MATAYO 18

1Omu kasumi ako, abeegesebwa bakaija hali Yesu baamukaguza bati: “Arukukira obukuru omu bukama bw'omu iguru, nooha?” 2Yesu yayeta omwana omuto, yamwemereza hagati yabu, 3yagamba ati: “Mazima nimbagambira nti: Obu mutalihinduka, mukaba nk'abaana abato, timulitaaha omu bukama bw'omwiguru. 4Weena anyakwebundaaza nk'omwana omuto onu, nuwe arukukira obukuru omu bukama bw'omwiguru.” 5“Weena anyakujwahukirra omwana omuto nk'onu omu ibara lyange, buli ajwahukiriire nyowe. 6Baitu weena alyesiitaza omu ha baana abato banu abarukunyikiriza, haakire abohwe omu bikya orubengo, anagwe omu nziha y'enyanja. 7“Ensi erikibona habw'ebyesiitazo! Mazima ebyesiitazo tibiri by'okuburaho, baitu alikibona ogu anyakubireeta! 8Kakuba omukono gwawe rundi okuguru kwawe bikuleetereza kusiisa, bitemeho obinage hara; haakire otaahe omu bwomeezi oramaire rundi ogookere, kukira kunagwa omu murro ogutahwaho oina emikono ebiri rundi amaguru abiri. 9Kandi eriiso lyawe obu liraaba nirikuleetereza kusiisa, liihemu, olinage hara; haakire otaahe omu bwomeezi oina eriiso limu, okukira kunagwa omu murro ogutaraara oina amaiso abiri. 10“Mwerinde, muleke kugaya omu ha bato banu, habwokuba nimbagambira nti: Omwiguru bamalaika baabo baikara nibarora amaiso ga Isenyowe anyakuli omu iguru. ( 11Ningira Omwana w'omuntu akaija kugarra ekyabuzire.)” 12Nimuteekereza muta? Omuntu kakuba aba aina entaama kikumi, emu hali zo ekabura, tasiga kyenda na mwenda ha nsozi akagenda kuserra enyakubuzire? 13Kakuba agizoora, mazimakwo nimbagambira nti: “Agisemererwa okukira ziri kyenda na mwenda ezitarabuzire. 14Na Isenyowe ow'omu iguru nukwo atagonza omu ha bato abo ahwerekerre.” 15“Mugenzi waawe obu araakusiisiraga, genda omugambire eki asobeze muli inywenka. Kakuba akuhuliriza, buli mugenzi waawe omwegaruliire. 16Baitu kakuba atakuhuliriza, genda n'omuntu omu rundi babiri, nukwo kyona eki muraagamba kigumibwe baakaiso babiri rundi basatu. 17Kakuba ayanga kubahuliriza, kigambire ekitebe ky'abaikiriza; kandi kakuba nabo ayanga kubahuliriza, omusisanize Omunyaihanga rundi omusorooza w'omusoro. 18“Mazima nimbagambira nti: Kyona kyona eki muliboha omunsi, kiribohwa n'omwiguru; kandi kyona eki mulisumurra omunsi, kirisumururwa n'omwiguru. 19Ninyongera kubagambira nti: Kakuba babiri hali inywe muraikirraniza omunsi ha kintu kyona eki murukusaba, Isenyowe ow'omwiguru alikibaha. 20Nambere ababiri rundi abasatu beesorooleza omu ibara lyange, ndaabaga hagati yabo.” 21Nubwo Petero yaizire yamukaguza ati: “Waitu, mugenzi wange obu aransiisiraga, ndamuganyiraga emirundi ingaha? Okuhika emirundi musanju?” 22Yesu yamugarukamu ati: “Tindukukugambira ngu okuhika emirundi musanju; baitu ohikyege nsanju emirundi musanju.” 23“Nahabweki obukama bw'omu iguru nibulengesanizibwa nk'omukama ayagondeze abaheereza be bamubarre ebintu bye. 24Obu yatandikire kubara nabo, baamuleetera omu anyakwina ibanja lye ly'obukaikuru bwa siringi; 25kandi habw'okutasobora kusasura, mukama we yaragira kumutunda hamu na mukazi we, n'abaana be, na byona ebi akaba ainabyo, nukwo amale ibanja. 26Omuheereza yateeza amaju yamwesengereza ati; ‘Mukama wange, ngumiisiriza, ndaakusasura zoona.’ 27Mukama we yamugirra embabazi, yamulekera, kandi yamuganyira ibanja eri. 28“Baitu omuheereza ogu obu yaturukire aheeru, yatangaana omu ha baheereza bataahi be, ow'akaba amuliireho ibanja erya sente nke muno; yamukwata, yamuniga naagamba ati: ‘Nsasura.’ 29Omuheereza mutaahi we yagwa hansi, yamwesengereza ati: ‘Ngumiisiriza, ndaakusasura.’ 30Baitu uwe yayanga, yagenda yamuta omu nkomo okuhika obu alikamara ibanja. 31Abaheereza bataahi be obu baarozire ebibaireho, baasaalirwa muno, baagenda baagambira mukama wabu byona ebibaireho. 32Nubwo mukama we yamweta yamugambira ati: ‘Iwe omuheereza omubi! Nkuganyiirege ibanja eri lyona habw'okunyesengereza; 33na iwe tokuganyiire omuheereza mutaahi waawe, nkooku nyowe nkuganyiire?’ 34Mukama we yabiihirwa, yamukwasa abalinzi b'enkomo okuhika obu alikasasura ibanja lyona. 35Isenyowe ow'omu iguru nukwo alibakora ati, obu muraaba mutarukuganyirangana n'omutima gumu.”

will be added

X\