1 Tehsalooniyanak 3

1ᐅᓵᒻ ᐃᑕᔥ ᑭᑮᑸᓄᒥᑰᒻ ᐁᑮᓅᑕᓯᐙᕽ ᐋᓃᓐ ᐁᔑᐊᔮᔦᒃ᙮ ᒦᐃ ᑳᐅᒋᑮᔐᑕᒫᕽ ᓃᓀᑕᐎᓐᑦ ᐃᐃᒫ ᐋᑎᓰᐎ ᐆᑌᓈᕽ Athens ᒋᐃᔥᑸᔮᕽ᙮ 2ᐊᐊ ᑕᔥ ᑎᒪᑎ Timothy ᑭᑮᐃᔑᓂᔕᐊᒫᑰᒻ ᒋᒫᐗᑎᓯᓀᒃ᙮ ᓃᒋᑭᐌᓈᓐ ᓂᑎᓀᓂᒫᓈᓐ, ᑲᔦ ᐅᐐᑑᑲᐙᓐ ᑭᔐᒪᓂᑑᓐ ᐁᐐᑕᒫᑫᒡ ᐃᐃᐌᓂ ᐅᒥᓍᒋᒧᐎᓂᓂ Xᑕᓐ᙮ ᒦ ᐃᐌ ᒋᐋᔩᓱᒥᓀᒃ ᑳᑮᐅᒋᒪᐗᑎᓯᓀᒃ ᑲᔦ ᒋᒪᔥᑲᐎᑳᐸᐎᔦᒃ ᑭᑌᐺᔦᑕᒧᐎᓂᐙᕽ᙮ 3ᑳᐐᓐ ᓂᑮᐊᑕᐌᑕᓰᒥᓐ ᐯᔑᒃ ᑳᑕᔑᔦᒃ ᒋᐋᓇᐌᒋᑫᒡ ᐅᓵᒻ ᐁᐅᒌᑭᑲᓂᐎᒡ ᐅᑌᐺᑕᒧᐎᓐ᙮ ᐃᓇᔥᑫ ᓴ ᑮᓇᐙ ᑭᑭᑫᑖᒻ ᒦ ᐅᐌ ᑳᐃᓀᓂᒥᓇᕽ ᐊᐊ ᑭᔐᒪᓂᑑ, ᒋᐅᒌᑳᑰᔭᕽ ᑭᑌᐺᑕᒧᐎᓂᓈᓐ᙮ 4ᐋᓃᔥ ᒣᒀ ᐁᑮᐐᒋᐊᔮᒥᑰᔦᒃ, ᑮᔖᒡ ᑭᑮᐐᑕᒫᑰᒻ: ᑭᑲᐅᒌᑳᑰᒻ ᐅᐅ ᑭᑌᐺᔦᑕᒧᐎᓂᓈᓐ, ᑭᑮᐃᑰᒻ᙮ ᔑᑾ ᑭᑭᑫᑖᒻ ᒦ ᐃᐌ ᒪᔮ ᑳᑮᐃᔑᐌᐱᓯᔦᒃ᙮ 5ᒦ ᐅᐌ ᑳᑮᐅᒋ​ᐃᔑᓂᔕᐊᒪᐎᓇᑰᒃ ᐊᐊ ᑎᒪᑎ: ᓂᑮᐐᐋᑯᑭᑫᑖᓐ ᑮᔥᐱᓐ ᑫᔮᐱ ᐁᐅᑌᐺᑕᒧᐎᓂᐌᑴᓐ᙮ ᒫᑭᔖ ᐅᑮᑲᑴᐗᓈᐃᑯᐙᓐ ᐃᓂ ᓭᑕᓇᓐ, ᑭᑮᐃᓀᓂᒥᓂᓂᒻ᙮ ᑮᔥᐱᓐ ᐋᓇᐌᒋᑫᔦᑭᐸᓐ, ᒦ ᐊᓂᔖ ᒋᑮᐊᓄᑮᔮᑭᐸᓐ᙮ 6ᐋᔕ ᑕᔥ ᓂᑮᐱᑮᐌᐅᑎᓯᑯᓈᓐ ᐊᐊ ᑎᒪᑎ, ᐁᑮᐃᔖᒡ ᑳᐃᔑᐊᔮᔦᒃ᙮ ᑭᑎᐹᒋᒥᑯᐙ ᑫᔮᐱ ᐁᔑᑌᐺᔦᑕᒣᒃ ᑲᔦ ᐁᔑᓵᑭᐃᑎᔦᒃ᙮ ᔑᑾ ᓂᐐᑕᒫᑯᓈᓐ ᐁᒥᓄᒫᒥᑴᓂᒥᔮᕽ ᑲᔦ ᐁᐐᓅᑌᐙᐸᒥᔮᕽ, ᒦ ᐯᔑᑾᓐ ᑫᓃᓇᐎᓐᑦ ᐁᔑᐊᑕᐌᑕᒫᕽ ᒋᐙᐸᒥᑰᔦᒃ᙮ 7ᑳᐐᒋᐅᑌᐺᑕᒨᒥᑰᔦᒃ, ᐊᐲ ᑯ ᒣᒋᓭᔮᕽ ᐁᑲᒀᑕᑭᐃᑰᔭᕽ, ᒦ ᐃᒫ ᐌᒋᓭᒃ ᓂᓱᑭᑌᐁᐎᓂᓈᓐ, ᐁᒥᑴᓂᒥᑰᔦᒃ ᐁᔑᑌᐺᑕᒣᒃ᙮ 8ᐗᐐᑫ ᓴ ᑯ ᓅᑯᒻ ᓂᑑᒋᒥᓄᓭᒥᓐ ᓂᐱᒫᑎᓯᐎᓂᓈᓂᕽ ᐁᑭᑫᓂᒥᑰᔦᒃ ᐁᓲᑭᑌᐺᑕᐌᒃ ᐊᐊ ᑳᑎᐯᒋᑫᒡ᙮ 9ᐋᓃᓐ ᐁᐲᒋᒦᑴᒋᐎᐊᑭᒡ ᑭᔐᒪᓂᑑ ᑮᓇᐙ ᐅᒋ! ᐋᓃᓐ ᑫᔑᓇᓈᑯᒪᑭᒡ ᐃᐃ ᒥᓂᒃ ᒌᑫᑕᒧᐎᓐ ᐁᔑᒨᔑᑑᔮᕽ ᐁᒥᑴᓂᒥᑰᔦᒃ ᐁᑲᓅᓇᑭᒡ? 10ᑕᓱᑮᔑᒃ ᑲᔦ ᑕᓱᑎᐱᒃ ᐗᐐᑫ ᓂᑎᔑᐸᑯᓭᑖᒥᓐ ᒋᐅᑎᓵᐸᒥᑰᔦᒃ ᐱᒌᓇᒃ, ᑲᔦ ᒋᓇᑭᓇᒫᑰᔦᒃ ᑭᑌᐺᔦᑕᒧᐎᓂᐙᕽ ᐋᓃᓂᑯ ᑳᐃᔑᓅᑌᓭᔦᒃ᙮ 11ᒫᓄ ᓂᑲᐃᔑᐎᓂᑯᓈᓐ ᒋᐅᑎᓯᑰᔦᒃ, ᒦ ᐃ ᐁᔑᐸᑯᓭᓂᒪᑭᑣ ᑳᐅᔫᓯᒪᕽ ᑭᔐᒪᓂᑑ ᑲᔦ ᒋᓴᔅ ᑳᑎᐯᓂᒥᓇᕽ᙮ 12ᑳᑎᐯᒋᑫᒡ ᒫᓄ ᑭᑲᒦᓂᑯᐙ ᐊᐗᔑᒣ ᒋᒫᒌᔥᑳᒪᑲᓂᓂᒃ ᑭᓵᑭᐃᑎᐎᓂᐙ ᑲᔦ ᑲᑭᓇ ᐯᒫᑎᓯᐙᒡ ᒋᓵᑭᐁᒀ, ᑖᐱᔥᑰ ᑫᓃᓇᐎᓐᑦ ᐁᔑᓵᑭᐃᑰᔦᒃ᙮ 13ᐲᓂᔥ ᒋᒪᔥᑲᐎᓰᐃᓀᒃ ᑭᑌᐃᐙᕽ, ᐁᑳ ᑫᑰᓐ ᒋᐃᔑᐊᔮᓯᐌᒃ, ᑭᔐᒪᓂᑑᓈᕽ ᐁᑕ ᒋᐅᒋᐋᐸᑎᓯᔦᒃ, ᒦ ᐃᐌ ᒋᐃᓈᑎᓯᔦᒃ ᐹᓂᒫ ᐃᓈᓴᒥᑳᐸᐐᑕᐌᒃ ᑭᔐᒪᓂᑑ ᑳᐅᔫᓯᒪᕽ, ᐊᐲ ᐱᑕᑯᔑᕽ ᑳᑎᐯᓂᒥᓇᕽ ᒋᓴᔅ – ᒥᓂᒃ ᐃᑕᔥ ᐃᑯ ᑳᑎᐯᓂᒫᒡ ᐅᑲᐱᐐᒌᐙᐞ ᐃᐃ ᐊᐲ᙮

will be added

X\