1 ᐃᔑᓂᔕᐙᑲᓇᒃ ᑕᔥ, ᐅᑌᐺᑕᒨᒃ ᑲᔦ ᒎᑏᔭᑮᕽ Judea ᑳᐊᔮᐙᒡ ᑮᓅᑕᒨᒃ ᐃᐃ ᑳᒎᐎᐎᓯᓂᒃ ᐁᑮᐅᑖᐱᓇᒥᓂᒡ ᑭᔐᒪᓂᑑᓐ ᐅᑎᑭᑐᐎᓂᓂ᙮ 2 ᐊᐲ ᑕᔥ ᐲᑕᕒ Peter ᑳᑕᑯᔑᕽ ᒉᕒᐆᓴᓬᐊᒥᕽ Jerusalem ᐅᑮᐋᓍᐸᒥᑰᐞ ᐃᐃ ᑳᑭᑭᓇᐙᑕᔕᑫᔣᓯᐎᒥᓐᒡ ᐅᑌᐺᑕᒨᐞ ᐁᑮᐃᑯᒡ, 3 ᑭᑮᐲᑎᑲᐙᒃ ᐃᐃ ᑳᑭᑭᓇᐙᑕᔕᑫᔣᓯᐎᑣ, ᑭᑮᐐᒋᐐᓯᓃᒫᒃ ᐃᑕᔥ ᑲᔦ, ᐅᑮᐃᑰᐞ᙮ 4 ᐲᑕᕒ ᑕᔥ ᑮᒫᒌᑲᑭᑐ ᐁᑮᐐᑕᒪᐙᒡ ᐋᓃᓐ ᒪᔮ ᑳᐃᔑᓭᓂᒃ ᐁᑮᐃᑭᑐᒡ: 5 ᒣᒀ ᒑᐸ Joppa ᐆᑌᓈᕽ ᐁᐊᔮᔮᓐ ᐁᐊᓇᒥᐋᔮᓐ, ᑫᑰᓐ ᓂᑮᐃᔑᓇᒻ᙮ ᓂᑮᐙᐸᑖᓐ ᑫᑰᓐ ᑮᔑᑯᕽ ᐁᐲᓈᑾᒃ ᐁᐃᔑᓈᑾᒃ ᐃᔒᑭᓄᕽ ᑳᔑᓇᓃᐎᑮᑫᔩᑲᒃ ᐁᐱᐅᒋᓃᓵᐲᑭᓂᑳᑌᒃ᙮ ᓃᓐ ᓂᑮᐱᓈᓯᑳᑯᓐ᙮ 6 ᐁᑲᓇᐙᐸᑕᒫᓐ ᑕᔥ, ᓂᑮᐙᐸᒫᒃ ᑳᓃᐎᑳᑌᐙᒡ ᐊᔭᐋᐎᔕᒃ, ᐱᑾᒋᐊᔭᐋᐎᔕᒃ ᑲᔦ, ᑭᓀᐱᑰᒃ ᑲᔦ, ᐱᓀᔒᔕᒃ ᑲᔦ ᐃᔥᐱᒥᕽ ᐯᒫᒥᓭᐙᒡ᙮ 7 ᓂᑮᓅᑕᐙ ᑕᔥ ᐊᐎᔭ ᐁᑲᓅᔑᒡ ᐁᐃᑭᑐᒡ: ᐗᓂᔥᑳᓐ ᐲᑕᕒ! ᓂᔑ ᒋᐊᒶᑣ, ᓂᑮᐃᒃ᙮ 8 ᐅᐅ ᑕᔥ ᓂᑮᐃᓈ: ᑳᐐᓐ ᑌᐯᒋᑫᔭᓐ! ᑳᐐᓐ ᐐᑳ ᓂᐱᒦᒋᓰᓐ ᑳᐐᓀᑖᑾᒃ, ᑳᒪᓈᒦᒋᓈᑳᑌᒃ ᒦᒋᒻ᙮ 9 ᒦᓇᐙ ᑕᔥ ᑭᒋᑮᔑᑯᕽ ᐊᐎᔭ ᓂᑮᐅᒋᑲᓅᓂᒃ: ᑫᑰ ᐃᑕᑫᓐ ᐁᐐᓀᑖᑾᒃ ᑭᔐᒪᓂᑑ ᑳᐯᑭᑑᒡ, ᓂᑮᐃᒃ᙮ 10 ᓃᔣ ᐅᐅ ᑮᑑᒋᑳᑌ, ᒦᑕᔥ ᑮᔑᑯᕽ ᑳᐃᔑᑮᐌᐃᔥᐱᐱᒋᑳᑌᒃ᙮ 11 