ABAROOMA 3

1Hati abandi Omuyudaaya naabakiza ki? Rundi okusarwa kwina mugaso ki? 2Nikigasa muno omu miringo etali emu. Eky'okubanza Abayudaaya nubo baakwasiibwe ebigambo bya Ruhanga. 3Abamu noobu baraaba batarabaire beesigwa, baitu itwe tugambe ki? Obuteesigwa bwabo buratanga Ruhanga kuba mwesigwa? 4Nikikafuuhe! Ruhanga aikara ali w'amazima abantu boona noobu baraaba bali banyabisuba, nkooku kyahandiikirwe kiti: “Leka ebigambo byawe byoleke nkooku oli w'amazima, nukwo osinge obu baba nibakucwera omusango.” 5Obubi bwaitu obu buraaba nibwoleka obwinganiza bwa Ruhanga, turagamba ki? Ngu Ruhanga tali mwinganiza kutufubira? [Nyowe nimbaza nk'omuntu buntu.] 6Naakake konka! Ruhanga obu araaba atali mwinganiza, ensi asobora ata kugicwera omusango? 7Ebisuba byange obu biraaba nibyongera kwoleka amazima ga Ruhanga kandi nibimwongera ekitiinisa, habwaki ninkyacwerwa omusango nk'omusiisi? 8Habwaki tutakora ebibi nukwo harugemu ebirungi? - abantu abamu nkooku batuhangirra ngu, nukwo twegesa. Abo, omusango gwabo nigubasinga kurungi. 9Hati nu tugambe tuta? Itwe Abayudaaya twina eki turukukiza abandi? Nangwa, naakake konka; habwokuba mmazire kugamba ngu, abantu boona, Abayudaaya n'Abagiriiki, balemwa ekibi, 10nkooku kyahandiikirwe kiti: “Tiharoho ahikiriire, nangwa noobwakuba omu; 11tiharoho arukwetegereza, tiharoho arukuserra Ruhanga. 12Boona bakahaba, baasiisikarra hamu, tiharoho arukukora kurungi, nangwa noobwakuba omu.” 13“Emimiro yabo bituuro ebyesamiriire, endimi zabu bazibiihisa ebisuba.” “Ebigambo byabo nibisaaliza nk'obusegwe bw'encwera.” 14“Akanwa kaabo kaikara nikakondereza kandi nikahangirra.” 15“Ebigere byabo bibanguhya kugenda okuseesa esagama, 16hoona ha bakagenda bahwerekereza kandi baleeta obujune, 17kandi omuhanda oguleeta obusinge tibagumanyire.” 18“Ruhanga tibamutiina.” 19Hati nitumanya ngu, byona Ebiragiro ebi bigamba, bikwata abo abarukulemwa Ebiragiro, nukwo akanwa koona kabumbwe kandi ensi yoona Ruhanga agicwere omusango. 20Omumaiso ge busaho muntu n'omu alyeetwa muhikiriire habw'okuhikya ebiri omu Biragiro; habwokuba omu Biragiro nuho tumanyira ekibi. 21Baitu hati Ruhanga ayolekere obuhikiriire obutarukuruga omu Biragiro, kandi Ebiragiro n'abarangi nibabijurra. 22Nubwo obuhikiriire Ruhanga obu aha abo abarukwikiriza Yesu Kristo, kandi obuheebwa boona abamwikiriza. Habwokuba busaho mbaganizo: 23ningira boona bakasiisa, balemwa kuhika ha kitiinisa kya Ruhanga, 24baitu habw'embabazi ze bakaheerwa busa obuhikiriire, Kristo Yesu obu yatucungwire. 25Nuwe ogu Ruhanga ou yahaireyo ali ndehwa, aseese esagama ye kuleherra abamwikiriza. Eki akakikora nukwo ayoleke obuhikiriire bwa Ruhanga, ayagumiisirize naayebwa ebibi ebyakozirwe ira; 26nukwo omu busumi bunu tumanye nkooku ahikiriire, kandi ahikiriza weena anyakwikiriza Yesu. 27Hati okwenyumiza kwaitu nikugasa ki? Kwa busa. Habwaki? Nikusigikira ha bikorwa byaitu? Nangwa, baitu ha kwikiriza kwaitu. 28Itwe nitugumya tuti: Okwikiriza nukwo kuhikiriza omuntu, baitu tikuli kukora ebirukuragirwa Ebiragiro. 29Obu, Ruhanga aba Ruhanga w'Abayudaaya bonka? Kandi tali Ruhanga w'Abanyamahanga? Ego, nabo wabo. 30Ruhanga nkooku ali omu, aliha abasazirwe obuhikiriire habw'okwikiriza kwabo, n'abatasazirwe abubahe habw'okwikiriza kwabo. 31Hati nu Ebiragiro turabidibya habw'okwikiriza kunu? Nikikafuuhe! Baitu tubigumye bugumya.

will be added

X\