ABAFILIPI 3

1Eky'okumalirra bagenzi bange, mukyanganuke omu MUKAMA. Na hati tikirukunjwahya kubahandiikira ebintu ebirukusisana na biri. Na inywe nikibaleetera obusinge. 2Mwerinde embwa ezi! Mwerinde enkozi z'ebibi! Mwerinde abo abasara omubiri! 3Itwe tuli abasazirwe b'amazima, Mwoyo nuwe atuhabura nkooku turaaramya Ruhanga. Okwenyumiza kwaitu kuli omu Kristo Yesu. Titwesiga emikoro ya ha mubiri. 4Noobu baakujuliire emikoro egi, baitu nyowe tinyina eki ndukutiina. Obu buraaba buli bulyo obw'okwesiga emikoro ya ha mubiri, nooha araabunkiza? 5Nkasarwa ha kiro kya munaana, ndi Omunyaisirairi, ow'oruganda rwa Benyamiini, Omuhebburaayo ayazairwe Abahebburaayo, kandi omu kukuraatira Ebiragiro, ndi Mufalisaayo. 6Nkooleka obwekambi bwange nimpiiganiza ekitebe ky'abaikiriza. Omu kuhikirra okurukusigikira ha Biragiro, tinyina musango. 7Ebirungi byona ebi natungire, nkabyeta kuferwa habwa Kristo. 8Mazimakwo, ebintu byona nimbirora nk'ebitaina mugaso obu mbirengesaniza n'oburungi obw'okumanya Kristo Yesu MUKAMA wange. Habwe nkaikiriza kuferwa ebintu byona kandi mbirora nk'ebitaina mugaso, nukwo ntunge Kristo, 9kandi nyikale omuli uwe. Tinkyaserra obuhikiriire bwange habwange obusigikira ha Biragiro, kwihaho obu oburukuleetwa okwikiriza Kristo. Nubwo obuhikiriire oburukuruga hali Ruhanga kandi oburukuleetwa okwikiriza kwaitu. 10Eki ndukwenda nukwo kumanya Kristo n'okumanya amaani g'okuhumbuuka kwe, mbagane nawe omu kubonabonesibwa kwe, nsisane nawe n'omu kufa kwe. 11Nukwo obu kiraaba nikisoboka, na nyowe mpike ha kuhumbuuka omu bafu. 12Tindukugamba ngu, eki mmazire kukitunga; rundi ngu, mmazire kuhikirra; baitu ninyekamba kukyetungira, Kristo Yesu nkooku yanyetungire. 13Bagenzi bange, tindukugira ngu, eki nkakyetungira; kwihaho eki ndukukora kiri kimu kyonka: nukwo kwebwa ebindi enyuma n'okwitanira ebindi omumaiso, 14ninyekamba kuhika ha kigendererwa, nukwo ntunge empeera ey'omwiguru Ruhanga ei yanyetiire omu Kristo Yesu. 15Abo abeetwa abakuru omuli itwe, nukwo tusemeriire kuteekereza tuti. Obu haba haroho ekintu eki murukuteekereza okundi, nakyo Ruhanga naija kukibasuukurra. 16Kyonka nambere tuhikire, muho tugendere tutarukugarukirra. 17Bagenzi bange mwikirranize kandi munkuraatire. Itwe nkooku tuli kyokurorraho kyanyu, mwetegereze abo abarukukora nka itwe. 18Habwokuba baingi omu Baisirairi abo, aba nabagambiireho emirundi nyingi, na hati aba ndukubagambira ntaireho n'okurra, baikara bali banyanzigwa b'omusaraba gwa Kristo. 19Empero yabo nukwo okuhwerekerra; ruhanga waabo niyo enda, kandi beenyumiriza ha bintu ebirukubahemura, emitima yabo bagimaliza ha bintu by'ensi. 20Baitu itwe, obwikaro bwaitu buli omwiguru, nambere haliruga Omujuni, MUKAMA Yesu Kristo ou turukulindirra. 21Nuwe alihindura emibiri yaitu etaina kitiinisa, esisane nk'ogwe ogw'ekitiinisa habw' amaani agamusoboza kulema ebintu byona.

will be added

X\