OKUSUUKURURWA 22

1Nubwo malaika yanyolekere ekisaaru eky'amaizi ag'obwomeezi, ekirukwangasana nk'ibaale kristaalo, ekirukugera nikiruga ha kitebe ky'obukama ekya Ruhanga n'eky'Omwana gw'Entaama, 2nikiraba hagati y'ikuute ery'orubuga orukuru. Ha buli rubaju orw'ekisaaru hakaba haliyo emiti y'obwomeezi enyakwina ebijuma byayo by'emiringo ikumi n'ebiri, enyakwana ebijuma buli kwezi; kandi ebikoora byayo bikaba biri by'okutambira abantu ab'amahanga. 3Omu rubuga oru tihaligaruka kuzookamu kintu kyona ekikyenerwe, baitu haraikaramuga ekitebe ky'obukama ekya Ruhanga n'eky'Omwana gw'Entaama, kandi abaheereza be balimuramya. 4Balirora amaiso ge, kandi ibara lye liriba ha buso bwabo. 5Obwire tibuligaruka kwira; tibalyetaaga kererezi ky'etaara rundi izooba, habwokuba MUKAMA Ruhanga nuwe araabamulikiraga kandi balirema ebiro byona. 6Hanyuma malaika yangambira ati: “Ebigambo binu by'okwesiga kandi by'amazima. MUKAMA Ruhanga anyakuha abarangi omwoyo ogw'okuranga, atumire malaika we ayoleke abaheereza be ebiri haihi kubaho.” 7Kandi Yesu yagamba ati: “Hati nu, ndi haihi kwija. W'omugisa ogu arukukwata ebigambo ebyarangirwe ebiri omu kitabu kinu.” 8Nyowe Yohaana, ninyowe ayahuliire kandi ayarozire ebintu ebi. Obu nabihuliire kandi mbirozire, najuumara ha bigere bya malaika ayabinyolekere kumuramya; 9baitu yantanga ati: “Otakisura! Nyowe ndi muheereza nka iwe kandi nka bagenzi bawe abarangi, kandi nk'abo abakwata ebigambo ebiri omu kitabu kinu. Ramya Ruhanga!” 10Kandi yanteererra ati: “Ebigambo ebyarangirwe ebiri omu kitabu kinu otabiculerra, habwokuba akasumi kabyo kali haihi kuhika. 11Arukukora kubi, leka akole kubi, arukusiisa, leka asiise; arukukora ebihikire, leka abikole; kandi arukwera, ayeyongere omu burukwera.” 12Yesu yagamba ati: “Dora ndi haihi kwija. Nyina empeera ey'okusasura buli omu habw'ebi yakozire. 13Ninyowe Alufa na Omega, amakuru gaakyo: Ow'okubanza kandi Nw'okumalirra, Entandiko kandi Empero.” 14B'omugisa abo aboogya ebijwaro byabu bakabyeza, nukwo baikirizibwe kulya ha bijuma by'emiti y'obwomeezi n'okutaaha orubuga orukuru nibaleetwa omu malembo. 15Aheeru yarwo haikarayo embwa, abarogo, abasiihani, abaisi b'abantu, abaramya abacwezi na boona abagonza kandi abaikaliza eby'obugobya. 16“Nyowe Yesu, nkutumiire malaika wange akumanyise binu, nukwo bigasire ebitebe by'abaikiriza. Ninyowe kikoro kandi mwijukuru ow'oruganda rwa Daudi, enyunyuuzi erukwangasana ey'omu rukyakya.” 17Mwoyo Ahikiriire n'Omugole nibagamba bati: “Rugayo.” Kandi weena arukuhurra, leka agambe ati: “Rugayo.” Kandi wena anyakukwasirwe iroho, leka aije; na weena arukwetaaga, leka anywe amaizi ag'obwomeezi agatarukugurwa. 18Nyowe Yohaana, nimpabura weena arukuhurra ebigambo ebyarangirwe ebiri omu kitabu kinu: Kakuba omuntu abyongeraho, Ruhanga alimwongeraho emihito enyakusoboroirwe omu kitabu kinu. 19Kandi omuntu kakuba abikeehyaho, Ruhanga talimwikiriza kuhika ha muti ogw' obwomeezi n'omu rubuga orurukwera, ebisoboroirwe omu kitabu kinu. 20Ogu arukugumya binu naagamba ati: “Mazimakwo ndi haihi kwija.” Nukwo kibe! Ija MUKAMA Yesu! 21Embabazi za MUKAMA Yesu ziikale n'abantu be boona. Amiina.

will be added

X\