OKUSUUKURURWA 1

1Kunu nukwo okusuukururwa Ruhanga oku yahaire Yesu Kristo kwoleka abaheereza be, bamanye ebikaba nibiija kubaho bwango. Binu akabimanyisa naatuma malaika hali omuheereza we Yohaana, 2ayahandiikire byona ebi yaboine naajurra ebigambo bya Ruhanga n'obwakaiso bwa Yesu. 3W'omugisa anyakusoma ebigambo binu eby'okuranga, kandi b'omugisa abo abanyakuhurra n'abanyakukwata ebihandiikirwe omu kitabu kinu; habwokuba akasumi kali haihi kuhika. 4Nyowe Yohaana nimpandiikira ebitebe musanju eby'abaikiriza ebiri omu Asiya: Nimbagondeza omugisa n'obusinge ebinyakuruga hali Ogu anyakubaho, ayabaireho, kandi ow'okwija, n'ebinyakuruga hali emyoyo musanju enyakwikara omumaiso g'ekitebe ky'obukama bwe, 5kandi ebinyakuruga hali Yesu Kristo kaiso omwesigwa ayabandize kuhumbuuka omu bafu, kandi anyakulema abakama b'ensi. Ogu anyakutugonza, ayatwihire omu bibi byaitu naatucunguza esagama ye, 6yatufoora bukama kandi banyakatagara ba Ruhanga Ise, aheebwe ekitiinisa n'obusobozi ebiro n'ebiro. Amiina. 7Ngugwo naizira omu bicu, kandi buli riiso lirimurora, n'abo abaamucumisire balimurora; kandi enganda zoona ez'omunsi zirimuterra empamo. Egokwo. Amiina. 8Mukama Ruhanga agamba ati: “Ninyowe Ntandiko, ninyowe Mpeero.” Anyakubaho, ayabaireho, kandi ow'okwija, Kamara-byona. 9Nyowe Yohaana mwene wanyu, anyakubagana na inywe omu Yesu: emihito n'okugumiisiriza ebitutungisa obukama, nkaba ndi omu kizinga ekirukwetwa Patimo, nkwatirweyo habw'okurangirra ekigambo kya Ruhanga n'okumanyisa abantu ebya Yesu. 10Ha kiro kya Mukama, obu natemberwe Mwoyo, enyuma yange nahurra iraka likooto nk'ery'engwara, 11nirigamba liti: “Ebi orukurora bihandiike omu kitabu, obitwekere ebitebe musanju by'abaikiriza abali: Efeeso, Sumiruna, Perugamo, Tiyatiira, Saadisi, Filadelufiya na Layodikeeya.” 12Nubwo nakubuutukire kurora ow'akaba naabaza na nyowe. Obu nakubuutukire, narora ebikondo musanju eby'etaara, bya zaabbu; 13hagati y'ebikondo ebi nkarora omu arukusisana Omwana w'omuntu, ajwaire ekanzu eraihire, ayeteegere omu kifuba omweko gwa zaabbu; 14omutwe gwe n'isoke rye bikaba nibyera ti nk'ebyoya by'entaama njeru, nibyera nk'ebirika. Amaiso ge gakaba nigaaka nk'endimi z'omurro; 15ebigere bye bikaba nibisisana omulinga oguzigwire, ogusemereziibwe omu kyoto; kandi iraka lye likaba nirisisana nk'iraka ery'amaizi amaingi agarukuhirra; 16omu mukono gwe ogw'obulyo akaba akwasire enyunyuuzi musanju, omu kanwa ke haarugamu empirima etoire ey'amoogi abiri, kandi amaiso ge gakaba nigangasana nk'izooba erirukujwa n'amaani. 17Obu namurozire, nagwa ha bigere bye nasisana nk'anyakufiire. Baitu yantaho omukono gwe gw'obulyo, naampuumuza ati: “Otatiina, ninyowe ow'okubanza, owa ha mpero, 18kandi hati nyomiire. Nkafa, baitu okuruga hati ndaikaraga ndi mwomeezi ebiro byona, kandi nyina ebisumuruzo by'Orufu n'eby'Okuzimu. 19Handiika ebi orukurora, ebinyakuroho hati kandi ebiribaho hanyuma. 20Amakuru agaserekerwe ag'enyunyuuzi musanju ezi orozire omu mukono gwange ogw'obulyo, n'ag'ebikondo musanju eby'etaara eza zaabbu nugo ganu: enyunyuuzi musanju imanyisa bamalaika ab'ebitebe musanju by'abaikiriza, kandi ebikondo musanju eby'etaara bimanyisa ebitebe ebi byonyini.”

will be added

X\