MATAYO 5

1Yesu obu yarozire ebitebe by'abantu, yatemba orusozi, yaikarra hansi, nukwo abeegesebwa be kwija nambere ali, 2yatandika kubeegesa ati: 3“Baina omugisa abeemanya nkooku bali banaku omu mwoyo, habwokuba obukama bw'omwiguru bwabo. 4Baina omugisa abarukuganya, habwokuba Ruhanga alibahuumuza. 5Baina omugisa abaculeezi, habwokuba baligweterwa ensi. 6Baina omugisa abarukurumwa enjara bakakwatwa n'iroho habw'obuhikiriire, habwokuba baliiguta. 7Baina omugisa ab'embabazi, habwokuba baligirirwa embabazi. 8Baina omugisa ab'emitima esemiire, habwokuba balirora Ruhanga. 9Baina omugisa abanyakuteeraniza abantu omu businge, habwokuba balyetwa baana ba Ruhanga. 10Baina omugisa abahiiganizibwa habw'obuhikiriire, habwokuba obukama bw'omwiguru bwabo. 11Inywe mwina omugisa abantu obu baraabajumaga, obu baraabahiiganizaaga kandi bakabahangirra ebintu ebibi byona habwange. 12Musemererwe, mukyanganuke, habwokuba empeera yanyu nyingi omu iguru; nukwo baahiiganiize bati abarangi abaabandize inywe.” 13“Inywe muli kisura ky'ensi; kakuba ekisura kihoibwamu orusa, orusa oru ruligarurwamu ruta? Kiba kitakyagasa, kisigaliire kunagwa n'okurubaatirirwa abantu. 14“Inywe muli kyererezi ky'ensi. Orubuga orwombekerwe ha rusozi tirusobora kuserekwa. 15Busaho muntu ahemba etaara akagijuumikira ekigega, baitu bagita ha kikondo, nukwo emulikire abantu boona abali omu nju. 16Ekyererezi kyanyu nukwo kimulikire kiti abantu, barole ebikorwa byanyu ebirungi, bakugize Isiinywe ow'omu iguru.” 17“Mutateekereza ngu, nkaija kwihaho Ebiragiro n'abarangi. Ebi ntaije kubiihaho, baitu nkaija kubihikiriza. 18Mazimakwo nimbagambira nti: Iguru n'ensi bitakahoireho, busaho enyuguta n'emu ey'omu Biragiro noobu kaakuba kacweka kaayo akaliihwamu, okuhika byona obu birikahikirra. 19Nahabweki weena anyakucwa ekimu ha biragiro binu ebike, kandi akeegesa abandi kubicwa, alyetwa muto omu bukama bw'omwiguru; kandi weena anyakubikwata akabyegesa abandi, alyetwa mukuru omu bukama bw'omwiguru. 20Baitu nimbagambira nti: Obuhikiriire bwanyu obu butalikira obw'abeegesa b'ebiragiro n'obw'Abafalisaayo timulitaaha omu bukama bw'omwiguru.” 21“Mukahurra aba ira nkooku baagambiirwe bati: ‘Otaliita; weena anyakwita w'okusingwa omusango’. 22Baitu nyowe nimbagambira nti: Weena anyakubiihirirwa mugenzi we ali w'okusingwa omusango; weena anyakujuma mugenzi we alitwarwa omu rukurato; kandi weena anyakweta mugenzi we ati: ‘Kidoma we!’ ogu alinagwa omu kiinongoro ky'omurro. 23Habweki, kakuba oba noohayo ekisembo kyawe ha itambiro, okaijuka nkooku mugenzi waawe aina eki arukukujunaana, 24siga aho ekisembo kyawe omu maiso g'itambiro, genda obanze ogarukanganemu nawe, nubwo ogaruke ohonge ekisembo kyawe. 25“Garukanganamu bwango n'ogu arukujunaana, atakakuhikize omu bulemi; nukwo aleke kukunyegerra hali omucwi w'emisango, n'omucwi w'emisango akakukwasa omuserikale, kandi omuserikale akakuta omu nkomo. 26Mazimakwo nyowe ninkugambira nti: Tolirugamu okuhika obu olikasasurra kimu akasente koona.” 27“Mukahurra nkooku kyagambirwe kiti: ‘Otalisiihana’. 28Baitu nyowe nimbagambira nit: Weena ogu arora omukazi akamwegomba, buli omu mutima gwe aba asiihaine nawe. 29Eriiso lyawe ery'obulyo kakuba nirikuleetereza kusiisa, liihemu olinage; haakire ofeerwe orugingo rumu orw'omubiri gwawe, kukira omubiri gwona kunagwa omu kiinongoro ky'omurro. 30Kandi omukono gwawe ogw'obulyo kakuba gukuleetereza kusiisa, gutemeho ogunage; haakire ofeerwe orugingo rumu orw'omubiri gwawe, kukira iwe weena kugenda omu kiinongoro ky'omurro.” 31“Kandi kikagambwa kiti: ‘Omuntu weena obu abingira kimu mukazi we, amuhe ebbaruha erukwoleka nkooku amubingire.’ 32Baitu nyowe nimbagambira nti: Omusaija kakuba abingira kimu mukazi we, atarukusigikira ha busiihani, nuwe aba amuleeteriize kusiihana obu aswerwa handi; n'omusaija anyakuswera omukazi ayabingirwe, nawe aba asiihaine.” 33“Mukagaruka mwahurra nkooku abantu ba ira bagambiirwe bati: ‘Otalirahirra busa, baitu eki orahiriire MUKAMA okihikirizeege!’ 34Baitu nyowe nimbagambira nti: Mutalirahira naakake konka, noobu lyakuba iguru, habwokuba nikyo kitebe kya Ruhanga; 35rundi ensi, habwokuba nuko akatebe k'ebigere bye; rundi Yerusaalemu, habwokuba nurwo orubuga rw'Omukama omukuru. 36Noobu kwakuba okurahira omutwe gwawe, habwokuba tosobora kuhindura akasoke kamu kuba akarukwera rundi akarukwiragura. 37Leka ekigambo kyawe ‘Ego’ kiikale kiri ‘Ego’, rundi ‘Nangwa’ kiikale kiri ‘Nangwa?’; ebirukukira hali ebi biruga hali Omubi.” 38“Mukahurra nkooku kyagambirwe kiti: ‘Eriiso lirehwe eriiso, n'eriino lirehwe eriino.’ 39Baitu nyowe nimbagambira nti: mutalyeholerra enzigu. Omuntu obu araakuteeraga oruhi ha rusaya rw'obulyo, omuhindurre n'orundi. 40Omuntu kakuba nakunyegerra habw'esaati, leka atwale n'ekooti. 41Kakuba omuntu naakuhambiriza kugenda nawe kilomita emu, genda nawe n'eya kabiri. 42Omuntu kakuba akusaba, omuhe; kakuba akwohoza, otalimwangirra.” 43“Mukahurra nkooku kyagambirwe kiti: ‘Ogonzeege mutaahi waawe kandi onobege omunyanzigwa waawe’. 44Baitu nyowe nimbagambira nti: Mugonzeege abanyanzigwa banyu, kandi musabirege abarukubahiiganiza, 45nukwo mube baana ba Isiinywe ali omu iguru, habwokuba ajwisiza omusana ababi n'abarungi, kandi anagira enjura abahikiriire n'abatali bahikiriire. 46Obu muraaba nimugonza abarukubagonza, mulitunga mpeera ki? N'abasorooza b'omusoro tinukwo bakora bati? 47Obu muraaba nimuramukya bagenzi banyu bonka, abandi nimubakizaaho ki? N'Abanyamahanga tinukwo bakora bati? 48Habweki mube bahikiriire nka Isiinywe ow'omu iguru oku ahikiriire.”

will be added

X\