Lok 3

1ᒦ ᓴ ᐃ ᒥᑖᔑᓈᓄᐱᐴᓐ 15 ᑖᐃᐲᕒᐃᔭᔅ Tiberius ᒫᐗᒡ ᐁᑮ​ᑭᒋᐅᑭᒫᐎᒡ, ᐃᐃᒫ ᑕᔥ ᒎᑏᔭ Judea ᐊᑮᕽ ᑮᑕᔑ​ᑭᒋ​ᐅᓇᔓᐌᐎᓂᓃᐎ ᐹᑎᔭᔅ ᐹᐃᓬᐊᑦ Pontius Pilate᙮ ᐃᐃᒫ ᑲᔦ ᑳᓬᐊᓬᐄ Galilee ᐊᑮᕽ ᑮᑕᔑ​ᑭᒋᐅᑭᒫᐎ ᐁᕒᐊᑦ Herod ᑳᐃᔑᓂᑳᓱᒡ᙮ ᐅᐐᒋᑭᐌᔭᓐ ᐱᓬᐊᑉ Philip ᑳᐃᔑᓂᑳᓱᓂᒡ ᑕᔥ ᐐᓐ ᐃᒍᕒᐄᔭ Iturea ᑲᔦ ᒍᕒᐋᑯᓈᐃᑎᔅ Trachonitis ᐃᓇᑫᑲᒥᒃ ᑮᑕᔑ​ᑭᒋᐅᑭᒫᐎᐗᓐ᙮ ᐊᐊ ᑕᔥ ᐐᓐ ᓬᐃᓭᓂᔭᔅ Lysanias ᐋᐸᓬᐄᓐ Abilene ᐊᑮᕽ ᑮᑕᔑ​ᑭᒋᐅᑭᒫᐎ᙮ 2ᐋᓇᔅ Annas ᐊᐊ ᑲᔦ ᑫᔭᐸᔅ Caiaphas ᐁᑮᒫᐗᒡ​ᑭᒋᐊᓇᒥᐁᐎᑭᒫᐎᐙᒡ, ᒦᑕᔥ ᐃᐃ ᐊᐲ ᐊᐊ ᒞᓐ John ᓭᑲᕒᐋᔭᐗᓐ Zechariah ᑳᑮᐅᑌᑌᒡ ᑳᑮᐅᑎᓯᑯᒡ ᑭᔐᒪᓂᑑᓐ ᐅᑎᑭᑐᐎᓂᓂ ᒣᒀ ᐱᑾᑕᑮᕽ ᐁᐊᔮᒡ᙮ 3ᒦᑕᔥ ᒞᓐ ᑳᑮᐃᔖᒡ ᐃᐃᒫ ᒥᓯᐌ ᓇᑫᑲᒥᒃ ᒞᕒᑕᓐ Jordan ᓰᐲᕽ ᐁᐃᔑ​ᐐᑕᒫᑫᒡ: ᓇᑲᑕᒧᒃ ᑭᒪᒋ​ᐃᔑᐌᐱᓯᐎᓂᐙᓐ ᑲᔦ ᑕᔥ ᓰᑲᐊᑖᑰᐎᓯᒃ, ᒦᔥ ᑲᔦ ᑭᔐᒪᓂᑑ ᒋᐴᓀᑕᒪᐎᓀᒃ ᑭᒪᒋ​ᐃᔑᐌᐱᓯᐎᓂᐙᓐ, ᑮᐃᑭᑐ᙮ 4ᒦᐅᐌ ᐁᔑᐲᐃᑳᑌᓂᒃ ᒪᓯᓇᐃᑲᓐ ᑳᑮᐃᑭᑐᑯᐸᓀᓐ ᐋᐃᓭᔭ Isaiah ᑳᑮᑲᓅᑕᒪᐙᒡ ᑭᔐᒪᓂᑑᓐ: ᐊᐎᔭ ᐌᑎ ᐱᑾᑕᑮᕽ ᑮᒪᑗᔖᑯᐌ: ᑮᔑᑕᒪᐎᒃ ᑳᑎᐯᒋᑫᒡ ᐅᒦᑲᓈᒻ, ᐅᔑᑕᒪᐎᒃ ᒋᑾᔭᒀᓂᒃ ᒦᑲᓇ ᑫᐃᔑ​ᐱᒥ​ᐊᔮᒡ᙮ 5ᑲᑭᓇ ᑳᔑ​ᐙᐙᓇᑎᓈᑭᓐ ᑕᒨᔥᑭᓇᒋᑳᑌᐗᓐ, ᑲᑭᓇ ᐱᒪᑎᓈᓐ ᑲᔦ ᑳᑭᒋ​ᐃᔥᐸᑎᓈᑭᓐ ᑕᑕᐸᓯᓂᑳᑌᐗᓐ, ᑳᐙᐙᑳᔥᑲᒧᑭᓐ ᒦᑲᓈᓐ ᑕᑾᔭᑯᒋᑳᑌᐗᓐ, ᑳᒫᓇᒧᑭᓐ ᒦᑲᓈᓐ ᑕᔔᔥᑯᒋᑳᑌᐗᓐ᙮ 6ᑲᑭᓇ ᑕᔥ ᐊᐎᔭᒃ ᑳᐱᒫᑎᓯᐙᒡ ᐅᑲᐙᐸᑖᓈᐙ ᑭᔐᒪᓂᑑᓐ ᐁᔑ​ᐱᒫᒋᐃᐌᓂᒡ, ᐃᔑᐲᐃᑳᑌ᙮ 7ᓃᐱᐗᐞ ᑕᔥ ᐊᐎᔭᒃ ᐅᑮᐱ​ᐊᑕᐙᐸᒫᐙᓐ ᒞᓇᓐ ᒋᓰᑲᐊᑖᑯᐙᒡ᙮ ᑮᓇᐙ ᑭᓀᐱᑰᒃ, ᐁᑮᐃᓈᒡ᙮ ᐊᐌᓀᓐ ᑳᑮᐐᑕᒪᐎᓀᒃ ᒋᑲᔥᑭᑑᔦᒃ ᒋᔖᐴᔥᑲᒣᒃ ᑭᔐᒪᓂᑑ ᐅᑎᐹᑯᓂᑫᐎᓐ, ᐋᔕ ᑫᑳ ᐅᐅᐌ ᑳᐐ​ᑕᑯᔑᓅᒪᑲᓂᓂᒃ? 8ᐃᔑᒋᑫᒃ ᑫᑰᓇᓐ ᑫᐅᒋ​ᓈᑾᒃ ᐁᑮᓇᑲᑕᒣᒃ ᑭᒪᒋᑑᑕᒧᐎᓂᐙᓐ᙮ ᑫᑯ ᑲᔦ ᐃᑎᓱᑫᒃ: ᐁᐸᕒᐊᐋᒻ Abraham ᐅᔕ ᓂᑭᒋᐊᔭᐋᒥᓈᓐ᙮ ᒦᔥ ᐁᔑ​ᐐᑕᒪᐎᓇᑰᒃ, ᑭᔐᒪᓂᑑ ᐅᔕ ᐅᑖ​ᑲᔥᑭᐋᐞ ᐃᐃ ᐊᓯᓃᐞ ᒋᑮᐅᐱᑭᐋᐸᓐ ᒋᑮ​ᐅᑕᑳᓀᓯᓂᒡ ᐁᐸᕒᐊᐋᒥᑳᕽ᙮ 9ᐋᔕ ᐙᑳᑾᑦ ᐋᐸᑕᓐ ᑫᐅᒋ​ᑮᔥᑭᑲᐅᑣ ᒥᑎᑰᒃ ᐅᒌᐱᑯᐙᕽ᙮ ᐁᑕᓱᐯᔑᑯᒡ ᐃᑕᔥ ᒥᑎᒃ ᑳᐅᒋ​ᓂᑖᐎᑭᑑᓯᒃ ᐌᓂᔑᔑᓂᓂᑭᓐ ᒦᓀᓴᓐ, ᒋᑮᔥᑲᑕᐙᑲᓂᐎᒡ ᒋᒪᒋᑌᐌᐱᓂᑲᓂᐎᒡ, ᑮᐃᑭᑐ᙮ 10ᒦᑕᔥ ᐊᐎᔭᐞ ᑳᐃᔑ​ᑲᑴᒋᒥᑯᒡ: ᐋᓃᓐ ᑕᔥ ᑫᐃᔑᒋᑫᔮᕽ? 