OKUSUUKURURWA 6

1Nubwo narozire Omwana gw'Entaama naabambura emanyiikirizo ey'okubanza ha manyikirizo musanju, kandi nahurra ekimu ha bihangwa ebbina ebyomeezi nikigamba n'iraka nk'ery'okuhinda kw'enkuba kiti: “Rugayo!” 2Narora embaraasi rweru, etemberwe omuntu akwasire obuta; yaheebwa ekondo, yaramaga kusingura kandi yasingurra kimu. 3Omwana gw'Entaama obu yabambwire emanyiikirizo eya kabiri, nahurra ekihangwa ekyomeezi ekya kabiri nikigamba kiti: “Rugayo!” 4Haarugayo embaraasi endi rugaaju. Ow'akaba agitembere yaikirizibwa kwiha obusinge omunsi, nukwo abantu baitangane; kandi yaheebwa empirima enkooto. 5Omwana gw'Entaama obu yabambwire emanyiikirizo eya kasatu, nahurra ekihangwa ekyomeezi ekya kasatu nikigamba kiti: “Rugayo!” Narora embaraasi rwozi. Ow'akaba agitembere akwasire minzaani omu ngaro ze; 6nahurra ekirukusisana iraka niryema hagati y'ebihangwa bbina abyomeezi, nirigamba liti: “Endengo ey'engano erukwera ebe mpeera y'ekiro kimu; baitu amagita n'amarwa obikwate mpora!” 7Omwana gw'Entaama obu yabambwire emanyiikirizo eya kana, nahurra iraka ery'ekihangwa ekyomeezi ekya kana nirigamba liti: “Rugayo!” 8Narora embaraasi rubuubi. Ow'akaba agitembere, ibara lye nuwe Rufu, kandi Kuzimu emuhondiire; byaheebwa obusobozi ha kimu kya kana eky'ensi, okukiisa empirima, kiihe, ebidanda, n'enyamaiswa ez'omunsi. 9Omwana gw'Entaama obu yabambwire emanyiikirizo eya kataano, narora hansi y'itambiro emyoyo y'abo abaisirwe habw'ekigambo kya Ruhanga, na habw'obwakaiso obu baahaire; 10baatoka n'iraka likooto bati: “Ai Kamarabyona, ahikiriire kandi ow'amazima, olimara kasumi ki otakacweriire musango abo abaikara omunsi, kandi olibahoora di enzigu habw'esagama yaitu?” 11Nubwo buli omu omuli bo yahairwe ekanzu erukwera, kandi baagambirwa kwongera kuhuumuraho akasumi, okuhika omuhendo ogw'abaheereza bagenzi baabo na bataahi baabo ab'okwitwa nka bo obu gulikahika. 12Omu kubonekerwa kwange, Omwana gw'Entaama obu yabambwire emanyiikirizo eya mukaaga, haabaho omusisa ogw'amaani; izooba lyaraara, lyasisana orugoye orurukwiragura, okwezi kwona kwatukura nk'esagama, 13enyunyuuzi eza haiguru zaaragalika hansi, nk'omuti omutini oku guragalikya ebijuma byagwo omu bwire bwa kasambura obu gutengesibwa ihunga; 14iguru lyahwaho nk'omuzingo ogukubirwe, buli rusozi na buli kizinga byaihururwa omu biikaro byabyo. 15Nubwo abakama b'ensi n'abantu ab'ekitiinisa, engabwa ez'amahe, abaguuda, ab'amaani kandi buli muntu: omwiru n'ow'obugabe baayeserekere omu maingira n'omu mabaale ag'omu nsozi; 16baataagira ensozi n'amabaale ago bati: “Mutugwere, mutusereke amaiso g'Ogu anyakusingire ha kitebe ky'obukama; kandi mututabule ekiniga ky'Omwana gw'Entaama; 17habwokuba ekiro kikuru eky'okucweraho omusango kihikire, nooha asobora kukyemera?”

will be added

X\