OKUSUUKURURWA 3

1“Handiikira malaika ow'ekitebe eky'abaikiriza ekiri Saadisi noogamba oti: Binu nibyo bigambo by'Ogu anyakwina emyoyo musanju eya Ruhanga n'enyunyuuzi musanju. Naagira ati: “Mmanyire ebikorwa byawe, oyetwa mwomeezi kandi kunu ofiire! 2Sisiimuka, ogumye ebi okyasigaize, biri haihi kuhwaho; habwokuba nindora ebikorwa byawe nkooku bitarukuhika omu maiso ga Ruhanga wange. 3Hati nu oijuke ebi wahairwe n'ebi wahuliire; nibyo ogumye, kandi oyegarukemu. Obu otasisiimuke ndiija nk'omusuma, kandi tolimanya kasumi aka ndikuhikiraho. 4Omu Saadisi okyainamu abake abatarasiisire bijwaro byabo. Baligenda na nyowe bajwaire ebirukwera, habwokuba bakisemeriire. 5Ogu anyakusingura, nukwo alijwara ati ebijwaro ebirukwera, kandi ibara lye tindiriragaza omu kitabu eky'obwomeezi; baitu ndimuranga omumaiso ga Isenyowe n'ag'obwomeezi; baitu ndimuranga omumaiso ga Isenyowe n'ag'abamalaika be. 6Anyakwina okutu, ahurre Mwoyo ebi arukugambira ebitebe eby'abaikiriza.” 7“Handiikira malaika ow'ekitebe eky'abaikiriza ekiri Filadelufiya noogamba oti: Binu nibyo bigambo by'Ogu Ahikiriire, ow'amazima kandi anyakwina ekisumuruzo kya Daudi. Nuwe ogu anyakukingura hatarukubaho n'omu anyakukinga; kandi anyakukinga hatarukubaho n'omu anyakukingura. Naagira ati: 8“Mmanyire ebikorwa byawe. Dora ntaire omu maiso gaawe orwigi orukingwirwe, orutasobora kukingwa muntu n'omu. mmanyire nkooku oina amaani make, baitu nabwo okakwata ekigambo kyange kandi otanyehooge. 9Ab'omu isorrokaniro lya Sitaani, abeeyeta Bayudaaya kunu tibalibo kwo, nibabiiha kwonka--ndabahambiriza baije bagwe ha bigere byawe, nukwo bamanye nkooku nakugondeze. 10Habwokuba okakwata ekigambo kyange ekirukuhabura kiti: Gumiisiriza; nikyo na nyowe ndikulindira omu kasumi ak'okwohebwa okuliizira ensi yoona, okulenga abo abarukwikara omunsi. 11Ninyija bwango; gumiza kimu eki oinakyo, tihaikara kubaho akunyagaho ekondo yawe. 12Ogu anyakusingura, ndimufoora nyomyo omunju ya Ruhanga wange, taligirugamu naakake. Ndimuhandiikaho ibara lya Ruhanga wange n'ibara ly'orubuga rwa Ruhanga wange nurwo Yerusaalemu oruhyaka orusirimuka niruruga omw'iguru mba Ruhanga wange Mmuhandiikeho n'ibara lyange erihyaka. 13Anyakwina okutu, ahurre Mwoyo ebi arukugambira ebitebe eby'abaikiriza.” 14“Handiikira malaika ow'ekitebe eky'abaikiriza ekiri Laodikeya noogamba oti: ‘Binu nibyo bigambo by'Ogu arukwetwa “Kibekwo”, kaiso omwesigwa kandi ow'amazima, endugirro ya byona Ruhanga ebi yahangire. Naagira ati: 15“‘Mmanyire ebikorwa byawe: torukufuka kandi torukwokya. Haakire waakufukire rundi waakwokeze! 16Baitu habw'okusangwa oli kooyakooya, torukufuka kandi torukwokya, ninyija kukutanaka, onduge omu kanwa! 17Ningira niiwe arukugamba oti: Ndi muguuda, ebintu nibinyizira kurungi, tinyina eki ndukwetaaga; kandi kunu torukumanya nkooku oli munaku, w'okuganyirwa, museege, kihimbaara, kandi noogenda busa. 18Nahabweki ninkuhabura: onguleho zaabbu enyakusemeziibwe omurro, nukwo obe muguuda. Onguleho n'ebijwaro ebirukwera, bikuswekerre, bikwiheho ensoni ez'okurorwa noogenda busa; kandi onguleho omubazi ogw'okuta omumaiso, nukwo orole. 19Abo aba ngonza, mbahana kandi mbafubira; nahabweki wekambe kandi oyegarukemu. 20Hurra nu, nyemeriire ha rwigi ninyeranga; omuntu weena obu ahurra iraka lyange akakingura orwigi, ninyija kutaahamu, mmuhikeho, nukwo tulye hamu. 21Ogu anyakusingura, ndimwikiriza aikarre na nyowe ha kitebe kyange eky'obukama, nka nyowe oku nasingwire, naikarra na Isenyowe ha kitebe kye eky'obukama. 22Anyakwina okutu, ahurre Mwoyo ebi arukugambira ebitebe eby'abaikiriza.’”

will be added

X\