ABAFILIPI 2

1Nukwo nu, obu haraaba haroho okugumyangana omu Kristo, okwimukyangana okuleetwa engonzi, n'okukwataniza omu Mwoyo, rundi okuganyira n'okugirrangana enbabazi, 2munyijuze omuhimbo mwina ebiteekerezo bimu, n'engonzi ez'omulingo gumu, nimwikirraniza omu byona n'omutima gumu. 3Mutalikora kintu kyona habw'okwegonza rundi okwekuliriza, baitu mwebundaaze, nimumanya abandi nkooku barukubakira oburungi. 4Buli omu hali inywe aleke kuta omutima hali ebi arukugonza wenka, baitu agute na ha birukugonzibwa abandi. 5Omwoyo Kristo Yesu ogu akaba ainagwo, nugwo musemeriire kuba nagwo. 6Uwe nobu araaba yasisanaaga Ruhanga, baitu okwingana kwe na Ruhanga atakire kukufaho. 7Akeemaramu ekitiinisa yayefoora mwiru, yazaarwa nk'abantu. 8Habw'okuzaarwa nk'omuntu, akeebundaaza kandi yaba muhulizi, kuhika ha kufa, nangwa n'okufa okwa ha musaraba. 9Nikyo Ruhanga yamunyumiriize, yamuruka ibara erirukukira agandi goona. 10Nukwo boona abanyakuli omu iguru, n'ab'omunsi, n'ab'okuzimu, obu bahurra ibara lya Yesu, bateeze amaju, 11kandi buli rulimi rwatule Yesu Kristo nkooku ali Mukama, nukwo Ruhanga Ise aheebwe ekitiinisa. 12Habweki, bagenzi bange abagonzibwa, nkooku mwabaire bahulizi kara, na hati nukwo mube, hatali kumpurra obu mba ndoho, baitu mukire kumpurra obu mba ntaroho, mwekambire okujunwa kwanyu nimutina kandi nimutukumira. 13Habwokuba Ruhanga naakorra omuli inywe, naabakoonyera okugonza n'okuhikiriza ebi asiima. 14Mukole ebintu byona mutarukutontorroma kandi mutarukuteera mpaka, 15nukwo mube abataina musango kandi abeezibwe; abaana ba Ruhanga abataina kamogo hagati y'abantu ab'obusinge bunu oburamaire kandi obuhabire aba murukwakiramu nk'enyunyuuzi ezirukwakira ab'omu nsi, 16nimugumiza kimu ebigambo by'obwomeezi. Nukwo ha Kiro kya Kristo nsobole kwenyumiza nkooku ntarairukiire busa, kandi ntaratalibaniire busa. 17Esagama yange noobu eraaba eri y'okuseeswa ha kyonzira ekiruhongwa-nukwo okwikiriza kwanyu kweyongere, baitu ninsemererwa kandi ninkyanganuka hamu na inywe inywena. 18Na inywe nukwo musemererwe muti kandi mukyanganuke hamu na nyowe. 19Ninihira omu MUKAMA Yesu kubatumira bwango Timoteho, nukwo omutima gungwe omu nda mmazire kumanya amakuru g'owaanyu. 20Tinyina ondi weena amwingana mu kutunturra muno obwomeezi bwanyu. 21Abandi boona beeserurra ebyabu, bitali bya Yesu Kristo. 22Baitu omugaso gwa Timoteho mugumanyire, habwokuba omu by'Amukuru Amarungi tukaheereza hamu nk'omwana oku arukukoonyera ise. 23Nikyo ndukunihirra kumutuma ahonaaho, obu ndakarora ebyange nambere biraagarukira; 24kandi ninyesiga MUKAMA ngu, na nyowe nyenka ndiija oku bwango. 25Hati nyetegeriize nkooku kirukwetaagwa kubatumira Epafurodito mugenzi wange, omukozi kandi omuserikale nyakyaitu; nuwe mukwenda wanyu arukumpa ebi ndukwetaaga; 26habwokuba inywena, abaire abainaho ekihika, kandi omutima gukamusarra kumanya nkooku mwahuliire eby'endwara ye. 27Akarwarakwo mali, kake afe. Baitu Ruhanga akamugirra embabazi, atazigirre uwe wenka baitu na nyowe, nukwo obujune obu nyina buleke kunyongerwaho. 28Nikyo ndukuteeraho muno omutima kumubatumaho, mukyanganuke habw'okugaruka kumurora, kandi na nyowe omutima gungaruke omunda. 29Habweki, mumutangirre omu MUKAMA n'omuhimbo gwona; kandi abantu nk'abo mubatemuga ekitiinisa. 30Ningira akaba ali haihi n'okufa habw'omulimo gwa Kristo, naahayo obwomeezi bwe okuhikiriza inywe ebi mwakunkolire.

will be added

X\