MATAỊ 1

1Kalata gwa kikolo kya Jesụ Kilisịtị, umwana gwa Ndabitị umwana gwa Abụlahamụ. 2Abụlahamụ ālimpāpịle Ịsịhaka, umwene Ịsịhaka ālimpāpịle Jakobụ, Jakobụ alinkumpāpa Jụ̄ta nabāmyabo, 3Jụ̄ta alinkumpāpa Pelesị na Sela mụ nkasị gwake Tamalị, umwene Pelesị alinkumpāpa Heselonị ugwịse gwa Alamụ, 4Alamụ alinkumpāpa Amịnatabu, umwene Amịnatabu alinkumpāpa Nahasonị, Nahasonị alinkumpāpa Salịmonị 5uju ālimpāpịle Boasị mụ nkasị gwake Lahabu, Boasị alinkumpāpa Obelị mụ nkasị gwake Luti, Obelị alinkumpāpa Jese, 6ugwịse gwa Malafyale Ndabitị. Ndabitị ālimpāpịle Solomonị mụ nkasị gwa Ulịja, 7Solomonị ālimpāpịle Lehobwamụ, uju ālimpāpịle Abịja ugwịse gwa Asa, 8uju ālimpāpịle Jehosafatị, ugwịse gwa Jolamụ uju ālimpāpịle Usịja, 9Usịja alinkumpāpa Jotamụ uju ālimpāpịle Ahasị ugwịse gwa Hesekịja, 10Hesekịja ālimpāpịle Manasị uju ālimpāpịle Amonị̄ ugwịse gwa Josịja, 11Josịja alinkumpāpa Jekonịja na bāmyabo pakabalilo kala basamịkisịgwege ku Babelị. 12Pānyụma bōsa bāsāmịkisị̄gwe ku Babelị, Jekonịja alinkumpāpa Salatyelị, umwene Salatyelị alinkumpāpa Selubabelị, 13Selubabelị alinkumpāpa Abịhụtị ugwịse gwa Elyakịmụ; Elyakịmụ ālimpāpịle Asolị, 14ugwịse gwa Satokị uju ālimpāpịle Akịmu (Jakịnị) ugwịse gwa Elịhutị, 15Umwene Elịhutị ālimpāpịle Elyasalị uju ālimpāpịle Mātanị ugwịse gwa Jakobụ, 16Jakobụ alimkumpapa Josefụ, unndume gwa Malịja uju ālimpāpịle Jesụ, uju ịkujobịgwa ija Kilisịtị. 17Po papo lelo īngulilo syosa ukufụma pa Abụlahamụ ukwịsakufịka pa Ndabitị sịlinkuja kalōngo na ịna, ukufụma pa Ndabitị ukwịsakufịka pakabalilo aka basāmịkisịgwege ku Babelị syali kalōngo na ịna; kangi ukufụma pakabalilo ka kusāmịkisịgwa ku Babelị ukwịsakufịka pa Kilisịtị syali kalōngo na ịna. 18Ukupāpịgwa kwa Jesụ Kilisịtị kwali ko uku: Unna Malịja āsịngilị̄gwe na Josefụ, lolị bo bakāli nukwegana, alinkwaga ali ni kifụba mmaka ga Mbepo Mwịkemo. 19Umwene Josefụ, unndume ali mụ̄ndu unngolofụ, akālōndaga ukunjwelụla, alinkutụmụla ukunndekela mbutị̄tu. 20Lelo bo ịkwịnogona sịsịsị, Ugwandumị gwa NTWA alinkunsetukila mụnjosị alinkuti: Josefụ gwe nnya Ndabitị, ungatị̄laga ukummwega Malịja ukuja nkasịgo; buno ikifụba iki alinakyo kya mmaka ga Mbepo Mwịkemo. 21Ịkumpapaga umwana unndumyana, jo gwịs'umpege īngamụ ja Jesụ, namanga ịsakubapokaga abāndu bāke kumbị̄bị syabo. 22Syosa sịsịsị syabonekaga ukuti mo sị̄silege isị UNTWA āsịjobịle mụnkụ̄ngụlụka ukuti: 23Keta unndīndwana ịsakwịnogaga umwana, ịsakumpapaga umwana unndumyana, jo bịsakumpaga īngamụ ja Ịmanwelị (kokuti Kyala ali nanụswe). 24Lelo bo Josefụ alēmbwịke ntulo alinkukōnga sị̄syo anndagilaga ugwandumị gwa NTWA; alinkummwega unkasị gwake; 25alinkusịta nukummanya tāsị ukwịsakufịka papo ampāpege umwana. Po lelo Josefụ alinkumpa īngamụ ja Jesụ.

will be added

X\