1 ᒋᓴᔅ ᐅᑮᐱᐅᑎᑖᓐ ᒉᕒᐊᑯ Jericho ᐆᑌᓇ ᐁᑮᒥᒋᔖᐳᔥᑳᒡ᙮ 2 ᑮᐊᔮ ᑕᔥ ᐃᐃᒫ ᐃᓂᓂ ᓵᑮᔭᔅ Zacchaeus ᐁᔑᓂᑳᓱᒡ ᒫᐗᒡ ᑳᓃᑳᓂᔥᑲᐙᒡ ᑳᒫᐗᑑᓈᓂᒡ ᑖᑭᔅᔔᓂᔮᓐ tax ᑲᔦ ᑕᔥ ᐐᑫ ᐁᑮᐌᓅᑎᓯᒡ᙮ 3 ᐅᑮᑲᑴᐙᐸᒫᓐ ᐊᐌᓀᓂᐎᓂᒡ ᒋᓴᓲᓐ᙮ ᑳᐐᓐ ᑕᔥ ᐅᑮᐙᐸᒫᓰᓐ ᐋᓃᔥ ᑮᑕᑰᓰ, ᐅᓵᒻ ᑲᔦ ᑮᐹᑏᓄᐗᐞ ᐯᒫᑎᓯᓂᒡ᙮ 4 ᒦᑕᔥ ᑮᓃᑳᓂᐸᑑ ᐁᐱᒧᓭᓈᓂᐗᓂᓂᒃ ᑲᔦ ᑕᔥ ᐁᑮᐊᒀᑕᐌᒡ ᓯᑲᒶᕒᐃᐙᑎᑯᕽ Sycamore ᐙᐅᒋᐙᐸᒫᒡ ᒋᓴᓲᓐ ᒪᔮ ᐃᐃᐌᑎ ᐐᐊᓂᐃᔑᐱᒧᓭᓂᒡ ᐁᔑᐊᑰᓯᒡ᙮ 5 ᐊᐲ ᒋᓴᔅ ᑳᐱᐅᑎᑕᕽ ᐁᔑᐊᑰᓯᓂᒡ ᓵᑮᔭᓴᓐ, ᐃᔥᐱᒥᕽ ᑮᐃᓈᐱ ᐁᑲᓅᓈᒡ: ᓵᑮᔭᔅ, ᐌᔩᑉ ᐱᓃᓵᑕᐌᓐ᙮ ᓅᑯᒻ ᑳᑮᔑᑲᒃ ᐅᒋᑕ ᓂᑲᐱᐊᔮ ᐃᐃᒫ ᑭᑕᔮᐎᓂᕽ, ᐅᑮᐃᓈᓐ᙮ 6 ᓵᑮᔭᔅ ᑕᔥ ᑮᐸᐹᔒ ᐁᓃᓵᑕᐌᒡ, ᑲᔦ ᑕᔥ ᐁᑮᒥᓉᑕᕽ ᒋᓴᓲᓐ ᐱᓵᓐ ᒋᐲᑎᑳᑯᒡ᙮ 7 ᑲᑭᓇ ᑕᔥ ᐊᐎᔭᒃ ᐅᐅ ᐁᐃᔑᐙᐸᑫᐙᒡ ᑮᒫᒌᑭᒋᑳᑮᑭᑐᐗᒃ ᐁᑮᐃᑭᑐᐙᒡ: ᒦ ᐃ ᐊᐸᓐ ᒋᓴᔅ ᐁᐊᑕᒪᐗᑎᓵᒡ ᐅᑖᐎᓂᓃᕽ ᐅᒪᒑᑎᓴᓐ, ᑮᐃᑭᑐᐗᒃ᙮ 8 ᓵᑮᔭᔅ ᑕᔥ ᑮᐸᓯᑸ ᐁᑲᓅᓈᒡ ᑳᑎᐯᒋᑫᓂᒡ: ᐃᓇᔥᑫ ᑌᐯᒋᑫᔭᓐ ᐋᐱᑕ ᓂᑲᐸᑭᑎᓈᓇᓐ ᓂᑕᔭᐄᒪᓐ ᒋᒦᓇᒀ ᑳᑭᑎᒫᑭᓯᐙᒡ᙮ ᒥᓂᒃ ᑲᔦ ᑳᑮᐱᐗᔦᔑᒪᒀ ᐊᐎᔭᒃ ᓃᐎᕽ 4 ᐊᐗᔑᒣ ᒥᓂᒃ ᓂᑲᔑᑮᐌᑎᐸᐊᒪᐙᒃ, ᐅᑮᐃᓈᓐ᙮ 9 ᒦᑕᔥ ᒋᓴᔅ ᑳᐃᓈᒡ: ᐱᒫᒋᐃᑰᐎᓯᐎᓐ ᐅᑑᑎᓯᑯᓈᐙ ᐅᐅᒫ ᑳᐊᔮᐙᒡ ᑖᐎᓂᕽ ᓅᑯᒻ ᑳᑮᔑᑲᒃ ᐋᓃᔥ ᑫᐐᓐ ᐊᐊ ᐃᓂᓂ ᐁᐸᕒᐊᐋᒥᕽ Abraham ᓂᑖᐎᑭᒋᑲᓂᕽ ᐅᑕᑳᓀᓯ᙮ 10 ᓃᓐ ᐋᓃᔥ ᐃᓂᓂ ᐅᑯᓯᓴᓐ ᓂᑮᐲᔖ ᐁᐱᐊᑐᓀᐗᒀ, ᑲᔦ ᑕᔥ ᐁᐐᐱᒫᒋᐊᒀ ᑳᐗᓂᔑᓄᐙᒡ, ᑮᐃᑭᑐ᙮ 11 ᒣᒀ ᑕᔥ ᐯᒫᑎᓯᓂᒡ ᐁᐱᓯᑖᑯᒡ ᒋᓴᔅ ᑫᔮᐱ ᐅᑮᐊᓂᐐᑕᒪᐙᐞ ᐊᐌᒋᑫᐎᓐ ᐋᔕ ᐁᐯᔓᓈᑾᓂᓂᒃ ᒋᐅᑎᑕᕽ ᒉᕒᐆᓴᓬᐊᒻ Jerusalem᙮ ᒦ ᐄᑐᒃ ᑳᐃᓀᑕᒥᓂᒡ ᐋᔕ ᔐᒫᒃ ᒋᓈᑾᓂᓂᒃ ᑭᔐᒪᓂᑑᓐ ᐅᑎᐯᒋᑫᐎᓂᓂ᙮ 12 ᒦᑕᔥ ᑳᐃᑭᑐᒡ: ᐯᔑᒀ ᑮᐊᔮ ᐃᓂᓂ ᒫᐗᒡ ᐁᑭᒋᐃᓀᑖᑯᓯᒡ᙮ ᑮᑾᔮᒌ ᐙᓴ ᐊᑮᕽ ᐁᐐᐃᔑᒫᒑᒡ, ᐌᑎ ᐁᐐᐊᐎᑕᔑᑭᒋᐅᑭᒫᐎᐃᓐᒡ᙮ ᐊᐲ ᑕᔥ ᑮᐃᔥᒀᐅᓇᑭᒥᓐᒡ, ᐁᐐᐱᑮᐌᒡ ᒋᐅᑭᒫᑲᑕᕽ ᐊᑮᕽ ᑳᐅᒌᒡ᙮ 13 ᒋᑆ ᒫᒑᒡ ᑕᔥ ᐅᑮᑲᓅᓈᐞ ᒥᑖᓱ ᐅᑕᓄᑮᐋᑲᓇᐞ ᑲᑭᓇ ᐁᑮᒫᒦᓈᒡ ᐯᐯᔑᒃ ᐅᓵᐎᔔᓂᔮᓴᐞ᙮ ᒦᔥ ᑳᐃᓈᒡ: ᐃᔑᐸᑭᑎᓂᒃ ᐗᐊ ᔔᓂᔮ ᑫᐅᒋᔔᓂᔮᑫᔮᓐ ᒥᓂᒃ ᐃᑯ ᑫᐅᑌᑎᔮᓐ ᐲᓃᔥ ᒋᐱᑕᑯᔑᓈᓐ, ᐅᑮᐃᓈᐞ᙮ 14 ᐊᐊ ᑕᔥ ᐃᓂᓂ ᑳᔒᑫᓂᒥᑯᒡ ᐅᐐᒋᐱᒫᑎᓰᒫᑲᓇᐞ ᐅᑮᐃᔑᓂᔕᐙᓂ ᑳᑎᐹᒋᒧᓂᒡ ᐅᐅ ᒋᐊᐎᐃᑭᑐᓂᒡ: ᑳᐐᓐ ᓂᓇᑕᐌᓂᒫᓯᐙᓈᓐ ᐗᐊ ᐃᓂᓂ ᒋᑭᒋᐅᑑᑭᒫᒥᔮᕽ᙮ 15 ᔖᑰᒡ ᐃᑕᔥ ᐊᐊ ᐃᓂᓂ ᑮᑭᒋᐅᑭᒫᐎᐋ, ᒦᔥ ᑳᐱᔑᑮᐌᒡ᙮ ᔐᒫᒃ ᐃᑕᔥ ᑮᐃᓈᑯᓂᑫ ᐅᑕᓄᑮᐋᑲᓇᐞ ᒋᐱᓃᐸᐎᓂᒡ ᐁᓈᓴᒦᒡ ᐁᐐᐊᑕᑭᑫᑕᕽ ᐋᓃᓐ ᒥᓂᒃ ᑳᑲᔥᑭᒋᑫᓂᒡ᙮ 16 ᐃᓂ ᓂᑕᒻ ᑳᐲᔖᓂᒡ ᑮᐃᑭᑐᐗᓐ: ᓂᑑᑭᒫᒻ, ᑯᑕᒃ ᒥᑖᓱ ᓂᑕᔮᐙᒃ ᐅᓵᐎᔔᓂᔮᓴᒃ ᑳᑮᐅᒋᑲᔥᑭᒋᑫᔮᓐ ᐊᐊ ᐯᔑᒃ ᑳᑮᒦᔑᔭᓐ ᐅᒋ, ᐅᑮᐃᑰᓐ᙮ 17 ᒦᑕᔥ ᑳᐃᓈᒡ: ᒦ ᐃᐌ ᐁᑮᒥᓄᒋᑫᔭᓐ, ᑮᓐ ᑾᔭᒃ ᐊᓄᑮᐋᑲᓐ ᑭᑎᓄᐤ᙮ ᐁᑾᔭᑯᑑᑕᒪᓐ ᑕᔥ ᒥᓴᐙᑯ ᑳᐊᑳᓭᑖᑾᒃ, ᑭᒦᓂᓐ ᒋᓈᓈᑲᒋᑑᔭᓐ ᒥᑖᓱ ᑭᒋᐆᑌᓇᐗᓐ, ᐅᑮᐃᓈᓐ᙮ 18 ᐃᓂ ᑯᑕᒃ ᐅᑕᓄᑮᐋᑲᓇᓐ ᑮᐲᔖᐗᓐ ᐁᑮᐃᑯᒡ: ᓂᑑᑭᒫᒻ ᑯᑕᒃ ᓈᓇᓐ ᓂᑕᔮᐙᒃ ᐅᓵᐎᔔᓂᔮᓴᒃ ᑳᑮᐅᒋᑲᔥᑭᒋᑫᔮᓐ ᐊᐊ ᐯᔑᒃ ᑳᑮᒦᔑᔭᓐ ᐅᒋ, ᐅᑮᐃᑰᓐ᙮ 19 ᒦᑕᔥ ᐐᓐ ᐃᓂ ᑳᐃᓈᒡ: ᑮᓐ ᑕᔥ ᐐᓐ ᑭᑲᒦᓂᓐ ᓈᓇᓐ ᒋᓈᓈᑲᒋᑑᔭᓐ ᑭᒋᐆᑌᓇᐗᓐ, ᐅᑮᐃᓈᓐ᙮ 20 ᐃᓂᐌᓂᐗᓐ ᐃᑕᔥ ᑯᑕᒃ ᐊᓄᑮᐋᑲᓇᓐ ᑮᐲᔖᐗᓐ ᐁᑮᐃᑯᒡ: ᓂᑑᑭᒫᒻ, ᐃᓇ ᐗᐊ ᑭᑑᓵᐎᔔᓂᔮᓯᒻ᙮ ᐋᐱᑳᑲᓂᕽ ᓂᑮᑲᔥᑮᑭᓈ ᐁᑮᑲᓇᐌᓂᒪᒃ, 21 ᐁᑮᑯᓯᓈᓐ ᐋᓃᔥ ᑭᑭᑫᓂᒥᓐ ᐋᓃᓐ ᐁᐲᒋᐋᒀᑎᓯᔭᓐ ᐁᐅᑖᐱᓇᒪᓐ ᑮᓐ ᑳᑎᐯᑕᓯᐗᓐ, ᑲᔦ ᑕᔥ ᐁᒫᐗᑑᓇᒪᓐ ᐁᒪᓂᔑᒪᓐ ᑮᓐ ᑳᑮᑭᑎᑳᑕᓯᐗᓐ, ᐅᑮᐃᑰᓐ᙮ 22 ᒦᑕᔥ ᑳᐃᑯᒡ ᐅᑑᑭᒫᒪᓐ: ᑮᓐ ᒫᐗᒡ ᓅᒋᑯ ᐊᓄᑮᐋᑲᓐ᙮ ᑭᑎᑭᑐᐎᓇᓐ ᓂᑲᐋᐸᒋᑑᓇᓐ ᑫᐅᒋᐅᓈᑯᓂᓈᓐ᙮ ᑭᑭᑫᑖᓐ ᐋᐱᒋ ᐁᐋᒀᑎᓯᔮᓐ, ᐁᐅᑖᐱᓇᒫᓐ ᑲᔦ ᑳᑎᐯᑕᓯᐙᓐ, ᐁᒪᓂᔕᒫᓐ ᑲᔦ ᑳᑮᑭᑎᑳᑕᓯᐙᓐ᙮ 23 ᐌᑯᓀᓐ ᑕᔥ ᑳᐅᒋᐊᓵᓯᐗᒡ ᓂᔔᓂᔮᒻ ᑫᑮᐅᒋᑲᔥᑭᒋᑫᔮᐹᓐ ᐊᐲ ᑕᔥ ᑮᐱᑕᑯᔑᓈᓐ ᒋᑮᓵᑭᓯᐊᑭᐸᓐ ᓂᔔᓂᔮᒻ, ᒥᓂᒃ ᑲᔦ ᑳᐋᓂᑫᑲᔥᑭᒋᑫᒡ? 24 ᒦᑕᔥ ᑳᐃᓈᒡ ᐃᐃᒫ ᑳᑮᓃᐸᐎᓂᒡ: ᐅᑖᐱᓂᒥᒃ ᐃᓂ ᐅᓵᐎᔔᓂᔮᓴᓐ ᑳᐊᔮᐙᒡ, ᐃᓂ ᑕᔥ ᒦᓂᒥᒃ ᐊᓄᑮᐋᑲᓇᓐ ᒥᑖᓱ ᐅᓵᐎᔔᓂᔮᓴᐞ ᑳᐊᔮᐙᓂᒡ᙮ 25 ᒦᔥ ᑳᐃᓂᓐᒡ ᐊᐊ ᑭᒋᐅᑭᒫ: ᓂᑑᑭᒫᒥᓈᓐ, ᐋᔕ ᐄᑐᒃ ᐐᓐ ᒥᑖᓱ ᔔᓂᔮᓴᐞ ᐅᑕᔮᐙᐞ, ᑮᐃᓈ᙮ 26 ᑭᒋᐅᑭᒫ ᑕᔥ ᑮᐃᑭᑐ: ᑭᐐᑕᒪᐎᓂᓂᒻ ᐅᐅ, ᑲᑭᓇ ᐊᐎᔭ ᑫᑰᓐ ᑳᐊᔮᒡ ᐋᒌᑫ ᐊᐗᔑᒣ ᑕᒦᓈᑲᓂᐎ, ᐊᐊ ᑕᔥ ᐐᓐ ᑫᑰᓐ ᑳᐊᔮᓯᒃ, ᑕᐅᑖᐱᓇᒪᐙ ᒥᓴᐙ ᑯ ᐸᑮ ᑫᑰᓐ ᑳᐊᔮᒡ᙮ 27 ᐃᑭᐌᓂᐗᒃ ᑕᔥ ᐐᓐ ᑳᔒᑫᓂᒥᐙᒡ ᑳᑮᐊᑕᐌᓂᒥᓯᒀ ᒋᐅᑭᒫᑲᑕᐗᒀ, ᐲᓂᑾᒃ ᐅᐅᒫ ᐁᔑᐊᔮᐗᒃ᙮ ᓂᓯᑾᒃ ᐁᓈᓴᒦᐗᒃ, ᑮᐃᑭᑐ᙮ 28 ᐅᐅ ᑕᔥ ᒋᓴᔅ ᑳᐃᔥᒀᐃᑭᑐᒡ, ᑮᐊᓂᓃᑳᓂᒫᒑ ᒉᕒᐆᓴᓬᐊᒥᕽ Jerusalem ᐁᐃᔖᐙᒡ᙮ 29 ᐊᐲ ᑕᔥ ᑫᑳ ᐁᐊᓂᑕᑯᔑᕽ ᐯᐸᒋ Bethphage ᐁᔑᓂᑳᑌᓂᒃ ᐃᔑᑖᐎᓂᕽ ᑲᔦ ᐯᑕᓂ Bethany ᐁᔑᐊᔮᓂᑭᓐ ᐁᐱᑾᑎᓈᓂᒃ ᐋᓬᐃᑉ Olive ᐁᒋᑳᑌᓂᒃ, ᒋᓴᔅ ᑕᔥ ᐅᑮᓃᑳᓂᓂᔕᐙᐞ ᓃᔑᓐ 2 ᐅᑭᑭᓄᐊᒪᐙᑲᓇᐞ, 30 ᐅᐅ ᐁᑮᐃᓈᒡ: ᐊᓂᓃᑳᓂᐃᔖᒃ ᑳᒪᑗᐊᔮᒃ ᑳᐃᔑᑖᓂᐗᕽ᙮ ᐊᐲ ᑕᔥ ᐊᓂᐲᑎᑫᔥᑳᔦᒃ ᑭᑲᐙᐸᒫᐙ ᒫᔑᒥᑕᑎᒻ ᒋᓴᑳᑾᐱᓱᒡ ᒪᔑ ᐊᐎᔭᓐ ᐁᐴᓱᓄᑖᑯᓯᒃ᙮ ᐋᐸᐙᑫᒃ ᑕᔥ ᒋᐲᓀᒃ᙮ 31 ᑮᔥᐱᓐ ᑕᔥ ᐊᐎᔭ ᐅᐅ ᐃᔑᑲᑴᒋᒥᓀᒃ: ᐌᑯᓀᓐ ᐌᒋᐋᐸᐌᒃ ᐊᐊ ᒫᔑᒥᑕᑎᒻ? ᐅᐅ ᓴ ᑭᑲᐃᓈᐙ: ᑳᑎᐯᒋᑫᒡ ᐅᐐᐋᐸᒋᐋᓐ, ᐅᑮᐃᓈᐞ᙮ 32 ᐃᑭ ᑕᔥ ᑳᑮᓃᑳᓂᓂᔕᐅᑣ ᑮᐃᔖᐗᒃ ᐁᑮᐃᔑᒥᑲᒧᐙᒡ ᑲᑭᓇ ᑳᑮᐃᓂᑣ᙮ 33 ᒣᒀ ᑕᔥ ᐁᐋᐸᐙᐙᒡ ᐃᓂ ᒫᔑᒥᑕᑎᒨᓐ, ᑌᐯᓂᒥᑯᓂᒡ ᐅᑮᐃᑯᐙᓐ: ᐌᑯᓀᓐ ᑕᔥ ᐌᒋᐋᐸᐌᒃ ᒫᔑᒥᑕᑎᒻ᙮ 34 ᒦᔥ ᑳᐃᓈᐙᒡ: ᑳᑎᐯᒋᑫᒡ ᐅᐐᐋᐸᒋᐋᓐ, ᐅᑮᐃᓈᐙᓐ᙮ 35 ᐅᑮᐲᓈᐙᓐ ᑕᔥ ᐃᓂ ᒫᔑᒥᑕᑎᒨᓐ ᐁᔑᐊᔮᓂᒡ ᒋᓴᓲᓐ᙮ ᒦᑕᔥ ᑳᐃᔑᐗᑭᑕᑑᐙᒡ ᐅᑲᔥᑮᑮᐎᓂᐙᓐ, ᒦᔥ ᐃᐃᒫ ᑳᐃᔑᐊᐸᐱᓂᒡ ᒋᓴᓲᓐ᙮ 36 ᐁᐊᓂᐱᒥᐊᔮᒡ ᐃᑕᔥ, ᐯᒫᑎᓯᓂᒡ ᐅᑮᑕᔗᑮᑭᓯᑑᓂ ᐅᑲᔥᑮᑮᐎᓂᓂ ᐃᐃᒫ ᒦᑲᓈᕽ᙮ 37 ᐊᐲ ᐯᔓ ᐁᐊᓂᐅᑎᑕᕽ ᒉᕒᐆᓴᓬᐊᒻ ᐁᔑᓃᓴᒋᐌᒧᓂᓂᒃ ᒦᑲᓇ ᑳᔑᐃᔥᐸᑎᓈᓂᒃ ᐋᓬᐃᑉ ᑭᑎᑳᓈᑎᑯᑳᕽ ᐁᒋᑳᑌᓂᒃ, ᐋᐱᒋ ᑮᐹᑏᓄᐗᐞ ᑳᐱᒥᓂᔕᐅᑯᒡ ᐁᑮᒫᒌᒌᑫᑕᒥᓂᒡ ᐁᓂᑯᒃ ᐁᑮᔖᑯᐌᓂᒡ ᐁᓇᓈᑯᒫᓂᒡ ᑭᔐᒪᓂᑑᓐ ᑲᑭᓇ ᒫᒪᑳᒋᒋᑫᐎᓇᓐ ᑳᑮᐙᐸᑕᒥᓂᒡ: 38 ᔕᐌᑖᑯᓯ ᐊᐊ ᑭᒋᐅᑭᒫ ᑳᐱᑕᑯᔑᕽ ᐅᑎᔑᓂᑳᓱᐎᓂᓃᕽ ᑳᑎᐯᒋᑫᓂᒡ᙮ ᐱᓵᓂᓯᐎᓐ ᐊᔮᒪᑲᓐ ᑭᒋᑮᔑᑯᕽ, ᑲᔦ ᑕᔥ ᒫᐗᒡ ᑭᒋᐃᓀᑖᑯᓯᐎᓐ ᐅᑕᔮᓐ ᑭᔐᒪᓂᑑ ᒫᐗᒡ ᐃᔥᐱᒥᕽ ᑳᐊᔮᒡ, ᑮᐃᔑᔖᑯᐌᐗᒃ᙮ 39 ᐋᓂᑕ ᑕᔥ ᐯᕒᐊᓰᒃ Pharisees ᒣᑴᔭᐄ ᑳᔑᐹᑏᓄᓈᓂᐗᓂᓂᒃ ᐅᑮᐅᒋᑲᓅᓈᐙᓐ ᒋᓴᓲᓐ ᐁᑮᐃᓈᐙᒡ: ᐅᑭᑭᓄᐊᒫᑫ, ᑲᓅᔥ ᑭᑭᑭᓄᐊᒪᐙᑲᓇᒃ ᒋᓅᑖᑎᓯᒀ᙮ 40 ᒋᓴᔅ ᑕᔥ ᑮᐃᔑᓇᑴᑕᒻ: ᑭᐐᑕᒪᐎᓂᓂᒻ, ᑮᔥᐱᓐ ᐐᓇᐙ ᓅᑖᑎᓯᒀ, ᐊᓯᓃᒃ ᐅᔕ ᑕᔖᔖᑯᐌᐗᒃ᙮ 41 ᐊᐲ ᒋᓴᔅ ᐋᔕ ᐯᔓ ᐁᐊᓂᐅᑎᑕᕽ ᒉᕒᐆᓴᓬᐊᒻ Jerusalem ᑭᒋᐆᑌᓇ, ᐊᐲ ᐁᑌᐹᐸᑕᕽ ᐅᑮᒪᐎᑖᓐ, 42 ᐁᑮᐃᑭᑐᒡ: ᑮᔥᐱᓐ ᑕᔥ ᑮᑭᑫᑕᒣᑭᐸᓐ ᓅᑯᒻ ᑳᑮᔑᑲᒃ ᐋᑎ ᑫᐅᒋᒦᓂᑰᔦᑭᐸᓐ ᐱᓵᓂᓯᐎᓐ; ᑳᐐᓐ ᑕᔥ ᑭᑮᐙᐸᑕᐃᑰᓰᒻ ᐃᓂᐌᓂᐗᓐ᙮ 43 ᑭᑲᐅᑎᓵᐸᑖᒻ ᐅᔕ ᑮᔑᑲᒃ, ᐊᐲ ᑳᔒᑫᓂᒥᓀᒀ ᒋᐙᑳᐱᑾᑲᒥᑲᐃᑫᐙᒡ ᑫᐅᒋᒦᑳᓂᓀᒀ᙮ ᑭᑲᐙᑳᔥᑳᑯᐙᒃ ᑲᔦ, ᒥᓯᐌ ᑲᔦ ᐃᓇᑫ ᑭᑲᐅᒌᑳᑯᐙᒃ᙮ 44 ᐐᑫ ᓴ ᑯ ᐅᑲᓂᔑᐗᓈᒋᑑᓈᐙ ᑭᑑᑌᓈᒥᐙ᙮ ᑭᑲᓂᓯᑰᒻ, ᐊᐱᓅᒌᔕᐞ ᑲᔦ ᐅᑲᓂᓵᐙᐞ᙮ ᑳᐐᓐ ᑲᓇᑫ ᐯᔑᒃ ᐊᓯᓐ ᑕᐃᓇᐱᓰ ᑳᑮᐃᔑᑭᑕᐱᐸᓐ, ᐅᓵᒻ ᐋᓃᔥ ᑳᐐᓐ ᑭᑮᓂᓯᑕᐎᓇᓰᒻ ᐊᐲ ᑮᔑᑲᓂᓂᒃ ᑭᔐᒪᓂᑑ ᑫᑮᐱᒫᒋᐃᓀᑭᐸᓐ᙮ 45 ᒋᓴᔅ ᑮᐲᑎᑫ ᐃᐃᒫ ᑭᒋᐊᓇᒥᐁᐎᑲᒥᑯᕽ, ᐁᑮᒫᒌᓵᓵᑭᒋᓂᔕᐙᒡ ᑲᑭᓇ ᑳᑮᐊᑖᐌᐎᑲᒥᑯᑫᓂᒡ᙮ 46 ᒦᔥ ᐅᐅ ᑳᐃᓈᒡ: ᒦ ᓴ ᐁᔑᐲᐃᑳᑌᒃ ᑭᒋᒪᓯᓇᐃᑲᓐ ᑭᔐᒪᓂᑑ ᐁᑮᐃᑭᑐᒡ: ᓂᐙᑳᐃᑲᓐ ᓴ ᑕᐃᔑᓂᑳᑌ ᐊᓇᒥᐁᐙᑳᐃᑲᓐ, ᑮᓇᐙ ᑕᔥ ᐁᐃᔑᓈᑯᑑᔦᒃ ᑖᐱᔥᑰ ᒋᐅᑳᓲᐎᑲᒥᑯᐙᒡ ᐅᒪᑲᑗᔥᑲᒃ᙮ 47 ᑕᓱᑮᔑᒃ ᒋᓴᔅ ᑮᑭᑭᓄᐊᒫᑫ ᑭᒋᐊᓇᒥᐁᐎᑲᒥᑯᕽ᙮ ᐃᐃ ᑕᔥ ᑭᒋᐊᓇᒥᐁᐎᑭᒫᐞ, ᐃᐃ ᑲᔦ ᑳᑭᑭᓄᐊᒫᑫᓂᒡ ᐅᓇᔓᐌᐎᓐ, ᐃᐃ ᑲᔦ ᑳᓃᑳᓃᑕᒪᐙᓂᒡ ᐯᒫᑎᓯᓂᒡ ᐅᑮᑲᑴᓂᓯᑰᐞ᙮ 48 ᑳᐐᓐ ᐅᑮᑭᑫᑕᓰᓂ ᐋᓃᓐ ᑫᑮᐅᒋᓂᓯᑯᐸᓐ ᐋᓃᔥ ᑲᑭᓇ ᐯᒫᑎᓯᓂᒡ ᐅᑮᑭᒋᐌᑕᒥᓂ ᑳᑮᐃᑭᑐᒡ᙮ ᑮᑭᒋᐎᐊᔮᐗᐞ ᐁᑮᐱᓯᑖᑯᒡ ᐋᓃᓐ ᐁᑭᑐᒡ᙮
