Ishihcikewinan Ishihcikewinan 26

1ᐋᑲᕒᐃᐸᐗᓐ Agrippa ᑕᔥ ᐅᑮᐃᑰᓐ ᑆᓬ Paul: ᑭᐸᑭᑎᓇᒫᑰ ᒋᑲᓅᑕᒫᓱᔭᓐ, ᐅᑮᐃᑰᓐ᙮ ᑆᓬ ᑕᔥ ᑮᐃᔑᓂᑫᓂ ᒦᑕᔥ ᑳᐃᔑ​ᒫᒌ​ᑲᓅᑕᒫᓱᒡ: 2ᑮᓐ ᑭᒋᐅᑭᒫ ᐋᑲᕒᐃᐸ, ᐋᐱᒋ ᓂᒥᓄᓭᐌᑕᒻ ᐁᐅᒋᔥᑲᐎ​ᑳᐸᐎᑕᐎᓈᓐ ᓅᑯᒻ ᑳᑮᔑᑲᒃ ᒋᑲᓅᑕᒫᓱᔮᓐ ᐃᐃ ᑲᑭᓇ ᑫᑰᓇᓐ ᑳᔑ​ᐊᓈᒥᒥᐙᒡ ᒎᐗᒃ, 3ᒣᒥᑕᑫᑯ ᑮᓐ ᐁᓇᑲᒋ​ᑭᑫᑕᒪᓐ ᑲᑭᓇ ᒎᐎ​ᐃᔑᑣᐎᓇᓐ, ᐃᓂ ᑲᔦ ᑳᐗᐙᓀᑕᒧᐃᑯᐙᒡ᙮ ᑭᐸᑯᓭᓂᒥᓐ ᑕᔥ ᒋᔑ​ᔒᐯᓂᒥᔭᓐ ᒋᐱᓯᑕᐎᔭᓐ᙮ 4ᑲᑭᓇ ᐅᔕ ᒎᐗᒃ ᐅᑭᑫᑖᓈᐙ ᐋᓃᓐ ᑳᐱᐃᔑ​ᐱᒫᑎᓯᐗᒃ ᑮᐅᔥᑳᑎᓯᐗᒃ, ᐁᑮᐅᒋ​ᒫᒌ​ᐱᒫᑎᓯᐗᒃ ᓂᑕᑮᒥᕽ, ᐃᐃᒫ ᑲᔦ ᒉᕒᐆᓴᓬᐊᒥᕽ Jerusalem᙮ 5ᐋᔕ ᑕᔥ ᑭᓉᔥ ᓂᐱᐅᒋ​ᑭᑫᓂᒥᑰᒃ, ᑖᑎᐹᒋᒧᐗᒃ ᐅᔕ ᑮᔥᐱᓐ ᑯᑕ ᐃᓀᑕᒧᐙᒡ ᐁᐅᒋ​ᑎᐯᑖᑯᓯᐗᒃ ᐯᕒᐊᓰᐞ Pharisee ᑳᐃᔑᑣᓂᒡ ᐁᔮᑾᓇᒥᐋᓂᒡ, ᐃᐃ ᑲᔦ ᓇᑫ ᐁᑮᐃᔑ​ᐱᒫᑎᓯᐗᒃ᙮ 6ᐁᐊᐯᓂᒧᓄᑕᒧᐗᒃ ᑕᔥ ᑭᔐᒪᓂᑑ ᑳᑮᐃᔑ​ᐊᔓᑕᒪᐙᒡ ᓂᑫᑌᔭᐋᒥᓈᐸᓃᐞ, ᒦ ᐅᒫ ᓅᑯᒻ ᑳᑮᔑᑲᒃ ᑳᐅᒋ​ᓃᐸᐎᔮᓐ ᐁᑎᐹᑯᓂᑰᔮᓐ᙮ 7ᒦ ᓴ ᐅᐌᓂ ᐊᔓᑕᒫᑰᐎᓐ ᑳᒥᑖᓱ​ᓃᔗᐙᓇᑭᓯᐙᒡ ᓂᐐᑖᑎᓰᒫᑲᓂᓈᓂᒃ ᑳᑮᐋᑯᐲᑑᐙᒡ ᒋᑌᐱᓇᒧᐙᒡ᙮ ᒦᔥ ᑳᑮᐊᓄᑮᑕᐙᐙᒡ ᑭᔐᒪᓂᑑᓐ ᐁᑎᐱᑲᓂᓂᒃ ᐁᑮᔑᑲᓂᓂᒃ ᑲᔦ᙮ ᑮᓐ ᓴ ᐌᑭᒫᐎᔭᓐ! ᐅᐅ ᑕᔥ ᐃᓇᑫ ᐁᐃᔑ​ᐊᐯᓂᒧᐗᒃ, ᒦ ᐃ ᒎᐗᒃ ᑳᐅᒋ​ᒪᒥᔑᒥᐙᒡ᙮ 8ᐌᑯᓀᓐ ᐃᑕᔥ ᐌᒋ​ᑲᔥᑭᑑᓯᐌᒃ ᒋᑌᐺᑕᒣᒃ ᑭᔐᒪᓂᑑ ᐁᑮᐌ​ᐱᒫᑎᓯᐋᒡ ᑳᓂᐳᓂᒡ! 9ᑌᐺ ᓃᓐ ᓂᑮᐃᔑ​ᑌᐺᑖᓐ ᐁᑯ​ᑲᔥᑭᑑᔮᓐ ᒋᑮᓇᑳᔥᑲᒧᐗᑭᐸᓐ ᐅᐐᓱᐎᓐ ᒋᓴᔅ ᓈᓴᕒᐃᑦ Nazareth ᐆᑌᓈᕽ ᑳᐅᒌᒡ᙮ 10ᒦᑕᔥ ᐅᐅ ᑳᐃᔑᒋᑫᔮᐹᓐ ᒉᕒᐆᓴᓬᐊᒥᕽ᙮ ᑭᒋᐊᓇᒥᐁᐎᑭᒫᒃ ᑕᔥ ᓂᑮᐃᔑ​ᒦᓂᑰᒃ ᐱᓵᓐ ᒋᑭᐸᐅᐌᐗᒃ᙮ ᓃᐱᐗᐞ ᑕᔥ ᑭᔐᒪᓂᑑ ᐅᐱᒫᑎᓰᒪᐞ ᑭᐸᐅᑏᐎᑲᒥᑯᕽ ᓂᑮᐊᓯᒫᐞ᙮ ᐊᐲ ᑕᔥ ᐁᐃᓈᑯᓂᑣ ᒋᓂᓯᑣ, ᑫᓃᓐ ᓴ ᓂᑮ​ᓇᐁᑖᓐ ᐃᐃᐌ ᒋᐃᔑᒋᑫᓈᓂᐗᕽ᙮ 11ᓂᑮᐊᓅᑮᐙᓐ ᐃᑕᔥ ᒨᔕᒃ ᒋᑕᔑ​ᑲᒀᑕᑭᐃᑣ ᒎᐎ ᐊᓇᒥᐁᐎᑲᒥᑯᑳᕽ᙮ ᓂᑮᑲᑴ​ᑲᔥᑭᐋᒃ ᑲᔦ ᒫᓄ ᒋᐃᑭᑐᐙᒡ ᐁᑌᐺᑕᐙᓯᒀ Xᑕᓐ᙮ ᑳᐊᐲᒋ​ᓂᔥᑭᐃᐙᒡ ᑕᔥ ᒦ ᐃ ᑳᑮᐃᔖᔮᓐ ᒪᒪᔭᑭ​ᐆᑌᓈᑳᕽ ᐁᑮᓇᓈᑐᓀᐗᒀ, ᑮᐃᑭᑐ ᑆᓬ᙮ 12ᑫᔮᐱ ᑮᐊᓂ​ᐃᑭᑐ: ᒦ ᐃ ᑳᑮᐅᒋ​ᐃᔖᔮᓐ ᑎᒫᔅᑲᔅ Damascus ᐆᑌᓈᕽ, ᑭᒋᐊᓇᒥᐁᐎᑭᒫᒃ ᐁᑮᐊᓅᔑᐙᒡ, ᑲᔦ ᑕᔥ ᐁᑮᒦᔑᐙᒡ ᑲᔥᑭᐁᐎᓯᐎᓐ᙮ 13ᐃᓇᔥᑫ ᑕᔥ ᑭᒋᐅᑭᒫ! ᐁᐊᓂ​ᐋᐱᑕᐎ​ᑮᔑᑲᒃ ᑕᔥ ᒦᑲᓈᕽ ᐁᐊᓂᐱᒥ​ᐊᔮᔮᓐ ᓂᑮᐙᐸᑖᓐ ᑭᒋᑮᔑᑯᕽ ᐁᐅᒋ​ᐙᓭᔮᒃ, ᓇᐗᒡ ᐁᐙᓭᓈᑾᒃ ᐊᐲᒡ ᐐᓐ ᑮᓯᔅ᙮ ᓂᑮᐙᑳᔥᑳᑯᓐ ᐁᐙᓭᔮᒃ, ᐃᑭ ᑲᔦ ᑳᑮᐐᒌᐎᐙᒡ᙮ 14ᑲᑭᓇ ᑕᔥ ᑳᑮᑕᔑᔮᕽ ᒥᑕᑲᒥᒃ ᓂᑮᐃᔑ​ᐸᑭᔑᓂᒥᓐ, ᓂᑮ​ᓅᑕᐙ ᑕᔥ ᐊᐎᔭ ᐁᑲᓅᔑᒡ ᐄᐸᕒᐆᕽ Hebrew ᐁᐃᔑᑮᔗᒡ: ᔂᓬ! ᔂᓬ! Saul ᐌᑯᓀᓐ ᐌᒋ​ᒫᔑᑑᑕᐎᔭᓐ᙮ ᑮᓐ ᐅᔕ ᑯ ᑳᐐᓴᑲᐅᑎᓱᔭᓐ ᐃᐃ ᑳᑑᑕᒪᓐ, ᑖᐱᔥᑰ ᐱᔑᑭ ᑳᑕᑭᔥᑲᕽ ᐃᐃ ᐅᑳᒋᓂᔕᐃᑲᓈᑯᓂ ᐃᓂ ᑳᑎᐯᓂᒥᑯᒡ, ᓂᑮᐃᑰ᙮ 15ᐅᐅ ᑕᔥ ᓂᑮᐃᓈ: ᐊᐌᓀᓐ ᑮᓐ, ᑌᐯᒋᑫᔭᓐ? ᑳᑎᐯᒋᑫᒡ ᑕᔥ ᓂᑮᐃᒃ: ᓃᓐ ᒋᓴᔅ ᑳᒫᔑ​ᑑᑕᐎᔭᓐ᙮ 16ᐸᓯᑸᓐ! ᒦ ᐅᔕ ᑳᐅᒋ​ᓈᑯᓰᑕᐎᓈᓐ ᐁᐅᓇᑭᒥᓈᓐ ᓂᑕᓄᑮᐋᑲᓐ ᒋᑎᓄᐎᔭᓐ ᒋᑎᐹᒋᒥᔭᓐ, ᒋᑎᐹᑐᑕᒪᓐ ᑲᔦ ᐅᐅ ᓅᑯᒻ ᑳᐃᔑ​ᐙᐸᒥᔭᓐ, ᐃᓂ ᑲᔦ ᑫᓂ​ᐙᐸᑕᐃᓈᓐ᙮ 17ᑭᑲᓈᑕᒪᐎᓐ ᑕᔥ ᑲᔦ ᑫᑰᓐ ᒋᑑᑕᐎᓯᓄᐎᒀ ᐃᑭ ᒎᐗᒃ, ᐃᑭ ᑲᔦ ᑳᒎᐎᐎᓯᒀ᙮ ᑭᑎᔑᓂᔕᐅᓐ ᑕᔥ 