OKUSUUKURURWA 11

1Hanyuma naheebwa oruti orw'okulengesa, orurukusisana orubango; haabaho ayandagiire ati: “Imuka, olenge Enju ya Ruhanga n'itambiro, kandi obale abo abaramizaamu; 2baitu otalenga ezigati ey'aheeru y'Enju egi; yo ogireke, habwokuba ehairwe Abanyamahanga kandi balirubaatirra orubuga orurukwera okumara ameezi makumi ana n'abiri. 3Kandi abakaiso bange ababiri ndibaha obusobozi obw'okuranga okumara ebiro rukumi rumu omu bikumi bibiri n'enkaaga, baliranga bajwaire ebiguniya.” 4Abakaiso abo niyo emiti ey'oliva, n'ebikondo bibiri eby'etaara ebinyakuli omu maiso ga MUKAMA w'ensi yoona. 5Kakuba habaho weena arukubakora kubi, omurro gulibaruga omu kanwa, gumaleho abanyanzigwa baabo. Kakuba habaho weena arukubakora kubi, nawe nukwo ali w'okwitwa ati. 6Baina obusobozi obw'okukinga iguru, nukwo enjura ereke kugwa omu biro ebi balimara nibaranga. Kandi baina obusobozi ha maizi okugahindura sagama, n'okuleeta omunsi buli muhito gwona ha bakagondiize hoona. 7Obu balikamara kuha obwakaiso bwabu, ekinyamaiswa ekinyakuruga omu kiina ekitaina h'okugarukira kiribarwanisa, kibasingule, kibaite; 8kandi emitumbi yabu erigaraamirra omu ikuute ery'orubuga orukuru nambere MUKAMA wabo yabambiirwe ha musaraba, orubuga orusisanizibwa Sodomu na Misiri. 9Abantu aba buli mulingo, buli ruganda, buli ngambo, n'aba buli ihanga emitumbi yabo baligihanga amaiso okumara ebiro bisatu n'ekicweka, batarukwikiriza eziikwe omu kituuro. 10Kandi abo abaliba bali omunsi balibeebugira, balisemererwa kandi balitwekerangana ebisembo, habwokuba abarangi abo ababiri baabatuntuzaaga muno. 11Baitu obu haahingwireho ebiro bisatu n'ekicweka, orwoya orw'obwomeezi orwarugire hali Ruhanga rukabataahamu, baayemerra; n'abo boona abaababoine baatiina muno. 12Nubwo abakaiso abo ababiri baahuliire iraka likooto erirukuruga omwiguru nirigamba liti: “Mutembe, mwije hanu!” Baatemba omu iguru, bali omu kicu, abanyanzigwa baabo nibabarora. 13Kandi omu kasumi ako haabaho omusisa ogw'amaani, kimu kya ikumi eky'orubuga kyagwa; abantu kasanju baitwa omusisa, kandi abaasigaireho baatina muno, baakugiza Ruhanga ow'omwiguru. 14Omuhito ogwa kabiri guhoire, hati ogwa kasatu gumalize kwija. 15Nubwo malaika owa musanju yatiire engwara ye, omu iguru haahulirwa amaraka makooto agaagambire gati: “Obukama bw'ensi buhindukire, bwaba bwa MUKAMA waitu n'Ogu ou yaseesireho amagita (nuwe Kristo), kandi alirema ebiro byona.” 16Abakuru amakumi abiri na bbana abanyakwikarra ha bitebe byabu omu maiso ga Ruhanga baajuumara, baamuramya, 17nibagamba bati: “Nitukusiima MUKAMA Ruhanga ow'obusobozi bwona, anyakuroho kandi ayabaireho, habwokuba oyegaruliire obusobozi bwawe, wajuumura engoma. 18Amahanga gakabiihirwa muno, hati akasumi kawe kahikire ak'okugafubira: abafiire okucwerwa omusango, n'abaheereza baawe okuheebwa empeera, nubo abarangi n'abahikiriire n'abo abakutiina, abato n'abakuru kandi nuko kasumi ak'okumaraho abahwerekereza ensi.” 19Aho Enju ya Ruhanga ey'omwiguru yakingurwa, kandi esanduuko ey'endagaano yazooka omu Nju ye; haabaho emirabyo, okuhinda kw'amaani, okubbaruka kw'enkuba, omusisa n'orubaale rwingi.

will be added

X\