OKUSUUKURURWA 21

1Nubwo narozire iguru erihyaka n'ensi empyaka. Habwokuba iguru ery'okubanza n'ensi ey'okubanza bikaba bihoireho, kandi enyanja ekaba etakyaroho. 2Narora orubuga orurukwera, Yerusaalemu oruhyaka, nirusirimuka niruruga omwiguru hali Ruhanga, ruteekaniziibwe nk' omugole ou bakunisiize iba. 3Kandi nahurra iraka likooto niriruga ha kitebe ky'obukama nirigamba liti: “Hati mumanye Ruhanga nkooku aikara n'abantu be. Aliikara nabo, babe bantu be, nawe wenka aliikara omulibo. 4Alibasusura amaizi goona ag'omu maiso gabo. Orufu tiruligaruka kubaho, noobu kwakuba okuganya, rundi okurra, rundi obusaasi. Habwokuba ebintu ebya kara biriba bihoireho.” 5Ogu ow'akaba asingire ha kitebe eky'obukama yagamba ati: “Hati ebintu byona nimbifoora bihyaka!” Yayongera yagamba ati: “Handiika binu, habwokuba binu bigambo by'okwesiga kandi by'amazima.” 6Nubwo yangambiire ati: “Byona bihikiriziibwe! Ninyowe Alufa na Omega, amakuru gaabyo: Entandiko kandi Empero. Weena anyakukwatwa iroho ndimuha amaizi agatali g'okugura, agarukuruga omu iziba ery'amaizi ag'obwomeezi. 7Weena anyakusingura, bunu nubwo buliba bugwetwa bwe: Ndiba Ruhanga we, kandi uwe aliba mwana wange. 8Baitu abatiini, abataikiriza, abanugwa, abaisi b'abantu, abasiihani, abarogo, abaramya abacwezi n'abanyabisuba boona, omugabo gwabo eriba enyanja erukwaka omurro n'obuganga. Nukwo okufa okwa kabiri.” 9Nubwo haizire omu ha baamalaika omusanju, abakaba baina ebibindi musanju ebiijwire emihito musanju eya ha mpero, yangambira ati: “Ija, nkwoleke Omugole, omukazi w'Omwana gw'Entaama.” 10Yantwara ha rusozi orukooto kandi oruraihire ntemberwe Mwoyo Ahikiriire, yanyoleka orubuga orurukwera, Yerusaalemu, nirusirimuka niruruga omwiguru hali Ruhanga, 11rwina ekitiinisa kya Ruhanga. Okwangasana kwarwo nikusisana ibaale ery'omuhendo omukooto, nirusisana ibaale yasipi, nirwengengeta nka ibaale kristalo. 12Rukaba rwehinguliriziibwe ekigo ekikooto kandi ekiraihire. Kiina amalembo ikumi n'abiri, ha malembo ago haroho bamalaika ikumi na babiri; kandi na ha malembo hahandiikirweho amabara ag'enganda ikumi na ibiri ez'Abaisirairi. 13Ha Burugaizooba amalembo asatu, bukiizi bw'emoso amalembo asatu, bukiizi bw'obulyo amalembo asatu, na Bugwa-izooba amalembo asatu. 14Ekigo ky'orubuga oru kikaba kiina amabaale g'omusingi ikumi n'abiri agahandiikirweho amabara ikumi n'abiri ag'abakwenda ikumi na babiri ab'Omwana gw'Entaama. 15Malaika ayabalize na nyowe, akaba aina orubango orwa zaabbu orw'okulengesa orubuga, amalembo gaarwo n'ebisiika byarwo. 16Orubuga oru rukaba rwina embaju ina ezirukwingana, obura bwarwo bwainganaga n'obugazi bwarwo. Orubuga yarulengesa orubango, rwahikya kilomita enkumi ibiri n'ebbina; obura, obugazi n'obwemi bwarwo nibwingana. 17Malaika yayongera yalenga ekisiika kyarwo, kyahikya mita nkaaga oburaiha, abantu nkooku baalenga. 18Ekisiika kikombekwa na mabaale g'omuhendo agarukwetwa yasipi, baitu orubuga rukombekwa na zaabbu yonyini, erukumuliikana nk'ekirahule. 19Emisingi ey'ekisiika ky'orubuga ekaba etonerwe n'amabaale ag'omuhendo aga buli mulingo. Omulingo ogw'okubanza, niryo ibaale yasipi, erya kabiri saafiro, erya kasatu kalukeedoni, erya kana simaragido, 20erya kataano sarudoni, erya mukaaga saarudiyo, erya musanju kirisoolito, erya munaana beerilo, erya mwenda topaazi, erya ikumi krisoopuraso, erya ikumi na limu yasinto, erya ikumi n'abiri ametisito. 21amalembo ikumi n'abiri, nugo amabaale ag'eruuru ikumi n'ibiri, buli irembo lyombekerwe n'eruuru emu yonka; kandi ikuute ery'orubuga likaba likozirwe na zaabbu yonyini, erukumuliikana nk'ekirahule. 22Omu rubuga oru ntarolemu Nju ya Ruhanga, habwokuba MUKAMA Ruhanga ow'obusobozi bwona n'Omwana gw'Entaama nubo Nju ya Ruhanga y'orubuga oru. 23Kandi orubuga oru tirurukwetaaga izooba rundi okwezi eby'okurujwera, habwokuba ekitiinisa kya Ruhanga nikyo kyererezi kyarwo kandi Omwana gw'Entaama niyo taara yarwo. 24Amahanga galigendera omu kyererezi kyarwo; kandi abakama b'ensi baliruleetamu ekitiinisa kyabo. 25Amalembo gaarwo tigalikingwa nyamusana omurundi na gumu; kandi oku, obwire tibwairege. 26Baliruleetamu ekitiinisa ky'amahanga n'itungo lyago. 27Baitu ekintu kyona ekitasemiire tikirirutaahamu, noobwakubaire omuntu weena anyakukora ekirukunugwa rundi eby'obugobya; baitu halitaahamu abo bonka abaahandiikirwe omu kitabu eky'obwomeezi eky'Omwana gw'Entaama.

will be added

X\