18ᒋᐙᐱᐊᑣ, ᒋᑴᑮᐊᑣ ᑲᔦ ᑲᔥᑮᑎᐱᑲᓄᕽ ᐅᒋ, ᒣᔥᑾᒡ ᑕᔥ ᐙᓭᔮᕽ ᒋᐃᔑ​ᐱᒫᑎᓯᐙᒡ, ᒋᓇᑲᑕᒧᐙᒡ ᑲᔦ ᑳᑎᐯᓂᒥᑯᐙᒡ ᐁᔑ​ᒪᔥᑲᐎᓰᓂᒡ ᒪᒋᐊᔭᐋᓐ, ᑭᔐᒪᓂᑑᓐ ᑕᔥ ᒣᔥᑾᒡ ᒋᓈᓯᑲᐙᐙᒡ᙮ ᒦᑕᔥ ᑌᐺᔦᓂᒥᐙᒡ ᒋᐴᓀᑕᒪᐎᑣ ᐅᒪᒋᑑᑕᒧᐎᓂᐙᓐ, ᑫᐐᓇᐙ ᑕᔥ ᒋᑕᑾᑭᒥᑣ ᐃᐃᒫ ᐁᔑ​ᐊᔮᓂᒡ ᑭᔐᒪᓂᑑᓐ ᐅᐱᒫᑎᓰᒥᓂ ᑳᑮᐅᓈᐸᒫᓂᒡ, ᓂᑮᐃᒃ, ᐃᑭᑐ ᑆᓬ᙮ 19ᑫᔮᐱ ᑕᔥ ᑮᐊᓂ​ᐃᑭᑐ: ᑭᒋᐅᑭᒫ ᐋᑲᕒᐃᐸ Agrippa! ᑳᐐᓐ ᑕᔥ ᓂᑮ​ᔕᔒᐱᑕᓰᓐ ᐃᐃ ᐃᔑᓇᒧᐎᓐ ᑭᒋᑮᔑᑯᕽ ᑳᑮᐅᒋ​ᐙᐸᑕᐃᑰᐎᓯᔮᓐ᙮ 20ᐃᐃᒫ ᑕᔥ ᓃᑳᓐ ᑎᒫᔅᑲᔅ Damascus ᐆᑌᓈᕽ, ᒉᕒᐆᓴᓬᐊᒥᕽ Jerusalem ᑲᔦ, ᒥᓯᐌ ᒎᑏᔭ Judea ᐊᑮᕽ ᑲᔦ, ᑳᔑ​ᐊᔮᐙᒡ ᑲᔦ ᑳᒎᐎᐎᓯᒀ, ᓂᑮ​ᑕᔑ​ᐐᑕᒪᐙᒃ ᒋᑴᑳᑎᓯᐙᒡ ᒋᓇᑲᑕᒧᐙᒡ ᐅᒪᒋᑑᑕᒧᐎᓂᐙᓐ᙮ ᒋᑴᑮᑕᐙᐙᒡ ᑲᔦ ᑭᔐᒪᓂᑑᓐ ᒋᑑᑕᒧᐙᒡ ᑫᐅᒋ​ᓈᑯᑑᐙᒡ ᐁᑮ​ᑴᑭ​ᐱᒫᑎᓯᐙᒡ᙮ 21ᒦ ᐅᐌᓂ ᐅᒋ ᒎᐗᒃ ᑳᑮᐅᒋ​ᐅᑎᑎᓂᐙᒡ ᑭᒋᐊᓇᒥᐁᐎᑲᒥᑯᕽ ᐁᐊᔮᐗᑭᐸᓐ, ᐁᑮᐅᒋ​ᑲᑴ​ᓂᔑᐙᒡ᙮ 22ᐲᓂᔥ ᑕᔥ ᓅᑯᒻ ᐅᐅ ᐃᔑᐊᐲ ᑳᑮᔑᑲᓂᓂᒃ ᓂᐱᐐᒋᐃᒃ ᑭᔐᒪᓂᑑ, ᒦᑕᔥ ᐅᐅᒫ ᑳᐅᒋ​ᓃᐸᐎᔮᓐ ᑲᑭᓇ ᐯᔑᑾᓐ ᐁᐃᔑ​ᑎᐹᒋᒧᑕᐗᒀ ᑳᐊᑳᓭᑖᑯᓯᐙᒡ ᐃᑭ ᑲᔦ ᑳᑭᑌᑖᑯᓯᐙᒡ᙮ ᑳᐐᓐ ᐊᐗᔑᒣ ᑫᑰᓐ ᐸᔦᔥ ᓂᑎᑭᑐᓰ ᑳᑮᐃᑭᑐᐙᑯᐸᓀᓐ ᑭᔐᒪᓂᑑ ᑳᑮᑲᓅᑕᒫᑯᒡ, ᐊᐊ ᑲᔦ ᒨᓯᔅ Moses ᑳᑮᐃᑭᑐᑯᐸᓀᓐ ᐁᐐᑕᒧᐙᒡ ᑫᐊᓂ​ᐃᔑᓭᒃ᙮ 23ᐅᐅ ᐁᑮᐃᑭᑐᐙᑯᐸᓀᓐ: ᐃᓂ ᓴ ᑭᔐᒪᓂᑑ ᑫᐅᓈᐸᒫᒡ ᒋᐱᒫᒋᐃᐌᓂᒡ, ᑮᐃᓀᑖᑯᓯᐗᓐ ᒋᑲᒀᑕᑭᑑᓂᒡ, ᐐᓐ ᑲᔦ ᓂᑕᒻ ᒋᑲᔥᑭᑑᓂᒡ ᒋᑮᐌ​ᐱᒫᑎᓯᒡ ᓂᐳᐎᓂᕽ ᐅᒋ᙮ ᒋᐐᑕᒪᐙᓂᒡ ᑳᒎᐎᐎᓂᒡ, ᐃᐃ ᑲᔦ ᑳᒎᐎᐎᓯᓂᒃ ᐱᒫᒋᐃᑰᐎᓐ ᒋᐙᓭᔥᑳᑯᓂᒡ, ᑆᓬ ᑮᐃᑭᑐ᙮ 24ᒣᒀ ᑕᔥ ᑆᓬ ᐅᐅ ᐁᐃᑭᑐᒡ ᐁᑲᓅᑕᒫᓱᒡ ᐅᑮᐅᒋ​ᑲᓅᓂᑰᓐ ᐯᑕᓲᓐ ᐁᔖᑯᐌᓂᒡ: ᑆᓬ, ᑭᑭᐗᔥᑴ ᒫᐐᓐ ᓰᔮᑫᓐ! ᑳᔑᑭᒋ​ᑭᑫᑖᓱᔭᓐ ᐅᔕ ᑭᑮᐗᔥᑴᐃᑯᓐ! ᐅᑮᐃᑰᓐ᙮ 25ᑆᓬ ᑕᔥ ᑮᐃᑭᑐ: ᑫᑌᑖᑯᓯᔭᓐ ᐯᔅᑕᔅ! ᑳᐐᓐ ᓃᓐ ᓂᑮᐗᔥᑴᓰ᙮ ᒦ ᓴ ᐱᑯ ᐁᔑ​ᑌᐺᔮᓐ ᐅᐅ ᑳᐃᑭᑐᔮᓐ᙮ 26ᑭᒋᐅᑭᒫ ᐋᑲᕒᐃᐸ Agrippa ᐅᔕ ᐅᑭᑫᑖᓇᓐ ᐅᓄ ᑳᑕᔑᑕᒧᐗᒃ, ᒦᑕᔥ ᑳᐅᒋ​ᐌᒋᑖᐗᒃ ᐁᑲᑲᓅᓇᒃ᙮ ᓂᑎᔑ​ᑫᒋᓈᐞ ᑲᔦ ᑫᑰᓂᓂ ᐁᐸᓈᐸᑕᓯᒃ ᐋᓃᔥ ᑳᐐᓐ ᑫᑰᓐ ᑳᒐᔭᐃᕽ ᐃᔑᒋᑫᓈᓂᐗᓯᓂᓂ᙮ 27ᑭᒋᐅᑭᒫ ᐋᑲᕒᐃᐸ! ᑭᑌᐺᑕᒧᐙᓐ ᐃᓇ ᑳᐃᑭᑐᓂᒡ ᑭᔐᒪᓂᑑ ᑫᓅᑕᒫᑯᒡ᙮ ᑭᑭᑫᓂᒥᓐ ᐄᑐᒃ ᐁᑌᐺᑕᐗᑣ! ᐅᑮᐃᓈᓐ᙮ 28ᐅᐅ ᑕᔥ ᐅᑮᐃᑰᓐ ᐋᑲᕒᐃᐸᐗᓐ: ᑭᑎᓀᑕᒻ ᐃᓇ ᒋᑲᔥᑭᒥᔭᓐ X ᐅᐱᒥᓂᔕᐙᑲᓇᓐ ᒋᑎᓄᐎᔮᓐ, ᐊᒋᓇ ᐁᑕ ᐁᑲᓅᔑᔭᓐ? ᐅᑮᐃᑰᓐ᙮ 29ᑆᓬ ᑕᔥ ᐅᑮᐃᓈᓐ: ᑮᔥᐱᓐ ᐊᒋᓇ ᑯᒫ ᑲᔦ ᑭᓉᔥ ᐃᔑᓭᒃ, ᒦ ᐃ ᐁᔑ​ᐸᑯᓭᓂᒪᒃ ᑭᔐᒪᓂᑑ ᑳᐐᓐ ᑮᓐ ᐁᑕ, ᐅᑯ ᓴ ᑲᔦ ᑲᑭᓇ ᐅᐅᒫ ᑳᐊᔮᐙᒡ ᑳᓅᑕᐎᐙᒡ ᓅᑯᒻ ᑳᑮᔑᑲᓂᓂᒃ, ᒋᑎᓄᐎᐙᒡ ᑳᑎᓄᐎᐗᒃ, ᑳᐐᓐ ᐐᓐ ᐅᓄᐌᓂᐗᓐ ᐲᐙᐱᑴᔮᐲᓐ ᑳᐃᑕᒫᓐ! ᐅᑮᐃᓈᓐ᙮ 30ᒦᑕᔥ ᑳᑮᐸᓯᑸᒡ ᑭᒋᐅᑭᒫ, ᐊᐊ ᑲᔦ ᐊᑮᓂ ᑳᑎᐯᑕᕽ, ᐊᐊ ᑲᔦ ᐯᕒᓇᐃᓯ Bernice, ᐃᐃ ᑲᔦ ᑲᑭᓇ ᐃᐃᒫ ᑳᑮᐊᔮᓂᒡ ᑮᐸᓯᑸᐗᐞ᙮ 31ᐊᐲ ᑕᔥ ᐸᑳᓐ ᐸᑫᒋᑲᓂᕽ ᑳᐃᔖᐙᒡ ᑮᑲᑲᓅᓂᑎᐗᒃ ᐁᑮᐃᑭᑐᐙᒡ: ᐗᐊ ᐃᓂᓂ ᑳᐐᓐ ᑫᑰᓐ ᑮᐃᔑᒋᑫᓰ ᑫᐅᒋ​ᓂᐳᐸᓐ, ᑫᐅᒋ​ᑭᐸᐃᑲᓂᐎᐸᓐ ᑲᔦ, ᑮᐊᔨᑎᐗᒃ᙮ 32ᐋᑲᕒᐃᐸ ᑕᔥ ᐅᑮᐃᓈᓐ ᐯᔅᑕᓲᓐ: ᑖᑮ​ᐸᑭᑎᓈᑲᓂᐎ ᐗᐊ ᐃᓂᓂ ᑮᔥᐱᓐ ᐊᑕᐌᑕᓯᑭᐸᓐ ᒋᑎᐹᑯᓂᑯᒡ ᒫᐗᒡ ᑭᒋᐅᑭᒫᓐ᙮

will be added

X\