TITO 3

1Abantu baawe obaijukye okworobera abalemi n'ab'obusobozi. Obeegese okubahurra beeteekanize okukora omulimo gwona omurungi. 2Baleke kubazaaho kubi muntu weena. Beerinde enkungani, babe baculeezi, kandi booleke abantu boona amakune agahikire. 3Habwokuba na itwe kara tukaba tuli basema, ntahurra, bantu abahabire, abarukulemwa okwegomba okubi n'okwegonza kwa buli mulingo. Twaikaraga omu itima n'ihali, nitunobwa abantu kandi nitunobangana. 4Baitu embabazi za Ruhanga Omujuni waitu n'engonzi ze ha bantu obu zaazookere, 5yatujuna. Hatali habw'oburungi bw'ebi twakozire, baitu habw'embabazi ze. Akatwogya tuzaarwe obwa kabiri kandi tufooke bahyaka omu Mwoyo Ahikiriire. 6Mwoyo ogu Ruhanga akamutuseesiraho atarukubalirra, naamurabya omu Yesu Kristo Omujuni waitu, 7nukwo embabazi ze ituhikirize, tufooke bagwetwa abarukunihira kutunga obwomeezi obutahwaho. 8Ebigambo ebi by'amazima. Ebigambo ebi, ninyenda obiteho amaani, nukwo abo abaikiriize Ruhanga bateho omutima okukora ebikorwa ebirungi. Ebigambo ebi birungi kandi nibigasira abantu. 9Baitu oyetantale empaka ez'obudoma n'okurondereza eby'obuzaale. Oyetantale okukungana n'okuhakaniza ensoborra z'Ebiragiro, habwokuba ebi tibiri by'omugaso kandi tibirumu nsa. 10Omuntu arukkuteeza empaka, obu omara kumuhabura omurundi gumu rundi ebiri, omuleke; 11noomanya omuntu arukukora ati nkooku amazire kuhaba kandi asiisire. Nawe wenka naayesingisa omusango. 12Obu ndikutumira Aritemisi rundi Tikiko, okole kyona eki orukusobora okumpikaho bwango, onsange Nikopoli, habwokuba oku nuho ncwiremu kumara ebiro by'obutiti. 13Okole kyona eki orukusobora kuboherra Zeena Looya hamu n'Apolo omu rugendo rwabu. Ocwe goona batunge ebi barukwetaaga. 14Abantu baitu leka beege okukora ebikorwa ebirungi, nukwo batungise bagenzi baabu ebi barukwetaaga, baleke kwikara kwonka bataina mugaso. 15Boona aba ndi nabo nibakuramukya. Na iwe oturamukize boona abanyakutugonza, abaturukuteerana nabo omu kwikiriza. Embabazi za Ruhanga zikale na inywe inywena.

will be added

X\