Ishihcikewinan Ishihcikewinan 19

1ᒣᒀ ᑕᔥ ᐊᐹᓬᐊᓴᓐ Apollos ᐁᐊᔮᓂᒡ ᒀᕒᐃᓐᑦ Corinth ᐆᑌᓈᕽ, ᑆᓬ Paul ᑮᔖᐳᔥᑳ ᐃᐃᒫ ᐊᑮᕽ, ᐁᐱᓴᔅ Ephesus ᐆᑌᓈᕽ ᑕᔥ ᑮᐃᔑ​ᑕᑯᔑᓐ᙮ ᐅᑮᒥᑲᐙᐞ ᑕᔥ ᐋᓂᑕ ᐅᑌᐺᑕᒨᐞ᙮ 2ᒦᑕᔥ ᑳᐃᓈᒡ: ᑭᑮᒦᓂᑰᐎᓯᒻ ᐃᓇ ᑭᔐᒪᓂᑑ ᐅᑕᒑᑾᓐ ᐊᐲ ᑮᑌᐺᔦᑕᒣᒃ? ᒦᔥ ᑳᐃᑯᒡ: ᑳᐐᓐ ᑲᓇᑫ ᓂᓅᑕᓰᒥᓐ ᐁᐊᔮᓂᑴᓐ ᑭᔐᒪᓂᑑ ᐅᑕᒑᑾᓐ, ᐅᑮᐃᑰᐞ᙮ 3ᐅᑮᐃᔑ​ᑲᑴᒋᒫᐞ ᐃᑕᔥ: ᐋᓃᓐ ᑕᔥ ᑳᐃᔑ​ᓰᑲᐊᑖᑰᔦᒃ? ᒞᓐ ᐅᓰᑲᐊᑖᑫᐎᓂᕽ, ᐅᑮᐃᑰᐞ᙮ 4ᑆᓬ ᑕᔥ ᐅᑮᐃᓈᐞ: ᒞᓐ ᓴ ᐅᑮ​ᓰᑲᐊᑕᐙᐞ ᐃᐃ ᑳᑮᑴᑮᓄᑕᒥᓂᒡ ᐅᒪᒋᑑᑕᒧᐎᓂᓂ᙮ ᒞᓐ ᐅᑮ​ᐐᑕᒪᐙᐞ ᐯᒫᑎᓯᓂᒡ ᑮᐃᔥᒀᐊᔮᒡ ᒋᑌᐺᔦᓂᒫᓂᒡ ᐃᓂ ᑫᐱ​ᑕᑯᔑᓂᓂᒡ, ᒋᓴᓲᓐ ᑕᔥ ᐃᓂ ᑳᑮᐃᓈᒡ, ᐅᑮᐃᓈᐞ᙮ 5ᐊᐲ ᑕᔥ ᐅᐅ ᐁᓅᑕᒥᓂᒡ, ᑮᓰᑲᐊᑖᓱᐗᐞ ᐅᐐᓱᐎᓂᓃᕽ ᑳᑎᐯᒋᑫᓂᒡ ᒋᓴᓲᓐ᙮ 6ᐊᐲ ᑕᔥ ᑆᓬ ᑳᓵᒥᓈᒡ ᐅᑮᐅᑎᓯᑯᓂ ᑭᔐᒪᓂᑑᓐ ᐅᑕᒑᑯᓂ, ᒦᔥ ᐯᐸᑳᓐ ᑳᐃᔑ​ᐊᔩᔑᑮᔗᓂᒡ, ᐁᑮᐐᑕᒫᑫᓂᒡ ᑲᔦ ᑭᔐᒪᓂᑑᓐ ᐅᑎᑭᑐᐎᓂᓂ᙮ 7ᓂᑯᒋ ᑯ ᑮᒥᑖᔑᓃᔑᐗᐞ 12 ᑕᔥ ᐃᐃ ᐃᓂᓂᐗᐞ᙮ 8ᑆᓬ ᑮᐲᑎᑫ ᒎᐎ ᐊᓇᒥᐁᐎᑲᒥᑯᕽ᙮ ᓂᓱᑮᓯᔅ 3 