OKUSUUKURURWA 16

1Nubwo nahuliire iraka erikooto eryarugire omu Nju ya Ruhanga ey'omwiguru, nirigambira bamalaika omusanju liti: “Mugende museese omunsi ebibindi musanju eby'ekiniga kya Ruhanga.” 2Malaika ow'okubanza yagenda yaseesa omunsi ebiri omu kibindi kye, abantu abakaba baina akororwaho ak'ekinyamaiswa kandi abaaramize ekisisani kyakyo baacweka ebihooya ebibi ebirukununka. 3Malaika owa kabiri yaseesa omu nyanja ebiri omu kibindi kye, enyanja yafooka nk'esagama y'omuntu afiire, kandi buli kintu ekyomeezi ekikaba kiri omu nyanja kyafa. 4Malaika owa kasatu yaseesa ebiri omu kibindi kye omu bisaaru n'omu maziba, byafooka sagama. 5Nahurra malaika anyakurolerra amaizi ago naagamba ati: “Niiwe Ahikiriire, anyakuroho kandi ayabaireho, encwa yawe enu y'obulyo. 6Habwokuba abantu bakaseesa esagama y'abarukwera n'abarangi, hati na Iwe obahaire esagama, niyo banywe. Niyo basemeriire!” 7Kandi nahurra iraka erirukuruga ha itambiro nirigamba liti: “Ego, MUKAMA Ruhanga ow'obusobozi bwona, encwa yawe y'amazima kandi y'obulyo!” 8Malaika owa kana yaseesa ebiri omu kibindi kye ha izooba, lyaikirizibwa okusiiriiza abantu n'ekibabu kyalyo. 9Abantu baasiirizibwa ekibabu eky'amaani, kandi baakondereza ibara lya Ruhanga anyakwina obusobozi ha mihito egi, bateegarukemu kandi baayanga kumuha ekitiinisa. 10Malaika owa kataano nawe yaseesa ebiri omu kibindi kye ha kitebe ky'obukama eky'ekinyamaiswa. Obukama bwakyo bwaswekwa omwirima; abantu baayeruma endimi habw'okuhururwa 11baakondereza Ruhanga ow'omu iguru habw'okuhururwa oku n'ebihooya ebi bacwekere, baitu bateegarukemu ebi baakozire. 12Malaika owa mukaaga yaseesa ebiri omu kibindi kye ha kisaaru ekikooto Efuraate. Amaizi gaakyo gaayomera kimu, nukwo hateekanizibwe omuhanda abakama abarukuruga Burugaizooba ogu basobora kurabamu. 13Kandi narora emyoyo emibi esatu, erukusisana ebikere, neeruga omu kanwa k'ekijoka, omu kanwa k'ekinyamaiswa, n'omu kanwa k'omurangi ow'ebisuba. 14Egi niyo myoyo ya Sitaani enyakukora ebihuniriza, enyakugenda omu bakama ab'ensi zoona kubasorooza baije ha bulemu ha kiro kikuru ekya Ruhanga ow'obusobozi bwona. 15(“Dora, ninyija nk'omusuma! W'omugisa ogu anyakwikara naarora, akalina ebijwaro bye, nukwo aleke kugenda busa, abantu bakamurora enjuuro!”) 16Emyoyo egi yasorooleza abakama omu kiikaro ekirukwetwa omu Ruhebburaayo: Aramagedoni. 17Malaika owa musanju yaseesa omu mwanya gw'iguru ebiri omu kibindi kye. Iraka likooto lyaruga ha kitebe ky'obukama ekiri omu Nju ya Ruhanga nirigamba liti: “Kihoire!” 18Haakurataho emirabyo, okuhinda kw'amaani, okubbaruka kw'enkuba, n'omusisa gw'amaani ogutakabahoga abantu baakaba kubaho omu nsi. Omusisa ogu gukaba gw'amaani muno. 19Orubuga orukuru rwayahukanizibwa omu bicweka bisatu, n'embuga enkuru ez'amahanga zaagwa, zaahwerekerra, baitu Ruhanga ateebwe Bbabbulooni, yaijuka orubuga oruranganwa kurunywisa ekikopo kyona ekiijwire empotole ey'ekiniga kye. 20Ebizinga byona byamirwa, n'ensozi zoona zaabura; 21kandi orubaale orw'amabaale amakooto againa obulemeezi obwa kilo makumi ataano buli limu, rwaruga omwiguru rwateera abantu, kandi baakondereza Ruhanga habw'omuhito ogw'orubaale ogwabatiinisize muno.

will be added

X\