ᐃᓇᔥᑫ ᒦ ᐃ ᐊᐲ ᓂᓯᓐ ᐃᓂᓂᐗᒃ ᑮᑕᑯᔑᓅᒃ ᑳᑮᐲᒋᓂᔕᐅᑣ᙮ ᑮᐱᓃᐸᐎᐗᒃ ᐃᐃᒫ ᐙᑳᐃᑲᓂᕽ ᑳᑮᐃᔑᑲᐯᔑᔮᓐ, ᓭᓴᕒᐄᔭ Caesarea ᐆᑌᓈᕽ ᑮᐱᐅᒌᐗᒃ ᐁᑮᐱᓈᓯᑲᐎᐙᒡ᙮ 12 ᑭᔐᒪᓂᑑ ᐅᑕᒑᑾᓐ ᑕᔥ ᓂᑮᐐᑕᒫᒃ ᒋᑆᑕᐐᓯᐙᓐ ᒋᐐᒌᐎᒪᒃ᙮ ᐅᑯ ᑕᔥ ᑲᔦ ᓂᑯᑣᓱ ᓃᒋᐅᑌᐺᑕᒨᒃ ᓂᑮᐐᒌᐎᑰᒃ᙮ ᒦᔥ ᑳᑮᐲᑎᑫᔮᕽ ᒀᕒᓃᓬᐃᔭᔅ Cornelius ᐅᐙᑳᐃᑲᓐ᙮ 13 ᓂᑮᐐᑕᒫᑯᓈᓐ ᑕᔥ ᑳᐃᔑᐙᐸᒫᒡ ᐁᒐᓬᐊᓐ ᐁᓃᐸᐎᓂᒡ ᐅᐙᑳᐃᑲᓂᕽ ᐁᑮᐃᑯᒡ ᐄᓴᓐ: ᐃᔑᓂᔕᐅᐌᓐ ᒑᐸ ᐆᑌᓈᕽ ᓵᐃᒪᓐ ᐲᑕᕒ ᑳᐃᔑᓂᑳᓱᒡ ᒋᐊᑐᒪᒡ᙮ 14 ᒦᑕᔥ ᐊᐊᐌ ᑫᐐᑕᒪᐎᒃ ᐃᑭᑐᐎᓇᓐ ᑫᐅᒋᐱᒫᒋᐃᑰᐎᓯᔭᓐ, ᐃᑭ ᑲᔦ ᑲᑭᓇ ᐁᔮᐙᒡ ᐃᐃᒫ ᑳᔑᐊᔮᔭᓐ, ᐅᑮᐃᑰᓐ ᐄᓴᓐ᙮ 15 ᐊᐲ ᑕᔥ ᑳᒫᒌᑳᑮᑭᑐᔮᓐ, ᑭᔐᒪᓂᑑᓐ ᐅᑕᒑᑯᓂ ᐅᑮᐅᑎᓯᑯᐙᓐ ᑖᐱᔥᑰ ᑮᓇᐎᓐᑦ ᓂᑕᒻ ᑳᑮᐃᔑᐅᑎᓯᔭᒥᓐᒡ᙮ 16 ᒦᑕᔥ ᑳᑮᒫᒥᑲᐎᔮᓐ ᐅᐅ ᑳᑮᐃᑭᑐᐸᓐ ᑳᑎᐯᒋᑫᒡ: ᒞᓐ John ᓂᐲᓂ ᐅᑮᔮᐸᒋᑑᓐ ᓰᑲᐊᑖᑫᒡ, ᑮᓇᐙ ᑕᔥ ᐐᓐ ᓰᑲᐊᑖᑰᔦᒃ, ᑭᔐᒪᓂᑑᓐ ᐅᑕᒑᑾᓐ ᑕᔮᐸᑎᓯᐗᓐ, ᑮᐃᑭᑐᐸᓐ᙮ 17 ᑮᔥᐱᓐ ᑕᔥ ᑭᔐᒪᓂᑑ ᒦᓈᒡ ᐃᐃ ᑳᒎᐎᐎᓯᓂᒃ ᐃᐃ ᐯᔑᑾᓐ ᑎᓄ ᒦᑭᐌᐎᓐ ᑳᑮᐃᔑᒦᓂᑰᐎᓯᔭᕽ ᐊᐲ ᑮᑌᐺᔦᓂᒪᕽ ᒋᓴᔅ X, ᐊᐌᓀᓐ ᑕᔥ ᓃᓐ ᑫᑎᓄᐎᔮᐹᓐ ᒋᑲᑴᓇᑳᔅᑲᐗᑭᐸᓐ ᑭᔐᒪᓂᑑ, ᑮᐃᑭᑐ ᐲᑕᕒ᙮ 18 ᐊᐲ ᑕᔥ ᑳᓅᑖᑯᒡ ᐅᐅ ᐁᓈᒋᒧᒡ ᑳᐐᓐ ᑮᓅᑖᑎᓰᐗᐞ᙮ ᒦᑕᔥ ᑳᐃᔑᓇᓈᑯᒫᓂᒡ ᑭᔐᒪᓂᑑᓐ ᐁᐃᑭᑐᓂᒡ: ᑭᔐᒪᓂᑑ ᐅᔕ ᐄᓴᓐ ᐅᐸᑭᑎᓇᒪᐙᐞ ᐃᐃ ᑳᒎᐎᐎᓯᓂᒃ ᒋᑴᑳᑎᓯᓂᒡ, ᒋᐅᒋᐱᒫᑎᓯᓂᒡ ᑲᔦ, ᑮᐃᑭᑐᐗᐞ᙮ 19 ᐊᐲ ᑕᔥ ᐃᔅᑏᐱᓐ Stephen ᑮᓂᓯᓐᒡ, ᒦ ᐃ ᐊᐲ ᑳᑮᒫᒌᑲᒀᑕᑭᐃᑣ ᐅᑌᐺᑕᒨᒃ᙮ ᐋᓂᑕ ᑕᔥ ᐅᑌᐺᑕᒨᒃ ᑳᑮᐲᐎᐸᐃᐌᐙᒡ ᑮᐃᔖᐗᒃ ᐱᓃᔑᔭ Phoenicia, ᒥᓂᓯᕽ ᑲᔦ ᓵᐃᐸᕒᐊᔅ Cyprus ᐁᔑᓂᑳᑌᓂᒃ, ᐁᑎᔮᒃ Antioch ᐆᑌᓈᕽ ᑲᔦ ᐁᑮᐸᐹᒥᓍᒋᒧᐙᒡ, ᒎᐗᐞ ᐁᑕ ᐁᑮᐐᑕᒪᐙᐙᒡ᙮ 20 ᐋᓂᑕ ᑕᔥ ᐅᑌᐺᑕᒨᒃ ᑮᐲᐅᒌᐗᒃ ᓵᐃᐸᕒᐊᔅ, ᓵᐃᕒᐄᓂ Cyrene, ᐁᑎᔮᒃ ᐆᑌᓈᕽ ᐁᑮᐃᔑᑕᑯᔑᓄᐙᒡ᙮ ᑳᒎᐎᐎᓯᓂᒃ ᐃᑕᔥ ᑲᕒᐄᒃ Greek ᑎᓄ ᐅᑮᐐᑕᒪᐙᐙᐞ ᐃᐃ ᐁᔑᒥᓍᒋᒥᒥᓐᒡ ᑳᑎᐯᒋᑫᓂᒡ ᒋᓴᓲᓐ᙮ 21 ᐅᑲᔥᑭᐁᐎᓯᐎᓂᓂ ᑕᔥ ᑳᑎᐯᒋᑫᓂᒡ ᐅᑮᐐᒌᐎᑯᓈᐙ, ᓃᐱᐗᐞ ᑕᔥ ᐯᒫᑎᓯᓂᒡ ᑮᑌᐺᑕᒨᐞ ᐁᑮᑴᑮᓄᑕᐙᓂᒡ ᑳᑎᐯᒋᑫᓂᒡ᙮ 22 ᐅᑌᐺᑕᒨᒃ ᑕᔥ ᒉᕒᐆᓴᓬᐊᒥᕽ Jerusalem ᑳᐊᔮᐙᒡ ᑮᓅᑕᒨᒃ ᐅᐅ ᐁᐃᔑᓭᓂᒃ᙮ ᒦᑕᔥ ᑳᑮᐃᔑᓂᔕᐙᐙᒡ ᐹᕒᓇᐸᓴᓐ Barnabas ᒋᐃᔖᓂᒡ ᐌᑎ ᐁᑎᔮᒃ ᐆᑌᓈᕽ᙮ 23 ᐊᐲ ᑕᔥ ᐹᕒᓇᐸᔅ ᐁᑕᑯᔑᕽ ᐅᑮᐙᐸᒫᐞ ᐅᑌᐺᑕᒨᐞ ᐁᑮᔕᐌᓂᒥᑯᓂᒡ ᑭᔐᒪᓂᑑᓐ᙮ ᐐᑫ ᑕᔥ ᑮᒌᑫᑕᒻ ᐁᑮᐊᔮᒀᒥᒫᒡ ᑲᔦ ᒨᔕᒃ ᐃᑯ ᑌᐺ ᒋᐱᒥᓂᔕᐙᓂᒡ ᑭᔐᒪᓂᑑᓐ᙮ 24 ᐋᐱᒋ ᓴ ᑮᓴᓭᑳᐃᓂᓃᐎ, ᐁᑮᒨᔥᑭᓀᔥᑳᑯᒡ ᑭᔐᒪᓂᑑᓐ ᐅᑕᒑᑯᓂ, ᑌᐺᑕᒧᐎᓐ ᑲᔦ᙮ ᑮᐊᓂᓇᑭᐹᑏᓄᐗᒃ ᑕᔥ ᑳᑮᑌᐺᑕᐙᐙᒡ ᑭᔐᒪᓂᑑᓐ᙮ 25 ᑮᐃᔖ ᑕᔥ ᑖᕒᓴᔅ Tarsus ᐆᑌᓈᕽ ᐁᑮᐊᑐᓀᐙᒡ ᔂᓬᐊᓐ Saul᙮ 26 ᐊᐲ ᑕᔥ ᑳᒥᑲᐙᒡ ᐅᑮᐲᓈᓐ ᐃᐃᒫ ᐁᑎᔮᒃ ᐆᑌᓈᕽ᙮ ᐯᔑᑯᐱᐴᓐ ᑕᔥ ᐃᐃᒫ ᑮᐊᔮᐗᒃ ᐁᑮᒫᒫᐗᒋᐋᐙᒡ ᐅᑌᐺᑕᒨᐞ, ᓃᐱᐗᐞ ᑲᔦ ᐁᑮᑭᑭᓄᐊᒪᐙᐙᒡ᙮ ᒦᑕᔥ ᐃᐃᒫ ᐆᑌᓈᕽ ᐁᑎᔮᒃ ᐅᑌᐺᑕᒨᒃ ᓂᑕᒻ ᑳᑮᐃᔑᓂᑳᓂᑣ X ᐅᐱᒥᓂᔕᐙᑲᓇᐞ᙮ 27 ᒦᑕᔥ ᐃᐃ ᐊᐲ ᐋᓂᑖ ᑳᑮᑕᑯᔑᓄᐙᒡ ᑳᑲᓅᑕᒪᐙᐙᒡ ᑭᔐᒪᓂᑑᓐ ᐃᐃᒫ ᐁᑎᔮᒃ, ᐁᑮᐅᒌᐙᒡ ᒉᕒᐆᓴᓬᐊᒥᕽ᙮ 28 ᐯᔑᒃ ᑕᔥ ᐃᓂᓂ ᐋᑲᐸᔅ Agabus ᐁᔑᓂᑳᓱᒡ ᑮᐸᓯᑸ᙮ ᑭᔐᒪᓂᑑᓐ ᐅᑕᒑᑯᓂ ᑕᔥ ᐅᑮᒦᓂᑰᓐ ᒋᐐᑕᕽ ᐁᐐᓅᑌᓭᓂᒃ ᒦᒋᒻ ᒥᓯᐌ ᐊᑮᕽ᙮ ᒦᑕᔥ ᑌᐺ ᑳᐃᔑᐌᐸᓂᓂᒃ ᒣᒀ ᐊᐲ ᑲᓬᐋᑎᔭᓴᓐ Claudius ᑮᑭᒋᐅᑭᒫᐎᓂᒡ᙮ 29 ᐅᑌᐺᑕᒨᒃ ᑕᔥ ᐯᐯᔑᒃ ᑮᐃᓀᑕᒨᒃ ᐁᑯᑲᔥᑭᑑᐙᒡ ᒋᐃᔑᓂᔕᐊᒪᐙᐙᒡ ᐐᒋᐃᐌᐎᓐ ᐅᑌᐺᑕᒨᐞ ᐁᔮᓂᒡ ᒎᑏᔭᑮᕽ Judea᙮ 30 ᒦᑕᔥ ᐅᐅ ᑳᐃᔑᒋᑫᐙᒡ ᐁᑮᐃᔑᓂᔕᐊᒪᐙᐙᒡ ᑳᓃᑳᓀᑖᑯᓯᓂᒡ ᐊᓇᒥᐋᐎᓂᕽ᙮ ᐹᕒᓇᐸᔅ ᑕᔥ, ᔂᓬ Saul ᑲᔦ ᑮᐊᓅᓈᐗᒃ ᒋᐃᔑᐎᑑᐙᒡ ᐃᐃ ᐐᒋᐃᑎᐎᓐ᙮
