OKUSUUKURURWA 20

1Nubwo narozire malaika ondi naasirimuka naaruga omwiguru, akwasire omu ngaro ekisumuruzo eky'ekiina ekitaina h'okugarukira n'orujegere rukooto. 2Yagenda yakwata ekijoka, niyo njoka egi eya ira enyakwetwa Omwohi kandi Sitaani, yamuboha kumara emyaka rukumi, 3yamunaga omu kiina, yakiigarra, yakitaho enkwasi amazire kumwigalirramu, nukwo aleke kwongera kubiihabiiha amahanga, okuhika emyaka rukumi obu erihwa. Obu erihwaho asumururwe akaanya kake. 4Hanyuma narora ebitebe by'obukama, abakaba babiikaliireho nubo abo abaahairwe obusobozi obw'okucwa emisango. Kandi narora emyoyo y'abo abaacwirweho emitwe habw'okujurra Kristo n'ekigambo kya Ruhanga. Nubo abo abatararamize kinyamaiswa rundi ekisisani kyakyo, abakaba batatairweho karorwaho kaakyo ha buso rundi ha mikono yabo. Baahumbuuka, baalema hamu na Kristo kumara emyaka rukumi. 5Abafu abandi batahumbuuke okuhika emyaka egi rukumi obu yahoireho. Oku mukwo okuhumbuuka okw'okubanza. 6W'omugisa kandi ahikiriire anyakubagana ha kuhumbuuka okw'okubanza! Abali nk'abo, okufa okwa kabiri tikubainaho busobozi; baitu baliba banyakatagara ba Ruhanga na Kristo, balirema hamu nawe okumara emyaka rukumi. 7Emyaka rukumi obu erihwa, Sitaani alisumururwa aruge omu nkomo ye, 8alituruka kubiihabiiha Gogu na Magogu, nugo amahanga agali ha mbaju ina ez'ensi agasorooleze obulemu. Omuhendo gw'abantu abo nigwingana omusenyi ogw'enyanja. 9Bakagenda banyaaka ensi yoona, baagota orukande rw'abantu ba Ruhanga n'orubuga orukuru orugonzibwa; baitu omurro gwaruga omwiguru gwabahwerekereza, 10kandi Omwohi ayababiihabiihaga yanagwa omu nyanja erukwaka omurro n'obuganga, nambere hakaba hali ekinyamaiswa n'omurangi ow'ebisuba, kandi nambere balibonabonesezibwa nyamusana n'ekiro ebiro byona. 11Aho narora Ekitebe ky'obukama ekirukwera kandi eky'ekitiinisa n'Ogu ow'akaba akiikaliireho. Ensi n'iguru byairuka byaruga omumaiso ge, byaburra kimu. 12Narora abafu, abakuru n'abato, beemeriire omumaiso g'ekitebe ky'obukama, kandi ebitabu byasuukurwa. Ekitabu ekindi nakyo kyasuukurwa, nikyo kitabu eky'obwomeezi. Abafu baacwerwa omusango habw'ebi ebi baakozire ebyahandiikirwe omu bitabu. 13Enyanja yabooga emitumbi y'abagiferiiremu. Rufu na Kuzimu byagarra abafu abakaba babirumu. Boona baacwerwa omusango habw'ebi baakozire. 14Nubwo Rufu na Kuzimu byanagirwe omu nyanja y'omurro. Kandi enyanja y'omurro, nukwo okufa okwa kabiri. 15Omuntu weena ow'ibara lye litarahandiikirwe omu kitabu ky'obwomeezi yanagwa omu nyanja y'omurro.

will be added

X\