ᑕᔥ ᒥᓂᒃ ᐅᑮᑲᑴ​ᔖᑰᓱᒫᐞ ᐁᑮ​ᑕᔑᑕᕽ ᐁᓇᑌᓂᒃ ᑭᔐᒪᓂᑑᓐ ᐅᑎᐯᒋᑫᐎᓂᓂ᙮ 9ᐋᓂᑕ ᑕᔥ ᑮᒪᒪᔦᒋᐎᐗᐞ, ᐁᑮ​ᔕᔒᐱᑕᒥᓂᒡ ᑲᔦ, ᒧᔐ ᑕᔥ ᐁᔑ​ᐹᑏᓄᓈᓂᐗᓂᓂᒃ ᐅᑮᒪᒋᐃᑕᒥᓂ ᐌᒋ​ᓈᓯᑲᐎᒥᓐᒡ ᐃᓇᑫ ᑭᔐᒪᓂᑑᓐ᙮ ᒦᑕᔥ ᑳᐃᔑ​ᓇᑲᓈᒡ, ᐁᑮᒫᒌᓈᒡ ᐅᑌᐺᑕᒨᐞ᙮ ᐁᑕᓱᑮᔑᒃ ᑕᔥ ᑮᑕᔑ​ᑲᑲᓅᔑᐌ ᐃᐃᒫ ᐙᑳᐃᑲᓂᕽ ᑕᐃᕒᐋᓇᓴᓐ Tyrannus ᑳᑮᓂᑖ​ᑕᔑ​ᑭᑭᓄᐊᒫᑫᓂᒡ᙮ 10ᓃᔓ​ᐱᐴᓐ ᑕᔥ ᐃᐃ ᑮᐃᔑᓭ, ᑲᑭᓇ ᑕᔥ ᒎᐗᒃ, ᑲᕒᐄᒃ Greek ᑲᔦ ᑎᓄ ᑳᑮᐃᔑᑖᐙᒡ ᐃᐃᒫ ᐁᔑᔭ Asia ᐊᑮᕽ ᐅᑮᓅᑖᓈᐙ ᐅᑎᑭᑐᐎᓂᓂ ᑳᑎᐯᒋᑫᓂᒡ᙮ 11ᑭᔐᒪᓂᑑ ᑕᔥ ᓃᐱᐗᐞ ᒫᒪᑳᒋᒋᑫᐎᓇᓐ ᑮᐃᔑᒋᑫ ᑆᓬᐊᓐ Paul ᐁᑮᐋᐸᒋᐋᒡ᙮ 12ᓈᐱᑳᑲᓀᓴᐞ, ᐋᑰᐱᓱᓇᓐ ᑲᔦ ᑳᑮᓵᒥᔥᑳᑯᒡ ᑆᓬ ᑮᐃᔑᐎᑕᐙᐗᐞ ᐅᑖᑯᓰᐞ, ᒦᔥ ᑳᑮᓇᑲᓂᑯᓂᒡ ᐁᓈᐱᓀᓂᒡ, ᒪᒋᐊᒑᑾᐞ ᑲᔦ ᐁᑮᓇᑲᓂᑯᓂᒡ᙮ 13ᐋᓂᑕ ᑕᔥ ᒎᐗᒃ ᑮᐸᐹᒥ​ᐊᔮᐗᒃ ᐁᑮᐸᐹ​ᓵᑭᒋᓂᔕᐙᐙᒡ ᒪᒋᐊᒑᑾᐞ᙮ ᐅᑮᑲᑴ​ᐋᐸᒋᑑᓈᐙ ᐅᐐᓱᐎᓂᓂ ᑳᑎᐯᒋᑫᓂᒡ ᒋᓴᓲᓐ ᒋᑲᔥᑭᐋᐙᒡ ᐃᓂᐌᓂᐗᓐ ᑳᑮᑭᑭᔥᑳᑯᓂᒡ ᒪᒋᐊᒑᑾᓐ, ᐅᐅ ᐁᑮᐃᑭᑐᐙᒡ: ᑭᑑᒋ​ᑲᓅᓂᓐ ᒋᓴᔅ ᐅᐐᓱᐎᓂᕽ, ᑆᓬ ᑳᑲᑮᒀᓈᒡ, ᒋᐅᒋ​ᓵᑲᐊᒪᓐ ᐃᐃᒫ, ᑮᐃᑭᑐᐗᒃ᙮ 14ᐊᐊ ᑕᔥ ᒎᐎᐊᓇᒥᐁᐎᑭᒫ ᓰᐸ Sceva ᑳᑮᐃᔑᓂᑳᓱᒡ, ᐅᑯᓯᓴᐞ ᑳᑮᓃᔣᒋᓂᒡ 7 ᐅᐅ ᑮᐃᔑᒋᑫᐗᐞ᙮ 15ᒪᒋᐊᒑᑾᓐ ᑕᔥ ᐅᑮᐃᑯᐙᓐ: ᒋᓴᔅ ᓂᑭᑫᓂᒫ, ᑆᓬ ᑲᔦ ᓂᑭᑫᓂᒫ᙮ ᐊᐌᓀᓇᒃ ᑕᔥ ᑮᓇᐙ? ᐅᑮᐃᑯᐙᓐ᙮ 16ᐃᓂᐌᓂᐗᓐ ᑕᔥ ᐃᓂᓂᐗᓐ ᑳᑮᑭᑭᔥᑳᑯᓂᒡ ᒪᒋᐊᒑᑾᓐ ᐅᑮᐅᑎᑎᓂᑯᐙᓐ ᐁᑮ​ᒦᑳᓂᑯᐙᒡ, ᑲᑭᓇ ᐁᑮ​ᔖᑰᒋᐃᑯᐙᒡ᙮ ᐙᑳᐃᑲᓂᕽ ᑕᔥ ᑮᐅᒋ​ᒫᒌᐸᐃᐌᐗᒃ ᐁᑮ​ᒫᑳᐱᓇᓂᑯᐙᒡ, ᐐᑫ ᐁᑮᐙᓵᑯᓇ​ᐌᐱᓂᑯᐙᒡ᙮ 17ᑲᑭᓇ ᑕᔥ ᒎᐗᒃ, ᑲᑭᓇ ᑲᔦ ᑳᒎᐎᐎᓯᒀ ᐁᐱᓴᔅ Ephesus ᐆᑌᓈᕽ ᑳᐊᔮᐙᒡ ᐁᓅᑕᒧᐙᒡ ᐅᐅ, ᐐᑫ ᑮᓭᑭᓯᐗᒃ᙮ ᑳᑎᐯᒋᑫᒡ ᒋᓴᔅ ᑕᔥ ᐅᐐᓱᐎᓐ ᑮᑭᑌᒋᑳᑌᓂ᙮ 18ᓃᐱᐗᐞ ᑕᔥ ᑳᑮᑌᐺᑕᒥᓂᒡ ᑮᐲᔖᐗᐞ ᒧᔐᔭᐄ ᐁᑮ​ᑎᐹᑐᑕᒥᓂᒡ, ᐁᑮᐐᑕᒥᓂᒡ ᑲᔦ ᐋᓃᓐ ᑳᑮᓂᑖ​ᐃᔑᒋᑫᓂᐸᓐ᙮ 19ᓃᐱᐗᐞ ᑲᔦ ᑳᑮᓅᒋᑑᓂᒡ ᒥᑌᐎᐎᓐ ᐅᑮ​ᒫᒪᐎ​ᐲᑑᓂ ᐅᒪᓯᓇᐃᑲᓂᓂ ᐁᑮ​ᓴᑲᐊᒥᓂᒡ ᒧᔐᔭᐄ᙮ ᐁᑮ​ᓴᑲᑲᑭᑕᒧᐙᒡ ᑕᔥ ᐁᓇᑭᑌᓂᑭᓐ ᐃᓂ ᒪᓯᓇᐃᑲᓇᓐ, ᓈᓂᒥᑕᓇ ᑕᓯᕽ ᒥᑖᔂᒃ 50,000 ᑕᓱ ᐙᐹᐱᑯ​ᔔᓂᔮᔅ ᑮᐃᔑᓭᓂᐗᓐ᙮ 20ᒦᑕᔥ ᐅᐅ ᓇᑫ ᑳᑎᐯᒋᑫᒡ ᐅᑎᑭᑐᐎᓐ ᑳᐊᓂᔑ​ᐊᐗᔑᒣ​ᒥᓯᑌᔥᑳᓂᒃ, ᓃᐱᐗᐞ ᑲᔦ ᐯᒫᑎᓯᓂᒡ ᐁᑮᐊᓂ​ᑌᐺᑕᒥᓂᒡ᙮ 