Ishihcikewinan Ishihcikewinan 27

1ᐊᐲ ᑕᔥ ᑳᑮᔐᒋᑳᑌᒃ ᐃᑕᓬᐃ Italy ᐊᑮᕽ ᒋᐃᓈᔑᔮᕽ, ᑆᓬ Paul ᐃᐃ ᑲᔦ ᑯᑕᒃ ᑭᐸᐙᑲᓇᒃ ᑮᐃᔑ​ᐸᑭᑎᓂᑲᓂᐎᐗᒃ ᒋᑲᓇᐌᓂᒥᑯᐙᒡ ᔑᒫᑲᓂᔒᐎᑭᒫᓐ ᒎᓬᐃᔭᔅ Julius ᐁᔑᓂᑳᓱᓂᒡ᙮ ᑮᐅᒋ​ᑎᐯᑖᑯᓯᐗᓐ ᑳᐅᑾᑭᒥᑣ ᔑᒫᑲᓂᔕᒃ, ᒫᐗᒡ ᑭᒋᐅᑭᒫᓐ ᐅᕒᐆᒥᕽ ᑳᐊᔮᓂᒡ ᑳᑎᐯᓂᒥᑯᐙᒡ᙮ 2ᐃᐃᒫ ᑕᔥ ᑭᒋᒌᒫᓂᕽ ᐋᑕᕒᐊᒥᑎᔭᒻ Adramyttium ᐌᒋᒪᑲᒃ ᓂᑮᐃᔑ​ᐴᓯᒥᓐ ᐁᐐᐊᓂ​ᓈᓀᐌᔮᔑᐙᒡ ᐌᑎ ᐁᐐᐊᓂ​ᑲᑳᐱᒌᐙᒡ ᐯᐸᑳᓐ ᐊᔮᐎᓂᕽ ᐁᔑᔭ Asia ᐊᑮᕽ᙮ ᒦᑕᔥ ᑳᑮᒫᒌᔮᔑᔮᕽ᙮ ᓂᑮᐐᒌᐎᑯᓈᓐ ᑕᔥ ᐁᕒᐃᔅᑖᕒᑲᔅ Aristarchus ᑳᐃᔑᓂᑳᓱᒡ ᐁᑮᐅᒌᒡ ᒫᓯᑑᓂᔭ ᐊᑮᕽ Macedonian ᐌᑎ ᑌᓴᓬᐊᓇᐃᑲ Thessalonica ᐆᑌᓈᕽ᙮ 3ᐁᓂ​ᐙᐸᕽ ᑕᔥ ᓂᑮᐃᔑ​ᐸᑲᒫᔑᒥᓐ ᓵᐃᑕᓐ Sidon ᐆᑌᓈᕽ᙮ ᒎᓬᐃᔭᓴᓐ ᑕᔥ ᐐᑫ ᐅᑮᒥᓄᑑᑖᑰᓐ ᐊᐊ ᑆᓬ, ᐁᑮ​ᐸᑭᑎᓂᑯᒡ ᒋᐊᑕ​ᐙᐸᒫᒡ ᑳᑭᑫᓂᒫᒡ ᒋᒥᓄ​ᐸᒥᐃᑯᓂᒡ ᐋᓃᓐ ᐁᔑ​ᓅᑌᓭᒡ᙮ 4ᒦᑕᔥ ᐃᐃᒫ ᑳᐅᒋ​ᓂᒥᓈᐌᔮᔑᔮᕽ ᐁᔑ​ᑕᐱᓇᐙᒃ ᐃᓇᑫ ᓂᑮᐊᓂ​ᐃᓈᔑᒥᓐ ᔖᐗᓄᕽ ᓵᐃᐸᕒᐊᔅ Cyprus ᒥᓂᓯᕽ, ᐋᓃᔥ ᐅᓵᒻ ᑮᑭᒋ​ᓅᑎᓐ ᐁᐅᒋᔥᑲᐗᐊᒫᕽ᙮ 5ᒦᑕᔥ ᑳᐃᔑ​ᐋᔕᐗᑳᒣ​ᔮᔑᔮᕽ ᑭᒋᑲᒦᕽ ᓯᓬᐃᔑᔭ Cilicia ᐊᑮᕽ ᐃᓇᑫ, ᐹᐱᓬᐃᔭ Pamphylia ᐊᑮᕽ ᑲᔦ᙮ ᐃᐃᒫ ᑕᔥ ᓂᑮᐃᔑ​ᐸᑲᒫᔑᒥᓐ ᒪᐃᕒᐊ Myra ᐆᑌᓈᕽ ᓬᐃᔑᔭ Lycia ᐊᑮᕽ᙮ 6ᒦᑕᔥ ᐃᐃᒫ ᔑᒫᑲᓂᔒᐎᑭᒫ ᑳᑮᒥᑲᕽ ᑭᒋ​ᒌᒫᓐ ᐋᓬᐃᑭᓵᑕᕒᐃᔭ Alexandria ᐁᐅᒌᒪᑲᓂᓂᒃ, ᐃᑕᓬᐃ ᐊᑮᕽ ᐁᐐᐃᔖᒪᑲᓂᓂᒃ᙮ ᐊᒦᑕᔥ ᐃᐃᒫ ᑳᐃᔑ​ᐋᒋ​ᐴᓯᐃᑰᔮᕽ᙮ 7ᓃᐱᐗᐞ ᑕᔥ ᑕᓱ​ᑮᔑᒃ ᓂᑮᐱᒥ​ᐊᔮᒥᓐ, ᐁᑮ​ᐯᑖᔑᔮᕽ ᐁᑮᓇᓇᑳᔮᔑᔮᕽ᙮ ᑫᑲᐲ ᑕᔥ ᓂᑮᐅᑎᑖᔑᒥᓐ ᐁᔑᐊᔮᒃ ᓇᐃᑕᔅ Cnidus ᐆᑌᓇ᙮ ᐐᑫ ᑮᑭᒋ​ᓅᑎᓐ ᐁᑮ​ᓴᓇᑲᒃ ᒋᑮᐅᒋᔥᑲᐗᐊᒫᑭᐸᓐ᙮ ᐃᑕᐙ ᑕᔥ ᐌᑎ ᓂᑮᐊᓂ​ᐃᓈᔑᒥᓐ ᒌᑲᔭᐄ ᑳᔑ​ᓀᔮᔑᐗᕽ ᓴᓬᒨᓂ Salmone ᐁᔑ​ᑕᐱᓇᐙᒃ ᔖᐗᓄᕽ ᐃᓇᑫ ᑲᕒᐄᑦ Crete ᒥᓂᓯᕽ ᐁᑮᐊᓂ​ᐃᓈᔑᔮᕽ᙮ 8ᐋᐱᒋ ᐯᔓ ᓂᑮ​ᒋᑫᐌᔮᔑᒥᓐ ᐁᑮ​ᓴᓇᑲᒃ ᐁᐱᒫᔑᔮᕽ᙮ ᓂᑮᐅᑎᑖᒥᓐ ᑕᔥ ᐁᐃᔑᓂᑳᑌᒃ ᐌᓂᔑᔑᒃ ᑕᐱᓇᐎᔑᒨᓄᐎᓐ, ᐯᔓ ᐃᒫ ᓬᐊᓰᔭ Lasea ᐆᑌᓈᕽ ᐁᔑ​ᐊᔮᒃ᙮ 9ᐅᓵᒻ ᑕᔥ ᑭᓉᔥ ᐃᐃᒫ ᓂᑮᐊᔮᒥᓐ, ᐋᔕ ᐁᑮᐅᒋᒋᓭᒃ ᐅᓵᒻ ᐁᓇᓃᓵᓀᑖᑾᒃ ᑫᔮᐱ ᒋᐱᒫᔑᕽ ᐋᓃᔥ ᐋᔕ ᑮᐊᐲᒋ​ᑕᒀᑭᓐ᙮ ᐋᔕ ᑲᔦ ᑮᐃᔥᒀ​ᐃᔑᑮᔑᑲᓐ ᒎᐗᒃ ᑳᔑ​ᓂᑖ​ᒫᐗᒋᐃᑎᐙᒡ ᐃᐃ ᑳᐴᓀᑕᒪᐎᑣ ᐅᒪᒋᑑᑕᒧᐎᓂᐙᓐ᙮ ᒦᑕᔥ ᑆᓬ ᐅᑮᐊᔦᒀᒥᒫᐞ ᐱᒫᔒᐎᓂᓂᐗᐞ᙮ 10ᒦᑕᔥ ᐅᐌ ᑳᐃᓈᒡ: ᓂᐙᐸᑖᓐ ᐅᐌ ᑳᐱᒥ​ᐊᔮᔭᕽ ᐋᐱᒋ ᐁᓇᓃᓵᓂᓯᔭᕽ, ᒋᑭᒋ​ᐗᓂᒋᑫᔭᕽ ᑲᔦ᙮ ᐴᓯᑖᓱᓇᓐ ᑕᓂᔑᐗᓈᒋᓭᐗᓐ, ᑭᒋ​ᒌᒫᓐ ᑲᔦ᙮ ᑭᐱᒫᑎᓯᐎᓂᓈᓂᓐ ᓴ ᑲᔦ ᓇᓃᓵᓀᑖᑾᓅᓐ᙮ 11ᐃᓂ ᑕᔥ ᔑᒫᑲᓂᔒᐎᑭᒫᓐ ᓇᐗᒡ ᐅᑮ​ᐱᓯᑕᐙᓂ ᑭᒋ​ᒌᒫᓃᐎᑭᒫᓐ, ᐃᓂ ᑲᔦ ᑳᑎᐯᑕᒥᓂᒡ ᐃᐃ ᑭᒋ​ᒌᒫᓐ, ᐊᐲᒡ ᐐᓐ ᐃᐃ ᑳᑮᐃᑭᑐᒡ ᑆᓬ᙮ 12ᐃᐃᒫ ᑕᐱᓇᐎᔑᒨᓄᐎᓂᕽ ᑳᐐᓐ ᐋᐱᒋ ᑮᐅᓂᔑᔑᓯᓅᓐ ᒋᑕᔑ​ᐱᐴᓂᔑᓈᓂᐗᕽ᙮ ᒦᑕᔥ ᓇᐗᒡ ᓃᐱᐗᐞ ᑳᑮᐃᓀᑕᒧᐙᒡ ᒋᓂᒥᓈᐌ​ᔮᔑᓈᓂᐗᓂᓂᒃ ᐁᐐᑲᑴ​ᑌᑕᑯᔑᓄᐙᒡ ᐌᑎ ᐆᑌᓈᕽ ᐃᐲᓂᑭᔅ Phoenix ᑳᐃᒋᑳᑌᓂᒃ᙮ ᐃᐃ ᑕᔥ ᑕᐱᓇᐎᔑᒧᐎᓐ ᑲᕒᐄᑦ Crete ᒥᓂᓯᕽ ᑮᐃᔑ​ᐊᔮ, ᐁᑮ​ᓂᑖ​ᐋᓴᒪᐊᕽ ᔖᐗᓄᓂᑳᐲᐊᓄᕽ, ᑮᐌᑎᓄ​ᓂᑳᐲᐊᓄᕽ ᑲᔦ᙮ 13ᐊᐲ ᑕᔥ ᓂᔑᑳᒡ ᐁᐸᑲᒥᓅᐌᓂᒃ ᐁᔖᐗᓂᓅᑎᕽ, ᒦ ᐃ ᒋᒥᓄᓭᔮᕽ ᐁᐃᓀᑕᒧᐙᒡ, ᐅᑮᐊᒀᓯᐱᓈᐙᓐ ᑭᒋᐙᒥᑲᐃᑲᓇᓐ᙮ ᐋᐱᒋ ᑕᔥ ᒌᑫᐤ ᑮᐃᔑ​ᐱᒫᔑᐗᒃ ᐃᐃᒫ ᑲᕒᐄᑦ ᒥᓂᓯᕽ᙮ 14ᑳᐐᓐ ᐃᑕᔥ ᑕᔑᓈᓈᑫ ᑮᐃᔑᓭᓯᓅᓐ ᒦ ᐃ ᐋᔕ ᓅᐱᒥᕽ ᐃᓇᑫ ᑳᑮᐅᒋ​ᐸᑲᒫᓂᒪᒃ ᓅᑎᓐ ᑮᐌᑎᓄ​ᐙᐸᓂᓅᐌᓭ ᑳᑮᐃᒋᑳᑌᒃ᙮ 15ᐊᐲ ᑕᔥ ᑳᒣᒀᔥᑲᒫᕽ ᐃᐃ ᐁᑭᒋ​ᓅᑎᕽ, ᐁᑮ​ᑲᔥᑭᑑᓯᐙᕽ ᑕᔥ ᒋᐅᒋᔥᑲᐗᐊᒫᕽ, ᐃᑕᐙ ᑕᔥ ᓂᑮᓈᒥᐗᓇᐋᒥᓐ, ᐁᑮᒥᒋ​ᐱᒫᐅᑯᔮᕽ᙮ 16ᐁᑮ​ᑕᐱᓇᐙᒃ ᑕᔥ ᒥᓂᓭᓯᕽ ᒀᑕ Cauda ᐁᔑᓂᑳᑌᒃ, ᓂᑮᑭᒋ​ᐊᓄᑮᒥᓐ ᐁᑮ​ᑲᔥᑭᑑᔮᕽ ᒋᐗᓂᑑᓯᐙᕽ ᒥᑎᑯ​ᒌᒫᓀᔅ ᑳᓴᑲᐱᑌᒃ᙮ 17ᐊᐲ ᑕᔥ ᑳᐃᒀᐲᑭᐱᑑᐙᒡ ᐃᐃ ᒥᑎᑯ​ᒌᒫᓀᔅ, ᐐᑫ ᐅᑮᐋᔩᑕᐱᑑᓈᐙ ᐁᑮ​ᑎᑎᐸᐱᑑᐙᒡ ᑭᒋ​ᒌᒫᓐ᙮ ᐁᑮ​ᓭᑭᓯᐙᒡ ᑕᔥ ᒋᒥᔕᑮᔑᓈᕽ ᑳᐃᔑ​ᐹᒀᑖᐗᑳᒃ ᐯᔓ ᐃᐃᒫ ᓬᐃᐱᔭ Libya ᐊᑮᕽ᙮ ᐅᑮᓃᓵᐲᑭᐱᑑᓈᐙᓐ ᑕᔥ ᐱᒫᔒᐌᑭᓅᓐ ᒦᑕᔥ ᑳᐃᔑ​ᒥᒋ​ᐱᒫᐅᑯᔮᕽ᙮ 18ᐐᑫ ᑕᔥ ᓂᑮᑭᒋ​ᐅᒑᓂᒫᐅᑯᒥᓐ᙮ ᐌᔮᐸᓂᓂᒃ ᑕᔥ ᐅᑮᒫᒌ​ᐸᐹᑯᐲ​ᐌᐱᓈᓈᐙᓐ ᐴᓯᑖᓱᓇᓐ᙮ 19ᓂᓱ​ᑮᔑᒃ 3 ᑕᔥ ᐁᔑᓭᓂᒃ, ᐅᑮ​ᐸᐹᑯᐲ​ᐌᐱᓈᓈᐙᓐ ᑭᒋ​ᒌᒫᓂᐎ​ᐋᐸᒋᒋᑲᓇᓐ᙮ 20ᐁᑮᐅᒋ​ᓈᑯᓯᓯᒃ ᑕᔥ ᑮᓯᔅ, ᐗᓇᑯᔕᒃ ᑲᔦ ᓃᐱᐗᐞ ᑕᓱ​ᑮᔑᒃ, ᐁᑮᐅᒋ​ᐊᓍᓅᐌᓯᓄᒃ ᑲᔦ, ᒦ ᐃ ᑫᑲᐱ ᑳᑮᐸᑭᒌᔮᕽ ᒋᐱᒫᑎᓯᓯᐙᕽ᙮ 21ᐋᔕ ᑕᔥ ᑭᓉᔥ ᐁᑮᐅᒋ​ᐐᓯᓂᓯᓂᒃ ᐃᓂᓂᐗᐞ, ᑆᓬ ᑮᐊᑕᐎ​ᓃᐸᐎ ᒣᑴᔭᐄ ᐁᔑ​ᐊᔮᓂᒡ ᐁᑮᐃᓈᒡ: ᐃᓂᓂᐗᒃ ᑭᑖᑮᐅᓴ​ᐱᓯᑕᐎᔑᒻ ᑳᑮᐃᓂᓇᑰᒃ ᒋᒫᒌᔮᔑᓯᐗᑭᐸᓐ ᐌᑎ ᑲᕒᐄᑦ Crete ᒥᓂᓯᕽ᙮ ᑳᐐᓐ ᑕᔥ ᐅᐅ ᑭᑖᑮᐃᔑ​ᐗᓯᑖᐎᓭᓰᒥᓐ, ᑳᐐᓐ ᑲᔦ ᑭᑖᑮᐗᓂᒋᑫᓰᒥᓐ᙮ 22ᒫᓄ ᑕᔥ ᑭᑲᑳᓱᒥᓂᓂᒻ ᒋᒪᔥᑲᐌᑕᒣᒃ ᒋᐸᑭᑌᓂᒧᓯᐌᒃ, ᐋᓃᔥ ᑳᐐᓐ ᐊᐎᔭ ᑳᑕᔑᔦᒃ ᐅᑲ​ᐗᓂᑑᓰᓐ ᐅᐱᒫᑎᓯᐎᓐ᙮ ᑭᒋ​ᒌᒫᓐ ᐁᑕ ᑕᓂᔑᐗᓈᑕᓐ᙮ 23ᑎᐱᑯᕽ ᐅᔕ ᓂᑮ​ᓃᐸᐐᑖᑯᐙᓐ ᐅᑌᒐᓬᐃᒪᓐ ᑭᔐᒪᓂᑑ ᑳᑎᐯᓂᒥᒡ ᑳᐊᓄᑮᑕᐗᒃ᙮ 24ᐅᐅ ᐁᑮᐃᔑᒥᒡ: ᑆᓬ, ᑫᑯ ᓭᑭᓯᑫᓐ! ᐅᒋᑕ ᑯ ᐃᔑᓈᑾᓐ ᒋᐅᒋᔥᑲᐎ​ᑳᐸᐎᑕᐗᒡ ᒫᐗᒡ ᑭᒋᐅᑭᒫ ᒋᑎᐹᑯᓂᒃ, ᐃᓇᔥᑫ ᑕᔥ ᑭᔐᒪᓂᑑ ᑭᒥᓄᑑᑖᒃ ᐁᐸᑭᑎᓈᒡ ᑲᑭᓇ ᐃᓂᐌᓂᐗᐞ ᑳᐐᒌᐎᒥᒃ ᒋᐱᒫᑎᓯᓂᒡ᙮ 25ᑮᓇᐙ ᑕᔥ ᐃᓂᓂᐗᒃ ᒪᔥᑲᐌᑕᒧᒃ! ᐋᓃᔥ ᓂᑌᐺᑕᐙ ᑭᔐᒪᓂᑑ ᒪᔮ ᒋᐃᔑᓭᓂᒃ ᑳᑮᐃᔑᒡ᙮ 26ᔖᑰᒡ ᑕᔥ ᓂᑯᒋ ᑯ ᒥᓂᓯᕽ ᑭᑲᒥᔕᑳᒣᔮᐅᑯᒥᓐ, ᐅᑮᐃᓈᐞ᙮ 27ᐊᐲ ᑕᔥ ᒥᑖᔑᓃᐎᑯᓐ 14 ᐁᔑᓭᒃ ᑫᔮᐱ ᓂᑮ​ᐱᒫᐅᑯᒥᓐ ᐃᐃᒫ ᐁᑕᕒᐃᔮ Adria ᑭᒋᑲᒦᕽ᙮ ᓂᑯᒋ ᑫᑳ ᐁᐊᓂ​ᐋᐱᑖ​ᑎᐱᑳᒃ ᒌᒫᓃᐎᓂᓂᐗᒃ ᐅᑮᐅᒋ​ᑭᑫᑖᓈᐙ ᐯᔓ ᒫᐐᓐ ᐁᐱᒪᑳᒣᔮᓂᒃ᙮ 28ᒦᑕᔥ ᑳᑮᑯᑕᑮᐃᑫᐙᒡ ᓂᑯᒋᑯ ᓃᔥᑕᓇ 20 ᑕᓱᓂᒃ ᑮᐊᐲᑖᔭᐙᓂ᙮ ᒦᓇᐙ ᑕᔥ ᓈᑫ ᑮᑯᑕᑮᐃᑫᐗᒃ ᓂᑯᒋᑯ ᑕᔥ ᒥᑖᔑᓈᓈᓐ 15 ᑕᓱᓂᒃ ᑮᐊᐲᑖᔭᐙᓂ᙮ 29ᐁᑮᓇᓃᓵᓀᑕᒧᐙᒡ ᑕᔥ ᐁᔑ​ᐊᓯᓃᑳᓂᒃ ᒋᔑᐊᒀᔮᐅᑯᐙᒡ ᐅᑮ​ᐸᑯᐲᐋᓈᐙᓐ ᓃᐎᓐ ᑭᒋᐙᒥᑲᐃᑲᓇᓐ ᐅᑖᑫᔫᓇᒃ ᐃᓇᑫ᙮ ᐐᑫ ᐅᑮᓅᑌ​ᐊᑕᐌᑖᓈᐙ ᒋᐙᐸᓂᓂᒃ᙮ 30ᒌᒫᓃᐎᓂᓂᐗᒃ ᑕᔥ ᑮᐃᓀᑕᒨᒃ ᐁᐐ​ᑮᒨᒋ​ᒫᒌᐸᐃᐌᐙᒡ᙮ ᐅᑮᓃᓵᐲᑭᓈᓈᐙ ᑕᔥ ᒥᑎᑯ​ᒌᒫᓀᔅ ᐁᐃᔑᒋᑫᑳᓱᐙᒡ ᐁᐸᑯᐲᐊᒧᐙᒡ ᑭᒋᐙᒥᑲᐃᑲᓇᓐ ᓂᒥᑖᒨᓇᒃ ᐃᓇᑫ᙮ 31ᑆᓬ ᑕᔥ ᐅᑮᐃᓈᓐ ᔑᒫᑲᓂᔒᐎᑭᒫᓐ ᐃᐃ ᑲᔦ ᔑᒫᑲᓂᔕᐞ: ᑮᔥᐱᓐ ᐃᑭ ᐃᓂᓂᐗᒃ ᐊᔮᓯᒀ ᐅᐅᒫ ᑭᒋ​ᒌᒫᓂᕽ, ᑳᐐᓐ ᑫᑮᓇᐙ ᑭᑲᐱᒫᑎᓯᓰᒻ, ᐅᑮᐃᓈᓐ᙮ 32ᔑᒫᑲᓂᔕᒃ ᑕᔥ ᐅᑮ​ᐸᑭᔖᓈᐙ ᑳᐅᒋ​ᓴᑲᐱᑌᓂᒃ ᒥᑎᑯ​ᒌᒫᓀᔅ ᐱᓵᓐ ᒋᑕᔑ​ᒫᒌᔮᐊᓂᓂᒃ᙮ 33ᐊᐲ ᑕᔥ ᐁᐊᓂ​ᐙᓭᔮᐸᓂᓂᒃ ᑆᓬ ᐅᑮ​ᐸᑯᓭᓂᒫᐞ ᑲᑭᓇ ᒋᐅᑖᐱᓇᒥᓂᒡ ᒦᒋᒻ ᒋᐐᓯᓂᓂᒡ ᐁᑮᐃᑭᑐᒡ: ᒦ ᐃ ᓅᑯᒻ ᑳᑮᔑᑲᒃ ᐋᔕ ᒥᑖᔑᓃᐎᑮᔑᒃ 14 ᐁᐃᔑᓭᒃ ᐁᒥᒋ​ᐲᐅᔦᒃ, ᐁᐅᒋ​ᐐᓯᓂᓯᐌᒃ ᑫᑰᓐ ᒋᑮᒦᒋᔦᑭᐸᓐ᙮ 34ᑭᒥᓴᐌᓂᒥᓂᓂᒻ ᑕᔥ ᒋᐅᑖᐱᓇᒣᒃ ᒦᒋᒻ ᐋᓃᔥ ᒦ ᐃᒫ ᑫᐅᒋ​ᐱᒫᑎᓯᔦᒃ᙮ ᑳᐐᓐ ᐅᔕ ᑲᓇᑫ ᐯᔑᒃ ᐊᐎᔭ ᐅᐐᓂᓯᔅ ᐅᑎᒀᓂᕽ ᑕᐅᒋ​ᓂᔑᐗᓈᑕᓯᓂᓂ ᐅᐅᒫ ᑳᑕᔑᔦᒃ, ᐅᑮᐃᓈᐞ᙮ 35ᐊᐲ ᑕᔥ ᐃᐃ ᑳᐃᔥᒀ​ᐃᑭᑐᒡ ᐅᑮᐅᑖᐱᓈᓐ ᐸᑴᔑᑲᓇᓐ ᐁᑮᓇᓈᑯᒫᒡ ᑭᔐᒪᓂᑑᓐ᙮ ᑲᑭᓇ ᑕᔥ ᐅᑮ​ᑲᓇᐙᐸᒥᑰᐞ᙮ ᒦᔥ ᑳᐃᔑ​ᐸᑴᐱᓈᒡ ᐸᑴᔑᑲᓇᓐ ᐁᑮᒫᒌ​ᐐᓯᓂᒡ᙮ 36ᑲᑭᓇ ᑕᔥ ᑮᐅᒋ​ᓲᑭᑌᐁᐗᐞ, ᒦᔥ ᑲᑭᓇ ᑳᐃᔑ​ᐐᓯᓂᓂᒡ᙮ 37ᑲᑭᓇ ᑕᔥ ᒫᒪᐤ ᑳᑮᐴᓯᔮᕽ ᐃᐃᒫ ᑭᒋ​ᒌᒫᓂᕽ ᓃᔣᒃ ᓃᔣᓯᒥᑕᓇᔑ​ᓂᑯᑣᓱ 276 ᓂᑮ​ᑕᔑᒥᓐ᙮ 38ᐊᐲ ᑕᔥ ᑳᑌ​ᐐᓯᓂᐙᒡ ᐅᑮ​ᐸᐹᑯᐲ​ᐌᐱᓈᐙᓐ ᐸᑴᔑᑲᓂᐎ​ᑭᑎᑳᓇᓐ ᑳᐅᒋ​ᐅᔑᐃᒥᓐᒡ ᐸᑴᔑᑲᓇᓐ ᒋᓈᑾᑯᑌᓂᒃ ᑭᒋ​ᒌᒫᓐ᙮ 39ᐊᐲ ᑕᔥ ᐁᐊᓂ​ᐲᑖᐸᓂᓂᒃ ᑳᐐᓐ ᐅᑮᓂᓯᑕᐎᓇᓰᓈᐙ ᐃᐃ ᐊᑮᓂ᙮ ᐅᑮᐙᐸᑖᓈᐙ ᑕᔥ ᐐᓐ ᐁᔑ​ᐙᓂᓂᑲᒫᓂᒃ ᐁᒪᑗ​ᒥᑖᐗᑳᓂᒃ᙮ ᒦᑕᔥ ᑳᑮᐃᓀᑕᒧᐙᒡ ᑮᔥᐱᓐ ᑲᔥᑭᑑᐙᒡ ᒋᑮᒉᑭᓯᑑᐙᐸᓐ ᑭᒋ​ᒌᒫᓂᓂ ᐃᐃᒫ᙮ 40ᐅᑮ​ᐸᑭᔖᓈᐙᓐ ᑕᔥ ᐃᓂ ᑭᒋᐙᒥᑲᐃᑲᓇᓐ ᓂᐲᕽ ᐃᑯ ᐁᑮᐃᔑ​ᓇᑲᑕᒧᐙᒡ᙮ ᐅᑮᐋᐸᐙᐙᓐ ᑲᔦ ᑕᑾᐃᑲᓇᓐ ᐁᑕᑯᐱᓱᓂᐸᓐ᙮ ᐅᑮᐃᒀᐲᑭ​ᐱᑑᓈᐙ ᑕᔥ ᐱᒫᔒᐌᑭᓐ ᓂᒥᑖᒨᓇᒃ ᑳᑮᐊᔮᓂᒃ ᓃᑳᓇᔭᐄ ᓇᑫ ᒋᒫᒌᔮᔑᐙᒡ᙮ ᒦᔥ ᑳᑮᓈᑕᑳᒣᔮᔑᔮᕽ᙮ 41ᑮᓅᑌ​ᒥᔕᑮᓯᓐ ᑕᔥ ᐃᐃ ᑭᒋ​ᒌᒫᓐ ᐁᔑ​ᐹᒀᒃ᙮ ᓂᒥᑖᒨᓇᒃ ᑕᔥ ᑮᑭᒋᐗᑖᐗᑭᓭ᙮ ᐅᑖᑫᔫᓇᒃ ᑕᔥ ᑮᐊᓂ​ᐲᑾᐊᓐ ᑳᐊᐲᒋ​ᓲᑳᔥᑳᒃ᙮ 42ᔑᒫᑲᓂᔕᒃ ᑕᔥ ᑮᐃᓀᑕᒨᒃ ᒋᓂᓵᐙᒡ ᑭᐸᐙᑲᓇᐞ ᐁᑮᓇᓃᓵᓀᑕᒧᐙᒡ ᒋᑮᒨᒋ​ᒫᒌᔮᑕᑫᓂᒡ ᒋᔑᐸᓂᓈᐙᒡ ᐃᑕᔥ᙮ 43ᔑᒫᑲᓂᔒᐎᑭᒫ ᑕᔥ ᐁᐐ​ᐱᒫᒋᐋᒡ ᑆᓬᐊᓐ ᐅᑮ​ᑭᐱᑎᓈᐞ ᑳᐐᐃᔑᒋᑫᓂᐸᓐ᙮ ᑮᐃᑭᑐ ᑕᔥ ᐃᐃ ᓀᑖᐙᑕᑫᓂᒡ ᓃᑳᓐ ᒋᐸᑯᐲ​ᒀᔥᑾᓂᓂᒡ ᒋᓈᑕᑳᒣᔮᑕᑫᓂᒡ᙮ 44ᐃᓂ ᑕᔥ ᑯᑕᒃ ᒋᔑᒥᒋᒦᓂᒡ ᓇᐸᑭᓴᑯᕽ ᑫᑰᓇᓐ ᑲᔦ ᑳᐲᐗᐊᓂᓂᑭᓐ ᒋᒥᒋᒥᓇᒥᓂᒡ᙮ ᑮᐃᔑᓭ ᑕᔥ ᑲᑭᓇ ᐊᐎᔭ ᐁᑮᒥᔕᑳᒣᔮᑕᑫᒡ, ᑫᑰᓐ ᐁᑮᐃᔑᓭᓯᒃ᙮

will be added

X\