OKUSUUKURURWA 2

1“Handiikira malaika ow'ekitebe eky'abaikiriza ab'Efeeso noogamba oti: Binu nibyo bigambo by'Ogu anyakukwasire enyunyuuzi musanju omu mukono gwe gw'obulyo, kandi anyakugendera hagati y'ebikondo musanju ebya zaabbu. Naagira ati: 2“Nyowe mmanyire ebikorwa byawe, okwekamba kwawe, n'okugumiisiriza kwawe; kandi mmanyire nkooku otasobora kugumiisiriza ababi, baitu okutegereza abo abanyakweyeta bakwenda kunu tibalibo kwo, wasanga bali b'ebisuba. 3Mmanyire nkooku orukugumiisiriza muno, nooyemera bingi habwange kandi tojwaha. 4Baitu eki ndukukujunaana nkinu: tokyaina engonzi ezi okaba oinazo okubanza. 5Nukwo nu, ijuka ha warugiriire kugwa; oyegarukemu, okole ebi wakoraga okubanza. Obu otaakole oti, ndikuhikaho, ekikondo ky'etaara yawe nkiihe omu kiikaro kyakyo, rundi buli oyegarukiremu. 6Ekirungi eki ndukukusiimaho nkinu: noonoba ebikorwa by'ekitebe ky'Abanikola 7Anyakwina okutu, ahurre Mwoyo ebi arukugambira ebitebe ky'abaikiriza. Anyakusingura ndimwikiriza kulya ha muti ogw'obwomeezi ogunyakuli omunsi ya Ruhanga ey'okuhiirwa.” 8“Kandi handiikira malaika ow'ekitebe eky'abaikiriza ekiri Sumiruna noogamba oti: Binu nibyo bigambo by'ow'okubanza kandi owa ha mpero, ayafiire kandi yahumbuuka. Naagira ati: 9“Mmanyire omuhito gwawe n'obunaku bwawe (kunu oli muguuda); kandi mmanyire ebihangirro by'abo abeeyeta Bayudaaya, kunu tibalibo kwo, baitu isorrokaniro lya Sitaani. 10Otatiina ebi orukwija kubonabona. Hurra nu, Omwohi amaliriire kuta omu nkomo abamu omuli inywe, nukwo mulengesibwe. Nimwija kumara ebiro ikumi nimubonesibwa. Mugume okuhika ha kufa, nubwo na nyowe ndibaha ekondo ey'obwomeezi. 11Ogu anyakwina okutu, ahurre Mwoyo ebi arukugambira ebitebe by'abaikiriza. Anyakusingura, okufa okwa kabiri tikwina eki kulimukoraho.” 12“Kandi handiikira malaika ow'ekitebe eky'abaikiriza ekiri Perugamo noogamba oti: Binu nibyo bigambo by'Ogu anyakwina empirima enyakutoire ey'amoogi abiri. Naagira ati: 13“Mmanyire h'oikara, oku nuho hali ekitebe eky'obukama bwa Sitaani; baitu iwe okyagumiire ha ibara lyange kandi oteehooge nkooku orukunyikiriza, noobu haakubaire omu biro by'Antipa, kaiso wange omwesigwa, ayaitiirwe owaanyu oku nambere Sitaani aikara. 14Baitu nyina ebigambo bike ebi ndukubajunaana: oku mwinayo abantu abamu abarukwikiriza enyegesa za Balaamu ayahabwire Balaki kwesiitaaza abaana ba Isirairi, nukwo balye ebyokulya ebihongiirwe abacwezi kandi beemarre ha busiihani. 15Kandi mwina n'abamu abarukuhondera enyegesa ez'Abanikola. 16Hati nu mwegarukemu. Kakuba muteegarukamu, ninyija kubahikaho bwango, abo boona mbarwanise n'empirima ey'akanwa kange. 17“Anyakwina okutu, ahurre Mwoyo ebi arukugambira ebitebe by'abaikiriza. Anyakusingura, ndimuha byokulya ebiserekerwe, niyo maanu; kandi ndimuha ibaale erirukwera erihandiikirweho ibara erihyaka eritamanyirwe muntu n'omu, okwihaho ogu anyakulirukirwe.” 18“Handiikira malaika ow'ekitebe eky'abaikiriza ekiri Tiyatiira noogamba oti: Binu nibyo bigambo by'Omwana wa Ruhanga, anyakwina amaiso agarukwaka nk'endimi z'omurro, kandi ebigere ebirukusisana omulinga oguzigwire. Naagira ati: 19“Mmanyire ebikorwa byawe, engonzi zawe, okwikiriza kwawe, obuheereza n'okugumiisiriza kwawe; kandi nimmanya ebikorwa ebi orukukora hati nkooku birukukira ebyabandize. 20Baitu kinu nikyo ndukukujunaana: n'okyaikiriza omukazi ogu Yezabeeli, arukweyeta murangikati, nuwe ahabisa abaheereza bange kandi naabeegesa kwemarra ha busiihani n'okulya ebihongiirwe embandwa. 21Nkamuha akasumi ak'okwegarukamu, baitu akanga kuleka obusiihani bwe. 22Hati nu ninyija kumuleetera endwara emuzingike, kandi abo abasiihana nawe ndibaleetera emihito nyingi, rundi buli balekere ebi arukukora; 23kandi n'abaana be ndibaita. Nukwo ebitebe byona eby'abaikiriza bimanye nkooku ali nyowe arukwetegereza ebiteekerezo n'emitima; kandi buli omu omuli inywe ndimuha ebisemeriire ebikorwa bye. 24“Baitu abandi abasigaireho, inywe abali Tiyatiira abatarukuhondera nyegesa egi, abatakeegere abandi eri beeta ifubo lya Sitaani, nyowe nimbagambira nti: Tindukwija kubongeraho bulemeezi obundi. 25Kyonka mugumize kimu eki mwinakyo okuhika obu ndiija. 26Ow'aliba asingwire kandi ahikiriize ebi ndukwenda okuhika ha mpero, ndimuha obusobozi obw'okulema amahanga, 27nyowe nkooku naabuhairwe Isenyowe. Aligalemesa omwigo ogw'ekyoma, agasasangule nk'omubumbi oku asasangura ebinaga. 28Kandi ndimuha enyunyuuzi ey'omu rukyakya (nuwe Kristo). 29Anyakwina okutu, ahurre Mwoyo ebi arukugambira ebitebe by'abaikiriza.”

will be added

X\