑᑾ ᑲᔦ ᑮᑭᒋᐱᓱ ᐃᐃ ᐸᔥᑴᑭᓅᓂ᙮ ᔑᑾ ᑕᔥ ᑮᐃᔑᐅᒦᒋᒥᒥ ᑭᒋᐸᐸᑭᓀᐞ ᐁᑮᐊᒸᒡ ᑲᔦ ᐱᑾᒋ ᐋᒨᐎᓰᓯᐹᑾᑦ᙮ 7 ᔑᑾ ᑮᐃᔑᐐᑕᒫᑫ ᐅᐅᐌ: ᐱᐊᔮᐲᑌᑎ ᓴ ᐱᒌᓇᒃ ᑫᐱᑕᑶᔑᕽ ᐃᓂᓂ, ᓇᐗᒡ ᑫᐃᔥᐯᑖᑯᓯᒡ ᐊᐲᒡ ᐃᑕᔥ ᓃᓐ᙮ ᐊᐊᐌ ᓴ ᑯ ᑳᐱᐱᒥᓂᔕᐅᒡ, ᐃᓇᔥᑫ ᑯ ᑳᐐᓐ ᓃᓐ ᑲᓇᑫ ᓂᑌᐊᐲᑌᑖᑯᓯᓰ ᒋᓇᐗᑮᔮᐹᓐ ᒋᐋᐸᐊᒧᐗᒃ ᐅᒪᑭᓯᓀᔮᐲᓐ᙮ 8 ᑭᑎᔑᓰᑲᐊᑕᐎᓂᓂᒻ ᓃᓐ ᓂᐲᕽ᙮ ᐐᓐ ᐃᑕᔥ ᐐᓐ ᑭᑲᑭᑭᔥᑲᒨᓂᑯᐙ ᑭᔐᒪᓂᑑᓐ ᐅᑕᒑᑯᓂ᙮ ᒦ ᐅᐌ ᑳᐐᐃᔑᓰᑲᐊᑕᐎᓀᒃ, ᑮᐃᑭᑐ ᐊᐊ ᒞᓐ᙮ 9 ᑮᐃᔑᓭ ᑕᔥ ᐃᐃ ᐊᐲ, ᐁᑮᑕᑶᔑᕽ ᐊᐊᐌ ᒋᓴᔅ, ᐁᑮᐱᐅᒌᒡ ᐌᑎ ᐆᑌᓇᐌᓯᕽ ᓈᓴᕒᐃᑦ Nazareth ᐁᐃᔑᓂᑳᑌᓂᒃ, ᐃᐃᒫ ᑳᓬᐊᓬᐄᐎ ᐊᑮᕽ Galilee ᐁᐊᔮᓂᒃ ᐆᑌᓇᐌᔅ᙮ ᐅᑮᐱᓈᓯᑲᐙᓐ ᑕᔥ ᐃᓂ ᒞᓇᓐ John, ᐁᑮᓰᑲᐊᑖᑯᒡ ᐃᐃᒫ ᒞᕒᑕᓇᐎ ᓰᐲᕽ Jordan᙮ 10 ᐱᒌᓇᒃ ᐃᑕᔥ ᐁᐊᒀᓰᒡ ᐊᐊ ᒋᓴᔅ, ᐅᑮᐙᐸᑖᓐ ᐃᐃ ᑮᔑᒃ ᐁᐹᑭᓭᓂᒃ᙮ ᔑᑾ ᐅᑮᐙᐸᒫᓐ ᐃᓂ ᑭᔐᒪᓂᑑᓐ ᐅᑕᒑᑯᓂ ᐁᐱᓈᔒᓂᒡ, ᐅᒦᒦᓯᕽ ᐁᐃᔑᓈᑯᓯᓂᒡ ᐁᐱᐴᓃᓴᑖᑯᒡ ᐁᐱᐲᒋᔥᑳᑯᒡ ᐃᓂ ᐊᒑᑾᓐ᙮ 11 ᔑᑾ ᑮᑌᐱᑖᑾᓐ ᐃᓉᐎᓐ ᑮᔑᑯᕽ: ᑮᓐ ᐃᓴ ᓂᑯᓯᔅ ᓯᔮᑭᐃᓈᓐ, ᑮᓐ ᑳᓇᐁᑕᒥᐃᔭᓐ᙮ 12 ᔐᒫᒃ ᑕᔥ ᐌᑎ ᐅᑮᐃᔑᐐᑯᔥᑳᐃᑰᓐ ᒋᓴᔅ ᐃᓂ ᐊᒑᑾᓐ, ᐱᑾᑕᑲᒥᑳᕽ ᐁᑮᐃᔑᒫᒑᒡ᙮ 13 ᒦᑕᔥ ᐃᐃᒫ ᑳᐃᔑᓃᒥᑕᓇᑕᓱᑯᓂᒡ ᐱᑾᑕᑲᒥᑳᕽ᙮ ᐊᒦᑕᔥ ᐃᐃᒫ ᓭᑕᓐ Satan ᐅᑮᑲᑴᑲᔥᑭᐋᓐ ᒋᓴᓲᓐ ᒋᒪᒋᑑᑕᒥᓂᒡ᙮ ᐱᑾᒋᐊᔭᐋᐎᔕᒃ ᑲᔦ ᑮᐊᔮᐗᒃ ᐌᑎ ᑳᑮᐃᔑᐊᔮᓂᒡ᙮ ᐃᐃᒫ ᑕᔥ ᐁᒐᓬᐊᒃ ᐅᑮᐱᑲᓇᐌᓂᒫᐙᓐ ᒋᓴᓲᓐ᙮ 14 ᐹᓂᒫ ᑕᔥ ᑳᑭᐸᐅᓐᒡ ᐊᐊ ᒞᓐ John ᓰᑲᐊᑖᑫᐎᓂᓂ, ᑮᐊᓂᑕᑶᔑᓐ ᐊᐊ ᒋᓴᔅ ᐃᐃᒫ ᑳᓬᐊᓬᐄᐎ ᐊᑮᕽ Galilee ᐁᐐᑕᒫᑫᒡ ᐃᐃ ᑭᔐᒪᓂᑑ ᐅᒥᓍᒋᒧᐎᓐ, 15 ᐅᐅᐌ ᐁᐃᑭᑐᒡ: ᒦ ᐋᔕ ᐁᐅᒋᒋᓭᒃ! ᐋᔕ ᐯᔓᓈᑾᓂᓂ ᐃ ᑭᔐᒪᓂᑑ ᒋᐅᑭᒫᑲᑖᑫᒡ! ᑴᑭᐱᒫᑎᓯᒃ, ᑌᐺᑕᒧᒃ ᐅᐅ ᒥᓍᒋᒧᐎᓐ! ᑮᐃᑭᑐ᙮ 16 ᒣᒀ ᑕᔥ ᐁᑮᐱᐱᒫᔕᑳᒣᒡ ᒋᓴᔅ ᑳᓬᐊᓬᐄᐎ ᓵᑲᐃᑲᓃᕽ ᐅᑮᐊᓂᐙᐸᒫᐞ ᓵᐃᒪᓇᓐ Simon ᑲᔦ ᓵᔨᒪᓐ ᐐᒋᑭᐌᔭᓐ ᐁᑕᕒᐆᓐ Andrew, ᒣᒀ ᐁᐸᑯᐲᐙᓂᒡ ᐊᓴᐲᓐ᙮ ᐋᓃᔥ ᐃᐃ ᒦ ᐅᐌ ᐅᑕᓄᑮᐎᓂᐙ ᐃᐃ ᐸᑭᑕᐌᐎᓐ᙮ 17 ᐅᑮᑲᓅᓈᐞ ᐃᑕᔥ: ᐊᐤ ᐊᐯᔪᒃ, ᐱᐐᒌᐎᔑᒃ, ᐅᑮᐃᓈᐞ᙮ ᐃᓇᔥᑫ ᓴ ᑳᐱᐃᓇᓄᑮᔦᒃ ᐁᐸᑭᑕᐙᔦᒃ, ᓅᑯᒻ ᐃᑕᔥ ᑭᑲᒫᒌᑭᑭᓄᐊᒪᐎᓂᓂᒻ ᒋᐲᑕᒪᐎᔦᒃ ᐯᒫᑎᓯᐙᒡ, ᐅᑮᐃᓈᐞ᙮ 18 ᒦᑕᔥ ᔐᒫᒃ ᑳᐃᔑᓇᑲᓈᐙᒡ ᐅᑕᓴᐲᐙᐞ, ᐁᑮᐊᓂᐐᒌᐙᐙᒡ ᐃᓂ ᒋᓴᓲᓐ᙮ 19 ᒦᓇᐙ ᑕᔥ ᐃᑯ ᓈᑫᐙᓴ ᐁᐊᓂᑕᑶᔑᕽ ᒋᓴᔅ, ᐅᑮᐙᐸᒫᐞ ᐃᓂ ᒌᒥᓴᓐ James ᑲᔦ ᒞᓇᓐ John, ᐁᐐᒋᑭᐌᔨᑎᓂᒡ, ᐅᑯᓯᓴᐞ ᐊᐊ ᓭᐸᑏ Zebedee᙮ ᐃᐃᒫ ᑮᐊᔮᐗᐞ ᐲᑑᓇᒃ, ᒣᒀ ᐁᑾᔮᒋᐋᓂᒡ ᐅᑕᓴᐲᓂ᙮ 20 ᔐᒫᒃ ᐃᑕᔥ ᒋᓴᔅ ᐅᑮᐊᑐᒫᐞ᙮ ᒦᑕᔥ ᑳᐃᔑᓇᑲᓈᐙᒡ ᐅᑌᑌᐙᓐ ᓭᐸᑏᓐ, ᐃᐃᒫ ᒌᒫᓂᕽ ᐁᐊᔮᓂᒡ, ᐃᐃᐌᓂᐗᐞ ᑲᔦ ᐊᓄᑮᐊᑲᓇᐞ᙮ ᒦᑕᔥ ᑳᐊᓂᐃᔑᐐᒌᐙᐙᒡ ᐃᓂ ᒋᓴᓲᓐ᙮ 21 ᒦᑕᔥ ᐌᑎ ᑳᓂᐃᔑᑕᑶᔑᓄᐙᒡ ᐆᑌᓈᕽ, ᑲᐸᕒᓂᔭᒻ Capernaum ᐁᐃᔑᓂᑳᑌᓂᒃ᙮ ᒦᑕᔥ ᐱᒌᓇᒃ ᐁᐃᔑᑮᔑᑲᒃ ᑳᐅᑕᓉᐲᐎᑮᔑᑲᓅᒥᐙᒡ ᐃᑭ ᒎᐗᒃ, ᒦᐃᒫ ᑳᐃᔑᐲᑎᑫᒡ ᐊᐊ ᒋᓴᔅ ᐃᐃᒫ ᒎᐗᐞ ᐅᑕᓇᒥᐁᐎᑲᒥᑯᓃᕽ, ᐁᑮᒫᒌᑭᑭᓄᐊᒫᑫᒡ᙮ 22 ᐅᑮᒫᒪᑳᓯᑖᑰᐞ ᐃᑕᔥ ᐃᐃ ᐯᒫᑎᓯᓂᒡ ᐁᔑᑭᑭᓄᐊᒫᑫᒡ᙮ ᐐᓐ ᐋᓃᔥ ᐅᑮᐃᔑᑭᑭᓄᐊᒪᐙᐞ ᑖᐱᔥᑰ ᒦ ᐗᐊᐌ ᐁᐅᑭᒫᐌᑖᑯᓯᒡ᙮ ᑳᐐᓐ ᐐᓐ ᑖᐱᔥᑰ ᑮᐃᔑᐊᔮᓰ ᐅᑯ ᑳᑭᑭᓄᐊᒫᑫᐙᒡ ᐃᐃ ᒎᐗᐞ ᐅᑑᓇᔓᐌᐎᓂᓂ᙮ 23 ᒦᐃ ᐊᐲ ᑮᐲᑎᑫ ᐃᒫ ᐊᓇᒥᐁᐎᑲᒥᑯᕽ ᐊᐊ ᐯᔑᒃ ᐃᓂᓂ ᐁᑭᑭᔥᑲᐙᒡ ᒪᒋᐊᒑᑾᓐ, ᐁᑮᐃᔑᔖᑯᐌᒡ: 24 ᑮᓐ ᒋᓴᔅ ᓈᓴᕒᐃᑎᕽ Nazareth ᐌᒌᔭᓐ! ᐌᑯᓀᔥ ᐌᒋᐸᐹᒣᓂᒥᔮᕽ? ᑭᐱᐅᒋᐃᔖ ᓇ ᒋᓂᔑᐗᓈᒋᐃᔮᕽ? ᑭᑭᑫᓂᒥᓐ ᑮᓐ ᐊᐌᓀᓂᐎᔭᓐ, ᑮᓐ ᐊᐊ ᑳᐯᑭᓯᒡ ᑭᔐᒪᓂᑑᕽ ᑳᐅᒌᒡ! ᑮᐃᔑᑭᔒᐌ᙮ 25 ᒋᓴᔅ ᐃᑕᔥ ᐅᑮᑭᔒᑲᓅᓈᓐ: ᐱᓵᓐ! ᑫᑯ ᑫᑰᓐ ᐃᑭᑐᑫᓐ! ᓇᑲᔥ ᐊᐊ ᐃᓂᓂ! ᐅᑮᐃᓈᓐ ᐃᓂ ᒪᒋᐊᒑᑾᓐ᙮ 26 ᒦᑕᔥ ᐁᑮᐅᒋᐱᓂᑯᔥᑲᐙᒡ ᐃᓂ ᐃᓂᓂᐗᓐ ᐊᐊ ᒪᒋᐊᒑᒃ, ᐁᑮᑭᒋᓅᑖᑯᓯᒡ, ᒦᐃ ᑳᐃᔑᓇᑲᓈᒡ᙮ 27 ᑮᑭᒋᑯᔥᑴᑕᒨᒃ ᐃᑕᔥ ᑲᑭᓇ ᐃᑭ ᐯᒫᑎᓯᐙᒡ, ᑳᐅᒋᑲᑴᒋᑎᐙᒡ: ᐌᑯᓀᔥ ᐅᐅᐌ? ᒦ ᓴ ᐅᐌ ᐅᔥᑭᑭᑭᓄᐊᒫᑫᐎᓐ! ᑖᐱᔥᑰ ᐁᐅᑭᒫᐌᑖᑯᓯᒡ ᐅᑎᔑᑲᓅᓈᐞ ᐃᐃ ᒪᒋᐊᒑᑾᐞ, ᑲᔦ ᐅᓇᐃᑖᑰᐞ! ᑮᐃᑭᑐᐗᒃ᙮ 28 ᒦᑕᔥ ᐃᐃ ᐌᔩᑉ ᐁᑮᐸᐹᑎᐹᒋᒥᓐᒡ ᒥᓯᐌ ᐃᐃᒫ ᑳᓬᐊᓬᐄᐎ ᐊᑮᕽ Galilee᙮ 29 ᒦᑕᔥ ᐃᐃ ᐁᐊᓂᐅᒋᒫᒑᐙᒡ ᐃᐃᒫ ᒎᐗᐞ ᐅᑕᓇᒥᐁᐎᑲᒥᑯᓃᕽ, ᐌᔩᑉ ᐃᑯ ᑮᐊᓂᐃᔑᐲᑎᑫᐗᒃ ᐃᐃᒫ ᐁᔑᑖᓂᒡ ᓵᐃᒪᓐ Simon ᑲᔦ ᐁᑕᕒᐆ Andrew, ᐁᑮᐊᓂᐐᒌᐎᑯᐙᒡ ᒌᒥᓴᓐ James ᑲᔦ ᒞᓇᓐ John᙮ 30 ᐃᓂ ᑕᔥ ᓵᐃᒪᓐ ᐅᓯᑯᓴᓐ ᑮᑭᔑᓱᐙᐱᓀᐗᓐ ᐁᑮᐱᒥᔑᓂᓂᒡ᙮ ᒦᑕᔥ ᐃᐃ ᔐᒫᒃ ᑳᐃᔑᐐᑕᒪᐎᓐᒡ ᐊᐊ ᒋᓴᔅ ᐁᐃᔑᐊᔮᓂᒡ᙮ 31 ᒦᑕᔥ ᑳᐃᔑᓈᓯᑲᐙᒡ ᐁᑮᓴᑭᓂᑫᓈᒡ ᐁᑮᐃᔑᐗᓂᔥᑳᐱᓈᒡ᙮ ᒦᑕᔥ ᔐᒫᒃ ᑳᐃᔑᓇᑲᓂᑯᓂᒡ ᐃᐃ ᑭᔑᓱᐙᐱᓀᐎᓐ᙮ ᒦᑕᔥ ᑳᐃᔑᒫᒌᐸᒥᐃᑯᐙᒡ ᐃᓂ ᐃᑴᐗᓐ᙮ 32 ᐊᐲ ᑕᔥ ᐌᓈᑯᔑᓂᓂᒃ, ᐋᔕ ᐁᑮᐸᑭᔑᒧᓂᒡ ᑮᓯᓲᓐ, ᑮᐹᐲᑕᒪᐙ ᒋᓴᔅ ᑲᑭᓇ ᑳᐋᑯᓯᓂᒡ ᑲᔦ ᐊᐎᔭᐞ ᑳᑭᑭᔥᑲᐙᓂᒡ ᒪᒋᐊᒑᑾᐞ᙮ 33 ᐲᓂᔥ ᐃᑯ ᑲᑭᓇ ᒥᓂᒃ ᐁᔮᐙᒡ ᐃᐃᒫ ᐆᑌᓇᐌᓯᕽ ᑮᐱᒫᐗᒋᐃᑎᐗᒃ ᐃᐃᒫ ᐊᑾᒋᐃᔥᒀᑌᕽ᙮ 34 ᓃᐱᐗᐞ ᐃᑕᔥ ᐅᑮᐱᒫᒋᐋᐞ ᒋᓴᔅ ᐃᐃ ᐋᓃᓐ ᐃᑯ ᐁᓈᐱᓀᓂᒡ᙮ ᑲᔦ ᓃᐱᐗᐞ ᐅᑮᓵᑭᒋᓂᔕᐊᒪᐙᐞ ᒪᒋᐊᒑᑾᐞ ᑳᑭᑭᔥᑲᐙᓂᐸᓐ ᐊᐎᔭᐞ᙮ ᑳᐐᓐ ᐃᑕᔥ ᐅᑮᐸᑭᑎᓇᒪᐙᓰᐞ ᒋᑮᑭᑐᓂᒡ ᐃᐃ ᒪᒋᐊᒑᑾᐞ, ᐋᓃᔥ ᐅᑮᑭᑫᓂᒥᑰᐞ ᐁᐅᑯᓯᓯᒥᑯᒡ ᑭᔐᒪᓂᑑᓐ᙮ 35 ᐐᐸ ᑕᔥ ᐁᑭᔐᐹᐗᑲᓂᓂᒃ ᒋᑆ ᐲᑖᐸᓂᓂᒃ, ᑮᐗᓂᔥᑳ, ᐁᑮᐊᓂᓵᑲᐊᕽ, ᐁᑮᓂᔑᑫᐃᔖᒡ ᐃᑯᒋ᙮ ᒦᑕᔥ ᐃᐃᒫ ᑳᐃᔑᐊᓇᒥᐋᒡ᙮ 36 ᐹᓂᒫ ᑕᔥ ᐊᐊ ᓵᐃᒪᓐ Simon ᑲᔦ ᐃᓂᐌᓂᐗᐞ ᑳᐐᒌᐎᑯᒡ ᐅᑮᐱᒪᐊᓈᐙᓐ ᐃᓂ ᒋᓴᓲᓐ ᐁᑮᓇᓈᑐᓀᐙᐙᒡ᙮ 37 ᒦᑕᔥ ᐁᒥᑲᐙᐙᒡ ᐅᑮᑲᓅᓈᐙᓐ: ᑲᑭᓇ ᐊᐎᔭ ᑭᓈᓈᑐᓈᒃ, ᐅᑮᐃᓈᐙᓐ᙮ 38 ᒋᓴᔅ ᐃᑕᔥ ᐅᑮᐃᓈᐞ: ᑕᑲ ᐌᑎ ᐃᔑᒫᒑᑖ ᒌᑲᔭᐄ ᐁᔮᑭᓐ ᐊᔮᐎᓇᓐ, ᐃᐃᒫ ᑲᔦ ᒋᑕᔑᐐᑕᒫᑫᔮᓐ ᑭᔐᒪᓂᑑ ᐅᑎᑭᑐᐎᓐ᙮ ᐋᓃᔥ ᒦᐃᐌ ᑳᐅᒋᐲᔖᔮᓐ, ᑮᐃᑭᑐ᙮ 39 ᒦᑕᔥ ᐃᐃ ᑳᐃᔑᐸᐹᒥᐊᔮᒡ ᐃᐃᒫ ᑳᓬᐊᓬᐄᐎ ᐊᑮᕽ Galilee ᒥᓯᐌ, ᐁᑮᐸᐹᑲᑮᑴᒡ ᐃᐃᒫ ᒎᐗᐞ ᐅᑕᓇᒥᐁᐎᑲᒥᑯᓃᕽ᙮ ᔑᑾ ᑕᔥ ᑲᔦ ᐅᑮᓵᑭᒋᓂᔕᐊᒪᐙᐞ ᒪᒋᐊᒑᑾᐞ ᐊᐎᔭᐞ᙮ 40 ᐋᐱᑎᕽ ᐃᑕᔥ ᐁᑮᔑᑲᓂᓂᒃ ᐅᑮᐱᐅᑎᓯᑰᓐ ᒋᓴᔅ ᐯᔑᒃ ᐃᓂᓂᐗᓐ ᐁᑮᐅᒥᑮᐙᐱᓀᓂᒡ, ᐁᐱᐸᑯᓭᓂᒥᑯᒡ ᑲᔦ ᑯ ᐁᐅᒋᒌᑾᓇᐲᑖᑯᒡ, ᐁᐃᑯᒡ: ᑮᔥᐱᓐ ᐃᓀᑕᒪᓐ ᑭᑖᑲᔥᑭᑑᓐ ᒋᐯᑭᐃᔭᓐ, ᑮᐃᑭᑐᐗᓐ᙮ 41 ᒋᓴᔅ ᐃᑕᔥ ᐐᑫ ᐁᑮᑭᑎᒫᑫᓂᒫᒡ, ᐅᑮᔒᐱᓂᑫᑕᐙᓐ ᐁᑮᓵᒥᓈᒡ᙮ ᔑᑾᔥ ᐁᑮᐃᓈᒡ: ᐁᐊᐞ, ᓂᑎᓀᑕᒻ᙮ ᑭᑲᐯᑭᐃᑰᐎᔅ, ᐅᑮᐃᓈᓐ᙮ 42 ᒦᑕᔥ ᐃᐃ ᔐᒫᒃ ᑳᐃᔑᓇᑲᓂᑯᓂᒡ ᐃᐃ ᐅᑎᓈᐱᓀᐎᓂᓂ ᐃᓂ ᐃᓂᓂᐗᓐ᙮ ᑮᒥᓄᐊᔮᐗᓐ ᐁᓈᐱᓈᑯᓯᓂᒡ᙮ 43 ᔐᒫᒃ ᐃᑕᔥ ᐅᑮᒫᒌᓂᔕᐙᓐ ᐊᐊ ᒋᓴᔅ ᐃᓂ ᐃᓂᓂᐗᓐ᙮ ᐊᑲᐌ ᑕᔥ ᐐᑫ ᐅᑮᐊᔮᒀᒥᒫᓐ ᐅᐅ: 44 ᐊᔮᒀᒥᓯᓐ, ᐅᑮᐃᓈᓐ᙮ ᑫᑯ ᑫᑰᓐ ᐊᐎᔭ ᐐᑕᒪᐙᑫᓐ᙮ ᐃᔖᓐ ᐃᑕᔥ ᐊᓇᒥᐁᐎᑭᒫ ᒋᐙᐸᒥᒃ᙮ ᒨᓯᔅ Moses ᑮᐃᓈᑯᓂᑫ ᐃᐃ ᐸᑭᑎᓂᑫᐎᓐ ᒋᒦᑭᐌᒡ ᐊᐎᔭ ᐊᐲ ᑮᒥᓄᐊᔮᐃᓐᒡ᙮ ᒦᐃᐌ ᒦᑭᐌᓐ ᒋᑭᑫᓂᒥᒀ ᐯᒫᑎᓯᐙᒡ ᐁᒥᓄᐊᔮᔭᓐ, ᐅᑮᐃᓈᓐ᙮ 45 ᐐᓐ ᐃᑕᔥ ᐊᐊ ᐃᓂᓂ ᑳᑮᒥᓄᐊᔮᐃᓐᒡ, ᐋᒋᑯ ᑮᐊᓂᑎᐹᒋᒧᑖᑫ ᒥᓯᐌ ᐁᑮᑭᑫᑕᒨᔑᐌᒡ᙮ ᒦᑕᔥ ᐅᐅ ᐅᒋ, ᑳᐐᓐ ᑮᒥᒋᒉᑭᔥᑳᓰ ᐆᑌᓇᐌᓯᕽ ᐊᐊ ᒋᓴᔅ, ᐁᑳ ᒋᑭᑫᓂᒫᓯᐎᓐᒡ᙮ ᒦᑕᔥ ᐃᑕᐙᒡ ᐃᐃᒫ ᐱᑾᒐᔭᐄ ᐁᑳ ᑳᐃᔑᑖᓂᐗᓯᓂᓂᒃ ᑮᐊᔭᔮ᙮ ᒥᓯᐌ ᑕᔥ ᐅᑮᐱᐊᔪᒋᐅᑎᓯᑰᐞ ᐊᐎᔭᐞ᙮
