ABAFILIPI 4

1Habweki nu, bagenzi bange, aba ngonza kandi aba nyinaho ekihika, okusemererwa kwange kandi ekondo yange, mugumire muti hali MUKAMA, inywe enganzi zange. 2Ninyesengereza Evodiya na Sintike, baikirranize omu MUKAMA. 3Kandi na iwe mugenzi wange mali, ninkusaba okoonyere abakazi abo, habwokuba tukatalibanira hamu okurangirra Amakuru Amarungi, kandi nimbabara na Kelementi n'abakozi abandi bagenzi bange ab'amabara gaabu gali omu kitabu eky'obomeezi. 4Mukyanganukege omu MUKAMA obutoosa; ningaruka kugamba nti: Mukyanganuke. 5Okugumiisiriza kwanyu kumanywe abantu boona. Ningira MUKAMA ali haihi kugaruka. 6Mutaharaza omutima habw'ekintu kyona, baitu omu buli kintu mwikale nimumanyisa Ruhanga ebi murukwetaaga, nimumusaba, nimumwesengereza kandi nimumusiima. 7Obusinge bwa Ruhanga obuhinguraine okwetegereza kwona, bulirinda emitima yanyu n'ebiteekerezo byanyu omu Kristo Yesu. 8Eky'okumalirra, bagenzi bange, byona eby'amazima, byona eby'ekitiinisa, byona eby'obulyo, byona ebirukwera, byona ebirungi, byona ebirukusiimwa nibyo muteekerezeho, hamu n'engeso enungi n'ebindi ebisemeriire kunyumizibwa. 9Ebi mwanyegereho, ebi mwanyihireho, ebi mwampuliireho, n'ebi mwandozireho, nibyo mukolege; kandi Ruhanga ow'obusinge araikaraga na inywe. 10Ninkyanganuka muno omu MUKAMA, habwokuba mulinzirwe mwagaruka mwanyijuka. Mazimakwo mukaba muntaireho omutima, baitu mukaba mutakatungire mwanya. 11Tikuli kugira ngu, eki ninkigambisibwa obuburwa, habwokuba nkeega okwenihira omu mulingo gwona ogu mbamu. 12Nimmanya kukeeherwa ebintu n'okubisaagirirwa; omu buli kintu n'omu miringo yoona nkeega amagezi ag'okwekoonyera: omu mweru n'omu njara, omu itungo n'omu bunaku. 13Ninsobora kukora byona habw'Ogu anyakumpa amaani. 14Baitu mukakora kurungi kunyirukirra omu muhito gwange. 15Na inywe Abafilipi nimumanya ngu, obu natandikire kurangirra Amakuru Amarungi ninduga Makedoni, hatabeho kitebe ky'abaikiriza na kimu ekyayeteeraine na nyowe omu kurolerra entaahya n'enturukya ya sente, okwihaho inywe inywenka. 16Noobu nkaba ndi Teesalonika, mwantwekerega eby'okunkoonyera. 17Tikuli kugira ngu, ninserra ebisembo; baitu ninserra amagoba Ruhanga aga alibongeramu. 18Nyowe, emperra yange mmazire kugitunga kandi nsaagisizeho! Ntungire ebirukumara habwokuba Epafurodito amazire kumpa ebisembo ebi mwantwekiire, nikyo kihongwa ekirukuboya kurungi kandi ekyonzira ekirukusiimwa Ruhanga kandi eki agonza. 19Ruhanga wange alibaha byona ebi murukwetaaga nk'obwingi bw'obwenda bwe omu Kristo Yesu oku buli. 20Ekitiinisa kibe hali Ruhanga Isiitwe ebiro n'ebiro. Amiina. 21Mundamukize abantu ba Ruhanga boona omu Kristo Yesu. Bagenzi bange aba nyinabo hanu, nibabaramukya. 22Abantu ba Ruhanga boona nibabaramukya, muno muno ab'omu kikaali kya Kaisaali. 23Emigisa ya MUKAMA Yesu Kristo ikale n'emyoyo yanyu.

will be added

X\