OKUSUUKURURWA 18

1Ebi obu byahoire, narora malaika ondi naasirimuka naaruga omwiguru, aina obusobozi bwingi, kandi ensi yayangasana habw'ekitiinisa kye. 2Yayamirra n'iraka ery'amaani ati: “Rugwire Bbabbulooni orubuga rukuru! Rugwire! Rufookere bwikaro bw'emizimu, bwikaro bwa buli mwoyo mubi gwona, bwikaro obwikarwamu buli kinyonyi kyona ekirofu kandi ekirukunobwa; 3habwokuba amahanga goona gatamiire obubi bw'obusiihani bwarwo, kandi abakama ab'ensi basiihaine narwo, n'abasuubuzi ab'ensi baguudahaire habw'itungo erirugire omu rwanju rwarwo.” 4Nubwo nahuliire iraka erindi erirukuruga omwiguru nirigamba liti: “Inywe, bantu bange, muturuke muruge omu rubuga oru, timwikara kwetaba omu bibi byarwo, mukabagana ha mihito yarwo. 5Ebibi byarwo bituumire kuhika ha iguru, kandi Ruhanga aijukire obubi bwarwo. 6Murukole nkooku rwakozire abandi, kandi mururongoole kabiri habw'ebi rwakozire, ekikopo ky'amarwa ag'empotole aga rwabanywisize, inywe murugarurremu kabiri. 7Nkooku rwayenyumiize rwonka kandi rwagira orwanju, na inywe nukwo murusaalize kandi murutuntuze muti. Noobu ruraaba nirugamba omu mutima gwarwo ruti: ‘Nyikaliire nk'Omugo, tindi mufakaati, obujune tibulimpikaho’, 8baitu kiro kimu emihito yarwo eriruhikaho: orufu, okuganya na kiihe, kandi rulyokebwa omurro; habwokuba MUKAMA Ruhanga ow'obusobozi bwona nuwe arukurucwera omusango.” 9Abakama ab'ensi abaasiihaine kandi abaayanjukire narwo, balirulirirra kandi baruterre empamo obu balirora omwika gwarwo nigucuuka. 10Balyemerra hara, nibatiina kururora nirubonabonesibwa, kandi baligamba bati: “Ai bambi! Ai Bambi! Iwe rubuga orukuru! Iwe Bbabbulooni orubuga orw'amaani! Ekifubiro kyakuhikaho omu saaha emu yonka.” 11Abasuubuzi ab'omunsi nibarulirirra kandi nibarugaragarra, habwokuba busaho n'omu akyayongera kubaguraho bintu byabo: 12zaabbu, efeeza, amabaale g'omuhendo n'eruuru; bafuta enungi eya kahuukya, engoye eza liiri n'ezirukutukura; n'emiti yoona erukuboya kurungi; ebintu byona ebyakozirwe omu masanga, byona ebyabaizirwe omu miti ey'omuhendo, omu mulinga ogw'omuherre, ekyoma ekigumire n'amabaale agarukwangasana; 13eby'okuboyesa ebyokulya, ebirungo, eseeta, omugaju, emyamirro, amarwa, amagita, ensaano enungi n'engano; ente n'entaama; embaraasi n'ebigaali byazo, hamu n'abairu rubaale--nukwo kiti nambere abantu bahingisibwamu ebintu. 14“Amagoba omwoyo gwawe aga gwayegombere, gakurugireho, kandi byona ebi wayekunisaaga hamu n'ekitiinisa kyawe obifeerirwe, toligaruka kubirora!” 15Abasuubuzi ab'ebintu ebi, abaaguudahaziibwe itungo ery'orubuga oru, balyemerra hara, nibatiina kururora nirubonabonesibwa, nibaganya kandi nibarra bati: 16“Ai bambi! Ai bambi! Orubuga orukuru, orwajwaraga bafuta enungi, ey'erangi kahuukya n'erukutukura, orwatonerwe n'ezaabbu, amabaale ag'omuhendo n'eruuru! 17Obuguuda obu bwona buhwerekereziibwe omu saaha emu yonka.” Kandi bakama b'emeeri, n'abo abagenderamu, abalimba n'abo abanyakusuburra ha nyanja baayema hara, 18nibaborooga muno obu baarozire omwika gwarwo nigucuuka, bayekaguza bati: “Rubuga ki orwainganaga orubuga runu orukuru?” 19Baayeseesa ecuucu ha mitwe. Obu, nibaganya, nibarra kandi nibeesaalinga bati: “Ai bambi! Ai bambi! Orubuga orukuru, orwaguudahaize boona abakaba baina emeeri ha nyanja! Ruhwerekereziibwe omu saaha emu. 20Iwe iguru, inywe abahikiriire, abakwenda n'abarangi murwebugire, habwokuba Ruhanga arusingisize omusango habwanyu!” 21Nubwo malaika ow'amaani yakomere ibaale erirukwingana orubengo orukooto, yalihungura omu nyanja naagamba ati: “Bbabbulooni orubuga orukuru nukwo rulinagwa hansi n'amaani ruti, kandi tiruligaruka kuzooka. 22Amaraka g'abateezi b'endongo n'ag'abazini, ag'abateezi b'enseegu hamu n'ag'abateezi b'engwara, tigaligaruka kuhulirwa omuli iwe; kandi omukozi w'omulimo gwona taligaruka kuzooka omuli iwe; n'iraka ery'orubengo tiririgaruka kuhulirwa omuli iwe. 23Kandi ekyererezi eky'etaara tikirigaruka kwakira omuli iwe. Iraka erya kigabura n'erya kigabuka tiririgaruka kuhulirwa omuli iwe. Mazimakwo abasuubuzi bawe bakaba bali bantu barangaanwa omunsi, habwokuba amahanga goona okagabiihabiiha n'oburogo bwawe. 24Kandi omu rubuga oru hakaba haseesekeremu esagama ey'abarangi n'abahikiriire, n'eya boona abaisirwe omunsi.”

will be added

X\