MATAYO 3

1Omu biro ebi, Yohaana Omubatiza akaija naarangirra omwirungu lya Buyudaaya, 2naagamba ati: “Mwegarukemu, habwokuba obukama bw'omwiguru buli haihi.” 3Nuwe ogu omurangi Isaaya ou yagambireho ati: “Iraka ly'ogu arukwamiira omwirungu ati: Muteekanirize MUKAMA omuhanda, mutereekereze obuhanda bwe.” 4Yohaana ogu yajwaraga ekijwaro ky'ebyoya by'engamiya, yayeteegesaaga orukoba rw'oruhu; kandi yalyaga enzige n'obwoki bw'enjoki ez'omwirungu. 5Abantu baarugaga Yerusaalemu n'omu isaza lyona erya Buyudaaya n'omunsi eziheriire ekisaaru Yorudaani, nibaija nambere ali. 6Yababatirizaaga omu kisaaru Yorudaani nibaatura ebibi byabu. 7Yohaana obu yarozire Abafalisaayo baingi n'Abasadukaayo nibaija kubatizibwa, yabagambira ati: “Inywe abaana b'enjoka! Nooha ayabahabwire kwiruka obukaya bwa Ruhanga obutagarukirra? 8Mukole ebikorwa ebirukwoleka nkooku mwegarukiremu. 9Muleke kwesigura muti: ‘Twina isenkuru itwe Abburahamu’; baitu nimbagambira nti: Amabaale ganu, Ruhanga asobora kugaihiramu Abburahamu abaijukuru. 10Nangwa na hati endemu etairwe ha bikoro by'emiti. Omuti gwona ogutarukwana bijuma ebirungi nigwija kutemwa, gunagwe omu murro. 11“Nyowe nimbabatiza n'amaizi habw'okwegarukamu, baitu ogu arukwija enyuma, nankiza obusobozi, kandi tinsemeriire n'okumukwatiraho enkaito ze; uwe alibabatiza na Mwoyo Ahikiriire n'omurro; 12kandi akwasire orugali rwe kuhehemukya, naija kusingorra orubuga rwe, nukwo ahunike oburo omu nguli ye, kandi ebisunga abyokye omu murro ogutaraara.” 13Nubwo Yesu yarugire Galiraaya, yagenda Yorudaani kubatizibwa Yohaana. 14Baitu Yohaana yagonza kumwangirra naagamba ati: “Nyowe ninyetaaga ombatize, kandi iwe noija hali nyowe?” 15Baitu Yesu yamugarukamu ati: “Hati iwe ikiriza tukole tuti, nukwo tuhikirize byona Ruhanga ebi arukutugondeza.” Aho Yohaana yaikiriza. 16Yesu obu yamazire kubatizibwa, ahonaaho yaruga omu maizi, iguru lyakinguka, yarora Mwoyo wa Ruhanga naamusirimukaho omu kisisani ky'eriiba, naamwijaho; 17n'iraka lyaruga omwiguru nirigamba liti: “Ogu nuwe Mwana wange omugonzibwa ou nsiima muno.”

will be added

X\