ABAROOMA 11

1Hati kankaguze nti: Ruhanga akanagira kimu abantu be? Nikikafuuhe! Na nyowe nyenka ndi Mwisirairi, mwijukuru w'Abburahamu, ow'omu ruganda rwa Benyamiini. 2Ruhanga atange bantu be aba yamanyire ira. Timurukwijuka Ebihandiiko ebirukwera ebi bigamba hali Eriya, obu yanyegeriire Abaisirairi hali Ruhanga? 3Ati: “Ai MUKAMA, abarangi baawe babaisire, amatambiro gaawe bagasesire. Nyowe nyenka ninyowe nsigaireho, kandi na nyowe nibenda kunyita.” 4Baitu Ruhanga akamugarukamu ki? Akamugira ati: “Nyesaagisiizeho abantu kasanju abatarateeriize embandwa Baali amaju.” 5Kandi n'omu kasumi kanu, hakyaroho abake abasigaireho abaakomerwe habw'embabazi za Ruhanga. 6Obu baraaba baakomerwe habw'embabazi, okukomwa kwabo tikukyasigikira ha bikorwa byabo. Kakuba kusigikira ha baakozire, buli embabazi za Ruhanga iba itakyali mbabazi. 7Hati nu, tugambe ki? Abaisirairi bakalemwa kutunga obuhikiriire obu baaserwire. Abaakomerwe nubo baabutungire; baitu abandi, emitima yaabo yagumangana, 8nkookukyahandiikirwe kiti: “Ruhanga akabaha emitima erukusununuka, amaiso agatarukurora, kandi amatu agatarukuhurra n'okuhika hati.” 9Daudi nawe akagamba ati: “Ekiihuro kyabo leka kibafookere mutego, kiriba, buhya, kandi kifubiro kyabo. 10Amaiso gaabo gaswekwe omwirima, nukwo baleme kuhweza, kandi baikale bagemerwe enaku ebiro byona.” 11Nikyo ndukukaguliza nti: Bakatabaijuka nk'abarukwija kugwa? Naakake konka! Okusobya kw'Abaisirairi kukaleetera Abanyamahanga kujunwa. Nukwo kujunwa okwakwasize Isirairi ihali. 12Ensobi zaabo obu iraaba niireetera abantu omugisa, n'okusiisa kwabo obu kuraaba nikuleetera Abanyamahanga embabazi; okwegarukamu kw'Abaisirairi boona tikulirugwamu emigisa erukukiraho muno? 13Hati nimbaza na inywe Abanyamahanga, habwokuba ndi mukwenda hali Abanyamahanga. Nimpaisaniza obuheereza bwange, 14nukwo nkwase ihali Abayudaaya bataahi bange, kandi njune abamu omuli bo. 15Okwangwa kwabo obu kuraaba kwaleetiire baingi okugarukanganamu na Ruhanga, okutangirirwa kwabo kulibaleetera ki? Tikulibahumbuura omu bafu? 16Ensaano ey'omuganuro enyakuhongwa, obu eba eyeziibwe, buli n'ekiihuro kyona kyeziibwe; kandi ekikoro obu kiba nikyera, n'amataagi nago buli nigeera. 17Amataagi agamu obu garaaba gaakoonoirweho, na iwe omunono ogw'omuti oliva ogw'omu kisaka, okagarurwa omu kiikaro kyago, nukwo oliisibwe hamu nago ebirukuruga omu kiikaro kyago, nukwo oliisibwe hamu nago ebirukuruga omu mihama yagwo, 18otenyumiriza ha mataagi ago. Kakuba oyenyumiza, ijuka nkooku atali iwe anyakukwatiriire ekikoro, baitu ekikoro nikyo kikwatiriire iwe. 19Osobora kugamba oti: “Amataagi, eki gaakoonolirweho, nukwo nyowe kugarurwa omu kiikaro kyago.” 20Eki ky'amazima. Gakanogorwaho habw'okutaikiriza kwago, baitu iwe ekikwemeriize otarukutengeeta, nukwo kwikiriza kwawe. Habweki leka kwekuza, baitu oikale nootiina. 21Ruhanga obu araaba ataraganyire mataagi gonyini agaameriireho, na iwe talikuganyira. 22Habweki nu, oyetegereze embabazi kandi n'obukaya bwa Ruhanga. Obukaya bwe hali abo abagwire, n'embabazi ze hali iwe, kakuba oziikaramu. Kakuba kitabakwo, na iwe olicwibwaho. 23Nangwa na bali, obu baraaba batarukugumira omu butaikiriza bwabo, baligarurrwa ha muti; habwokuba Ruhanga aina obusobozi obw'okwongera kubagarramu. 24Iwe obu oraaba wacwirwe ha muti ogw'oliva ogw'omu kisaka ogwayemereze, wagarurwa ha muti gw'oliva ogw'omu kisaka ogwayemereze, wagarurwa ha muti gw'oliva ogwabyairwe abantu kandi ogutarayemereze, amataagi agazairweho tigalikira muno kugarurwa ha muti nambere gaarugire? 25Bagenzi bange, ninyenda mukenge kirungi ensita enu, muleke kwebara nk'abamagezi: abamu omu Baisirairi bagumangaine kandi baliikara nibagumangana okuhika Abanyamahanga boona obu balitutaahamu. 26Obu nubwo Abaisirairi nabo balijunwa, nkooku kyahandiikirwe kiti: “Omujuni aliruga Siyoni, ihanga lya Yakobbo aliihiremu kimu okutatiina Ruhanga.” 27“Egi eriba ndagaano yange nabo, obu ndibaihaho ebibi byabo.” 28Okurorra ha Makuru Amarungi, bbo baba banyanzigwa ba Ruhanga, nukwo inywe musobole okugaikiriza; baitu okurorra ha kukomwa, bbo baba nganzi habw'abaisenkurubo. 29Ningira Ruhanga obu ayeta rundi agaba, tayeyijukya. 30Nka inywe ira oku mukaba mweremiire Ruhanga, baitu hati mugiriirwe embabazi habw'obwereme bwa bali. 31Nabo hati bafookere beereme, nukwo bagiriirwe embabazi nk'ezi mwagiriirwe. 32Ningira abantu boona Ruhanga akabeeta abeemi, nukwo boona abagirre embabazi. 33Haa! Amagezi ga Ruhanga, n'okumanya kwe ka bihinguraine obwingi! Encwa ye k'etarukwetegerezibwa, n'emihanda ye k'etarukukengwa! 34“Nooha aramanyire ebiteekerezo bya MUKAMA? Nooha si aramuhanuliire?” 35“Nooha aramuhaire ekisembo nukwo nawe agarulirwe?” 36Ebintu byona biruga omuli Uwe, biraba omuli Uwe, kandi bigarukira omuli Uwe. Aheebwe ekitiinisa ebiro n'ebiro. Amiina.

will be added

X\