Kalehshiyanak 1

1ᓃᓐ ᑆᓬ Paul ᑳᐅᔑᐲᐊᒪᐎᓇᑰᒃ᙮ ᑳᐐᓐ ᐃᓂᓂ ᓂᑮᑲᓅᓂᑯᓰ, ᑳᐐᓐ ᑲᔦ ᐃᓂᓃᑳᕽ ᓂᑮᐅᒋ​ᐃᓀᑖᑯᓯᓰ ᐃᔑᓂᔕᐙᑲᓐ ᒋᑎᓄᐎᔮᓐ᙮ ᑭᔐᒪᓂᑑ ᐅᔕ, ᐃᓂ ᑲᔦ ᐅᑯᓯᓴᓐ ᒋᓴᔅ Xᑕᓐ ᑳᑮᑮᐌᐱᒫᑎᓯᐋᒡ ᑳᑮᓂᐳᓂᐸᓐ, ᓂᑮᑲᓅᓂᑰᒃ᙮ 2ᑲᑭᓇ ᓴ ᓃᒋᐅᑌᐺᑕᒨᒃ ᐅᐅᒫ ᑳᐊᔮᐙᒡ ᑭᑕᑯᐴᔔᐃᑯᐙᒃ᙮ ᑮᓇᐙ ᐅᑌᐺᑕᒨᒃ ᐌᑎ ᑳᐊᔮᔦᒃ ᑲᓬᐁᔑᔭ Galatia ᐊᑮᕽ ᐯᐸᑳᓐ ᑳᐃᔑᒫᒫᐗᒋᐃᑎᔦᒃ ᑭᑑᔑᐲᐊᒪᐎᓂᓂᒻ᙮ 3ᑕᑲ ᑭᔐᒪᓂᑑ ᑳᐅᔫᓯᔭᕽ, ᑳᑎᐯᒋᑫᒡ ᑲᔦ ᒋᓴᔅ X, ᑭᑲᒦᓂᑯᐙ ᑭᔐᐙᑎᓯᐎᓐ, ᐱᓵᓀᑕᒧᐎᓐ ᑲᔦ᙮ 4X ᑕᔥ ᐁᑮᓇᐃᑕᐙᒡ ᑭᑭᔐᒪᓂᑑᒥᓈᓂᓐ ᑳᐅᔫᓯᒥᒪᕽ ᑳᑮᐅᒋᐸᑭᑎᓇᕽ ᐅᐱᒫᑎᓯᐎᓐ ᑭᒪᒋᑑᑕᒧᐎᓂᓈᓂᓐ ᑮᓇᐎᓐᑦ ᐅᒋ ᒋᔖᐾᐗᕽ ᐅᐅᒫ ᑳᐃᔑᒪᒋᓈᑾᓂᓂᒃ ᐅᐅ ᓅᑯᒻ ᑳᐱᒥ​ᐃᔑᐌᐸᒃ ᐊᑭ᙮ 5ᑕᑲ ᑭᔐᒪᓂᑑ ᑕᑭᒋ​ᐃᓀᑖᑯᓯ ᐊᐸᓀ ᐱᔑᔑᒃ᙮ ᐁᒣᓐ! 6ᐋᐱᒋ ᓴ ᑭᑯᔥᑯᐎᔑᒻ ᐃᐃ ᑳᑮᐃᔑᒋᑫᔦᒃ! ᐋᐱᒋ ᐐᐸ ᐁᓇᑲᓀᒃ ᐊᐊ ᑭᔐᒪᓂᑑ ᑳᑮᑲᓅᓂᓀᒃ ᐃᐃᒫ Xᑕᓐ ᑳᐃᔑᑭᔐᐙᑎᓯᓂᒡ, ᐸᑳᓐ ᑕᔥ ᒥᓍᒋᒧᐎᓐ ᐁᐅᑖᐱᓇᒣᒃ! 7ᑫᑫᑦ ᓴ, ᑳᐐᓐ ᑯᑕᒃ ᒥᓍᒋᒧᐎᓐ ᐊᔮᓯᓅᓐ! ᑭᐐᑕᒪᐎᓂᓂᒻ ᑕᔥ ᐁᐊᔮᐙᒡ ᐯᒫᑎᓯᐙᒡ ᐁᑲᑴᐗᓂᔥᑴᐃᓀᒀ, ᐁᑲᑴᐋᒋᑑᐙᒡ ᑲᔦ ᐃᐃᐌᓂ Xᑕᓐ ᐅᒥᓍᒋᒧᐎᓂᓂ! 8ᑮᔥᐱᓐ ᑕᔥ ᓃᓇᐎᓐᑦ ᐸᑳᓐ ᐃᓉᑑᔮᕽ ᑯᒫ ᑲᔦ ᒥᓴᐙ ᑯ ᐁᒐᓬ ᑭᒋᑮᔑᑯᕽ ᐱᐅᒌᒡ ᐸᑳᓐ ᑕᔥ ᐃᓉᑑᒡ ᐃᐃ ᒥᓍᒋᒧᐎᓂᓂ ᐋᔕ ᑳᑮᐐᑕᒫᑰᔦᒃ, ᑕᑲ ᑕᓂᔑᐗᓈᑎᓯᐗᒃ ᓂᑲᐃᑰᒥᓐ᙮ 9ᐋᔕ ᑕᔥ ᐅᐅ ᐁᑮᐃᑭᑐᔮᓐ, ᒦᓇᐙ ᑕᔥ ᓂᐐᐃᑭᑦ: ᑮᔥᐱᓐ ᓴ ᐊᐎᔭ ᑲᑮᑭᒥᓀᒃ ᐸᑳᓐ ᑕᔥ ᐃᓉᑑᒡ ᐃᐃ ᐋᔕ ᑳᑮᐅᑖᐱᓇᒣᒃ ᒥᓍᒋᒧᐎᓂᓂ, ᑕᑲ ᑕᐃᓇᑭᒫ ᒋᓂᔑᐗᓈᑎᓯᒡ᙮ 10ᒦ ᓇ ᐃ ᐁᓂᑖᑯᓯᔮᓐ ᑖᐱᔥᑰ ᐁᐊᑕᐌᓂᒪᒃ ᐃᓂᓂ ᒋᒥᓍᐸᒥᒡ? ᑳᐐᓐ! ᑭᔐᒪᓂᑑ ᐅᔕ ᓂᓇᑕᐌᓂᒫ ᒋᒥᓍᐸᒥᒡ᙮ ᒦ ᓇ ᐃ ᐁᔑᓈᑯᓯᔭᓐ ᐁᑲᑴᐃᔑᒋᑫᔮᓐ ᐃᓂᓂ ᒋᒥᓍᐸᒥᒡ? ᑮᔥᐱᓐ ᓴ ᐃ ᐃᔑᒋᑫᔮᐹᓐ, ᑳᐐᓐ ᐄᓴᓐ X ᓂᑖᐊᓄᑮᑕᐙᓰ᙮ 11ᓃᑕᓇᒥᐋᒃ! ᑭᐐᑕᒪᐎᓂᓂᒻ ᑕᔥ, ᐃᐃ ᓴ ᒥᓍᒋᒧᐎᓐ ᑳᑲᑮᒀᑕᒫᓐ ᑳᐐᓐ ᐃᓂᓃᑳᕽ ᑮᐅᒌᓯᓅᓐ᙮ 12ᑳᐐᓐ ᑲᔦ ᐃᓂᓃᑳᕽ ᓂᑮᐅᑎᓇᓰᓐ, ᑳᐐᓐ ᑲᔦ ᐊᐎᔭ ᐃᓂᓂ ᓂᑮᑭᑭᓄᐊᒫᑯᓰ᙮ ᒋᓴᔅ X ᐅᔕ ᐐᓐ ᐃᑯ ᓂᑮᐙᐸᑕᐃᒃ᙮ 13ᐋᔕ ᐄᑐᒃ ᑭᑮᓅᑖᒻ ᐋᓃᓐ ᑳᐃᔑᐱᒫᑎᓯᔮᓐ, ᐋᐱᒋ ᐌᐌᓂ ᐁᑮᐱᒥᓂᔕᐊᒫᓐ ᐃᐃ ᒎᐎ ᐊᓇᒥᐁᒋᑫᐎᓐ᙮ ᐋᐱᒋ ᑲᔦ ᐁᑮᒪᓈᒋᐋᓯᐗᒀ ᐁᑮᑲᒀᑕᑭᐊᒀ ᐅᑌᐺᑕᒨᒃ ᑳᐃᔑᐊᔫᑯᐊᔮᐙᒡ ᑳᑎᐯᓂᒥᑯᐙᒡ ᑭᔐᒪᓂᑑᓐ, ᐁᑮᑲᑴᓂᔑᐗᓈᒋᐊᒀ ᑲᔦ᙮ 14ᐃᑭ ᑲᔦ ᓃᒋ​ᒎᐗᒃ ᑳᑮᐐᒋᐊᐲᑖᑎᓰᒪᒀ, ᓇᐗᒡ ᓃᓐ ᐊᐗᔑᒣ ᓂᑮᐃᔑᒋᑫ ᐁᑮᑑᑕᒫᓐ ᐃᐃ ᒎᐎ ᐊᓇᒥᐁᒋᑫᐎᓐ᙮ ᓇᐗᒡ ᓃᓐ ᑲᔦ ᓂᑮᑭᒋ​ᐃᓀᑖᓇᓐ ᐃᓂ ᑳᑮᐃᔑᑣᐙᒡ ᐃᑭ ᒣᐎᔕ ᑳᑮᐱᒫᑎᓯᐙᒡ᙮ 15ᑭᔐᒪᓂᑑ ᑕᔥ ᐅᑭᔐᐙᑎᓯᐎᓂᕽ ᓂᑮᐅᒋᐅᓀᓂᒥᒃ ᒋᑆ ᓂᑖᐎᑭᔮᓐ, ᐅᑭᔐᐙᑎᓯᐎᓂᕽ ᑲᔦ ᓂᑮᐅᒋᑲᓅᓂᒃ ᒋᐊᓄᑮᑕᐗᒃ, ᐁᑮᐃᓀᑕᕽ ᑕᔥ ᑲᔦ ᓂᐱᒫᑎᓯᐎᓂᕽ ᒋᐙᐸᒥᒥᓐᒡ ᐃᓂ ᐅᑯᓯᓴᓐ, 16ᐁᑮᐃᓀᑕᕽ ᑲᔦ ᒋᐐᑕᒪᐎᒪᒃ ᐃᐃ ᐁᑳ ᑳᒎᐎᐎᓯᓂᒃ ᒋᑕᔑᑕᒪᐎᒪᒃ ᐃᐃ ᒥᓍᒋᒧᐎᓐ, ᒋᑕᔑᒥᒪᒃ ᐃᓂ ᑭᔐᒪᓂᑑ ᐅᑯᓯᓴᓐ᙮ ᐊᐲ ᑕᔥ ᑳᑮᐙᐸᒥᒪᒃ ᑳᐐᓐ ᐊᐎᔭ ᓂᑮᓈᓯᑲᐙᓰ ᒋᐐᑕᒪᐎᒡ ᐋᓃᓐ ᑫᐃᔑᒋᑫᔮᓐ᙮ 17ᑳᐐᓐ ᑲᔦ ᒉᕒᐆᓴᓬᐊᒥᕽ Jerusalem ᓂᑮᐃᔖᓰ ᒋᐊᑕᐙᐸᒪᒀ ᐃᑭ ᐃᔑᓂᔕᐙᑲᓇᒃ ᐋᔕ ᒣᐎᔕ ᑳᑮᐱᐅᒋ​ᐃᓇᓄᑮᐙᒡ᙮ ᑕᑾᒡ ᑕᔥ ᐱᑾᑕᑲᒥᒃ ᐊᕒᐁᐱᔭ Arabia ᐊᑮᕽ ᑳᐃᔑᓂᑳᑌᒃ ᓂᑮᐃᔖ᙮ ᒦᑕᔥ ᑳᐃᔑᑮᐌᐃᔖᔮᓐ ᒦᓇᐙ ᑎᒫᔅᑲᔅ Damascus ᐆᑌᓈᕽ ᐁᑮᐃᔖᔮᓐ᙮ 18ᐹᓂᒫ ᑕᔥ ᓂᓱᐱᐴᓐ 3 ᐁᑮᐃᔑᓭᒃ ᒉᕒᐆᓴᓬᐊᒥᕽ ᓂᑮᐃᔖ, ᐁᑮᐊᑕᐙᐸᒪᒃ ᐲᑕᕒ Peter ᐁᐐᑭᑫᓂᒪᒃ᙮ ᒥᑖᔑᓈᓄᑮᔑᒃ 15 ᑕᔥ ᓂᑮᐐᒋᐊᔮᒫ᙮ 19ᑳᐐᓐ ᑕᔥ ᑯᑕᒃ ᐃᔑᓂᔕᐙᑲᓇᒃ ᓂᑮᐙᐸᒫᓰᒃ, ᒦ ᐁᑕ ᑯ ᒌᒥᔅ James ᑳᑎᐯᒋᑫᒡ ᐐᒋᑭᐌᔭᓐ ᑳᐙᐸᒪᒃ᙮ 20ᑌᐺ ᐅᔕ ᐅᐅ ᑳᐃᔑᐲᐊᒪᐎᓇᑰᒃ᙮ ᑭᔐᒪᓂᑑ ᓂᑭᑫᓂᒥᒃ ᐁᑮᐗᓂᒧᓯᐙᓐ᙮ 21ᓈᓈᑫ ᑕᔥ ᐌᑎ ᓂᑮᐊᓂ​ᐃᔖ ᓰᕒᐃᔭ Syria ᐊᑮᕽ ᔑᑾ ᓯᓬᐃᔑᔭ Cilicia ᐊᑮᕽ᙮ 22ᑳᐐᓐ ᑕᔥ ᐌᐌᓂ ᐃᐃ ᐊᐲ ᓂᑮᑭᑫᓂᒥᑯᓰᒃ ᑳᑌᐺᑕᐙᐙᒡ Xᑕᓐ ᐌᑎ ᒎᑏᔮᑳᕽ Judea ᐯᐸᑳᓐ ᑳᐃᔑᐊᔫᑸᓄᐙᒡ᙮ 23ᐃᐃᒫ ᑕᔥ ᐁᑕ ᑳᑮᐃᓈᒋᒥᑰᐗᒃ ᓂᑮᐅᒋᑭᑫᓂᒥᑰᒃ᙮ ᒦᑕᔥ ᐅᐅ ᑳᑮᐃᓈᒋᒥᑰᔮᓐ: ᐊᐊ ᓴ ᐃᓂᓂ ᑳᑮᑲᒀᑕᑭᐃᓇᕽ, ᓅᑯᒻ ᐅᐸᐹᑕᔑᑖᓐ ᐃᐃ ᑌᐺᑕᒧᐎᓂᓂ ᑳᑮᑲᑴᓂᔑᐗᓈᒋᑑᐸᓐ᙮ 24ᒦᑕᔥ ᐃᐃᒫ ᑳᐃᔑᒦᑴᒋᐌᓂᒫᐙᒡ ᑭᔐᒪᓂᑑᓐ ᐃᐃ ᑳᑮᑑᑕᐎᒥᒡ ᐃᐃᒫ ᓂᐱᒫᑎᓯᐎᓂᕽ᙮

will be added

X\