Ishihcikewinan Ishihcikewinan 14

1ᐃᐃᒫ ᑕᔥ ᐋᐃᑰᓂᔭᒻ Iconium ᐆᑌᓈᕽ, ᑆᓬ Paul ᐊᐊ ᑲᔦ ᐹᕒᓇᐸᔅ Barnabas, ᑮᐲᑎᑫᐗᒃ ᐁᑮ​ᓂᑖᐊᔨᑎᐙᒡ ᐅᑕᓇᒥᐁᐎᑲᒥᑯᓃᕽ ᒎᐗᐞ᙮ ᑳᐊᐲᒋ​ᐌᐌᓂ ᑕᔥ ᑲᑭᑐᐙᒡ ᑮᐹᑏᓄᐗᐞ ᒎᐗᐞ, ᐃᐃ ᑲᔦ ᑳᒎᐎᐎᓯᓂᒃ ᑳᑮᑌᐺᑕᒥᓂᒡ᙮ 2ᐃᓂᐌᓂᐗᐞ ᑕᔥ ᒎᐗᐞ ᑳᑮᑌᐺᑕᓯᓂᒃ ᐅᑮᐅᒻᐺᐋᓂ ᑳᒎᐎᐎᓯᓂᒃ ᐁᑮ​ᔖᑰᓱᒫᓂᒡ ᒋᒪᒋ​ᐃᓀᓂᒫᓂᒡ ᐅᑌᐺᑕᒨᐞ᙮ 3ᑭᓉᔥ ᑕᔥ ᐃᐃᒫ ᑮᐊᔮᐗᒃ ᐁᑮ​ᓲᑭᑌᐁᐙᒡ ᐁᑮ​ᑕᔑᒫᐙᒡ ᑳᑎᐯᒋᑫᓂᒡ᙮ ᒦᐗᓐ ᓴ ᐃᓂ ᑳᒦᓂᑯᐙᒡ ᒋᑲᔥᑭᑑᐙᒡ ᒋᑑᑕᒧᐙᒡ ᒫᒪᑳᒋᒋᑫᐎᓇᓐ, ᒣᔮᒪᑳᑌᑖᑾᓂᓂᑭᓐ ᑲᔦ, ᑳᑎᐯᒋᑫᓂᒡ ᐁᑮᓈᑯᑑᓂᒡ ᐁᑌᐺᒪᑲᓂᓂᒃ ᐁᓍᑐᑕᒧᐙᒡ ᐅᑭᔐᐙᑎᓯᐎᓂᓂ᙮ 4ᑲᑭᓇ ᑕᔥ ᐊᐎᔭᒃ ᑮᓀᓈᐎᐃᑎᐗᒃ; ᐋᓂᑕ ᒎᐗᐞ ᐁᑮᐐᒌᐙᐙᒡ, ᐋᓂᑕ ᑕᔥ ᑲᔦ ᐃᔑᓂᔕᐙᑲᓇᐞ᙮ 5ᒎᐗᐞ ᐃᑕᔥ ᐃᐃ ᑲᔦ ᑳᒎᐎᐎᓯᓂᒃ ᐃᐃ ᑲᔦ ᑕᑯ ᑳᓃᑳᓂᑕᒫᑯᓂᒡ ᑮᒫᐗᒋᐃᑎᐗᐞ ᐁᐐᒪᒫᔑᑲᑖᑯᐙᒡ, ᐁᐐ​ᐸᐲᒶᓯᓇᐃᑯᐙᒡ ᑲᔦ᙮ 6ᐅᑮ​ᑭᑫᑖᓈᐙ ᑕᔥ ᐃᐃ ᐁᐐ​ᑑᑕᐎᑣ, ᐌᑎ ᑕᔥ ᑮᐊᐸᐃᐌᐗᒃ ᓬᐃᑫᔫᓂᔭ Lycaonia ᐊᑮᕽ, ᐁᔑ​ᐊᔮᓂᑭᓐ ᐆᑌᓇᐗᓐ ᓬᐃᔅᑕᕒᐊ Lystra, ᑕᕒᐱ Derbe ᐁᔑᓂᑳᑌᓂᑭᓐ, ᐃᔑᐙᑳᔭᐄ ᑲᔦ ᐌᑎ᙮ 7ᒦᑕᔥ ᐌᑎ ᑳᐃᔑ​ᐙᐐᑕᒧᐙᒡ ᒥᓍᒋᒧᐎᓐ᙮ 8ᐌᑎ ᑕᔥ ᓬᐃᔅᑕᕒᐊ Lystra ᐆᑌᓈᕽ ᑮᓇᒪᑕᐱᐗᓐ ᐯᔑᒃ ᐃᓂᓂᐗᓐ ᐁᑮ​ᒫᑭᓯᓂᒡ ᐅᓯᑎᓃᕽ, ᐁᑮᐃᔑ​ᓂᑖᐎᑭᓂᒡ ᐃᐃ ᓇᑫ ᐐᑳ ᐁᑮ​ᐱᒧᓭᓯᓂᒃ᙮ 9ᑆᓬ Paul ᑕᔥ ᐅᑮ​ᐱᓯᑖᑰᓐ ᐁᑲᑭᑐᒡ ᐃᓂ ᐃᓂᓂᐗᓐ᙮ ᐅᑮ​ᑲᓇᐙᐸᒫᓐ ᑕᔥ, ᐁᓂᓯᑕᐎᓇᐙᒡ ᑕᔥ ᐁᐊᔮᓂᒡ ᑌᐺᔦᑕᒧᐎᓐ ᒋᒥᓄᐊᔮᐃᒥᓐᒡ, 10ᒦᔥ ᑳᐃᓈᒡ: ᐸᓯᑸᓐ ᒋᓃᐸᐎᔭᓐ! ᐅᑮᐃᓈᓐ᙮ ᔐᒫᒃ ᑕᔥ ᐃᑯ ᑮᐸᓯᑸᐗᓐ, ᐁᑮᒫᒌ​ᐱᒧᓭᓂᒡ᙮ 11ᐊᐲ ᑕᔥ ᑳᑮᒫᒪᐎ​ᐊᔮᓂᒡ ᐁᐙᐸᑕᒥᓂᒡ ᑆᓬ ᑳᑮᐃᔑᒋᑫᒡ, ᓬᐃᑫᔫᓂᔭ ᐃᔑᑮᔗᐎᓐ ᓴ ᐅᑮ​ᔮᐸᒋᑑᓂ ᐁᐃᑭᑐᓂᒡ: ᒪᓂᑑᒃ ᑭᑑᑎᓯᑯᓈᓂᒃ ᐃᓂᓃᕽ ᐁᐃᔑᓈᑯᓯᐙᒡ, ᑮᐃᑭᑐᐗᐞ᙮ 12ᐹᕒᓇᐸᓴᓐ Barnabas ᑕᔥ ᓲᔅ Zeus ᐅᑮᐃᔑᓂᑳᓈᐙᓐ᙮ ᑆᓬᐊᓐ Paul ᑕᔥ ᐊᕒᒦᔅ Hermes ᐅᑮᐃᔑᓂᑳᓈᐙᓐ ᐋᓃᔥ ᑮᓃᑳᓂᑲᑭᑐᐗᓐ᙮ 13ᑮᐊᔮᐗᓐ ᑕᔥ ᐃᐃᒫ ᐃᓂᓂᐗᓐ ᑳᑮᐊᓇᒥᐁᓄᑮᑕᐙᓂᒡ ᒪᓂᑑᓐ Zᐆᔅ ᐁᓂᒥᓐᒡ᙮ ᐅᑕᓇᒥᐁᐎᑲᒥᑯᓂ ᑕᔥ ᐊᑾᒌᕽ ᐆᑌᓈᕽ ᑮᐃᔑ​ᐸᑕᑭᑌᓂ᙮ ᒦᐗᓐ ᑕᔥ ᐃᓂ ᑳᑮᐲᓈᓂᒡ ᐋᐯ​ᐱᔑᑮᓴᓐ, ᑳᑮᐲᑑᓂᒡ ᑲᔦ ᐃᐃᒫ ᐁᔑ​ᐃᔥᒀᑌᒥᐗᓂᓂᒃ ᐆᑌᓇ᙮ ᐅᑮᐊᑕᐌᑕᒥᓂ, ᐃᐃ ᑲᔦ ᑳᐹᑏᓄᓂᒡ ᐁᐐ​ᐸᑭᑎᓈᓲᑕᒫᑯᐙᒡ᙮ 14ᐊᐲ ᑕᔥ ᐹᕒᓇᐸᔅ Barnabas, ᐊᐊ ᑲᔦ ᑆᓬ Paul ᐁᓅᑕᒧᐙᒡ ᐙᐃᔑᒋᑫᐃᑣ, ᐅᑮ​ᑖᔥᑮᑭᐱᑑᓈᐙᓐ ᐅᑭᑭᔥᑭᑲᓂᐙᓐ ᐁᑮᐅᓱᓵᒣᑕᒧᐙᒡ᙮ ᑮᐊᐸᑑᐗᒃ ᑕᔥ ᒣᑴᔭᐄ ᐁᔑ​ᒫᒪᐎ​ᐊᔮᓂᒡ ᐁᑮᐃᔑ​ᔖᑯᐌᐙᒡ: 15ᐋᓃᓐ ᐃᓈ ᐅᓱᓵᒪᑲᒥᒃ ᐁᔑᒋᑫᔦᒃ! ᓂᒥᒋ​ᐃᓂᓃᐎᒥᓐ ᐅᔕ ᑫᓃᓇᐎᓐᑦ ᑖᐱᔥᑰ ᑮᓇᐙ ᑳᐃᔑ​ᐊᔮᔦᒃ᙮ ᑭᐱ​ᐐᑕᒫᑰᒻ ᐅᔕ ᒥᓍᒋᒧᐎᓐ ᐁᐐᑕᒫᑰᔦᒃ ᒋᐴᓂᑑᔦᒃ ᑫᑰᓐ ᐁᓀᑖᑾᓯᓄᑭᓐ, ᒣᔥᑾᒡ ᐃᑕᔥ ᒋᓈᓯᑲᐌᑭᐸᓐ ᑭᔐᒪᓂᑑ ᑳᐱᒫᑎᓯᒡ, ᑳᑮᐅᔑᑑᒡ ᑮᔑᒃ, ᐊᑭ, ᑭᒋᑲᒻ ᑲᔦ, ᑲᑭᓇ ᑲᔦ ᐃᐃᒫ ᐁᔮᓂᑭᓐ᙮ 16ᐃᓇᔥᑫ ᐅᑖᓈᕽ ᐅᑮ​ᐸᑭᑎᓈᐞ ᑳᐯᐸᑳᓉᐙᓇᑭᓯᓂᒡ ᐯᒫᑎᓯᓂᒡ ᐱᓵᓐ ᐃᑯ ᓇᑫ ᐙᐃᔑᐱᒫᑎᓯᓂᒡ ᒋᐃᔑᒋᑫᓂᒡ᙮ 17ᐃᓇᔥᑫ ᑳᐐᓐ ᑫᑰᓐ ᑮᐃᔥᑯ​ᐃᔑᒋᑫᓰ ᑫᒋᓈᒡ ᐃᑯ ᑫᐅᒋ​ᑭᑫᑖᑯᓯᒡ ᐁᒥᓄᒋᑫᒡ᙮ ᐐᓐ ᐄᑐᒃ ᑮᔑᑯᕽ ᑳᐅᒋ​ᑭᒥᐗᓄᑫᒡ, ᑳᒦᓂᓀᒃ ᑲᔦ ᑭᑎᑳᓇᓐ ᑫᒪᓂᔕᒧᐌᒃ, ᐐᓐ ᑲᔦ ᑳᒦᓂᓀᒃ ᒦᒋᒻ, ᑫᐅᒋ​ᒥᓉᑕᒧᐌᒃ ᑲᔦ, ᐅᑮᐃᓈᐙᐞ᙮ 18ᐅᐅᐌᓂ ᑕᔥ ᐋᓇᑮᐃᑭᑐᐙᒡ, ᐊᑳᐙ ᐅᑮ​ᑲᔥᑭᒫᐙᐞ ᑳᒫᒪᐐᓄᓂᒡ ᒋᐸᑭᑎᓈᓱᑕᒫᑯᓯᒀ᙮ 19ᐋᓂᑕ ᑕᔥ ᒎᐗᐞ ᑮᐱᑕᑯᔑᓅᐞ ᐁᑎᔮᒃ Antioch ᐆᑌᓈᕽ, ᐋᐃᑰᓂᔭᒻ Iconium ᐆᑌᓈᕽ ᑲᔦ ᐁᑮᐱᐅᒌᓂᒡ᙮ ᐅᑮ​ᔖᑰᓱᒫᓂ ᐃᑕᔥ ᑳᒫᒪᐐᓄᓂᒡ᙮ ᒦᑕᔥ ᑆᓬ ᑳᑮᐸᐲᒶᓯᓇᐃᑯᒡ ᐁᑮ​ᓵᑭᒋ​ᑖᐲᐸᐃᑯᒡ ᐃᐃᒫ ᐆᑌᓈᕽ, ᓂᐳᐎᑐᒃ ᒫᐐᓐ ᐁᑮᐃᓀᓂᒥᑯᒡ᙮ 20ᐅᑌᐺᑕᒨᐞ ᐃᑕᔥ ᑳᐃᔥᒀ​ᐙᑳᑳᐸᐎᑖᑯᒡ, ᑮᐗᓂᔥᑳ ᐆᑌᓈᕽ ᐁᑮᑮᐌᐃᔖᒡ᙮ ᐁᐊᓂ​ᐙᐸᓂᓂᒃ ᑕᔥ ᐅᑮᒫᒌ​ᐐᒌᐙᓐ ᐹᕒᓇᐸᓴᓐ Barnabas ᑕᕒᐱ Derbe ᐆᑌᓈᕽ ᐁᑮᐃᔖᐙᒡ᙮ 21ᐊᐲ ᑕᔥ ᑳᐐᑕᒫᑫᐙᒡ ᐃᐃ ᒥᓍᒋᒧᐎᓐ ᐃᐃᒫ ᑭᒋ​ᐆᑌᓈᕽ, ᓃᐱᐗᐞ ᐊᐎᔭᐞ ᑮᒫᒌ​ᑌᐺᑕᒨᐞ᙮ ᐌᑎ ᑕᔥ ᐃᓇᑫ ᑮᐃᔑ​ᐊᔐ​ᑮᐌᐗᒃ ᓬᐃᔅᑕᕒᐊ Lystra ᐆᑌᓈᕽ, ᐋᐃᑰᓂᔭᒻ ᐆᑌᓈᕽ, ᐌᑎ ᑲᔦ ᐁᑎᔮᒃ ᐆᑌᓈᕽ᙮ 22ᒦᑕᔥ ᐃᐃᒫ ᑳᑕᔑ​ᐐᒌᐙᐙᒡ ᐅᑌᐺᑕᒨᐞ ᑫᔮᐱ ᒋᒪᔥᑲᐌᑕᒥᓂᒡ, ᒋᐸᑭᒌᓯᓂᒃ ᐃᐃ ᑳᑮᐃᔑ​ᑌᐺᑕᒥᓂᒡ ᐁᑮᐃᑭᑐᐙᒡ: ᐅᒋᑕᑯ ᐃᔑᓈᑾᓐ ᓃᐱᐗᐞ ᐗᓯᑖᐎᓭᐎᓐ ᒋᓇᑭᔥᑲᒪᕽ ᐐᐲᑎᑫᔭᕽ ᑭᔐᒪᓂᑑ ᐅᑎᐯᒋᑫᐎᓐ᙮ 23ᐊᐲ ᑕᔥ ᑳᐅᓇᑭᒫᐙᒡ ᑫᓃᑳᓂᓯᓂᒡ ᑳᔑ​ᒫᒫᐗᒋᐃᑎᓂᒡ ᐅᑌᐺᑕᒨᐞ, ᑮᐊᓇᒥᐋᐗᒃ ᑕᑯ ᑲᔦ ᑮᒪᑕᐐᐃᑎᓱᐗᒃ ᐁᑮ​ᐸᑭᑎᓇᒪᐙᐙᒡ ᑳᑎᐯᒋᑫᓂᒡ ᒋᑲᓇᐌᓂᒫᓂᒡ ᐃᐃ ᑳᑮᑌᐺᑖᑯᓂᒡ᙮ 24ᑮᐊᓂ​ᔖᐳᔥᑳᐗᒃ ᐃᑕᔥ ᐱᓯᑎᔭ Pisidia ᐊᑮᕽ, ᐃᐃᒫ ᑕᔥ ᐹᐱᓬᐃᔭ Pamphylia ᐊᑮᕽ ᑮᐃᔑ​ᑕᑯᔑᓅᒃ᙮ 25ᒦᑕᔥ ᐃᐃᒫ ᐯᕒᑲ Perga ᐆᑌᓈᕽ ᑳᑕᔑ​ᐐᑕᒫᑫᐙᒡ ᒥᓍᒋᒧᐎᓐ᙮ ᑮᐊᓂ​ᐃᔖᐗᒃ ᑕᔥ ᐌᑎ ᐊᑖᓬᐃᔭ Attalia ᐁᔑᑖᓂᐗᓂᓂᒃ᙮ 26ᒦᑕᔥ ᐃᐃᒫ ᑭᒋ​ᒌᒫᓂᕽ ᑮᐅᒋ​ᑮᐌᔮᔑᐗᒃ ᐁᑎᔮᒃ ᐃᓇᑫ ᐁᑮᐃᔖᐙᒡ᙮ ᒦ ᐄᑐᒃ ᐃᐃᒫ ᑳᑮᐅᒋ​ᒫᒑᐙᐸᓐ ᑳᑮᐸᑯᓭᓂᒥᒥᓐᒡ ᑭᔐᒪᓂᑑᓐ ᐅᑭᔐᐙᑎᓯᐎᓂᓃᕽ ᒋᔑ​ᑲᓇᐌᓂᒥᑯᐙᒡ ᒋᑑᑕᒧᐙᒡ ᐃᐃ ᐊᓄᑮᐎᓐ ᓅᑯᒻ ᑳᑮᑮᔑᑑᐙᒡ᙮ 27ᐊᐲ ᑕᔥ ᑳᑕᑯᔑᓄᐙᒡ ᐅᑮᒫᒪᐎᐊᑐᒫᐙᐞ ᐅᑌᐺᑕᒨᐞ ᐁᑮ​ᑎᐹᒋᒧᐙᒡ ᐋᓃᓐ ᑲᑭᓇ ᑫᑰᓐ ᑳᑮᐃᔑᒋᑫᓂᒡ ᑭᔐᒪᓂᑑᓐ ᐁᐐᑕᓄᑮᒥᑯᐙᒡ, ᐋᓃᓐ ᑲᔦ ᑳᑮᐃᔑ​ᐹᑭᓇᒪᐙᓂᒡ ᐃᐃ ᑳᒎᐎᐎᓯᓂᒃ ᒋᑌᐺᔦᑕᒥᓂᒡ᙮ 28ᑭᓉᔥ ᑕᔥ ᐃᐃᒫ ᑮᐊᔮᐗᒃ ᐁᑮᐐᒌᐙᐙᒡ ᐅᑌᐺᑕᒨᐞ᙮

will be added

X\