ABAROOMA 9

1Nimbaza amazima omu Kristo, tindukubiiha. Omutima gwange nigumanywa Mwoyo Ahikiriire 2nkooku gwijwire obujune bwingi n'obusaalizi obutaina h'okugarukira. 3Naakugondeze nyowe nkyenwe kandi mbaganizibwe na Kristo habwa bagenzi baitu, n'ab'oruganda rwaitu. 4Nubo Abaisirairi abaayesirwe kuba baana ba Ruhanga, abaahairwe ekitiinisa n'endagaano, abaakwasibwe Ebiragiro n'emikoro ey'okuramya, n'ebyaraganiziibwe. 5Omuli bo nuho haarugire baisenkuru itwe, kandi omu ihanga lyabo nuho haazairwe Kristo, nuwe Ruhanga anyakulema byona, anyakukugizibwa ebiro n'ebiro. Amiina. 6Kinu tikirukumanyisa ngu, Ruhanga eki yaraganiize kikalema kuhikirizibwa, nangwa! Habwokuba boona abaazairwe omu Isirairi, tibali Baisirairi; 7kandi boona tibali bagwetwa b'Abburahamu, habw'okuzaarwa nk'abaijukuru. Baitu kikahandiikwa kiti: “Omu Isaaka nuho haliruga abagwetwa baawe.” 8Eki nikimanyisa ngu, abaana ba Abburahamu abaazairwe omu mubiri, tibali nubo baana ba Ruhanga; baitu abaazairwe, Ruhanga amazire kukora endagaano na Abburahamu, nubo bagwetwa kwo. 9Habwokuba ekyaraganiziibwe kikagamba kiti: “Omwaka ogurukwija ndigaruka mbarole omu kasumi nka kanu, kandi Saara aliba azaire omwana w'obwojo.” 10Tikiri eki kyonka, baitu na Rebbeka, obu akaba aina enda ey'abarongo ey'omusaija ogu omu, nuwe isenkuru itwe Isaaka, 11noobu bakaba batakazairwe kandi batakakozire kintu ekirungi rundi ekibi, baitu entegeka ya Ruhanga ey'okukoma ou yasiimire, ekeeyongera omumaiso. Hatali habw'ebi baakozire, baitu habw'enkoma ya Ruhanga. 12Rebbeka akagambirwa ati: “Isingoma aliheereza Kato.” 13Nkooku kyahandiikirwe kiti: “Yakobbo nkamugonza, baitu Esau nkamwanga.” 14Hati turagamba ki? Ngu Ruhanga tagira bwinganiza? Nikikafuuhe! 15Uwe akagambira Musa ati: “Ndiganyira ou ndukugonza kuganyira, kandi ngirre embabazi ou ndukugonza kugirra embabazi.” 16Habweki tikirukurugirra ha kugonza kw'omuntu rundi ha bwekambi bwe, baitu kirugirra ha mbabazi za Ruhanga. 17Habwokuba omu Bihandiiko ebirukwera Ruhanga akagambira Faraaho ati: “Nkwimukize, ningenderra okukwolekeramu obusobozi bwange, nukwo ibara lyange lirangirirwe omunsi yoona.” 18Habweki nu, Ruhanga aganyira weena ou agonza kuganyira, kandi agumanganiza omutima ogwa weena ou agoza gugumangane. 19Hati nu nimwija kunkaguza muti: “Habwaki Ruhanga naakyajunaana abantu habw'ensobi zaabu? Kandi nooha asobora kwanga kukora Ruhanga eki arukwenda?” 20Baitu si niiwe oha iwe omuntu arukugarukamu Ruhanga? Ekinaga kirikaguza omubumbi wakyo kiti: “Habwaki wambumbire oti?” 21Omubumbi w'ekinaga, ibumba taliinaho busobozi, omu kitonge kimu ky'ibumba kubumbamu ekibindi eky'emikoro ey'ekitiinisa rundi ekindi ekikwatirwamu ebintu ebya buli kiro? 22Ruhanga obu araaba naagonza okwoleka ekiniga kye n'okumanyisa obusobozi bwe, nikiita ki Uwe kugumiisiriza habw'embabazi ze enyingi ebibindi ebimukwasa ekiniga ebi yabumbiire kuhwerekerezibwa? 23Akagenderra kwoleka ekitiinisa kye ekingi ha bibindi ebimukwasa embabazi, ebi yateekaniriize ekitiinisa okuruga ira. 24Ebibindi ebi niitwe aba yayesire, atatwihe omu Bayudaaya bonka, baitu n'omu Banyamahanga. 25Nikyo Ruhanga yagambiire omu kitabu kya Hoseya ati: “Abo abakaba batali bantu bange, ndibeeta ‘ihanga lyange’. N'omukazi akaba atarukugonzibwa, ndimweta ‘kiganzi’.” 26“Kandi omu kiikaro kyonyini nambere bagambiriirwe bati: ‘Timuli bantu bange’, nuho balyeterwa ‘Baana ba Ruhanga omwomeezi’.” 27Kandi Isaaya akatokera haiguru obu yabaliize hali Isirairi ati: “Omuhendo gw'abaana ba Isirairi noobu guraaba nigwingana omusenyi gwa ha nyanja, baitu abake abalisigaraho nubo balijunwa; 28habwokuba MUKAMA talikeerereza kufubira abantu n'amaani.” 29Kandi na Isaaya akakiranga ati: “Kakuba MUKAMA ow'amahe ataratusigiire ruzaaro, twakubaire nka Sodomu, twakusisaine nka Gomora.” 30Hati turagamba ki? Tumanyire obuhikiriire obusigikira ha kwikiriza nkooku bwahikireho Abanyamahanga abatarabwekambiire; 31baitu Abaisirairi abaayekambiire obuhikiriire obusigikira ha Biragiro, bbo bakalemwa kuhikiriza Ebiragiro ebi. 32Habwaki? Habwokuba obuhikiriire batabwekambiire nibasigikira ha kwikiriza, baitu bakasigikira ha bikorwa byabo. Gamba bakaterwa ibaale eritabaijura, 33nkooku kyahandiikirwe kiti: “Dora nimbyara ibaale omu Siyoni, ibaale eriritabaijura abantu, omwandara ogulibanaga; kandi weena anyakumwikiriza, talikwatwa nsoni.”

will be added

X\