MATAYO 6

1“Mwerinde, muleke kukora ebikorwa byanyu ebirungi omu maiso g'abantu ngu, babarole. Obu muraakora muti, Isiinywe ow'omwiguru talibaha mpeera. 2“Habweki obu oraagabiraga omuseege, leka kukirangaaniza nk'abagobya oku bakora omu masorrokaniro n'omu mihanda, nukwo abantu babanyumize. Mazimakwo nimbagambira nti: Abo bamazire ira kutunga empeera yabu. 3Baitu obu oraagabiraga omuseege, omukono gwawe ogw'emoso guleke kumanya omukono gw'obulyo eki gurukukora. 4Okugaba kwawe kubege kw'ensita; kandi So anyakurora ensita alikuha empeera.” 5“Obu muraabaga nimusaba Ruhanga, mulekege kuba nk'abagobya; habwokuba bbo bagonza kusaba beemeriire omu masorrokaniro n'omu ntangatangano z'emihanda, nukwo abantu babarole. Mazimakwo nimbagambira nti: Abo baamazire ira kutunga empeera yabo. 6Baitu obu oraabaga noosaba, otaahege omu kisiika kyawe, oyekingiremu, nukwo osabe Sso atarukurorwa; kandi Uwe anyakurora ensita alikuha eky'osabire. 7“Obu muraabaga nimusaba muleke kukanyisa ebigambo nkooku Abanyamahanga bakora, nibateekereza ngu, Ruhanga araabahurra habw'ebigambo byabo ebingi. 8Muleke kusisana nk'abo, habwokuba Isiinywe amanyire ebi mwetaaga noobu muba mutakamusabire. 9Nahabweki musabege muti: Isiitwe ali omwiguru, ibara lyawe litiinwe, 10obukama bwawe bwije, ebi ogonza bikorwe omunsi nkooku bikorwa omwiguru. 11Otuhe hati ebyokulya byaitu ebya buli kiro; 12otuganyire ebibi byaitu nka itwe oku tuganyira abatukora kubi; 13otatuleka tukoohebwa baitu otujune omu bubi. 14Obu muraaganyiraga abantu ensobi zaabo, na inywe Isiinywe ow'omwiguru alibaganyira; 15baitu obu mutaganyira abantu ensobi zaabo, na inywe Isiinywe talibaganyira ezanyu.” 16“Obu muraabaga nimusiiba, muleke kwoleka obujune ha maiso nk'abagobya oku bakora, nukwo abantu babamanyirre nkooku barukusiiba. Mazimakwo nimbagambira nti: Abo bamazire kutunga empeera yabo. 17Baitu inywe obu muraabaga nimusiiba, munaabege ha maiso, mwesiige amagita, 18nukwo abantu baleke kubamanyirra nkooku murukusiiba; baitu mumanywe Isiinywe wenka atarukurorwa. Kandi Isiinywe anyakurora eby'ensita alibaha empeera.” 19“Mutalyeyahurra itungo omunsi, erirukusiiswa enkugutu n'obumomi, kandi abasuma nambere barukucwa bakaiba. 20Baitu mweyahurrege itungo omwiguru, nambere litasobora kusiiswa enkugutu n'obumomi, kandi abasuma nambere batarukucwa bakaiba. 21Habwokuba itungo lyanyu nambere liri, oku nuho emitima yanyu eraikaraga.” 22“Eriiso niyo taara y'omubiri. Habweki eriiso lyawe obu liraaba nirihweza kurungi, omubiri gwawe gwona guhwereza kimu; 23baitu eriiso lyawe obu liba litarukuhweza, omubiri gwawe gwona guswekwa omwirima. Okuhweza okuli omuli iwe kakuba kufooka mwirima, omwirima ogu guraingana ha!” 24“Tiharoho anyakusobora kuheereza abakama babiri. Alinobaho omu agonze ondi, rundi aligumira hali omu agaye ondi. Timusobora kuheereza Ruhanga n'okwemarra ha itungo ly'ensi. 25“Nikyo ndukubagambirra nti: Mutalitunturra obwomeezi bwanyu eki muraalyaga rundi eki muraanywaga rundi omubiri gwanyu eki muraajwaraga. Obwomeezi tibuli bw'omuhendo kukira ebyokulya? N'omubiri tiguli gw'omuhendo kukira ebyokujwara? 26Murole enyonyi ez'omu mwanya; tizisiga, tizigesa, kandi tizihunika, baitu Isiinywe ow'omu iguru aziriisa. Inywe timuli b'omuhendo okukira enyonyi ezi? 27Nooha omuli inywe, noobu atuntura ata, arukusobora kwongera akasumi kake ha bwomeezi bwe? 28“Habwaki nimutunturra ebyokujwara? Murorre ha byakyo by'omu kisaka nkooku bikura, tibikora mulimo kandi tibyongosa. 29Baitu nimbagambira nti: Noobwakubaire Solomoni omu kitiinisa kye kyona, atajwale kurungi okwingana ekimu ha byakyo binu. 30Ruhanga obu araaba ajweka ati obunyansi bw'omu kisaka oburoho hati, nyenkya bukanagwa omu kikoomi, talikiraho muno kujweka inywe abaina okwikiriza kuke? 31Habweki muleke kutuntura ngu: ‘Turaalya ki?’ Rundi ‘Turaanywa ki?’ Rundi ‘Turaajwara ki?’ 32Habwokuba ebintu nk'ebi Abanyamahanga nibyo baitanira. Isiinywe ow'omwiguru amanyire binu byona nkooku murukubyetaaga. 33Baitu mubanze muserre obukama bwe n'obuhikiriire bwe, n'ebi byona biribongerwaho. 34“Nahabweki, mulekege kutunturra ebya ijo; ekiro kya ijo kiryetunturra kyonka. Leka buli kiro kihwe n'omutalibano gwakyo.”

will be added

X\