OKUSUUKURURWA 14

1Nubwo narozire Omwana gw'Entaama ayemeriire ha rusozi Siyoni, hamu n'abantu akasiiriira kamu mu bukumi bbuna n'enkumi ina, abakaba bahandiikirwe ha buso ibara lye n'ibara lya Ise. 2Kandi nahurra iraka erirukuruga omwiguru, nirisisana okuhirra okw'amaizi maingi kandi okugamba okw'enkuba ez'amaani. Iraka eri nahuliire likaba nirisisana nk'ery'abateezi b'endongo abarukuteera endongo zaabbu, 3bakaba nibazina ekizina ekihyaka omumaiso g'ekitebe ky'obukama, n'omu maiso g'ebihangwa bbina ebyomeezi, n'omu maiso g'abakuru abo. Busaho n'omu ayasoboire kukwata ekizina eki, okwihaho abantu akasiiriira kamu mu bukumi bbuna n'enkumi ina abaacungwirwe omunsi. 4Nubo abo abatarayesiisire n'abakazi, habwokuba batamanye bakazi; abo nubo bahondera Omwana gw'Entaama hoona h'akagenda; nubo abaacungwirwe omu bantu, bali munganuro gwa Ruhanga n'ogw'Omwana gw'Entaama. 5Omu kanwa kaabu hatasangwemu bisuba, habwokuba tibaina kamogo. 6Hanyuma narora malaika ondi naahurruka omu mwanya, aina Amakuru Amarungi agatalihwaho ag'okurangirra abo abaikara omunsi, ag'okurangirra amahanga goona, enganda zoona, ab'engambo zoona, n'abantu boona; 7yagamba n'iraka likooto ati: “Mutiine Ruhanga kandi mumukugize, habwokuba akasumi ke ak'okucwa omusango kahikire; kandi muramye Omuhangi w'iguru n'ensi, enyanja n'ensoro zoona z'amaizi.” 8Haakurataho malaika ondi, owa kabiri, ayagaambire ati: “Rugwire Bbabbulooni orubuga rukuru! Rugwire oru orwatamiize amahanga goona n'obubi obw'obusiihani bwarwo!” 9Malaika ondi owa kasatu yabakurataho naagamba n'iraka likooto ati: “Kakuba omuntu weena aramya ekinyamaiswa eki n'ekisisani kyakyo, kandi akateebwaho akarorwaho ha buso rundi ha mukono, 10nawe alinywa empotole ey'ekiniga kya Ruhanga, enyakwiturwirwe omu kikopo kye. Alibonabonesibwa omurro n'obuganga oburukwokya, bamalaika abahikiriire n'Omwana gw'Entaama baroleriire. 11Omwika ogw'okubonesibwa kwabo guliikara nigucuuka ebiro n'ebiro; kandi abo abaramya ekinyamaiswa n'ekisisani, kyakyo hamu n'abanyakwina akarorwaho ak'ibara lyakyo, tibaligira kihuumuro nyamusana n'ekiro.” 12Aho nuho harukwetaagirwa okugumiisiriza kw'abahikiriire. Nubo abo abakwata Ebiragiro bya Ruhangga kandi abaikiriza Yesu. 13Kandi nahurra iraka erirukuruga omu iguru nirigamba liti: “Handiika oti: Okuruga hati, baina omugisa abafu abaraafeeraga omu MUKAMA.” Kandi Mwoyo naakigumya ati: “Mazimakwo baina omugisa, hati bahuumule, baleke emirimo yabu, habwokuba ebikorwa byabu bagenda nabyo!” 14Nubwo narozire ekicu ekirukwera, kiikaliirweho omu arukusisana omwana w'omuntu, ajwaire ha mutwe ekondo ya zaabbu, akwasire omu ngaro enoijoro enyakutoire. 15Malaika ondi yaruga omu Nju ya Ruhanga naayeta n'iraka likooto Ogu anyakwikaliire ha kicu naagamba ati: “Kwata enoijoro yawe ogese, habwokuba akasumi ak'okugesa kahikire, ebyokugesa by'ensi byeriire kimu.” 16Nubwo Ogu anyakwikaliire ha kicu yahungya enoijoro ye omunsi, yagesa ensi. 17Malaika ondi yaruga omu Nju ya Ruhanga ey'omwiguru, nawe akaba akwasire enoijoro enyakutoire. 18Kandi malaika ondi yaruga ha itambiro, nuwe malaika anyakwina obusobozi ha murro, yayera n'iraka likooto Ogu anyakukwasire enoijoro enyakutoire naagamba ati: “Kwata enoijoro yawe osale ebijuma by'emizabbibbu ey'omunsi habwokuba byengere.” 19Nubwo malaika yahungya enoijoro ye omunsi, yasoroza ebijuma by'emizaabbibbu y'omunsi, yabinaga omu ndeeba enkooto ey'ekiniga kya Ruhanga. 20Ebijuma byajungirwa omu ndeeba aheeru y'orubuga oru, byarugwamu esagama nyingi, yatuuma kuhika ha sentimita kikumi mu ataano, yagera kukira ha kilomita bikumi bibiri mu kyenda.

will be added

X\