1 ᒦᑕᔥ ᑮᐊᓅᑮ ᐹᐃᓬᐊᑦ Pilate ᒋᐃᔑᐎᓂᒥᓐᒡ ᒋᓴᓲᓐ ᒋᐸᐸᔕᔐᐃᑲᓂᐎᓂᒡ᙮ 2 ᔑᒫᑲᓂᔕᒃ ᐃᑕᔥ ᐅᑮᑕᑎᐸᓂᓈᓈᐙᓐ ᑭᒋᐅᑳᐎᒥᓇᑲᔒᐗᑎᑾᓇᓐ, ᐁᑮᐅᒋᐅᔑᑑᐙᒡ ᐸᓯᑴᐱᓱᐙᓄᒀᓐ᙮ ᐅᑮᐱᑖᓄᒀᓀᐋᐙᓐ ᒋᓴᓲᓐ᙮ ᒦᑕᔥ ᑳᐃᔑᐱᒋᑯᓇᔦᐋᐙᒡ ᐁᒪᑲᑌᒥᔅᒀᓂᒃ ᐁᑭᓉᑲᓂᓂᒃ ᑭᒋᐅᑭᒫᕽ ᒋᐃᔑᓈᑯᓯᓂᒡ᙮ 3 ᐅᑮᓈᓈᓯᑲᐙᐙᓐ ᑕᔥ ᐁᑮᐃᓈᐙᒡ: ᑭᒋᐴᔔ ᑮᓐ ᐅᑭᒋᐅᑭᒫᒥᐙᓐ ᒎᐗᒃ! ᐅᑮᐊᔨᓈᐙᓐ᙮ ᐁᑮᐸᐸᓰᑴᑲᓈᒫᐙᒡ ᑲᔦ᙮ 4 ᒦᓇᐙ ᑕᔥ ᐊᐊ ᐹᐃᓬᐊᑦ ᑮᓵᑲᐊᒻ ᐁᑮᑲᓅᓈᒡ ᐃᐃᒫ ᑳᐃᔑᒫᒪᐌᓄᓂᒡ: ᐃᓇᔥᑫ ᓴ, ᒦᓇᐙ ᑭᑲᓵᑭᓰᑕᒪᐎᓂᓂᒻ, ᒋᑭᑫᓂᒣᒃ ᐁᑳ ᐁᒥᑲᒧᐙᓯᐗᒃ ᑫᑰᓐ ᒋᐅᒋᓂᓯᑎᐸᓐ, ᐅᑮᐃᓈᐞ᙮ 5 ᒦᑕᔥ ᑳᐃᔑᓵᑲᐊᕽ ᒋᓴᔅ ᐁᑭᑭᔥᑲᕽ ᐃᐃᐌ ᐅᑳᐎᒥᓇᑭᔒᐙᓄᒀᓐ ᑲᔦ ᑳᒪᑲᑌᒥᔅᒀᓂᒃ ᐁᑭᓉᑲᓂᓂᒃ᙮ ᐊᒦᔥ ᐃᐃᐌ ᑳᐃᑭᑐᒡ ᐹᐃᓬᐊᑦ: ᐃᓇ ᐗᐊ ᐃᓂᓂ! 6 ᐊᐲ ᑕᔥ ᑭᒋᐊᓇᒥᐁᐎᑭᒫᒃ ᑲᔦ ᑲᓇᐌᒋᑫᐎᔑᒫᑲᓂᔕᒃ ᐁᐙᐸᒫᐙᒡ ᒋᓴᓲᓐ, ᑮᔖᑯᐌᐗᒃ: ᐊᑯᓴᑲᐅ ᐋᔑᑌᔮᑎᑯᕽ! ᐊᑯᓴᑲᐅ! ᑮᐃᑭᑐᐗᒃ᙮ ᐹᐃᓬᐊᑦ ᐃᑕᔥ ᑮᐃᑭᑐ: ᑮᓇᐙ ᑯ ᐃᔑᐎᓂᒃ, ᐊᐎᐊᑯᓴᑲᐅᒃ᙮ ᓃᓐ ᐐᓐ ᑳᐐᓐ ᓂᒥᑲᒧᐙᓰᓐ ᑫᐅᒋᑮᔖᑯᓂᑲᓂᐎᒡ ᒋᐅᒋᓂᓯᓐᒡ, ᐅᑮᐃᓈᐞ᙮ 7 ᑮᓇᑴᑕᒨᒃ ᐃᑕᔥ ᐃᑭ ᑳᒫᒪᐌᓄᐙᒡ: ᓃᓇᐎᓐᑦ ᓂᑕᔮᒥᓐ ᐃᐃᐌ ᐅᓇᔓᐌᐎᓐ᙮ ᐃᓇᑌ ᐱᑯ ᒋᓂᓯᓐᒡ, ᐋᓃᔥ ᑭᔐᒪᓂᑑ ᐅᑯᓯᓴᓐ ᑮᐃᔑᓂᑳᓂᑎᓱ, ᐅᑮᐃᓈᐙᓐ᙮ 8 ᐊᐲ ᑕᔥ ᐹᐃᓬᐊᑦ ᑳᓅᑕᕽ ᐅᐅᐌ ᐃᑭᑐᐎᓐ, ᐊᐗᔑᒣ ᑮᑭᒋᓭᑭᓯ᙮ 9 ᒦᓇᐙ ᑮᐲᑎᑫ ᐅᑎᐹᑯᓂᑫᐎᑲᒥᑯᕽ ᐁᑮᑲᓅᓈᒡ ᒋᓴᓲᓐ: ᐋᑎ ᐌᒌᔭᓐ? ᐅᑮᐃᓈᓐ᙮ ᑳᐐᓐ ᑕᔥ ᑫᑰᓐ ᐅᑮᐃᑯᓰᓐ᙮ 10 ᐹᐃᓬᐊᑦ ᐃᑕᔥ ᑮᐃᑭᑐ: ᑳᐐᓐ ᐃᓇ ᑭᐐᑲᓅᔑᓰ? ᑳᐐᓐ ᐃᓇᔥ ᑭᑭᑫᑕᓰᓐ ᒋᑲᔥᑭᑑᔮᓐ ᒋᐸᑭᑎᓂᓈᓐ ᑲᔦ ᒋᑲᔥᑭᑑᔮᓐ ᒋᐊᑯᓴᑲᐅᑰᔭᓐ ᐋᔑᑌᔮᑎᑯᕽ? ᐅᑮᐃᓈᓐ᙮ 11 ᒦᑕᔥ ᑳᐃᔑᓇᑴᑖᑯᒡ: ᑳᐐᓐ ᑭᑖᑲᔥᑭᑑᓰᓐ ᑫᑰᓐ ᒋᑑᑕᐎᔭᓐ, ᒦ ᐁᑕ ᐃᔥᐱᒥᕽ ᐅᒋᒦᓂᑰᔭᓐ᙮ ᒦᑕᔥ ᐅᐅᐌᓂ ᐅᒋ ᑳᑮᐸᑭᑎᓇᒪᐎᒃ ᐊᐊ ᐃᓂᓂ ᒋᑎᐹᑯᓂᑰᔮᓐ, ᓇᐗᒡ ᒦ ᐊᐌᑎ ᐃᓀᑖᑯᓯ ᐁᑭᑭᓯᒡ ᐃᐃ ᒪᒋᑑᑕᒧᐎᓐ, ᐅᑮᐃᑰᓐ ᒋᓴᓲᓐ᙮ 12 ᒦᑕᔥ ᐁᑮᓅᑕᕽ ᐊᐊ ᐹᐃᓬᐊᑦ, ᐅᑖᓇᑮᑲᑴᒥᑳᓐ ᑫᔑᐸᑭᑎᓈᒡ ᒋᓴᓲᓐ᙮ ᒎᐗᒃ ᐃᑕᔥ ᑳᑮᐹᑏᓄᐙᒡ ᑮᔖᑯᐌᐗᒃ: ᑮᔥᐱᓐ ᐸᑭᑎᓇᒡ ᐊᐊ ᐃᓂᓂ ᑳᐐᓐ ᑭᐐᒥᓉᓂᒫᓰ ᒫᐗᒡ ᑭᒋᑯᑭᒫ᙮ ᑲᑭᓇ ᐊᐎᔭ ᑳᐃᑎᓱᒡ ᐐᓐ ᐁᑭᒋᐅᑭᒫᐎᒡ ᐁᐃᑎᓱᒡ, ᐅᑖᓇᐌᓂᒫᓐ ᐃᓂ ᒫᐗᒡ ᑭᒋᐅᑭᒫᓐ᙮ 13 ᐊᐲᔥ ᐊᐊ ᐹᐃᓬᐊᑦ ᑳᓅᑕᕽ ᑳᐃᑭᑐᓂᒡ, ᐅᑮᓵᑭᓯᐋᓐ ᒦᓇᐙ ᒋᓴᓲᓐ᙮ ᐊᒦᔥ ᑳᐃᔑᐅᓇᐱᒡ ᐅᑎᐹᑯᓂᑫᐗᐱᐎᓂᕽ ᐃᐃᒫ ᑳᐊᔮᓂᒃ, ᑳᐊᓯᓃᐙᐱᑲᒃ ᑳᐃᔑᓂᑳᑌᒃ᙮ ᐊᒦ ᐃᐌ ᐄᐸᕒᐆ Hebrew ᑳᐃᔑᑮᔗᒪᑲᒃ, ᑳᐸᑖ Gabbatha᙮ 14 ᒦ ᐃᐌ ᐊᐲ ᑫᑳ ᐁᐋᐱᑕᑮᔑᑲᒃ, ᐁᑮᐃᔑᑮᔑᑲᒃ ᐁᐗᐌᔑᒋᑫᐙᒡ ᐁᐐᐱᒫᒋᐃᑰᐎᐐᑾᑎᕽ᙮ ᒦᔥ ᐅᐌ ᐹᐃᓬᐊᑦ ᐅᑮᐃᓈᐞ ᒎᐗᐞ: ᐗᐊ ᑭᑭᒋᐅᑭᒫᒥᐙ! 15 ᑮᔖᑯᐌᐗᐞ ᐃᑕᔥ: ᐃᑯᒋ ᐌᑎ ᒫᒌᔥ! ᐊᐎᓂᔑ! ᐋᔑᑌᔮᑎᑯᕽ ᒋᐊᑯᓴᑲᐗᒡ! ᐹᐃᓬᐊᑦ ᐃᑕᔥ ᑮᐃᑭᑐ: ᓂᑲᐊᑯᓴᑲᐙ ᓇ ᑭᑭᒋᐅᑭᒫᒥᐙ? ᑭᒋᐊᓇᒥᐁᐎᑭᒫᒃ ᐃᑕᔥ ᐅᑮᓇᑴᑕᐙᐙᓐ: ᑳᐐᓐ ᐊᐎᔭ ᓂᑭᒋᐅᑭᒫᒥᓈᓐ ᓂᑕᔮᐙᓯᐙᓈᓐ, ᒦ ᐁᑕ ᒫᐗᒡ ᑭᒋᐅᑭᒫ᙮ 16 ᒦᑕᔥ ᑫᑲᐲ ᐹᐃᓬᐊᑦ ᑳᐃᔑᐸᑭᑎᓇᒪᐙᒡ ᒋᐊᑯᓴᑲᐙᓂᒡ ᒋᓴᓲᓐ᙮ ᔑᒫᑲᓂᔕᒃ ᐃᑕᔥ ᐅᑮᒫᒌᓈᐙᓐ ᒋᓴᓲᓐ, 17 ᐐᓐ ᐁᑮᐱᒥᓂᑫᑕᒫᓱᓂᒡ ᐅᑖᔑᑌᔮᑎᑯᒥᓂ, ᐁᑮᐊᓂᓵᑲᐊᒥᓂᒡ ᐆᑌᓈᕽ, ᐲᓂᔥ ᐁᑮᐊᓂᐃᔖᒡ ᐌᑎ ᐅᑎᒀᓂᑫᑲᓂᑳᕽ ᑳᐃᔑᓂᑳᑌᓂᒃ ᐱᑾᑎᓈ, ᒦ ᐃᐌ ᒎᐗᒃ ᑳᐃᔑᑮᔗᐙᒡ ᑳᓬᑲᑖ Golgotha᙮ 18 ᐊᒦᑕᔥ ᐌᑎ ᑳᑕᔑᐊᑯᓴᑲᐙᐙᒡ ᒋᓴᓲᓐ ᐋᔑᑌᔮᑎᑯᕽ᙮ ᑕᑯ ᐊᔑᒡ ᓃᔑᓐ ᐃᓂᓂᐗᐞ ᐅᑮᓴᑲᐙᐙᐞ᙮ ᑴᑴᒃ ᐃᓇᑫ ᑮᐊᑰᒋᓅᐞ ᑳᐃᔑᐸᑕᑭᓱᓂᒡ ᐋᔑᑌᔮᑎᑰᐞ᙮ ᒋᓴᔅ ᐃᑕᔥ ᓇᓴᐗᔭᐄ ᐃᒫ ᑮᐊᑰᒋᓐ᙮ 19 ᐹᐃᓬᐊᑦ Pilate ᑕᔥ ᐅᑮᐅᔑᐲᐋᓐ ᑭᑭᓇᐙᐸᒋᑲᓐ᙮ ᑮᐊᓅᑮ ᒋᐊᒋᑳᑌᓂᒃ ᐃᒫ ᐋᔑᑌᔮᑎᑯᕽ᙮ ᒦᔥ ᐃᐌ ᑳᐃᔑᐲᐃᑳᑌᒃ: ᒋᓴᔅ ᓈᓴᕒᐃᑎᕽ Nazareth ᐌᒌᒡ, ᒎᐗᒃ ᐅᑭᒋᐅᑭᒫᒥᐙᓐ᙮ 20 ᐅᐅ ᑭᑭᓇᐙᐸᒋᑲᓐ ᐅᑮᐊᓇᒥᑑᓈᐙ ᓃᐱᐗᐞ ᐊᐎᔭ, ᐋᓃᔥ ᐯᔓ ᐃᒫ ᐆᑌᓈᕽ ᑮᐊᔮ ᒋᓴᔅ ᐁᑮᑕᔑᐊᑯᓴᑲᐃᑲᓂᐎᒡ᙮ ᒦᑕᔥ ᐃᐌ ᓂᔀᔭᒃ ᐁᐃᔑᑮᔗᕽ ᑮᐃᔑᐲᐃᑳᑌ ᑭᑭᓇᐙᐸᒋᑲᓐ, ᐄᐸᕒᐆ Hebrew, ᓬᐋᑎᓐ Latin, ᑲᕒᐄᒃ Greek ᑳᐊᔨᔑᑮᔗᕽ ᑮᐃᔑᐲᐃᑳᑌ᙮ 21 ᐅᑭᒋᐊᓇᒥᐁᐎᑭᒫᒥᐙᐞ ᐃᑕᔥ ᐃᑭ ᒎᐗᒃ ᐅᑮᑲᓅᓈᓂ ᐹᐃᓬᐊᑑᓐ: ᑫᑯ ᐐᓐ ᐃᔑᐲᐊᑫᓐ, ᒎᐗᒃ ᐅᑭᒋᐅᑭᒫᒥᐙᓐ! ᐅᐌ ᐐᓐ ᐃᔑᐲᐊᓐ: ᐗᐊ ᑳᐃᑭᑐᒡ, ᓃᓐ ᒎᐗᒃ ᐅᑭᒋᐅᑭᒫᒥᐙᓐ, ᒦ ᐃᐌ ᐃᔑᐲᐊᓐ, ᐅᑮᐃᑰᐞ᙮ 22 ᐹᐃᓬᐊᑦ ᑕᔥ ᐅᑮᓇᑴᑕᐙᐞ: ᐃᐃᐌ ᑳᑮᐅᔑᐲᐊᒫᓐ, ᐋᓃᔥ ᐃᓈ ᓂᑮᐅᔑᐲᐋᓐ, ᐅᑮᐃᓈᐞ᙮ 23 ᔑᒫᑲᓂᔕᒃ ᐃᑕᔥ ᐊᐲ ᑳᐃᔥᒀᐊᑯᓴᑲᐙᐙᒡ ᒋᓴᓲᓐ, ᐅᑮᐅᑖᐱᓈᓈᐙᓐ ᐃᓂ ᒋᓴᓲᓐ ᐅᑭᑭᔥᑭᑲᓂᓂ ᐃᒫ ᑳᔭᑌᓂᑭᓐ᙮ ᐅᑮᓃᐎᑑᓈᐙᓐ ᑕᔥ ᑌᑕᒃ ᐯᐸᑮ ᒋᐊᔮᐙᒡ ᐃᑭ ᔑᒫᑲᓂᔕᒃ ᐁᑮᓃᐎᐙᒡ᙮ ᑕᑯᔥ ᑲᔦ ᑮᐊᔮᓂ ᑳᑮᓈᐱᔥᑲᒥᓂᒡ᙮ ᒥᒋᐯᔑᑾᓐ ᑮᐅᔑᒋᑳᑌ ᒥᓯᐌ ᐲᓂᔥ ᒥᔕᑳᒣᔩᒃ᙮ ᑳᐐᓐ ᑮᓃᔓᒀᑌᓯᓅᓐ᙮ 24 ᒦ ᐃᐌ ᑳᐃᔑᑲᓅᓂᑎᐙᒡ ᔑᒫᑲᓂᔕᒃ: ᑳᐐᓐ ᑭᑲᐲᑯᐱᑑᓰᒥᓐ, ᒥᒋᔑᓇᐎᐌᐱᓂᑫᑖ, ᐊᐌᓀᓐ ᑫᐊᔮᒡ, ᑮᐃᑭᑐᐗᒃ᙮ ᒦ ᐃᐌ ᑳᐃᔑᐌᐸᒃ ᒋᑎᐱᓭᒃ ᐃᐃ ᑭᒋᐅᔑᐲᐃᑫᐎᓐ ᑳᐃᑭᑑᒪᑲᒃ: ᑮᓀᓈᐎᓇᒫᑎᐗᒃ ᐃᓂ ᓂᑭᑭᔥᑭᑲᓇᓐ ᑲᔦ ᑳᑮᓈᐱᔥᑲᒫᓐ ᑮᐅᒋᔑᓇᐎᐌᐱᓂᑫᐗᒃ, ᐃᑭᑑᒪᑲᓐ᙮ ᒦ ᐃᐌ ᑌᐺ ᔑᒫᑲᓂᔕᒃ ᑮᐃᔑᒋᑫᐗᒃ᙮ 25 ᐃᒫ ᑕᔥ ᐅᑖᔑᑌᔮᑎᑯᒥᕽ ᒋᓴᔅ, ᒌᑲᔭᐄ ᑮᓃᐸᐎᐗᓐ ᐅᒫᒫᓐ, ᑲᔦ ᐅᒫᒫᓐ ᐐᒋᑴᓂ ᑮᑕᑯᓃᐸᐎᐗᓐ᙮ ᔑᑾ ᒣᕒᐃ Mary ᑲᓬᐆᐸᔅ Clopas ᐐᐗᓐ, ᑲᔦ ᑯᑕᒃ ᒣᕒᐃ ᒫᑲᑕᓬᐋᕽ Magdala ᑳᐅᒌᒡ, ᑮᐊᔑᒋᑳᐸᐎᐗᒃ᙮ 26 ᒋᓴᔅ ᐅᑮᐙᐸᒫᓐ ᐃᓂ ᐅᒫᒫᓐ ᑲᔦ ᐃᓂ ᐯᔑᒃ ᐅᑭᑭᓄᐊᒪᐙᑲᓇᓐ ᒫᐗᒡ ᑳᓵᑭᐋᒡ ᐁᒌᑭᑳᐸᐎᓂᒡ ᐃᐃᒫ᙮ ᒦᑕᔥ ᑳᐃᔑᑲᓅᓈᒡ ᐃᓂ ᐅᒫᒫᓐ: ᓂᒫᒫ! ᐅᑮᐃᓈᓐ, ᑭᑯᓯᔅ ᐗᐊ᙮ 27 ᔑᑾ ᐅᑮᑲᓅᓈᓐ ᐅᑭᑭᓄᐊᒪᐙᑲᓇᓐ: ᐗᐊ ᑭᒫᒫ, ᐅᑮᐃᓈᓐ᙮ ᒦᑕᔥ ᐃᒫ ᐊᐸᓂᑯ ᐗᐊ ᑭᑭᓄᐊᒪᐙᑲᓐ ᐅᑮᐃᔑᐎᓈᓐ ᐐᓐ ᑳᐃᔑᑖᒡ ᐁᑮᑕᔑᑲᓇᐌᓂᒫᒡ ᐃᓂ ᐅᒫᒫᓂ ᒋᓴᓲᓐ᙮ 28 ᒋᓴᔅ ᑕᔥ ᐅᑮᑭᑫᑖᓐ ᐋᔕ ᑲᑭᓇ ᑫᑰᓐ ᐁᑮᔑᒋᑳᑌᓂᒃ, ᒦᔥ ᒋᑎᐱᓭᒃ ᐃᐃ ᑭᒋᐅᔑᐲᐃᑫᐎᓐ ᑮᐅᒋᐃᑭᑐ: ᓂᓅᑌᐐᒥᓂᑴ᙮ 29 ᑮᐊᑌ ᐃᒫ ᐅᓈᑲᓐ ᐁᒨᔥᑭᓀᐲᒃ ᑳᐌᑕᑭᑌᒃ ᔔᒥᓈᐳ᙮ ᐃᔅᑲᐃᐹᓐ ᐃᑕᔥ ᑮᒉᑭᐲᓂᑳᑌ ᔔᒥᓈᐳᕽ, ᒦᑕᔥ ᐅᑮᐊᑑᓈᐙᓐ ᐋᓂᑲᐗᔥᒀᑎᑯᕽ, ᐃᓴᑉ hyssop ᐁᐃᔑᓂᑳᑌᒃ, ᐁᑮᓃᒫᑾᐊᒪᐙᐙᒡ ᐃᑕᔥ ᐅᑑᓂᓃᕽ ᒋᓴᓲᓐ ᐁᒥᓇᐋᐙᒡ᙮ 30 ᐊᐲ ᑕᔥ ᑳᑮᒥᓂᑴᒡ, ᒦ ᐃᐌ ᑳᐃᑭᑐᒡ: ᐋᔕ ᑲᑭᓇ ᑮᔑᓭ! ᑮᐊᒋᑕᐎᑴᓂ ᑕᔥ, ᐊᒦ ᑯ ᐁᑮᓂᐳᒡ᙮ 31 ᒎᐗᒃ ᑳᓃᑳᓂᓯᐙᒡ ᐅᑮᑲᑴᒋᒫᐙᓐ ᐹᐃᓬᐊᑑᓐ Pilate ᒋᐴᑯᑳᑌᑲᓈᒥᒥᒡ ᐃᐃ ᑳᑮᐊᑯᓴᑲᐃᑲᓂᐎᓂᒡ, ᑲᔦ ᒋᐅᒋᐅᑖᐱᓂᑳᑌᓂᑭᓐ ᐋᔑᑌᔮᑎᑯᕽ ᐐᔭᐎᓂ᙮ ᒦ ᐅᐌ ᑳᑮᐅᒋᑲᑴᒋᒫᐙᒡ, ᐁᑮᐸᑴᔑᑲᓂᑮᔑᑲᒃ ᐁᑮᐃᔑᑮᔑᑲᒃ ᐁᑮᐗᐌᔑᒋᑫᐙᒡ ᐁᐐᐊᓉᐲᐎᑮᔑᑲᓂᓂᒃ᙮ ᐋᓃᔥ ᑳᐐᓐ ᑮᐃᓀᑕᓰᐗᒃ ᑫᔮᐱ ᒋᐊᑰᑌᓂᑭᓐ ᐁᐐᐊᓉᐲᐎᑮᔑᑲᓂᓂᒃ, ᐋᓃᔥ ᐋᐱᒋ ᑮᑭᒋᐃᓀᑖᑾᓐ ᐃᐃ ᑳᐐᐊᓉᐲᐎᑮᔑᑲᒃ᙮ 32 ᒦᑕᔥ ᐃᐃᐌ ᑳᑮᐅᒋᐃᔖᐙᒡ ᔑᒫᑲᓂᔕᒃ ᐁᑮᐊᐎᐴᑯᑳᑌᐙᐙᒡ ᐃᓂ ᓂᑕᒻ ᑲᔦ ᐃᓂ ᑯᑕᒃ ᑳᑮᑕᑯ ᐊᑯᓴᑲᐅᑰᒫᓂᒡ ᒋᓴᓲᓐ᙮ 33 ᐊᐲ ᑕᔥ ᐐᓐ ᐌᑎᓵᐙᒡ ᒋᓴᓲᓐ ᐅᑮᐙᐸᒫᐙᓐ ᐋᔕ ᐁᑮᓂᐳᓂᒡ᙮ ᒦᐃ ᑳᐐᓐ ᐅᑮᐴᑯᑳᑌᐙᓯᐙᐙᓐ᙮ 34 ᐯᔑᒃ ᐃᑕᔥ ᐃᑭ ᔑᒫᑲᓂᔕᒃ, ᐸᔑᐸᐃᑲᓐ ᐅᑮᐸᔑᐸᐙᓐ ᒋᓴᓲᓐ ᐅᐱᒣᓇᐤ᙮ ᔐᒫᒃ ᑮᐅᒋᓵᑭᒋᒋᐗᓐ ᓂᐱ ᑲᔦ ᒥᔅᑶ᙮ 35 ᐊᐊ ᑕᔥ ᑳᑮᐙᐸᑕᕽ ᐅᑮᑎᐹᑐᑖᓐ, ᑫᑮᓇᐙ ᑕᔥ ᒋᐅᒋᐅᑌᐺᑕᒧᐎᓂᔦᒃ᙮ ᑌᐺᒪᑲᓂᓂ ᐅᑎᐹᒋᒧᐎᓐ᙮ ᐅᑭᑫᑖᓐ ᐃᑯ ᐁᑌᐺᒡ᙮ 36 ᐅᐅ ᑮᐅᒋᐃᔑᒋᑫᐋ ᒋᓴᔅ ᒋᑎᐱᓭᒃ ᐃᐃᐌ ᑭᒋᐅᔑᐲᐃᑫᐎᓐ ᑳᐃᔑᐲᐃᑳᑌᒃ: ᑳᐐᓐ ᐊᐙᒡ ᐯᔑᒃ ᐅᑲᓐ ᒋᐲᑯᓂᑳᑌᓂᒃ, ᐃᑭᑑᒪᑲᓐ᙮ 37 ᒦᓇᐙ ᑕᔥ ᑯᑕᒃ ᑭᒋᐅᔑᐲᐃᑫᐎᓐ ᐃᑭᑑᒪᑲᓐ: ᐅᑲᑲᓇᐙᐸᒫᐙᓐ ᐃᓂ ᑳᑮᐸᔑᐸᐙᐙᒡ᙮ 38 ᑲᑭᓇ ᑳᐃᔥᒀᐃᔑᓭᒃ ᐅᐅ, ᑮᐃᔖ ᒎᓴᑉ Joseph, ᒦ ᐌᑎ ᐁᕒᐊᒪᑏᔭ Arimathea ᐆᑌᓈᕽ ᑳᑮᐅᒌᒡ᙮ ᒦᐗᓂᓂ ᐯᔑᒃ ᒋᓴᔅ ᑳᑮᐱᒥᓂᔕᐅᑯᒡ᙮ ᑮᒨᒡ ᐃᑕᔥ ᑮᐱᒥᓂᔕᐃᑫ ᒎᓴᑉ, ᐁᑮᑯᓵᒡ ᐅᓃᑳᓂᓰᐎ ᒎᐗᐞ᙮ ᒦ ᐗᐊ ᐅᑮᐊᐎᑲᑴᒋᒫᓐ ᐹᐃᓬᐊᑑᓐ Pilate ᐁᐐᐅᑖᐱᓇᕽ ᐐᔭᐎᓂ ᒋᓴᓲᓐ᙮ ᐁᐊᐞ ᑭᑲᐅᑖᐱᓈᓐ, ᐅᑮᐃᑰᓐ᙮ ᒦᑕᔥ ᑳᐃᔑᐃᔖᒡ ᒎᓴᑉ ᐁᑮᐊᐎᐅᑖᐱᓇᕽ ᐃᐃ ᐐᔭᐎᓂ ᐁᑮᐊᓂᒫᒌᑑᒡ᙮ 39 ᑮᐲᔖ ᑫᐐᓐ ᓂᑲᑏᒪᔅ Nicodemus, ᐊᐊ ᓂᑕᒻ ᐁᑎᐱᑲᓂᓂᒃ ᑳᑮᐊᑕᐙᐸᒫᒡ ᒋᓴᓲᓐ᙮ ᐅᑮᐲᑑᓐ ᑳᒥᓄᒫᑾᓂᓂᑭᓐ᙮ ᒪᕒ myrrh, ᐋᓬᐆᔅ aloes ᑳᑭᓂᑲᐎᓂᑳᑌᑭᓐ ᑮᑎᓄᐗᓐ, ᒫᑭᔖ ᓂᑯᑣᒃ ᑕᓱᑯᓯᑾᓐ ᒥᓂᒃ᙮ 40 ᒦᑕᔥ ᐅᑯ ᓃᔑᓐ ᐅᑮᐅᑖᐱᓈᓈᐙ ᐐᔭᐎᓂ ᒋᓴᓲᓐ, ᐁᑮᑎᑎᐯᔩᑭᓇᒧᐙᒡ ᐙᐱᔥᑮᑭᓐ, ᑕᑯ ᐃ ᑳᒥᓄᒫᑾᓂᓂᒃ ᐁᑮᒪᔥᑭᑮᐎᑑᐙᒡ᙮ ᒦ ᐃ ᑳᐃᔑᒋᑫᐙᒡ ᒎᐗᒃ ᐁᓇᐃᓇᒧᐙᒡ ᒦᔭᐤ᙮ 41 ᐃᐃᒫ ᑳᑮᑕᔑᓂᓯᓐᒡ ᒋᓴᔅ, ᐯᔓ ᐃᒫ ᑮᐊᔮ ᑭᑎᑫᐎᓐ᙮ ᐃᐃᒫᔥ ᑭᑎᑫᐎᓂᕽ ᐐᐹᐱᑯᑳᓐ ᑎᓄ ᑳᔑᓇᐃᓂᑎᕽ ᑮᐊᔮ, ᐁᑳ ᐐᑳ ᒪᔑ ᐊᐎᔭ ᐃᒫ ᐁᑮᓇᐃᓈᓯᐎᓐᒡ᙮ 42 ᒦ ᐃᒫ ᑳᐃᔑᓇᐃᓯᑑᐙᒡ ᒋᓴᓲᓐ ᐐᔭᐎᓂ, ᐋᓃᔥ ᐋᔕ ᑮᐃᔑᑮᔑᑲᓐ ᒋᑆ ᐊᓉᐲᐎᑮᔑᑲᒃ, ᑲᔦ ᑮᐯᔓᐗᓐ ᐃᐃ ᑳᔑᓇᐃᓂᑎᕽ ᐃᐃᒫ ᑳᑮᑕᔑᓂᐳᓂᒡ᙮