21ᐅᐅ ᑕᔥ ᑳᐴᓂᓭᓂᒃ ᑆᓬ Paul ᑮᐃᓀᑕᒻ ᐁᐐᐃᔖᒡ ᒉᕒᐆᓴᓬᐊᒥᕽ Jerusalem ᐁᐐᐊᓂ​ᔖᐳᔥᑳᒡ ᒫᓯᑑᓂᔭ ᐊᑮᕽ Macedonia ᑲᔦᔥ ᐊᑫᔭ Achaia ᐊᑮᕽ᙮ ᐅᐅ ᑕᔥ ᑮᐃᑭᑐ: ᐊᐲ ᐌᑎ ᑮᐃᔥᒀ​ᐃᔖᔮᓐ, ᒦᔥ ᐁᔑᓈᑾᒃ ᒋᑮᐙᐸᑕᒫᐹᓐ ᐅᕒᐆᒻ Rome ᐆᑌᓇ, ᑮᐃᑭᑐ᙮ 22ᓃᔑᓐ ᐃᑕᔥ ᑳᑮᐐᒋᐃᑯᒡ, ᑎᒪᑏᓐ Timothy, ᐃᓂ ᑲᔦ ᐄᕒᐋᔅᑕᓴᓐ Erastus ᐅᑮᐃᔑᓂᔕᐙᐞ ᒫᓯᑑᓂᔮ ᐊᑮᕽ ᒋᐃᔖᓂᒡ᙮ ᐐᓐ ᑕᔥ ᑫᔮᐱ ᑮᐊᔮ ᐃᐃᒫ ᐁᔑᔭ Asia ᑭᒋ​ᐊᑮᕽ᙮ 23ᒦᑕᔥ ᐃᐃ ᐊᐲ ᑳᑮᒫᒌ​ᐅᒻᐺᑲᒥᑲᒃ ᐁᐱᓴᔅ ᐆᑌᓈᕽ ᐃᐃ ᐅᒋ ᑳᔑ​ᓈᓯᑲᐎᓐᒡ ᐃᓇᑫ ᑳᑎᐯᒋᑫᒡ᙮ 24ᐯᔑᒃ ᐃᓂᓂ ᑮᐊᔮ ᐃᐃᒫ ᑎᒦᑕᕒᐃᔭᔅ Demetrius ᐁᑮᐃᔑᓂᑳᓱᒡ ᐁᑮ​ᐲᐙᐱᑯᑫᐎᓂᓃᐎᒡ᙮ ᐙᐹᐱᑯ​ᔔᓂᔮᐙᐱᑯᕽ ᓴ ᐅᑮᐅᒋ​ᐅᔑᑑᓇᓐ ᐁᓇᒥᐁᐎᑲᒥᑰᓴᓐ ᐁᑮᐃᔑᓈᑾᓂᓂᑭᓐ ᑖᐱᔥᑰ ᐊᓇᒥᐁᐎᑲᒥᑯᕽ ᑳᑮᑕᔑ​ᐊᓇᒥᐁᑕᐎᒥᓐᒡ ᐃᑴᐎ​ᒪᓂᑑᑳᓇᓐ ᐋᕒᑎᒪᔅ Artemis ᐁᔑᓂᑳᓂᒥᓐᒡ᙮ ᓃᐱᐗᐞ ᓴ ᐃᐃᒫ ᑮᐅᒋ​ᑭᒋ​ᔔᓂᔮᑫᐗᐞ ᐅᑕᓄᑮᐞ᙮ 25ᒦᔥ ᑳᑮᒫᒪᐎ​ᐊᑐᒫᒡ ᐃᐃ ᐯᔑᑾᓐ ᐃᓇᑫ ᑳᑮᐃᓇᓄᑮᓂᒡ ᐁᑮᐃᓈᒡ: ᑮᓇᐙ, ᑭᑭᑫᑖᒻ ᐄᑐᒃ ᐅᐅ ᐊᓄᑮᐎᓐ ᐁᐅᒋ​ᓴᓭᑳ​ᑲᔥᑭᒋᑫᔭᕽ᙮ 26ᐃᓇᔥᑫ ᑕᔥ ᑭᐙᐸᑖᒻ, ᑭᓅᑖᒻ ᑲᔦ, ᑳᐐᓐ ᐐᓐ ᐁᑕ ᐅᒫ ᐁᐱᓴᔅ ᐆᑌᓈᕽ, ᒥᓯᐌ ᓴᑯ ᐁᔑᔭ ᐊᑮᕽ, ᐋᓃᓐ ᐊᐊ ᐃᓂᓂ ᑆᓬ ᐁᔑ​ᔖᑰᓱᒫᒡ ᐯᒫᑎᓯᓂᒡ᙮ ᓃᐱᐗᐞ ᐁᑌᐺᑖᑯᒡ ᐃᐃ ᑳᐃᑭᑐᒡ: ᐅᓂᒌᒫᕽ ᑳᐅᒋ​ᐅᔑᐃᑣ ᑳᐐᓐ ᑌᐺ ᒪᓂᑑᐎᓰᐗᒃ, ᐁᐃᑭᑐᑴᓐ᙮ 27ᑳᐐᓐ ᐐᓐ ᐁᑕ ᑭᑕᓄᑮᐎᓂᓈᓐ ᓇᓃᓵᓀᑖᑾᓯᓅᓐ ᓅᒋᑯ ᒋᐃᒋᑳᑌᒃ, ᐃᐃ ᓴ ᑲᔦ ᐊᓇᒥᐁᐎᑲᒥᒃ ᑳᐐᓐ ᑫᑰᓐ ᑕᐊᐲᑌᑖᑾᓯᓅᓐ ᑳᑕᔑ​ᐊᓇᒥᐁᑕᐎᓐᒡ ᐃᑴᐎ​ᒪᓂᑑ ᐋᕒᑎᒪᔅ ᐁᔑᓂᑳᓱᒡ᙮ ᑫᐐᓐ ᑕᔥ ᐊᐊ ᐃᑴᐎ​ᒪᓂᑑ ᐁᓇᒥᐁᑕᐎᓐᒡ ᒥᓯᐌ ᐁᔑᔭ ᐊᑮᕽ, ᒥᓯᐌ ᑲᔦ ᐊᑮᕽ, ᑳᐐᓐ ᑫᑰᓐ ᑕᓂ​ᐊᐲᑌᑖᑯᓯᓰ, ᐅᑮᐃᓈᐞ᙮ 28ᐊᐲ ᑕᔥ ᐁᓅᑕᒥᓂᒡ ᐅᐅ ᑮᑭᒋ​ᓂᔥᑳᑎᓯᐗᐞ, ᐅᐅ ᐁᑮᐃᔑ​ᔖᑯᐌᓂᒡ: ᑭᒋᐃᓀᑖᑯᓯ ᐋᕒᑎᒪᔅ ᐁᐱᓴᓯᕽ ᑳᑕᔑ​ᐊᓇᒥᐁᑕᐎᓐᒡ, ᑮᐃᑭᑐᐗᐞ᙮ 29ᒥᓯᐌ ᑕᔥ ᐃᐃᒫ ᐆᑌᓈᕽ ᑮᐊᔮ ᐗᐙᓀᑕᒧᐎᓐ᙮ ᒦᑕᔥ ᑳᐃᔑ​ᐅᑎᑎᓈᐙᒡ ᑫᔭᓴᓐ Gaius, ᐃᓂ ᑲᔦ ᐁᕒᐃᔅᑖᕒᑲᔅ Aristarchus ᑳᑮᐅᒌᓂᒡ ᒫᓯᑑᓂᔮ ᐊᑮᕽ, ᑆᓬᐊᓐ ᐅᐐᒌᐙᑲᓂᓂ᙮ ᐌᑎ ᑕᔥ ᐅᑮᐃᔑ​ᑳᑳᒋᐌᐱᓈᐙᐞ ᑳᑮᐃᔑ​ᓂᑖ​ᒫᒪᐎᔥᑳᕽ ᐅᑕᒥᓄᐎᑲᒥᑯᕽ᙮ 30ᑆᓬ ᑕᔥ ᑮᐃᓀᑕᒻ ᒋᑮ​ᐲᑎᑫᐸᓐ ᐃᐃᒫ ᐁᔑ​ᐊᔮᓂᐗᓂᓂᒃ ᐁᐐᐊᐎ​ᐃᓈᓴᒥᑳᐸᐎᑕᐙᒡ ᐁᐐ​ᑲᑲᓅᓈᒡ ᐅᑌᐺᑕᒨᐞ ᐃᑕᔥ ᑳᐐᓐ ᐅᑮ​ᐸᑭᑎᓂᑯᓰᐞ᙮ 31ᐋᓂᑕ ᓴ ᑳᑮᓃᑳᓀᑖᑯᓯᓂᒡ ᐃᐃᒫ ᐊᑮᕽ ᑫᑫᓂᒥᑯᒡ, ᑳᓵᑭ​ᐐᒌᐎᑯᒡ ᑲᔦ, ᑮᐲᒋᓂᔕᐅᐌᐗᐞ ᐁᒥᓴᐌᓂᒥᑯᒡ ᒋᐲᑎᑫᓯᒃ ᐃᐃᒫ ᑳᑮᐃᔑ​ᓂᑖ​ᒫᒪᐎᔥᑳᕽ ᑮᐅᑕᒥᓄᕽ᙮ 32ᐃᑭ ᑕᔥ ᐃᐃᒫ ᑳᑮᒫᒪᐎ​ᐊᔮᐙᒡ ᑮᐗᐙᓀᑕᒨᒃ᙮ ᐋᓂᑕ ᐯᔑᑾᓐ ᑮᐃᔑ​ᔖᑯᐌᐗᒃ, ᑯᑕᒃ ᐃᑕᔥ ᑲᔦ ᐸᑳᓐ ᑫᐐᓇᐙ ᑮᐃᔑ​ᔖᑯᐌᐗᒃ᙮ ᑫᑳ ᑲᑭᓇ ᐃᐃᒫ ᑳᑮᐊᔮᐙᒡ ᑳᐐᓐ ᐅᑮ​ᑭᑫᑕᓰᓈᐙ ᐌᑯᓀᓐ ᑳᑮᐅᒋ​ᒫᒪᐎ​ᐊᔮᐙᒡ᙮ 33ᐋᓂᑕ ᑕᔥ ᐃᐃᒫ ᑳᑮᐊᔮᐙᒡ ᑮᐃᓀᑕᒨᒃ ᐋᓬᐃᑭᓵᑕᕒᐊᓐ Alexander ᒫᐐᓐ ᐃᐃ ᑳᑮᐅᒋ​ᐃᓇᑲᒥᑲᓂᓂᒃ, ᐋᓃᔥ ᒎᐗᐞ ᐅᑮᐃᔑ​ᑳᒋᐌᐱᓈᓂ ᐃᐃᒫ ᓃᑳᓇᔭᐄ᙮ ᒦᔥ ᐋᓬᐃᑭᓵᑕᕒ ᑳᑮᐃᔑᓂᑫᐸᓂᐅᒡ ᒋᓅᑖᑎᓯᓂᒃ ᐁᐐ​ᑲᑭᑐᒡ ᐁᐐ​ᑲᓅᑕᒪᐙᒡ ᒎᐗᐞ᙮ 34ᐊᐲ ᑕᔥ ᐁᐙᐸᑕᒧᐙᒡ ᐁᒎᐎᐎᓂᒡ ᑲᑭᓇ ᑮᐯᔑᑯᑖᑯᓯᐗᒃ ᐁᑮᐃᔑ​ᔖᑯᐌᐙᒡ ᓃᔓᑎᐸᐃᑲᓐ ᒥᓂᒃ: ᑭᒋ​ᐃᓀᑖᑯᓯ ᐋᕒᑎᒪᔅ ᐁᐱᓴᓯᕽ ᑳᑕᔑ​ᐊᓇᒥᐁᑕᐎᓐᒡ᙮ 35ᐆᑌᓈᐎᑭᒫ ᑕᔥ ᐅᑮ​ᑲᔥᑭᒫᐞ ᑳᑮᐹᑏᓄᓂᒡ ᐱᓵᓐ ᒋᐊᔮᓂᒡ ᐁᑮᐃᓈᒡ: ᑮᓇᐙ ᐅᒫ ᐁᐱᓴᓯᕽ ᐌᒌᔦᒃ, ᑲᑭᓇ ᐄᑐᒃ ᐊᐎᔭ ᐅᑭᑫᑖᓐ ᐁᐱᓴᔅ ᐆᑌᓈᕽ ᐁᐅᒋ​ᑲᓇᐌᑖᑾᒃ ᐃᐃ ᐊᓇᒥᐁᐎᑲᒥᒃ ᑳᑕᔑ​ᐊᓇᒥᐁᑕᐎᓐᒡ ᑫᒋ​ᐃᓀᑖᑯᓯᒡ ᐋᕒᑎᒪᔅ, ᐊᐊᐌ ᐊᓯᓐ ᐁᓇᒥᐁᑕᐎᓐᒡ ᑭᒋᑮᔑᑯᕽ ᑳᑮᐅᒋ​ᐸᑭᔑᕽ᙮ 36ᑳᐐᓐ ᑕᔥ ᐊᐎᔭ ᐅᑖᔮᓉᑕᓰᓇᓐ ᐅᓄ᙮ ᒦᑕᔥ ᐃᐃ ᐱᓵᓐ ᐃᔑ​ᑲᑴ​ᐊᔮᒃ, ᒋᐃᔑᒋᑫᓯᐌᒃ ᑫᑰᓐ ᑫᒥᒋᓇᐌᐃᑯᔦᒃ᙮ 37ᑭᑮ​ᐲᓈᐗᒃ ᑕᔥ ᐅᑯ ᐃᓂᓂᐗᒃ, ᐋᓇᐐᓐ ᐁᑮᐅᒋ​ᑭᒨᑎᓯᒀ ᐊᓇᒥᐁᐎᑲᒥᑯᕽ, ᑫᑰᓐ ᑲᔦ ᐁᑮᐃᔑ​ᒪᒋ​ᐃᓈᓯᒀ ᑭᑎᑴ​ᒪᓂᑑᒥᓈᓂᓐ᙮ 38ᑮᔥᐱᓐ ᑕᔥ ᑎᒦᑕᕒᐃᔭᔅ Demetrius ᐃᐃ ᑲᔦ ᑳᐐᑕᓄᑮᒥᑯᒡ ᑫᑰᓐ ᐗᐃᔑ​ᐊᓈᒥᒫᐙᑴᓐ ᐊᐎᔭᓐ, ᐹᑭᓯᓂᓂᐗᓐ ᐅᔕ ᐅᓇᔓᐌᐎᑲᒥᑰᓐ, ᐊᔮᐗᐞ ᑲᔦ ᐅᓇᔓᐌᐎᑭᒫᐞ, ᐱᓵᓐ ᑕᔥ ᑕᒪᒥᔑᑖᑯᓯᐗᒃ᙮ 39ᑮᔥᐱᓐ ᑕᔥ ᑫᔮᐱ ᑫᑰᓐ ᐁᔮᑴᓐ ᐙᑕᔑᑕᒣᒃ, ᒦ ᐃ ᐁᔑᓈᑾᒃ ᐃᓈᑯᓂᑫᐎᓂᕽ ᒋᐅᒋ​ᓇᓇᐊᒋᑳᑌᑭᐸᓐ᙮ 40ᐃᓇᔥᑫ ᐐᑫ ᑭᓇᓃᓵᓂᐃᑎᓱᒥᓐ ᒋᒪᒥᔑᐃᑎᓱᔭᕽ ᒋᐃᓈᑯᓂᑰᔭᕽ ᑮᓇᐎᓐᑦ ᐁᐅᒻᐺᑲᒥᑭᓯᔭᕽ ᐅᐅ ᑳᐃᓇᑲᒥᑲᒃ ᓅᑯᒻ ᑳᑮᔑᑲᒃ᙮ ᑮᔥᐱᓐ ᑕᔥ ᐃᐃ ᐃᔑᓭᒃ, ᑳᐐᓐ ᑫᑰᓐ ᑭᑖ​ᐃᑭᑐᓰᒥᓐ ᑫᐅᒋ​ᔖᑰᓱᑖᑯᓯᔭᑭᐸᓐ, ᐋᓃᔥ ᐊᓂᔖ ᐅᐅ ᑭᑎᔑᒋᑫᒥᓐ, ᐅᑮᐃᓈᐞ᙮ 41ᐊᐲ ᑕᔥ ᐅᐅ ᑳᐃᔥᒀ​ᐃᑭᑐᒡ, ᐅᑮ​ᑲᓅᓈᐞ ᒋᐊᓂ​ᒫᒑᓂᒡ᙮

will be added

X\