OKUSUUKURURWA 19

1Ebi obu byahoire, nahurra iraka likooto erirukusisana ery'ekitebe ky'abantu baingi abali omwiguru nibazina bati: “Haleluya! Okujuna, ekitiinisa n'obusobozi, byona bya Ruhanga waitu. 2Habwokuba encwa ye y'amazima kandi y'obulyo. Malaaya rurangaanwa ayasiisire ensi n'obusiihani bwe amusingisize omusango kandi amuhoire enzigu habw'esagama y'abaheereza be.” 3Baayongera baayamirra bati: “Haleluya! Omwika ogurukuruga omu rubuga oru guraikaraga nigucuuka ebiro byona.” 4Kandi abakuru amakumi abiri na bbana, hamu n'ebihangwa ebbina ebyomeezi baajuumara hansi, baaramya Ruhanga anyakwikaliire ha kitebe eky'obukama nibagamba bati: “Nukwo kibe kiti. Haleluya!” 5Kandi iraka lyaruga ha kitebe ky'obukama niryamirra liti: “Muhaisanize Ruhanga waitu, inywe inywena abaheereza be, inywe abamutiina abato n'abakuru!” 6Nubwo nahuliire iraka erirukusisana ery'ekitebe ky'abantu baingi, erirukuhirra nk'amaizi amaingi kandi erirukuhinda nk'okubbaruka kw'enkuba z'amaani niritoka liti: “Haleluya! MUKAMA Ruhanga waitu ow'obusobozi bwona ahangiriize. 7Katusemererwe, tukyanganuke kandi tumukugize, habwokuba obugenyi bw'obugole obw'Omwana gw'Entaama buhikire, kandi Omugole we ayeteekaniize; 8akaikirizibwa kujwara bafuta erukunekaneka, erukwera kandi esemiire” habwokuba bafuta erukunekaneka neemanyisa ebikorwa ebirungi eby'abahikiriire. 9Malaika yangambira ati: “Handiika oti: B'omugisa abaraliziibwe ha kiihuro ky'obugenyi bw'obugole obw'Omwana gw'Entaama.” Malaika yayongera ati: “Ebi nibyo bigambo bya Ruhanga ebya mazima.” 10Aho najuumara ha bigere bye kumuramya, baitu yantanga ati: “Otakisura! Nyowe ndi muheereza nka iwe, kandi nk'abagenzi bawe abagumya ebya Yesu. Ramya Ruhanga.” Habwokuba ekisembo kyona eky'okuranga kisigikira ha bwakaiso Yesu obu yahaire. 11Nubwo narozire iguru likingwirwe, haazookayo embaraasi rweru! Ogu ow'akaba agitembere, naayetwa Mwesigwa kandi Mazima, nuwe acwa emisango omu bulyo kandi arwana obulemu omu bwinganiza. 12Amaiso ge nigasisana endimi z'omurro, ha mutwe gwe ajwaire ekondo nyingi, kandi hahandiikirweho ibara eritarukumanywa muntu n'omu kwihaho uwe wenka. 13Ajwaire ekanzu enyakwibikirwe omu sagama, kandi ibara eri bamweta niryo Kigambo kya Ruhanga. 14Ab'amahe ag'omwiguru baamuhondera batembere embaraasi nyingi rweru, bajwaire bafuta erukunekaneka, erukwera kandi esemiire. 15Omu kanwa ke haarugamu empirima enyakutoire ey'okutemesa amahanga, kandi aligalemesa omwigo ogw'ekyoma; abanyanzigwa be alibarubatirirra omu ndeeba ey'ekiniga kya Ruhanga ow'obusobozi bwona. 16Ha kanzu ye na ha mpirima ye hahandiikirweho ibara: MUKAMA w'abakama kandi Mulemi w'abalemi. 17Aho narora malaika ayemeriire omu izooba, yayeta n'iraka likooto enyonyi zoona eziharruka haiguru omu burangasa ati: “Mwije mwesorooze ha kiihuro ekikuru kya Ruhanga! 18Mwije mulye enyama ey'abakama, ey'engabwa ez'amahe, n'ey'emanzi: enyama ey'embaraasi n'abatembi baazo, n'ey'abantu boona, ab'obugabe n'abairu, abato n'abakuru!” 19Narora ekinyamaiswa eki, n'abakama ab'ensi, n'amahe gaabu ageesoroize kurwanisa Ogu anyakwikaliire ha mbaraasi n'okurwanisa ihe rye. 20Ekinyamaiswa kyahambwa hamu n'omurangi ow'ebisuba ayakozire ebihuniriza omumaiso gaakyo. (Ebihuniriza ebyahabisize abo abatairweho akarorwaho k'ekinyamaiswa n'abo abaaramize ekisisani kyakyo.) Ekinyamaiswa n'omurangi ow'ebisuba byanagwa omu nyanja y'omurro erukwaka n'obuganga bikyali byomeezi. 21Abaasigaireho bakaitwa empirima y'Ogu anyakwikarra ha mbaraasi, niyo mpirima enyakuruga omu kanwa ke; amahungu goona gaalya gaaniha emitumbi yabo.

will be added

X\