TITO 2

1Baitu iwe Tito, oyegese ebirukuhikaana n'enyegesa ey'amazima. 2Teererra abagurusi babe beegendereza, beekambi, b'amagezi, bagumu omu kwikiriza, omu kugonza n'omu kugumiisiriza. 3Abakaikuru, nabo bateererre nkooku otereriire abagurusi. Babe n'engeso ezisemeriire abaikiriza, baleke kuhangirra, abantu kulemwa etamiiro; baitu beegese ebirungi, 4nukwo batendeke abakazi abato okugonza baibabo n'abaana baabu. 5Babeegese kuba abarukwetegereza, abatarukusiihana, babe bakazi abanyakutegeka amaka gaabu, banyambabazi kandi abarukworobera baibabo, nukwo ekigambo kya Ruhanga kireke kugaywa. 6Abasigazi nabo obeekambise, beege kwetanga. 7Omu byona ebi okora, weyoleke oli kyokurorraho, eky'ebikorwa ebirungi, kandi omu nyegesa yaawe weyoleke oli w'amazima kandi w'amaani. 8Oyegese ebigambo ebihikire kandi ebitasobora kugaywa, nukwo arukukuhakaniza akwatwe ensoni, aburwe ekibi eki arukutugambaho. 9Gambira abairu bahurre bakama baabu, kandi baboorobere omu byona, batarukubateeza mpaka. 10Baleke kwekomakoma ebintu, baitu boolekere kimu obwesigwa obw'amazima, nukwo omu byona basobole kuhaisa ekitiinisa enyegesa ya Ruhanga Omujuni waitu. 11Habwokuba embabazi za Ruhanga zizookere omu nsi kujuna abantu boona, 12zaatwegesa okwanga obukafiiri n'okuteegomba eby'ensi, twikale tuli beerinzi, b'amananu, nitutiina Ruhanga omu nsi munu, 13tutegeriize okutunga eki twanihizibwe. Nukwo okuzooka okw'ekitiinisa okwa Ruhanga waitu Rutakirwa kandi n'Omujuni waitu Yesu Kristo, 14ayayehaireyo habwaitu okutucungura, naatwiha omu bubi bwona kandi naayeyereza abantu be, nubo abo abeekambira okukora ebirungi. 15Ebintu ebi, obirangirre. Kandi oteererre abantu baawe noohana n'obusobozi bwona. Otaikiriza muntu n'omu kukugaya.

will be added

X\