OKUSUUKURURWA 5

1Omu mukono ogw'obulyo gw'Ogu anyakusingire ha kitebe ky'obukama, nkaroramu omuzingo gw'ekitabu oguhandiikirwe embaju zombi, oguboherwe emanyiikirizo musanju; 2kandi narora malaika ow'amaani naarangirra n'iraka likooto ati: “Nooha asemeriire kwanjurra omuzingo n'okucwa emanyiikirizo zagwo?” 3Baitu hatabeho n'omu omwiguru, rundi omunsi, rundi okuzimu ayasoboire kwanjurra omuzingo n'okugusoma. 4Na nyowe nkarra muno habw'okuburwaho n'omu ow'akaba asemeriire kwanjurra omuzingo n'okugusoma. 5Nubwo omu ha bakuru yangambiire ati: “Leka kurra; orole Entale ey'orunganda rwa Yuda, Ekikoro kya Daudi, asingwire. Nahabweki uwe asobora kwanjurra omuzingo n'okubambura emanyiikirizo zagwo musanju.” 6Hagati y'ekitebe ky'obukama n'ebihangwa bbina ebyomeezi, n'omu bakuru abo hagati, nkarora Omwana gw'Entaama ayemeriire, naasisana nk'anyakutambirwe, aina amahembe musanju n'amaiso musanju, agarukumanyisa emyoyo musanju Ruhanga ei yatumire omunsi yoona. 7Yagenda yaiha omuzingo omu mukono ogw'obulyo ogw'Ogu ow'akaba asingire ha kitebe ky'obukama. 8Obu yamazire kutwara omuzingo, ebihangwa ebbina ebyomeezi n'abakuru amakumi abiri na bbana baajuumara omumaiso g'Omwana gw'entaama, buli omu akwasire endongo n'ebibindi bya zaabbu ebiijwire omugaju, nubwo bumanyisa okusaba kw'abahikiriire. 9Baazina ekizina ekihyaka nibagamba bati: “Niiwe osemeriire kutwara omuzingo n'okubambura emanyiikirizo zagwo, habwokuba okaitwa, wacungurra Ruhanga abantu n'okufa kwawe, noobaiha omu buli ruganda, buli ngambo, omu bantu boona n'omu mahanga goona. 10Wabafoora bukama kandi banyakatagara ba Ruhanga waitu, nubo balirema omunsi.” 11Omu kubonekerwa kwange nahurra amaraka ga bamalaika baingi batarukusobora kubarwa, beehinguliriize ekitebe ky'obukama, n'ebihangwa ebyomeezi, n'abakuru abo. 12Boona nibagamba n'iraka likooto bati: “Mwana gw'Entaama ayatambirwe asemeriire kuheebwa obusobozi, obuguuda, amagezi, amaani, okunyumizibwa, ekitiinisa n'okukugizibwa!” 13Kandi nkahurra ebihangwa byona ebiri omwiguru, omunsi, okuzimu, n'omu nyanja na byona ebinyakugirumu nibigamba biti: “Ogu anyakusingire ha kitebe ky'obukama, hamu n'Omwana gw'Entaama, bakugizibwe, banyumizibwe, baheebwe ekitiinisa n'obusobozi ebiro n'ebiro!” 14Kandi ebihangwa ebbina ebyomeezi byagamba biti: “Nukwo kibe kiti!” Abakuru baajuumara ha nsi, baaramya.

will be added

X\