Ishihcikewinan Ishihcikewinan 20

1ᐊᐲ ᑕᔥ ᐅᐅ ᑳᐃᔥᒀ​ᐃᓇᑲᒥᑲᓂᓂᒃ, ᑆᓬ ᐅᑮᐊᑐᒫᐞ ᐅᑌᐺᑕᒨᐞ, ᑳᐃᔥᒀ​ᑲᓅᓈᒡ ᐃᑕᔥ ᒋᒪᔥᑲᐌᑕᒥᓂᒡ, ᐅᑮ​ᐴᔔᐋᐞ ᐁᑮᐊᓂ​ᒫᒑᒡ ᒫᓯᑑᓂᔮ ᐊᑮᕽ ᐁᑮᐃᔖᒡ᙮ 2ᒥᓯᐌ ᑕᔥ ᐃᐃᒫ ᓇᑫᑲᒥᒃ ᑮᐃᔖ, ᐁᑮᐸᐹ​ᑲᓅᓈᒡ ᐅᑌᐺᑕᒨᐞ ᒋᒪᔥᑲᐌᑕᒥᓂᒡ, ᐲᓂᔥ ᐁᑮ​ᑕᑯᔑᕽ ᑲᕒᐄᔅ Greece ᐊᑮᕽ᙮ 3ᓂᓱ​ᑮᓯᔅ 3 ᑕᔥ ᐃᐃᒫ ᑮᐊᔮ᙮ ᐋᔕ ᑕᔥ ᑫᑳ ᐁᐊᓂ​ᑮᔒᑖᒡ ᐁᑮᐐᐃᔖᒡ ᓰᕒᐃᔭ Syria ᐊᑮᕽ, ᐅᑮᓅᑌ​ᑭᑫᑖᓐ ᑫᑰᓐ ᐁᐐ​ᑑᑖᑯᒡ ᒎᐗᐞ, ᒦᔥ ᑳᑮᐃᓀᑕᕽ ᒫᓯᑑᓂᔮ ᐊᑮᕽ ᐃᓇᑫ ᒋᓂ​ᐃᔖᒡ᙮ 4ᒦᐗᐞ ᐃᑕᔥ ᐅᐅ ᑳᐐᒌᐎᑯᒡ, ᓲᐸᑕᕒᐊᓐ Sopater ᐌᒌᓂᒡ ᐱᕒᐄᔭ Berea ᐆᑌᓈᕽ ᑳᑮᐅᑌᑌᓂᒡ ᐱᕒᐊᓴᓐ Pyrrhus᙮ ᐁᕒᐃᔅᑖᕒᑲᓴᓐ Aristarchus ᑲᔦ, ᐃᓂ ᑲᔦ ᓯᑲᑕᓴᓐ Secundus ᐌᒌᓂᒡ ᑌᓴᓬᐊᓇᐃᑲ Thessalonica ᐆᑌᓈᕽ᙮ ᐃᓂ ᑲᔦ ᑫᔭᓴᓐ Gaius ᐌᒌᓂᒡ ᑕᕒᐱ Derbe ᐆᑌᓈᕽ, ᑏᒪᑎ Timothy ᑕᔥ ᑲᔦ᙮ ᐃᓂ ᑕᔥ ᑲᔦ ᑎᑭᑲᓴᓐ Tychicus, ᒐᕒᐆᐱᒪᔅ Trophimus ᑲᔦ ᐁᔑᔭ Asia ᐊᑭᕽ ᐌᒌᓂᒡ᙮ 5ᒦᔥ ᐅᑯ ᐃᓂᓂᐗᒃ ᑮᓃᑳᓂ​ᒫᒑᐗᒃ, ᐁᑮ​ᐲᐃᓇᑭᑣ ᐌᑎ ᒐᕒᐆᐗᔅ Troas ᐆᑌᓈᕽ᙮ 6ᐱᓬᐃᐹᐃ Philippi ᐆᑌᓈᒃ ᑕᔥ ᓂᑮᐅᒋ​ᒫᒌᔮᔑᒥᓐ ᐊᐲ ᑳᐃᔥᒀᑲᒥᑲᒃ ᑳᐊᒧᓐᒡ ᐸᑴᔑᑲᓐ ᐌᐱᓯᑲᓂᐎᓯᒃ᙮ ᓈᓄᑮᔑᒃ ᑕᔥ ᐁᐊᓂ​ᐃᔑᓭᒃ ᒐᕒᐆᐗᔅ ᐆᑌᓈᕽ ᓂᑮᐃᔑ​ᐅᑎᓵᓈᓂᒃ᙮ ᓃᔣᓱᑮᔑᒃ 7 ᑕᔥ ᐃᐃᒫ ᓂᑮᐊᔮᒥᓐ᙮ 7ᑳᓂᑕᒥ​ᑮᔑᑲᒃ ᑕᔥ ᑮᑕᐗᑌᒃ ᓂᑮᒫᒪᐎ​ᐊᔮᒥᓐ ᐁᑮᐊᒶᑭᒡ ᐸᑴᔑᑲᓐ᙮ ᑆᓬ ᑕᔥ ᐅᑮ​ᑲᑲᓅᓈᐞ ᐯᒫᑎᓯᓂᒡ, ᐲᓂᔥ ᑮᐊᓂ​ᐋᐱᑖ​ᑎᐱᑲᓂᓂ ᐁᑲᑭᑐᒡ, ᐋᓃᔥ ᐊᓂᐙᐸᓂᓂᒃ ᐁᐐᒫᒑᒡ᙮ 8ᑮᐹᑏᓇᑎᓅᓐ ᑕᔥ ᐙᓴᑯᓀᒋᑲᓇᓐ ᐁᔑ​ᐃᔥᐱᒦᑲᑌᒃ ᐃᐃᒫ ᑳᑮᑕᔑ​ᒫᐗᒋᐃᑎᔮᕽ᙮ 9ᐅᔥᑭᓃᑭ ᑕᔥ ᑮᓇᒪᑕᐱ ᐙᓭᒋᑲᓂᕽ ᐃᔫᑎᑲᔅ Eutychus ᐁᐃᔑᓂᑳᓱᒡ, ᐐᑫ ᐁᑮᓅᑌᑾᔑᒡ, ᑭᓉᔥ ᐋᓃᔥ ᑆᓬᐊᓐ ᑮᑲᑭᑐᐗᓐ᙮ ᐁᑲᐎᑾᔑᒡ ᑕᔥ ᒥᑕᑲᒥᒃ ᑮᐃᔑ​ᐸᑭᔑᓐ ᐁᑮᐃᓇᑰᒋᕽ ᓂᓱ​ᐃᔥᐱᒦᑲᑌ᙮ ᐁᐅᑖᐱᓂᓐᒡ ᑕᔥ ᑮᐙᐸᒫ ᐁᓂᐳᒡ᙮ 10ᑆᓬ ᑕᔥ ᑮᓃᓵᑕᐌ ᐁᑮᐊᐸᑭᓱᒡ ᐁᔑ​ᐱᒥᔑᓂᓂᒡ ᐁᑮᐅᑖᐱᓈᒡ ᒦᔥ ᑳᐃᑭᑐᒡ: ᑫᑯ ᑫᑰᓐ ᐃᓀᑕᑫᒃ, ᑫᔮᐱ ᐅᔕ ᐱᒫᑎᓯ, ᐅᑮᐃᓈᐞ᙮ 11ᒦᔥ ᒦᓇᐙ ᑮᐃᔑ​ᐊᒀᑕᐌᒡ ᐁᑮ​ᐸᑴᐱᓈᒡ ᐸᑴᔑᑲᓇᓐ ᐁᐐᒋ​ᐐᓯᓃᒫᒡ ᐅᑌᐺᑕᒨᐞ, ᐲᓂᔥ ᑕᔥ ᑮᐲᑖᐸᓂᓂ ᐁᑮ​ᑲᑲᓅᓈᒡ᙮ ᒦᔥ ᑳᐃᔑ​ᒫᒑᒡ᙮ 12ᑮᑮᐌ​ᐐᒌᐎᒫᐗᓐ ᑕᔥ ᐃᓂ ᐅᔥᑭᓃᑭᐗᓐ ᐁᐱᒫᑎᓯᓂᒡ, ᐐᑫ ᐁᑮᒥᓉᑕᒧᓈᓂᐗᓂᓂᒃ᙮ 13ᓂᑮᓃᑳᓂ​ᐴᓯᒥᓐ ᑕᔥ ᒌᒫᓐ ᐁᑮᐃᓈᔑᔮᕽ ᐋᓴᔅ Assos ᐆᑌᓈᕽ, ᒦ ᐌᑎ ᐁᐐᐅᒋ​ᐴᓯᐊᑭᒡ ᑆᓬ᙮ ᓂᑮᐊᓅᓂᑯᓈᓐ ᐅᐅ ᒋᐃᔑᒋᑫᐗᑭᒡ ᐋᓃᔥ ᐐᓐ ᑮᒥᑐᓭ ᐌᑎ ᐁᐃᔖᒡ᙮ 14ᐊᐲ ᑕᔥ ᑳᒣᒀᔥᑲᐗᑭᒡ ᐋᓴᔅ ᐆᑌᓈᕽ ᓂᑮ​ᐴᓯᐋᓇᓐ, ᓂᑮᐊᓂᔑ​ᐸᑲᒫᔑᒥᓐ ᑕᔥ ᐌᑎ ᒥᑎᓬᐄᓂ Mitylene ᐆᑌᓈᕽ᙮ 15ᐁᐊᓂ​ᐙᐸᕽ ᑕᔥ ᒦ ᐃᒫ ᑳᐅᒋ​ᒫᒌᔮᔑᔮᕽ ᑮᔭᔅ Chios ᒥᓂᓯᕽ ᐁᑮᐃᔑ​ᐸᑲᒫᔑᔮᕽ᙮ ᐁᐊᓂ​ᐙᐸᕽ ᑕᔥ ᓭᒪᔅ Samos ᐁᒋᑳᑌᒃ ᒥᓂᔅ ᓂᑮᐃᔑ​ᐸᑲᒫᔑᒥᓐ᙮ ᒦᓇᐙ ᑕᔥ ᐁᐊᓂ​ᐙᐸᕽ ᓂᑮᐃᔑ​ᐸᑲᒫᔑᒥᓐ ᒫᐃᓬᐄᑕᔅ Miletus ᐆᑌᓇ ᐁᒋᑳᑌᒃ᙮ 16ᑆᓬ ᑮᐃᓀᑕᒻ ᒋᔖᑆᔑᒡ ᒌᒫᓂᕽ ᐁᐱᓴᔅ Ephesus ᐆᑌᓈᕽ, ᑳᐐᓐ ᑮᐃᓀᑕᓰ ᑭᓉᔥ ᒋᐊᓂ​ᐅᑕᒥᐊᔮᒡ ᐃᐃᒫ ᐁᔑᔭ Asia ᐊᑮᕽ᙮ ᑮᐌᔩᐱᓯ ᐋᓃᔥ ᐁᑮᑲᑴ​ᑌᑕᑯᔑᕽ ᒉᕒᐆᓴᓬᐊᒥᕽ Jerusalem, ᑮᔥᐱᓐ ᑯᑕ ᑌᐊᔨᔒᒡ ᒋᒣᒀᔥᑲᕽ ᒫᑕᑲᒥᑲᓂᓂᒃ ᐯᑎᒀᔅᑎᐎ​ᐃᔑᑮᔑᑲᓂᓂᒃ᙮ 17ᒫᐃᓬᐄᑕᔅ ᐆᑌᓈᕽ ᓴ ᑆᓬ Paul ᑮᐅᒋ​ᐃᔑᓂᔕᐅᐌᑯᐸᓐ ᒋᐃᔖᓂᐗᓂᓂᒃ ᐁᐱᓴᔅ ᐆᑌᓈᕽ, ᒦ ᐌᑎ ᒋᔑᓇᑭᔥᑳᑯᒡ ᑳᓃᑳᓂᔥᑲᐙᓂᒡ ᑳᒫᐗᒋᐃᑎᓂᒡ ᐅᑌᐺᑕᒨᐞ᙮ 18ᐊᐲ ᑕᔥ ᐌᑎᓯᑯᒡ ᐅᐅ ᐅᑮᐃᓈᐞ: ᒥᓂᒃ ᑳᐱ​ᐐᒌᐎᓇᑰᒃ ᐄᑐᒃ ᑭᑭᑫᑖᒻ ᒫᐗᒡ ᐃᑯ ᓂᑕᒻ ᑮᑕᑯᑮᔮᓐ ᐅᐅᒫ ᐁᔑᔭ Asia ᐊᑮᕽ, ᐋᓃᓐ ᑳᐃᔑᒋᑫᔮᓐ᙮ 19ᐁᑮᐊᓄᑮᑕᐗᒃ ᑳᑎᐯᒋᑫᒡ ᒥᓯᐌ ᐁᑮᐃᔑ​ᑕᐸᓭᓂᒧᔮᓐ, ᒨᔕᒃ ᑲᔦ ᐁᑮᐅᒋᑲᐙᐱᔮᓐ ᒣᒀ ᑮᐗᐙᓀᑕᒥᓭᔮᓐ ᐋᓃᔥ ᒎᐗᒃ ᑮᑮᒨᒋᒋᑫᐗᒃ ᑫᑰᓐ ᐁᐐ​ᑑᑕᐎᐙᒡ᙮ 20ᑭᑭᑫᑖᒻ ᐄᑐᒃ ᑲᔦ ᐁᑮ​ᑭᒋᐎᓇᒪᐎᓯᓅᓇᑰᒃ ᑫᑰᓐ ᑫᐐᒋᐃᑯᔦᑭᐸᓐ ᑮᐙᐐᑕᒪᐎᓇᑰᒃ, ᒧᔐᔭᐄ ᑲᔦ ᐁᑮ​ᑭᑭᓄᐊᒪᐎᓇᑰᒃ ᑳᐊᔨᔑᑖᔦᒃ᙮ 21ᓂᑮ​ᑲᓅᓈᒃ ᒎᐗᒃ, ᐃᑭ ᑲᔦ ᑳᒎᐎᐎᓯᒀ ᒋᑴᑮᓄᑕᐙᐙᒡ ᑭᔐᒪᓂᑑᓐ ᒋᓇᑲᑕᒧᐙᒡ ᐅᒪᒋ​ᐃᔑᒋᑫᐎᓂᐙᓐ, ᒋᑌᐺᔦᓂᒫᐙᒡ ᑕᔥ ᑳᑎᐯᓂᒥᒥᓇᕽ ᒋᓴᔅ Xᑕᓐ᙮ 22ᓅᑯᒻ ᑕᔥ ᓂᐐᐃᔖ ᒉᕒᐆᓴᓬᐊᒥᕽ Jerusalem ᐁᐃᔑ​ᐐᔖᒥᒥᒡ ᑳᑎᐯᒋᑫᒡ ᐅᑕᒑᑾᓐ, ᑳᐐᓐ ᑕᔥ ᓂᑭᑫᑖᓰᓐ ᐊᒪᓐᒡ ᑫᐃᔑᓭᐙᓀᓐ ᐌᑎ᙮ 23ᒦ ᐁᑕ ᐁᔑ​ᑭᑫᑕᒫᓐ ᑕᓯᓐ ᐆᑌᓇᐗᓐ ᑳᐱ​ᒪᔮᔥᑲᒫᓐ, ᑭᔐᒪᓂᑑ ᐅᑕᒑᑾᓐ ᐁᐊᔦᒀᒥᒥᓂᒡ ᒫᒫᒋᑾᐱᓱᓇᓐ, ᑲᒀᑕᑭᐃᑰᐎᓐ ᑲᔦ ᐁᐊᔓᓂᑯᐗᒃ᙮ 24ᑳᐐᓐ ᑕᔥ ᓃᓐ ᑫᑰᓐ ᓂᑎᓀᑕᓰᓐ ᓂᐱᒫᑎᓯᐎᓐ ᒋᑭᒋ​ᐃᓀᑕᒫᐹᓐ; ᒦ ᐁᑕ ᐙᐃᔑᒋᑫᔮᓐ ᒋᑮᔑᑖᐗᒃ ᐱᒥᐸᑑᐎᓐ, ᐊᓄᑮᐎᓐ ᑲᔦ ᑳᑮᒦᔑᒡ ᑳᑎᐯᒋᑫᒡ᙮ ᓂᑮᐃᔑᒦᓂᒃ ᒋᑎᐹᑐᑕᒧᐗᒃ ᐁᔑ​ᒥᓍᑐᑌᓂᒃ ᑭᔐᒪᓂᑑ ᐅᑭᔐᐙᑎᓯᐎᓐ᙮ 25ᓂᑮ​ᐸᐹ​ᐃᔖ ᓴ ᒣᑴᔭᐄ ᑲᑭᓇ ᑳᔑ​ᐊᔮᔦᒃ, ᐁᑮ​ᑕᔑᑕᒫᓐ ᑭᔐᒪᓂᑑ ᐅᑎᐯᒋᑫᐎᓐ᙮ ᓅᑯᒻ ᑕᔥ ᓂᑭᑫᑖᓐ ᑮᓇᐙ ᒦᓇᐙ ᐐᑳ ᒋᐙᐸᒥᓯᐌᒃ᙮ 26ᒦᑕᔥ ᐁᓂᓇᑰᒃ ᓅᑯᒻ ᑳᑮᔑᑲᒃ, ᑳᐐᓐ ᓃᓐ ᓂᑲᐊᓈᒣᑖᑯᓯᓰ ᐊᐎᔭ ᓂᔑᐗᓈᑎᓯᒡ᙮ 27ᑳᐐᓐ ᐄᑐᒃ ᑫᑰᓐ ᓂᑮ​ᑭᒋᐎᓇᓰᓐ ᑮᐐᑕᒪᐎᓇᑰᒃ ᑲᑭᓇ ᑭᔐᒪᓂᑑ ᐅᑎᓀᑕᒧᐎᓐ᙮ 28ᐊᔦᒀᒥᑲᓇᐌᓂᑎᓱᒃ ᑕᔥ, ᑲᓇᐌᓂᒥᑾᒃ ᑕᔥ ᑳᒫᒪᐎ​ᐊᔮᐙᒡ ᐅᑌᐺᑕᒨᒃ ᑭᔐᒪᓂᑑ ᐅᑕᒑᑾᓐ ᑳᑮᒦᓂᒥᓀᒃ ᒋᓈᓈᑲᒋᐁᒀ᙮ ᑖᐱᔥᑰ ᐅᑲᓇᐎ​ᒫᓇᒑᓂᔑᐌ ᑳᐃᔑᒋᑫᒡ, ᒦ ᐃᓇᑫ ᐃᔑ​ᑲᓇᐌᓂᒥᑾᒃ ᑭᔐᒪᓂᑑ ᐅᒫᐗᒋᐋᑲᓇᐞ, ᐅᒥᔅᑸᒥᕽ ᑳᑮᐅᒋ​ᑎᐸᐙᒡ᙮ 29ᓂᑭᑫᑖᓐ ᐊᐲ ᒫᒑᔮᓐ ᒋᐅᑎᓯᓀᒀ ᑳᔮᒀᑎᓯᐙᒡ ᒪᐄᑲᓂᕽ ᐁᓀᑖᑯᓯᐙᒡ ᐁᔑ​ᐊᔮᔦᒃ, ᑳᐐᓐ ᑕᔥ ᐅᑲ​ᒪᓈᒋᐋᓯᐙᐙᐞ ᐅᑌᐺᑕᒨᐞ᙮ 30ᐋᓂᑕ ᓴ ᑮᓇᐙ ᐁᔑ​ᐊᔮᔦᒃ ᑕᓂ​ᐅᒌᐗᒃ ᓭᓯᒃ ᑫᔑ​ᑭᑭᓄᐃᑫᓯᒀ, ᒋᐗᓂᔑᒫᐙᒡ ᐅᑌᐺᑕᒨᐞ ᒋᐱᒥᓂᔕᐅᑯᐙᒡ᙮ 31ᐊᔦᒀᒥᓯᒃ ᐃᑕᔥ᙮ ᒫᒥᑲᐎᒃ ᓂᓱᐱᐴᓐ ᒥᓂᒃ ᐁᑮᐅᒋ​ᑭᐱᒌᓯᐙᓐ ᐁᐊᔦᒀᒥᒥᓇᑰᒃ ᐁᑕᓱᑎᐱᒃ, ᐁᑕᓱᑮᔑᒃ ᑲᔦ, ᐁᑮᐅᒋᑲᐙᐱᔮᓐ ᐁᑲᒀᑕᑫᑕᒫᓐ᙮ 32ᓅᑯᒻ ᑕᔥ ᑭᑎᔑ​ᐸᑭᑎᓂᓂᓂᒻ ᑭᔐᒪᓂᑑ ᒋᑲᓇᐌᓂᒥᓀᒃ, ᒋᑲᓇᐌᓂᒥᑯᐌᒃ ᑲᔦ ᐅᑎᑭᑐᐎᓐ ᑳᔑ​ᑕᔑᑌᓂᒃ ᐅᑭᔐᐙᑎᓯᐎᓐ᙮ ᒦ ᐃᐌ ᑫᐅᐱᑭᐃᑯᔦᒃ, ᒦ ᑲᔦ ᐃᐃᒫ ᑫᐅᒋ​ᒦᓂᑰᐎᓯᔦᒃ ᒋᑎᐱᓇᐌᐎᓯᔦᒃ ᑭᔐᒪᓂᑑ ᑳᐐᒦᓈᒡ ᑲᑭᓇ ᐅᐱᒫᑎᓰᒪᐞ᙮ 33ᑳᐐᓐ ᓂᒥᓴᐌᓂᒥᒫᓰᓐ ᐊᐎᔭ ᐅᐙᐹᐱᑯ​ᔔᓂᔮᒪᓐ, ᐅᑑᓵᐎ​ᔔᓂᔮᒪᓐ, ᑳᐐᓐ ᑲᔦ ᓂᒥᓴᐌᑕᒨᐙᓰᓇᓐ ᐅᑭᑭᔥᑭᑲᓇᓐ᙮ 34ᑭᑭᑫᑖᓈᐙ ᐄᑐᒃ ᓃᓐ ᐁᑮᐅᑎᓇᒫᓱᔮᓐ ᐋᓃᓐ ᐁᔑ​ᓅᑌᓭᔮᓐ, ᐁᑮ​ᐸᒥᐊᒀ ᑲᔦ ᓂᐐᒌᐙᑲᓇᒃ᙮ 35ᑲᑭᓇ ᑫᑰᓐ ᓂᑮᐃᔑᒋᑫ ᒋᐙᐸᑕᒣᒃ ᐅᐅ ᓇᑫ ᒋᔑᑭᒋ​ᐊᓄᑮᓈᓂᐗᑭᐸᓐ ᒋᐐᒋᐃᑣᐸᓐ ᒣᔥᑲᐙᑎᓯᓯᒀ, ᒋᒫᒥᑲᐎᓄᑌᓂᒃ ᐅᐅ ᑳᑮᐃᑭᑐᒡ ᑳᑎᐯᒋᑫᒡ ᒋᓴᔅ: ᓇᐗᒡ ᒥᓉᑖᑾᓐ ᑳᒦᑭᐌᓈᓂᐗᕽ ᑫᑰᓐ ᐊᐲᒡ ᐐᓐ ᑮᑌᐱᓂᑳᑌᒃ ᑫᑰᓐ᙮ 36ᐊᐲ ᑕᔥ ᐅᐅ ᑆᓬ ᑳᐃᔥᒀ​ᐃᑭᑐᒡ, ᐅᑮᐐᒋ​ᐅᒋᒌᑾᓇᐲᑕᐙᐞ ᐁᑮᐊᓇᒥᐋᒡ 37ᑲᑭᓇ ᑕᔥ ᑮᑭᒋ​ᒪᐎᐗᐞ ᐁᑮ​ᑭᑭᒋᑴᓂᑯᒡ ᐁᐊᔫᒌᒥᑯᒡ᙮ 38ᒦᑕᔥ ᑳᑮᐅᒋ​ᒫᓀᑕᒥᓂᒡ ᐁᑮᐃᓈᒡ ᐐᑳ ᒦᓇᐙ ᒋᐙᐸᒥᑯᓯᒃ᙮ ᐅᑮᐃᔑ​ᐐᒌᐎᑯᐞ ᐃᑕᔥ ᑭᒋ​ᒌᒫᓂᒃ᙮

will be added

X\