ABAROOMA 7

1Beene baitu, timurukumanya Ebiragiro nkooku birema omuntu akyali mwomeezi? - nimbaliza abo abarukumanya Ebiragiro. 2Nukwo kiti, omukazi omuswerwa, Ekiragiro kimuboha hali iba obu aba akiri mwomeezi; baitu iba obu afa, nubwo asumururwa ha Kiragiro eki. 3Nukwo nu, kakuba aswerwa omusaija ondi, kunu iba akiri mwomeezi, obu ayetwa musiihani. Baitu kakuba iba afa, buli takyalemwa Kiragiro eki; kandi kakuba aswerwa omusaija ondi, tayetwa musiihani. 4Na inywe bagenzi bange, nukwo mwafiire muti ha Biragiro omu mubiri gwa Kristo, mutungwe ondi ayahumbwirwe omu bafu, kandi itwena tusobole kukorra Ruhanga ebirungi. 5Obu tukaba nitukyahondera eby'omubiri, okwegomba kwaitu okubi okwasisiimurwaga Ebiragiro kwakorraga omu ngingo zaitu, nukwo tukole ebibi ebireeta orufu. 6Baitu hati tukaihwaho Ebiragiro, tumazire kuleka ebi ebyatwikaize omu bwiru, nukwo tuheereze tutarukuhondera Ebiragiro ebyahandiikirwe ira, baitu nituheereza twina bwomeezi obuhyaka obuleetwa Mwoyo Ahikiriire. 7Hati nu tugambe ki? Tuti: Ebiragiro nibyo bireeta ebibi? Mahano! Kakuba bitarabaire Biragiro, ebibi tinkubimanyire. Kakuba Ebiragiro bitaragambire biti: “Otalyegomba kubi”, tinakusoboire kumanya ekyetwa okwegomba okubi. 8Baitu ebibi obu byataahiriire omu Kiragiro eki, byanyimukyamu okwegomba okw'emiringo yoona. Nambere hatali Biragiro, buli ebibi biba bifiire. 9Nyowe kara nkaba ndi mwomeezi hataroho Biragiro; baitu Ebiragiro obu byaizire, ebibi byanjunaanwa, nyowe naafa. 10Ekiragiro eki ekikaba kiri ky'okundeetera obwomeezi, kikandugiramu orufu. 11Habwokuba ebibi obu byataahiriire omu Kiragiro, bikangobeza kandi byanyitira omu Kiragiro eki. 12Habweki, Ebiragiro nibyera, n'Ekiragiro ky'okuteegomba kubi nakyo nikyera, nibihika kandi birungi. 13Hati nu, ebirungi nibyo byanyisire? Nangwa! Ebibi nibyo byanyisire nibiraba omu birungi nukwo ebibi bizooke nkooku biri bibi, kandi habw'okutaahirra omu Kiragiro, bihinguraniire kimu obubi. 14Tumanyire Ebiragiro nkooku biri by'omwoyo; baitu nyowe ndi w'omubiri, ayaguliirwe omu bwiru bw'ebibi. 15Ebikorwa byange byonyini tindukubyetegereza. Habwokuba ebi ngonza, tibiri nibyo nkora; baitu ekintu kyonyini eki nnoba, nikyo nkora. 16Hati nu, obu ndaaba ninkora ebi ntarukugonza, buli ninyikiriza Ebiragiro nkooku birukwetaagwa. 17Nahabweki, takyali nyowe arukubikora, baitu nibikorwa ebibi ebiikara omuli nyowe. 18Habwokuba mmanyire omuli nyowe nkooku hatarumu karungi na kamu, nukwo kugamba: omu mubiri gwange. Noobu ngonza kukora ebihikire, baitu ndemwa kubikora. 19Ebirungi ebi ngonza, timbikora; baitu ebibi ebi ntagonza, nibyo nkora. 20Habweki, obu ndaaba nkora ebi ntagonza, takyali nyowe anyakubikora, baitu bikorwa ebibi ebinyakwikara omuli nyowe. 21Na nyowe nsanga kinu kinfookiire kiragiro. Obu ngonza kukora ebihikire, ebibi bimba haihi. 22habwokuba omu mutima gwange ninsiima Ebiragiro bya Ruhanga, 23baitu omu ngingo zange nimpurramu ekiragiro ekindi, ekirukurwanisa ekiragiro ekiri omu mutima gwange, nikinfoora munyankomo w'ekiragiro ky'ebibi ebiikara omu ngingo zange. 24Imira nyowe! Ka mboine! Omubiri gunu ogw'okufa, nooha aligunjuna? 25Ruhanga asiimwe arukutujunira omu Yesu Kristo MUKAMA waitu! Hati nu, nyowe habwange nkwata Ebiragiro bya Ruhanga n'amagezi gange, baitu omu mubiri gwange mpondera ekiragiro ky'ebibi.

will be added

X\