OKUSUUKURURWA 8

1Omwana gw'Entaama obu yabambwire emanyiikirizo eya musanju, haabaho okuculeera omu iguru okumara nk'ekicweka ky'esaha. 2Nubwo narozire bamalaika musanju abeemerra omumaiso ga Ruhanga baaheebwa engwara musanju. 3Haija malaika ondi yayemerra haihi n'itambiro, aina ekiswa kya zaabbu; yaheebwa emigaju nyingi ey'okwotera hamu n'eby'okusaba kw'abahikiriire ebikaba biri ha itambiro lya zaabbu omumaiso g'ekitebe ky'obukama; 4kandi omwika gw'omugaju gwaimuka omu maiso ga Ruhanga hamu n'eby'okusaba kw'abahakiriire, byona byaruga omu mukono gwa malaika ogu. 5Aho malaika yakwata ekiswa kya zaabbu, yakiijuza omurro ogwa ha itambiro, yakihungura omunsi; enkuba zaabbaruka, emirabyo yamulikya, haabaho n'omusisa. 6Nubwo bamalaika musanju abakaba baina engwara musanju, baayeteekaniza kuziteera. 7Malaika ow'okubanza yateera engwara ye, haazooka orubaale n'omurro bitabwirwemu esagama, byagwa omunsi; kimu kya kasatu eky'ensi kyamekuka, n'ekimu kya kasatu eky'emiti n'obunyansi, byona byahya. 8Malaika owa kabiri yateera engwara ye, ekintu ekirukusisana orusozi orukooto orurukwaka omurro, kyagwa omu nyanja. 9Kimu kya kasatu eky'enyanja kyafooka sagama, n'ekimu kya kasatu eky'ebihangwa ebyomeezi ebiri omu nyanja kyafa, kandi kimu kya kasatu eky'emeeri kyahwerekerezibwa. 10Malaika owa kasatu yateera engwara ye, enyunyuuzi enkooto yaruga omu iguru, neeyaka nk'ekimuli, yagwa ha kimu kya kasatu eky' ebisaaru na ha maziba. 11Ibara ly'enyunyuuzi egi, niyo Nyakusarra. Kimu kya kasatu eky'amaizi gasarra pe, gaita abantu baingi, habwokuba gakaba gasaaliire. 12Malaika owa kana yateera engwara ye, kimu kya kasatu eky' izooba kyateerwa, hamu n'ekimu kya kasatu eky'okwezi, na kimu kya kasatu eky'enyunyuuzi. Ekyarugiremu: kimu kya kasatu eky'ekyererezi kyabyo kyaswekwa omwirima, omusana gukamara kimu kya kasatu ky'ekiro gutarukujwa. Okwezi n'enyunyuuzi nabyo byamara kimu kya kasatu ky'ekiro bitarukujwa. 13Aho narora kandi nahurra isamba erikaba nirihurruka omu burangasa, niryamuza n'iraka likooto liti: “Ziribabona, ziribabona, ziribabona abaliba bali omunsi engwara ezindi isatu obu zirigamba, bamalaika abasatu ezi bali haihi kuteera!”

will be added

X\