ABAROOMA 15

1Itwe abaina amaani, tusemeriire okugumiisiriza obuceke bw'abataina maani, tutarukuserra eby'okwesemeza itwenka. 2Leka buli omu omuli itwe aserre ebirukusemeza mutaahi we habw'okumugasira n'okumugumya. 3Habwokuba Kristo ataserre ebirukumusemeza wenka; baitu nkooku kyahandiikirwe kiti: “Ebijumo by'abo abaakujumire, bikahikaho nyowe.” 4Byona ebyahandiikirwe ira, bikahandiikwa kutwegesa, nukwo tutunge okunihira habw'okugumibwa n'okwekambisibwa Ebihandiiko ebi ebirukwera. 5Ruhanga, endugirro y'amaani gaitu kandi anyakutwekambisa, abahe okwikarana mwina omutima gumu, nimusisana Kristo Yesu. 6Nukwo inywena hamu musobole kunyumiza Ruhanga, Ise MUKAMA waitu Yesu Kristo, n'iraka limu. 7Habweki mujwahukirrangane nka Kristo oku yabajwahukiriire, nukwo Ruhanga aheebwe ekitiinisa. 8Nyowe nimbagambira nti: Kristo akafooka muheereza w'abasazirwe, abanze ayoleke amazima ga Ruhanga, naagenderra kugumya ebyaraganiziibwe baisenkuru itwe, 9nukwo hanyuma asoboze Abanyamahanga kuhaisaniza Ruhanga habw'embabazi ze, nkooku kyahandiikirwe kiti: “Habweki ndikuhaisaniza omu Banyamahanga, kandi nzine eby'okukukugiza.” 10Handi kigamba kiti: “Inywe Abanyamahanga mukyanganuke hamu n'abantu be”; 11Kandi kiti: “Muhaisanize Atahwaho Abanyamahanga inywena, n'abantu boona bamuhaisanize.” 12Na Isaaya ayongera ati: “Omwijukuru wa Yese aliija, aliimuka okulema Abanyamahanga; kandi Abanyamahanga nuwe baligiramu obwesige.” 13Ruhanga endugirro y'okunihira kwaitu abaijuze omuhimbo gwona n'obusinge ebireetwa okwikiriza, nukwo habw'obusobozi bwa Mwoyo Ahikiriire, okunihira kwanyu kusaagane muno. 14Bagenzi bange, mmanyiire kimu inywena nkooku mwijwire engeso nungi, nimwetegerereza kimu, kandi nimusobora n'okuhaburangana. 15Baitu haroho ebintu ebimu ebi mbahandiikiire n'obumanzi, mbandiize kubaijukya embabazi Ruhanga ezi yangiriire 16nkooku zaanfoire muheereza wa Kristo Yesu hali Abanyamahanga. Kandi obuheereza obu mbakorra, nukwo kurangirra Amakuru Amarungi aga Ruhanga. Abanyamahanga nabo basobole kufooka kyonzira ekirukusiimwa Ruhanga, kimazire kwezibwa Mwoyo Ahikiriire. 17Nahabweki omu Kristo Yesu nyina eki ndukusigikiraho okwenyumiza habw'omulimo gwange ogu nkorra Ruhanga. 18Habwokuba tindikisura okubazaaho ekindi kyona, okwihaho Kristo ebi yakoliire omuli nyowe okuleetera Abanyamahanga okworobera Ruhanga omu bigambo byange n'omu bikorwa byange, 19habw'amaani g'ebihuniriza n'ebyamahano ebyakozirwe, na habw'amaani ga Mwoyo Ahikiriire. Nikyo narangiririire kimu Amakuru Amarungi aga Kristo okuruga Yerusaalemu okuhikira kimu Iliiriko. 20Eki naayendaga muno nukwo kurangirra Amakuru Amarungi, hatali omu biikaro nambere ibara lya Kristo lyagambirweho, ntaliikara kwombeka ha musingi ogw'omuntu ondi, 21baitu kibe nkooku kyahandiikirwe kiti: “Balirora ou batakagambirwahoga, kandi balyetegereza ou batakahurrahoga.” 22Eki nikyo kyantangire okwija owanyu buli kasumi. 23Baitu hati nkooku ntakyaina h'okukora omulimo omu bicweka binu, kandi nkooku mmazire emyaka nyingi nyina ekihika kwija kubarora, 24ninihira kubarora obu ndiba nindabaho okugenda Sipaini, nkamara na inywe ebiro bike, nukwo mumboherre omu rugendo rwange. 25Baitu hati ninyija kugenda Yerusaalemu, nintwarra abantu ba Ruhanga eby'okubakoonyera. 26Habwokuba aba Makedoni n'ab'Akaaya bakaikiriza okusorooza ebintu eby'okukoonyera abanaku abali omu baikiriza ba Yerusaalemu. 27Eki bakakikora n'okusemererwa, kandi mazimakwo babainaho ibanja. Abanyamahanga obu baraaba babagaine n'Abayudaaya ha birungi byabo eby'omwoyo, nabo basemeriire kubakoonyera n'ebintu byabo eby'omubiri. 28Obu ndimara eki, mmazire n'okubaha ebyasoroziibwe, ndibarabaho ningenda Sipaini. 29Nimmanya obu ndibahikaho, ndiija nyina emigisa yoona eya Kristo. 30Bagenzi bange, nimbeesengereza habwa MUKAMA waitu Yesu Kristo, na habw'engonzi za Mwoyo, mwekambe hamu na nyowe munsabire hali Ruhanga, 31nukwo ntabuke abataikiriza abali Buyudaaya, kandi ebyokukoonyera ebi ndukutwara Yerusaalemu bisiimwe abarukwera. 32Nukwo Ruhanga obu alisiima, nsobole kwija owanyu n'omuhimbo, kandi ngarukwemu amaani obu ndiba ndi na inywe. 33Ruhanga, endugirro y'obusinge, aikale na inywe inywena. Amiina.

will be added

X\