ABAROOMA 12

1Nahabweki bagenzi bange, nimbeesengereza habw'embabazi za Ruhanga, muheyo emibiri yanyu nk'ekyonzira ekyomiire, ekirukwera kandi ekirukusiimwa Ruhanga. Obu nubwo muba nimuramya Ruhanga omu mazima. 2Muleke kwesisaniza n'ab'ensi enu, baitu muhinduke, nimugarurwa buhyaka omu biteekerezo byanyu, nukwo mugumye Ruhanga ebi agonza: nibyo ebirungi, ebisiimwa, kandi ebihikiire kimu. 3Habw'omugisa ogu nahairwe, ninteererra buli omu omuli inywe, aleke kweteekerezaaho muno okukira nkooku ali, baitu ayeteekerezeho nkooku ali omu mazima, buli omu naarorra ha kwikiriza Ruhanga oku yamuhaire. 4Omu mubiri gumu nkooku twinamu ebicweka bingi, kandi ebicweka ebi byona bitarukukora mulimo gumu, 5nukwo kiti na itwe. Noobu turaaba tuli baingi, baitu tuli mubiri gumu omu Kristo; kandi buli omu kicweka kya mugenzi we. 6Nkooku twina ebisembo ebitarukusisana okurorra ha migisa ei twahairwe, katubyekonyeze. Obu kuraaba kuli kuranga, turange niturorra ha kwikiriza kwaitu. 7Obu buraaba buli buheereza, tuheereze. Ogu arukwegesa, ate omutima ha kwegesa kwe. 8Ogu arukuhabura, ahabule kwo; ogu arukugaba, agabe n'obwenda; ogu arukukoonyera, akoonyere n'obwekambi; kandi arukukora eby'embabazi, abikole n'okusemererwa. 9Engonzi zanyu zibe z'amazima. Munobe ekibi, mugumire ha kirungi. 10Mugonzangane nk'ab'oruganda oku bagonzangana; omu kuhangana ekitiinisa buli omu akizeho mugenzi we. 11Mwekambe, muleke kuba bagara, muheereze MUKAMA n'omutima ogwijwire engonzi. 12Mukyanganuke omu kunihira kwanyu, mugumiisirize omu mihito, musabe obutalekerra. 13Muhe abantu ba Ruhanga ebi barukwetaaga, mutangirre kandi mukunire abagenyi. 14Musabire omugisa abo abanyakubahiiga; mubasabire omugisa, baitu muleke kubakondereza. 15Mukyanganuke n'abo abarukukyanganuka, murre n'abo abarukurra. 16Mwikale mwina omutima gumu; muleke kwekuliriza, mweteerane n'abo abataina kitiinisa, muleke kwemanyaho amagezi. 17Weena anyakukora kubi, mutamuhoora nzigu, baitu muteho omutima okukora boona eki barukweta ekirungi. 18Obu kiraaba nikisoboka, mwikarane na boona mu businge nkooku murukusobora. 19Abagonzibwa, mutalyehorra inywenka enzigu, baitu eki mukirekere encwa ya Ruhanga; habwokuba kikahandiikwa kiti: “Okuhoora enzigu kwange, ninyowe ndihoora; MUKAMA nukwo agamba.” 20Na handi kigamba kiti: “Omunyanzigwa waawe obu arumwa enjara, muhe ebyokulya; obu akwatwa iroho, muhe ekyokunywa; habwokuba obu okora oti, oba noomusingisa omusango.” 21Mutalisingurwa obubi, baitu inywe obubi mubusinguze oburungi.

will be added

X\