11ᒦᑕᔥ ᑳᐃᔑ​ᓇᑴᑕᐙᒡ: ᐱᑯ ᐊᐌᓀᓐ ᐁᔮᑴᓐ ᓃᔑᓐ 2 ᓈᐱᔥᑭᑲᓇᓐ, ᐯᔑᒃ ᐅᑲᒦᓈᓐ ᐊᐎᔭᓐ ᐁᔮᓯᓂᒃ ᓈᐱᔥᑭᑲᓐ᙮ ᐊᐎᔭ ᑲᔦ ᐁᔮᑴᓐ ᒦᒋᒻ ᐅᑲᐊᔕᒫᓐ ᐁᔮᓯᓂᒃ ᒦᒋᒻ᙮ 12ᐋᓂᑕ ᑲᔦ ᑳᒫᐗᑑᓈᐙᒡ ᑖᑭᔅ tax ᑎᐸᐃᑫᐎᔔᓂᔮᓐ ᑮᐱᐊᑕ​ᓰᑲᐊᑖᓱᐗᒃ᙮ ᒦᑕᔥ ᑳᐃᔑ​ᑲᑴᒋᒫᐙᒡ: ᐅᑭᑭᓄᐊᒫᑫ, ᐋᓃᓐ ᑫᐃᔑᒋᑫᔮᕽ? ᐅᑮᐃᓈᐙᓐ᙮ 13ᑫᑯ ᐹᔑᒡ ᐊᐗᔑᒣ ᑎᐸᐃᑫᐃᐌᑫᒃ, ᑳᐃᑰᔦᒃ ᐁᑕ ᐃᔑ​ᑎᐸᐃᑫᐃᐌᒃ, ᐅᑮᐃᓈᐞ᙮ 14ᐋᓂᑕ ᑲᔦ ᔑᒫᑲᓂᔕᒃ ᐅᑮᐃᔑ​ᑲᑴᒋᒫᐙᓐ: ᓃᓇᐎᓐᑦ ᐃᑕᔥ ᐐᓐ ᐋᓃᓐ ᑫᐃᔑᒋᑫᔮᕽ? ᒦᑕᔥ ᑳᐃᓈᒡ: ᑫᑯ ᐐᓐ ᐊᐎᔭ ᒪᑲᒫᑫᓐ ᐅᔔᓂᔮᒪᓐ, ᑫᑯ ᑲᔦ ᐊᐎᔭ ᐃᔑᐊᓂᔖ ᐊᓈᒥᒫᑫᓐ᙮ ᒦ ᐱᑯ ᐃ ᐃᔑᓇᐁᑕᒧᒃ ᑭᑑᑎᓯᐎᓂᐙ, ᐅᑮᐃᓈᐞ᙮ 15ᐊᐎᔭᒃ ᑕᔥ ᐯᒫᑎᓯᐙᒡ ᑮᐅᒑᓂᒥᐲᐅᐗᒃ, ᑲᔦ ᑕᔥ ᐁᑮᓈᓈᑲᑕᐌᓂᒫᐙᒡ ᒞᓇᓐ, ᒦ ᒫᐐᓐ ᐊᐊᐌ ᑭᔐᒪᓂᑑ ᑳᑮᐊᔓᑕᒫᑫᒡ ᑫᐱᒫᒋᐃᐌᓂᒡ, ᐁᐃᓀᓂᒫᐙᒡ᙮ 16ᒦᑕᔥ ᒞᓐ ᑳᐃᓈᒡ ᑲᑭᓇ: ᓂᐱ ᓂᑖᐸᒋᑑᓐ ᐁᓰᑲᐊᑕᐎᓇᑰᒃ᙮ ᐊᐊ ᑕᔥ ᐐᓐ ᑳᐐ​ᐲᔖᒡ ᓇᐗᒡ ᑭᒋ​ᐃᓀᑖᑯᓯ ᐊᐲᒡ ᓃᓐ᙮ ᑳᐐᓐ ᐊᐙᒡ ᓂᑌᐸᑫᑖᑯᓯᓰ ᑲᓇᑫ ᒋᐋᐸᐊᒧᐗᒃ ᐅᒪᑭᓯᓇᓐ᙮ ᐐᓐ ᑕᔥ ᓰᑲᐊᑕᐎᓀᒃ ᐅᑲ​ᐋᐸᒋᐋᓐ ᑭᔐᒪᓂᑑᓐ ᐅᑕᒑᑯᓂ, ᑲᔦ ᑕᔥ ᐃᔥᑯᑌᓂ᙮ 17ᑖᐱᔥᑰ ᐃᓀᑖᑯᓯ ᑭᑎᑫᐎᓂᓂ ᑳᑕᑯᓇᕽ ᐅᐸᐎᐌᐸᐃᑲᓈᑎᒃ, ᐁᐐ​ᐸᐙᔑᒫᒡ ᐅᐸᑴᔑᑲᓂᒪᓐ᙮ ᐅᑲ​ᓇᐃᓈᓐ ᑕᔥ ᐅᐸᑴᔑᑲᓂᒪᓐ ᐊᑖᓱᐎᑲᒥᑯᕽ᙮ ᐅᑲ​ᒪᒍᑌ​ᐌᐱᓈᓇᓐ ᐃᑕᔥ ᐐᓐ ᐅᑯᓄᔮᓇᓐ ᐃᐃᒫ ᐃᔥᑯᑌᕽ ᐐᑳ ᑳᔑ​ᐋᑕᐌᓯᓂᓂᒃ, ᐅᑮᐃᓈᐞ᙮ 18ᒞᓐ ᐃᑕᔥ ᓃᐱᐗᐞ ᐃᓇᑫ ᐅᑮᐃᔑ​ᐊᔮᒀᒥᒫᐞ ᐯᒫᑎᓯᓂᒡ ᐁᑮᐙᐐᑕᒪᐙᒡ ᒥᓍᒋᒧᐎᓐ᙮ 19ᔖᑰᒡ ᐃᑕᔥ ᒞᓐ ᐅᑮ​ᑲᓅᓈᓐ ᐁᕒᐊᑦ Herod ᐁᔑᓂᑳᓱᓂᒡ ᐌᑭᒫᐙᑎᓯᓂᒡ, ᐁᑮ​ᐅᒋᐋᒡ, ᐋᓃᔥ ᐁᕒᐊᑕᓐ ᐅᑮᐐᑎᑫᒫᓂ ᐁᕒᐆᑎᔭᓴᓐ Herodias ᐐᒋᑭᐌᓯᐗᓐ ᐅᐐᐎᓂ, ᑲᔦ ᑕᔥ ᓃᐱᐗᐞ ᒪᒋᐃᔑᒋᑫᐎᓇᓐ ᐁᑮᐃᔑᒋᑫᓂᒡ᙮ 20ᐱᑯ ᑕᔥ ᓇᐗᒡ ᑫᔮᐱ ᑮᒪᒋ​ᐃᔑᒋᑫ ᐁᕒᐊᑦ ᑭᐸᐅᑏᐎᑲᒥᑯᕽ ᐁᑮ​ᑭᐸᐙᒡ ᒞᓇᓐ᙮ 21ᐊᐲ ᑕᔥ ᑲᑭᓇ ᐊᐎᔭᒃ ᑳᐃᔥᒀ​ᓰᑲᐊᑖᑰᐎᓯᐙᒡ, ᒋᓴᔅ ᑫᐐᓐ ᑮᓰᑲᐊᑖᑰᐎᓯ᙮ ᒣᒀ ᐁᐊᓇᒥᐋᒡ ᑭᒋᑮᔑᒃ ᑮᐹᑭᑌᔥᑳᓂ᙮ 22ᒦᑕᔥ ᑭᔐᒪᓂᑑᓐ ᐅᑕᒑᑯᓂ ᑳᑮᐱ​ᓈᓯᑳᑯᒡ ᑖᐱᔥᑰ ᐅᒦᒦᕽ ᐁᐃᔑᓈᑯᓯᓂᒡ ᑲᔦ ᑕᔥ ᑭᒋᑮᔑᑯᕽ ᐊᐎᔭᓐ ᐁᐅᒋ​ᑮᑭᑐᓂᒡ: ᑮᓐ ᑎᐱᓇᐌ ᑳᓵᑭᐃᓈᓐ ᓂᑯᓯᔅ, ᑮᓐ ᑳᓇᐁᑕᒥᐃᔭᓐ, ᑮᐃᑭᑐᐗᓐ᙮ 23ᓂᓯᒥᑕᓇ 30 ᒫᐐᓐ ᐁᑕᓱᐱᐴᓉᒡ ᒋᓴᔅ ᑳᑮᒫᒌ​ᑭᑭᓄᐊᒫᑫᒡ᙮ ᒦᔥ ᐊᐎᔭᒃ ᑳᑮᐃᓀᑕᒧᐙᒡ ᒎᓴᐴᓐ Joseph ᐁᑮᐅᑯᓯᓯᒥᑯᒡ ᒋᓴᔅ᙮ ᒎᓴᑉ ᐃᑕᔥ ᑮᐅᑌᑌ ᐄᓬᐋᔫᓐ Heli᙮ 24ᐄᓬᐋᐃ ᑮᐅᑌᑌ ᒫᑕᑑᓐ Matthat᙮ ᒫᑖᑦ ᑮᐅᑌᑌ ᓬᐄᐹᔭᓐ Levi᙮ ᓬᐄᐹᐃ ᑮᐅᑌᑌ ᒣᓬᑳᔫᓐ Melchi᙮ ᒣᓬᑳᐃ ᑮᐅᑌᑌ ᒑᓈᔫᓐ Jannai᙮ ᒑᓈᐃ ᑮᐅᑌᑌ ᒎᓴᐴᓐ Joseph᙮ 25ᒎᓴᑉ ᑮᐅᑌᑌ ᒫᑕᑖᔭᓲᓐ Mattathias᙮ ᒫᑕᑖᔭᔅ ᑮᐅᑌᑌ ᐁᒪᓲᓐ Amos᙮ ᐁᒪᔅ ᑮᐅᑌᑌ ᓀᐊᒨᓐ Nahum᙮ ᓀᐊᒻ ᑮᐅᑌᑌ ᐁᔅᓬᐋᔫᓐ Esli᙮ ᐁᔅᓬᐋᐃ ᑮᐅᑌᑌ ᓈᑳᔫᓐ Naggai᙮ 26ᓈᑳᐃ ᑮᐅᑌᑌ ᒣᔮᑑᓐ Maath᙮ ᒣᔮᑦ ᑮᐅᑌᑌ ᒫᑕᑖᔭᓲᓐ Mattathias᙮ ᒫᑕᑖᔭᔅ ᑮᐅᑌᑌ ᓭᒥᔭᓅᓐ Semein᙮ ᓭᒥᔭᓐ ᑮᐅᑌᑌ ᒎᓭᑰᓐ Josech᙮ ᒎᓭᒃ ᑮᐅᑌᑌ ᒎᑕᐗᓐ Joda᙮ 27ᒎᑕ ᑮᐅᑌᑌ ᒎᐁᓇᓅᓐ Johanan᙮ ᒎᐁᓇᓐ ᑮᐅᑌᑌ ᐅᕒᐄᓴᐗᓐ Rhesa᙮ ᐅᕒᐄᓴ ᑮᐅᑌᑌ ᓯᕒᐊᐸᐸᓬᐊᓐ Zerubbabel᙮ ᓯᕒᐊᐸᐸᓬ ᑮᐅᑌᑌ ᔑᔮᓬᑏᔭᓬᐆᓐ Shealtiel᙮ ᔑᔮᓬᑏᔭᓬ ᑮᐅᑌᑌ ᓃᕒᐋᔫᓐ Neri᙮ 28ᓃᕒᐋᐃ ᑮᐅᑌᑌ ᒣᓬᑳᔫᓐ Melchi᙮ ᒣᓬᑳᐃ ᑮᐅᑌᑌ ᐋᑖᔫᓐ Addi᙮ ᐋᑖᐃ ᑮᐅᑌᑌ ᑰᓴᒨᓐ Cosam᙮ ᑰᓴᒻ ᑮᐅᑌᑌ ᐁᓬᒪᑖᒨᓐ Elmadam᙮ ᐁᓬᒪᑖᒻ ᑮᐅᑌᑌ ᐁᕒᐆᓐ Er᙮ 29ᐁᕒ ᑮᐅᑌᑌ ᒑᔓᐙᐆᓐ Joshua᙮ ᒑᔓᐙ ᑮᐅᑌᑌ ᐁᓬᐃᐄᓴᕒᐆᓐ Eliezer᙮ ᐁᓬᐃᐄᓴᕒ ᑮᐅᑌᑌ ᒞᕒᐃᒨᓐ Jorim᙮ ᒞᕒᐃᒻ ᑮᐅᑌᑌ ᒫᑕᑑᓐ Matthat᙮ ᒫᑕᑦ ᑮᐅᑌᑌ ᓬᐄᐹᔭᓐ Levi᙮ 30ᓬᐄᐹᐃ ᑮᐅᑌᑌ ᓯᒥᔭᓇᓐ Simeon᙮ ᓯᒥᔭᓐ ᑮᐅᑌᑌ ᒎᑕᐗᓐ Judah᙮ ᒎᑕ ᑮᐅᑌᑌ ᒎᓴᐴᓐ Joseph᙮ ᒎᓴᑉ ᑮᐅᑌᑌ ᒎᓇᒨᓐ Jonam᙮ ᒎᓇᒻ ᑮᐅᑌᑌ ᐃᓬᐋᔭᑭᒪᓐ Eliakim᙮ 31ᐃᓬᐋᔭᑭᒻ ᑮᐅᑌᑌ ᒣᓬᐄᔭᐗᓐ Melea᙮ ᒣᓬᐄᔭ ᑮᐅᑌᑌ ᒣᓇᐗᓐ Menna᙮ ᒣᓇ ᑮᐅᑌᑌ ᒫᑕᑕᐗᓐ Mattatha᙮ ᒫᑕᑕ ᑮᐅᑌᑌ ᓀᑕᓅᓐ Nathan᙮ ᓀᑕᓐ ᑮᐅᑌᑌ ᑌᐱᑕᓐ David᙮ 32ᑌᐱᑦ ᑮᐅᑌᑌ ᒉᓯᐗᓐ Jesse᙮ ᒉᓯ ᑮᐅᑌᑌ ᐆᐯᑑᓐ Obed᙮ ᐆᐯᑦ ᑮᐅᑌᑌ ᐴᐙᓴᓐ Boaz᙮ ᐴᐙᔅ ᑮᐅᑌᑌ ᓵᓬᒪᓇᓐ Salmon᙮ ᓵᓬᒪᓐ ᑮᐅᑌᑌ ᓇᔕᓅᓐ Nahshon᙮ 33ᓇᔕᓐ ᑮᐅᑌᑌ ᐊᒥᓇᑖᐴᓐ Amminadab᙮ ᐊᒥᓇᑖᑉ ᑮᐅᑌᑌ ᐋᑎᒥᓅᓐ Admin᙮ ᐋᑎᒥᓐ ᑮᐅᑌᑌ ᐋᕒᓇᔫᓐ Arni᙮ ᐋᕒᓇᐃ ᑮᐅᑌᑌ ᐄᓯᕒᐊᓅᓐ Hezron᙮ ᐄᓯᕒᐊᓐ ᑮᐅᑌᑌ ᐲᕒᐃᓴᓐ Perez᙮ ᐲᕒᐃᔅ ᑮᐅᑌᑌ ᒎᑕᐗᓐ Judah᙮ 34ᒎᑕ ᑮᐅᑌᑌ ᒉᑲᐴᓐ Jacob᙮ ᒉᑲᑉ ᑮᐅᑌᑌ ᐋᐃᓯᑰᓐ Isaac᙮ ᐋᐃᓯᒃ ᑮᐅᑌᑌ ᐁᐸᕒᐊᐋᒪᓐ Abraham᙮ ᐁᐸᕒᐊᐋᒻ ᑮᐅᑌᑌ ᑎᕒᐊᐗᓐ Terah᙮ ᑎᕒᐊ ᑮᐅᑌᑌ ᓀᐅᕒᐊᓐ Nahor᙮ 35ᓀᐅᕒ ᑮᐅᑌᑌ ᓰᕒᐋᑰᓐ Serug᙮ ᓰᕒᐋᒃ ᑮᐅᑌᑌ ᕒᐄᐆᓐ Reu᙮ ᕒᐄᐅ ᑮᐅᑌᑌ ᐲᓬᐁᑰᓐ Peleg᙮ ᐲᓬᐁᒃ ᑮᐅᑌᑌ ᐄᐸᕒᐆᓐ Heber᙮ ᐄᐸᕒ ᑮᐅᑌᑌ ᔒᓬᐊᐗᓐ Shelah᙮ 36ᔒᓬᐊ ᑮᐅᑌᑌ ᑮᓇᓅᓐ Cainan᙮ ᑮᓇᓐ ᑮᐅᑌᑌ ᐋᕒᐹᑭᓵᑑᓐ Arphaxad᙮ ᐋᕒᐹᑭᓵᑦ ᑮᐅᑌᑌ ᔐᒪᓐ Shem᙮ ᔐᒻ ᑮᐅᑌᑌ ᓅᐗᐙᓐ Noah᙮ ᓅᐗ ᑮᐅᑌᑌ ᓬᐁᒣᑰᓐ Lamech᙮ 37ᓬᐁᒣᒃ ᑮᐅᑌᑌ ᒦᑑᓴᓬᐊᐗᓐ Methuselah᙮ ᒦᑑᓴᓬᐊ ᑮᐅᑌᑌ ᐄᓈᑰᓐ Enoch᙮ ᐄᓈᒃ ᑮᐅᑌᑌ ᒉᕒᐁᑑᓐ Jared᙮ ᒉᕒᐁᑦ ᑮᐅᑌᑌ ᒪᐁᓬᐊᓬᐄᔭᓬᐊᓐ Mahalaleel᙮ ᒪᐁᓬᐊᓬᐄᔭᓬ ᑮᐅᑌᑌ ᑫᓇᓅᓐ Cainan᙮ 38ᑫᓇᓐ ᑮᐅᑌᑌ ᐄᓄᔔᓐ Enosh᙮ ᐄᓄᔥ ᑮᐅᑌᑌ ᓭᑑᓐ Seth᙮ ᓭᑦ ᑮᐅᑌᑌ ᐋᑕᒨᓐ Adam᙮ ᐋᑕᒻ ᐅᑮᐅᑌᑌᒫᓐ ᑭᔐᒪᓂᑑᓐ᙮

will be added

X\