FILEEMONI 1

1Nyowe Paulo, omunyankomo habwa Kristo Yesu, na Timoteho mugenzi waitu, Nitukuhandiikira iwe Fileemoni omugonzibwa kandi omukozi mugenzi waitu, 2na Afiya munyaanya-itwe, na Arikipo omuserikale mugenzi waitu, n'ekitebe ky'abaikiriza abeesorooleza omu nju yaawe: 3Nitubagondeza emigisa n'obusinge ebiruga hali Ruhanga Isiitwe na hali MUKAMA Yesu Kristo. 4Obutoosa obu nkwijuka omu kusaba kwange, nsiima Ruhanga wange. 5Habwokuba mpurra ha kugonza n'okwikiriza ebi orukwoleka MUKAMA Yesu na bantu be boona. 6Kandi ninsaba ngu, okukwataniza n'abandi omu kwikiriza kunu kwongere kukukengesa ebirungi byona ebi twatungire omu Kristo. 7Mugenzi wange, engonzi zaawe zindetiire omuhimbo kandi zimpuumwize, habwokuba oruhurwire emitima y'abantu ba Ruhanga. 8Nukwo nu, noobu ndaaba ntarukutiina kukuragira omu Kristo okukora ekirukwetagwa, 9baitu habw'engonzi nyina eki ndukukusaba, nyowe Paulo omukwenda kandi omu kasumi kanu omunyankomo habwa Kristo Yesu. 10Ninkwesengereza habw'Oneesimo, ou nfoire mwana wange ndi omu nkomo. ( 11Kara akaba atarukukugasira, baitu hati omu mazima naakugasira muno, kandi na nyowe naangasira.) 12Ngugwo mmukugaruliire nk'arukukugarurra omutima gwange gwonyini. 13Naakugondeze kwikara nawe, ampeereze omu kiikaro kyawe, nkyali omu nkomo habw'Amakuru Amarungi. 14Baitu mmaliriire kutakora kintu na kimu otaikiriize, nukwo oburungi bwawe buleke kuba bw'akagemo, baitu bube bw'okwegondeza wenka. 15Rundi nikyo yakurugiireho kumara akaanya kake, nukwo osobole kugarukanganira kimu nawe, 16atakyali mwiru, baitu naakiraho. Afookere ow'oruganda omugonzibwa, okukira muno hali nyowe, kiraasura ki hali iwe, arukwikara nawe omu mubiri n'omu MUKAMA. 17Obu oraaba nonyeta mutaahi waawe, omujwahukirre nkooku waakujwahukiriire nyowe. 18Obu araaba yakusobiize rundi aina ibanja lyawe lyona, olitonge nyowe. 19Nyowe Paulo, kinu ninyija kukihandiika nyenka n'omukono gwange nti: Ibanja eri ndirisasura--tindukwenda n'okukwijukya nkooku onyinaho ibanja, kandi ibanja eri niiwe wonyini. 20Nukwo mugenzi wange, ninyenda onkoonyere omu MUKAMA. Ohuumuze omutima gwange nk'omunyaruganda omu Kristo. 21Habw'okwesiga nkooku oli muhulizi, nkuhandiikire nimmanya nti: Oraakora ebindukukugamba, n'okubikizaaho obikizeeho. 22Kandi ekindi, onteekanirize h'okuraara. Habw'okusaba kwanyu ninihira kulekerwa, mbagarukire. 23Epafura, omunyankomo mutaahi wange omu Kristo Yesu, naakuramukya. 24Mariko, Aristariko, Deema, na Luka abakozi bagenzi bange, nabo nibakuramukya. 25Embabazi za MUKAMA Yesu Kristo zikale na iwe.

will be added

X\