Kalaahshiyanak 4

1ᑮᓇᐙ ᑳᐅᑭᒫᐎᔦᒃ, ᑾᔭᒃ ᑑᑕᐎᑾᒃ, ᐌᐌᓂ ᑯ ᑲᔦ ᑑᑕᐎᑾᒃ ᐃᑭ ᑳᐸᒦᑕᐎᓀᒀ ᑳᑎᐯᓂᒣᒀ᙮ ᐃᔑᒫᒥᑲᐎᒃ ᑫᑮᓇᐙ ᐁᐊᔮᒡ ᑭᑑᑭᒫᒥᐙ ᑭᒋᑮᔑᑯᕽ᙮ 2ᑫᑯ ᐸᑭᒌᑫᒃ ᒋᐊᓇᒥᐁᑕᐌᒃ ᑭᔐᒪᓂᑑ, ᓇᐋᓯᒃ ᑲᔦ ᒣᒀ ᐁᐊᓇᒥᐋᔦᒃ, ᐁᒦᑴᒋᐌᓂᒣᒃ ᑲᔦ ᑭᔐᒪᓂᑑ᙮ 3ᒣᒀ ᑕᔥ ᐁᐊᓇᒥᐋᔦᒃ, ᐊᓇᒥᐁᑕᒪᐎᔑᓈᒻ ᑫᓃᓇᐎᓐᑦ, ᑭᔐᒪᓂᑑ ᒋᑕᐎᓇᒪᐎᓇᑭᒡ ᒋᐙᐐᑕᒫᑫᔮᕽ ᐅᑎᐹᒋᒧᐎᓐ ᑳᐃᔑᑕᔑᒥᒥᓐᒡ Xᑕᓐ, ᑳᑮᑭᑫᒋᑳᑌᓯᓂᓂᒃ ᐅᑖᓈᕽ᙮ ᒦᑕᔥ ᓃᓐ ᓅᑯᒻ ᑳᐅᒋᑭᐸᐅᑰᔮᓐ ᐁᐐᑕᒫᑫᔮᓐ᙮ 4ᒦᑕᔥ ᑲᔦ ᐃᔑᐊᓇᒥᐁᑕᒪᐎᔑᒃ ᓃᓐ ᐌᐌᓂ ᒋᓂᓯᑐᑖᑰᔮᓐ ᐋᓃᓐ ᐁᑭᑐᔮᓐ, ᐋᓃᔥ ᒦ ᐃᐌ ᐁᔑᒦᓂᑰᔮᓐ ᒋᐃᔑᒋᑫᔮᓐ᙮ 5ᑲᑮᑖᐐᒃ ᑲᔦ ᐋᓃᓐ ᐁᑑᑕᐌᒀ ᐃᑭ ᑳᑌᐺᑕᓯᒀ, ᐋᐱᒋ ᓴ ᑾᔭᒃ ᐃᓈᐸᒋᑑᒃ ᐃᐃ ᑳᔑᑕᐎᓇᒫᑰᔦᒃ᙮ 6ᑕᑲ ᑲᔦ ᑭᑎᑭᑐᐎᓂᐙᓐ ᑕᒥᓄᑖᑾᓅᓐ, ᒋᐃᓂᑖᑾᑭᓐ ᐊᐎᔭ ᒋᐐᓅᑕᕽ, ᒦᑕᔥ ᑲᔦ ᐁᔑᓈᑾᒃ ᒋᑭᑫᑕᒣᒃ ᑾᔭᒃ ᒋᐃᔑᓇᑴᑕᐌᒃ ᑲᑭᓇ ᐊᐎᔭ᙮ 7ᐊᐊ ᑕᔥ ᑳᔕᐌᓂᒪᑭᒡ ᓃᑕᓇᒥᐋᓈᓐ ᑎᑭᑲᔅ Tychicus ᐋᐱᒋ ᑌᐺ ᐊᓄᑮ, ᑳᐐᑕᓄᑮᒥᒡ ᐃᐃᒫ ᑳᑎᐯᒋᑫᓂᒡ ᐅᑕᓄᑮᐎᓂᓃᕽ᙮ ᑭᑲᐐᑕᒫᑯᐙ ᐋᓃᓐ ᐁᔑᐊᔮᔮᓐ᙮ 8ᒦᑕᔥ ᐅᐅᐌᓂ ᑳᐅᒋ​ᐃᔑᓂᔕᐗᒃ ᐌᑎ ᑳᐃᔑᐊᔮᔦᒃ, ᒋᐐᑕᒪᐎᓀᒃ ᐋᓃᓐ ᑲᑭᓇ ᐁᔑᓭᔮᕽ ᐅᐅᒫ ᑳᐃᔑᐊᔮᔮᕽ, ᑮᓇᐙ ᒋᐅᒋᒪᔥᑲᐌᑕᒣᒃ᙮ 9ᐃᓂ ᑕᔥ ᑮᒋᐅᑌᐺᑕᒨᓈᓂᓐ ᐅᓀᓯᒪᓴᓐ Onesimus ᑳᑌᐺᔦᑖᑯᓯᓂᒡ ᑳᓵᑭᐃᒥᓐᒡ ᑲᔦ, ᐅᑲᐱᐐᒌᐙᓐ ᐊᐲ ᐅᑎᓯᓀᒃ᙮ ᐋᓃᔥ ᐅᓀᓯᒪᔅ ᐌᑎ ᑳᐃᔑᒫᐗᒋᐃᑎᔦᒃ ᐅᒋᑎᐯᑖᑯᓯ᙮ ᑭᑲᐐᑕᒫᑯᐙᒃ ᐃᑕᔥ ᐋᓃᓐ ᐁᔑᐌᐸᓂᓂᒃ ᐅᐅᒫ ᑳᐃᔑᐊᔮᐗᑭᒡ᙮ 10ᐁᕒᐃᔅᑖᕒᑲᔅ Aristarchus ᑳᐐᒋᑭᐸᐅᑰᒪᒃ ᑫᐐᓐ ᑭᐴᔔᐃᑯᐙ᙮ ᒫᕒᒃ Mark, ᐹᕒᓇᐸᔅ Barnabas ᐐᒋᑭᐌᓯᐗᓐ ᑲᔦ ᑭᐴᔔᐃᑯᐙ᙮ ᐋᔕ ᑭᑮᐐᑕᒫᑰᒻ ᐌᐌᓂ ᒋᐅᑖᐱᓀᒃ ᑮᔥᐱᓐ ᐅᑎᓯᓀᒃ᙮ 11ᒑᔓᐙ Joshua, ᒐᔅᑕᔅ Justus ᑳᐃᔑᓂᑳᒋᑲᓂᐎᒡ ᑫᐐᓐ ᑭᐴᔔᐃᑯᐙ᙮ ᐅᑯ ᑕᔥ ᓂᓯᓐ ᑳᐐᓇᒀ, ᒦ ᓴ ᐃᑭ ᐁᑕ ᓂᓯᓐ ᐅᑴᑳᑎᓰᒃ ᑳᒎᐎᐎᐙᒡ ᑳᐐᑕᓄᑮᒪᒀ ᐅᐅ ᑳᐊᓄᑮᑕᒧᐗᒃ ᑭᔐᒪᓂᑑ ᐅᑑᑭᒫᐎᐎᓐ᙮ ᐋᐱᒋ ᑲᔦ ᓃᐱᐗᐞ ᓂᑎᔑᐐᒋᐃᑰᒃ ᒋᒪᔥᑲᐎᑌᐁᔮᓐ᙮ 12ᐁᐸᐸᕒᐊᔅ Epaphras ᐃᑕᔥ ᑫᐐᓐ ᑭᐴᔔᐃᑯᐙ, ᐋᓃᔥ ᑫᐐᓐ ᒦ ᐌᑎ ᑳᐃᔑᒫᐗᒋᐃᑎᔦᒃ ᐌᒋᑎᐯᑖᑯᓯᒡ, X ᒋᓴᓲᓐ ᐃᑕᔥ ᑲᔦ ᐁᐊᓄᑮᑕᐙᒡ᙮ ᒨᔕᒃ ᐃᑕᔥ ᑫᐐᓐ ᐅᒋᑲᒀᑕᑲᓄᑮᐃᑎᓱ ᐁᐊᓇᒥᐁᑕᒪᐎᓀᒃ ᒋᒪᔥᑲᐎᑳᐸᐎᔦᒃ, ᒋᑮᔖᐯᐎᐌᒃ, ᑫᒋᓈᒡ ᒋᑫᒋᓈᐅᐌᒃ ᑳᐃᔑᑌᐺᑕᒧᐌᒃ, ᐐᑫ ᐱᑯ ᒋᓇᐃᑕᒧᐌᒃ ᑭᔐᒪᓂᑑ ᑳᐃᔑᒥᓴᐌᑕᕽ᙮ 13ᑫᓃᓐ ᐃᑕᔥ ᐃᑯ ᓂᐐᑕᒧᐙᓐ ᐋᐱᒋ ᐁᑭᒋᐊᓄᑮᒡ ᑮᓇᐙ ᐅᒋ, ᐃᐃ ᑲᔦ ᐌᑎ ᓬᐁᔮᑎᓰᔮᑳᕽ Laodicea ᐌᑎ ᑲᔦ ᐋᔭᕒᐋᐸᓬᐃᓯᑳᕽ Hierapolis ᑳᐊᔮᓂᒡ᙮ 14ᓬᐅᒃ Luke ᑲᔦ ᑳᓵᑭᒋᑲᓂᐎᒡ ᒪᔥᑭᑮᐎᓂᓂ ᑭᐴᔔᐃᑯᐙ᙮ ᑏᒪᔅ Demas ᑫᐐᓐ ᑭᐴᔔᐃᑯᐙ᙮ 15ᐴᔔ ᑲᔦ ᓂᑎᓈᓈᓂᒃ ᓃᑕᓇᒥᐋᓈᓂᒃ ᐌᑎ ᓬᐁᔮᑎᓰᔮᑳᕽ Laodicea ᑳᐊᔮᐙᒡ, ᐊᐊ ᑲᔦ ᓂᐴᔔᐋᓈᓐ ᓂᐸ Nympha, ᐅᑖᐎᓂᕽ ᑳᐃᔑᐲᑎᑫᓈᓂᐗᓂᓂᒃ᙮ 16ᐊᐲ ᑕᔥ ᑮᐃᔥᒀᐊᓇᒥᒋᑳᑌᒃ ᐅᐅ ᐅᔑᐲᐃᑲᓐ ᐌᑎ ᑳᐃᔑᐊᔮᔦᒃ, ᑫᒋᓈᒡ ᑲᔦ ᐌᑎ ᑳᐃᔑᐲᑎᑫᐙᒡ ᐃᑭ ᓬᐁᔮᑎᓰᔮᐎᓂᓂᐗᒃ Laodiceans ᑕᐊᓇᒥᒋᑳᑌ᙮ ᑫᑮᓇᐙ ᑕᔥ ᑭᑲᐊᓇᒥᑑᒻ ᐃᐃ ᐅᔑᐲᐃᑲᓐ ᓬᐁᔮᑎᓰᔮᐎᓂᓂᐗᒃ ᑳᑮᐅᔑᐲᐊᒪᐗᒀ᙮ 17ᐅᐅ ᑕᔥ ᐃᓂᒃ ᐊᐊ ᐃᓂᓂ ᐋᕒᑭᐸᔅ Archippus: ᑫᒋᓈᒡ ᐃᑯ ᑮᔑᑑᓐ ᐃᐃ ᐊᓄᑮᐎᓐ ᑳᑮᒦᓂᑰᔭᓐ ᑳᑎᐯᒋᑫᒡ ᐁᐊᓄᑮᑕᐗᒡ᙮ 18ᓃᓐ ᐃᑕᔥ ᐃᑯ ᓂᓂᓐᒡ ᓂᑖᐸᒋᑑᓐ ᐅᓄ ᐃᔥᒀᒡ ᐃᑭᑐᐎᓀᓴᓐ ᑳᐅᔑᐲᐊᒪᐎᓇᑰᒃ, ᓃᓐ ᑆᓬ Paul ᐁᐴᔔᐃᓇᑰᒃ᙮ ᑫᑯ ᐗᓃᑫᑫᒃ ᐁᑭᐸᐅᑰᔮᓐ᙮ ᑕᑲ ᑭᔐᒪᓂᑑ ᐅᑭᔐᐙᑎᓯᐎᓐ ᑭᑲᐐᒌᐎᑯᒻ᙮

will be added

X\