ABAROOMA 13

1Buli muntu weena ayorobere abalemi abarukumulema, habwokuba tiharoho busobozi na bumu rundi buli burugire hali Ruhanga; kandi abalemi abaroho bakateebwaho Ruhanga. 2Habweki, ogu anyakweremera abalemi, aba ayeremiire ekyatairweho Ruhanga. Kandi abeereme abo, beereetera omusango. 3Habwokuba abalemi tibatiinisa bantu abakora kurungi, baitu batiinisa abakora kubi. Iwe nooyenda kutatiina ow'obusobozi? Hati nu, kora ebirungi, nukwo nawe akusiime. 4Ningira uwe muheereza wa Ruhanga arukukora habw'oburungi bwawe. Baitu kakuba okora kubi, otiine; habwokuba ekitara takihagatiirra busa. Nuwe muheereza wa Ruhanga ow'okufubira anyakukora kubi. 5Nahabweki omuntu asemeriire kworoba, tikuli habw'okwetantara obukaya bwa Ruhanga kwonka, baitu na habw'okuhaburwa omutima gwe eki gumugambira. 6Nikyo muheera emisoro, habwokuba abalemi baheereza ba Ruhanga, abarukukora omulimo agw'okusorooza emisoro. 7Musasule boona ebi barukubatonga: abarukusorooza omusoro, mugubahe; abarukutonga obusuuru, mububahe; ab'okutiinwa, mubatiine; ab'ekitiinisa, mubahe ekitiinisa. 8Mutaliba n'ibanja ha muntu weena, okwihaho ibanja ery'okugonzangana; habwokuba ogu anyakugonza mutaahi we, aba ahikiriize Ebiragiro. 9Nibyo Ebiragiro ebigamba biti: “Otalisiihana, otaliita, otaliiba, otalyegomba kubi” n'ebiragiro ebindi, byona bifunzibwa omu kigambo ekirukugamba kiti: “Ogonzeege mutaahi waawe nkooku oyegonza wenka.” 10Anyakwina egonzi takora kubi mutaahi we; nahabweki engonzi nizo ihikiriza Ebiragiro. 11Okwongera hali eki, mumanyire akasumi nkooku kali haihi kandi kahikiire kimu, inywe kusisiimuka omu turo; habwokuba okujunwa, hati kutwiriire haihi okukira nambere twabandize kwikiriza. 12Obwire buli haihi kukya, n'izooba liri haihi kuturuka. Habweki, tuleke ebikorwa eby'omwirima, tukwate eby'okurwanisa omu musana. 13Tukole kurungi nk'abali omu musana, tutarukurarraana omu magenyi kandi tutarukutamiira, tutarukusiihana n'okukora eby'obugwagwa, tutarukukungana n'okugirrangana ihali. 14Baitu MUKAMA Yesu Kristo nuwe mufoole ngabu yanyu, muleme emibiri yanyu, ereke kukora ebi erukwegomba.

will be added

X\