MATAYO 16

1Abafalisaayo n'Abasadukaayo bakaija hali Yesu kumulenga nibamusaba abooleke akokurorraho akarukuruga omwiguru. 2Yabagarukamu ati: “Omu bwire bwa rwebagyo mugamba muti: ‘Obwire buraaba burungi; habwokuba iguru niritukura.’ 3Nyenkya kara mugamba muti: ‘Harabaho enjura y'ekiyaga, habwokuba iguru niritukura kandi libiihire.’ Mumanyire kukenga iguru nkooku lirukusisana, baitu timusobora kukenga ebihuniriza eby'obusumi bunu obunyakuroho. 4Abantu ab'obusinge obubi kandi obuhabire, nubo barukuserra ekihuniriza; baitu tibaliheebwa kihuniriza kwihaho kya Yona.” Nubwo yabarugireho, yagenda. 5Abeegesebwa be obu baahikire nseeri y'enyanja, baarora nkooku beeberwe kutwara emigaati. 6Yesu yabagambira ati: “Mwerinde kandi mwegendereze ekitumbisa ky'Abafalisaayo n'Abasadukaayo.” 7Baatandika kukaguzangana bati: “Ekirukumugambisa kiti, habwokuba titwina migaati.” 8Yesu obu yayetegeriize eki, nubwo yabagambiire ati: “Inywe ab'okwikiriza okuke! Eby'okutaba n'emigaati nimukibalizaho ki? 9Timukeetegeriize? Timurukwijuka nkooku naliisize abantu enkumi itaano emigaati etaano yonka? Mukasorooza ebigega bingaha eby'oburagalika? 10Rundi obu naaliisize abantu enkumi ina n'emigaati musanju, mukasorooza ebigega bingaha? 11Habwaki mulemerwe kwetegereza nkooku ntabagambire ha by'emigaati? Mwerinde nu ekitumbisa ky'Abafalisaayo n'Abasadukaayo.” 12Nubwo baayetegeriize nkooku atabagambire okwerinda ekitumbisa ky'Emigaati, baitu okwerinda enyegesa y'Abafalisaayo n'Abasadukaayo. 13Yesu yahika omu kicweka kya Kaisaariya orwa Filipi, yakaguza abeegesebwa be ati: “Omwana w'omuntu abantu bamweta bata?” 14Baamugarukamu bati: “Abamu bagamba ngu: Nuwe Yohaana Omubatiza; abandi ngu: Nuwe Eriya; abandi ngu: Nuwe Yeremiya rundi omu hali abarangi.” 15Nandiki Yesu ati: “Baitu inywe munyeta muta?” 16Simooni Petero yamugarukamu ati: “Niiwe Kristo, Omwana wa Ruhanga Atafa.” 17Yesu yamugarukamu ati: “Oli w'omugisa Simooni, mutabani wa Yona, habwokuba amazima ganu togamanyisiibwe muntu kwonka, baitu ogasuukuliirwe Isenyowe anyakuli omu iguru. 18Kandi ninkugambira nti: Niiwe Petero, kandi ha mwandara gunu nuho ndyombeka ekitebe ky'abeeserwe bange, n'amaani g'okuzima tigalikisingura. 19Ndikuha ebisumuruzo by'obukama bw'omu iguru. Kyona kyona eki oliboha omu nsi, kiribohwa n'omu iguru; kandi kyona eki olisumurra omu nsi, kirisumururwa n'omu iguru.” 20Nubwo yateererra muno abeegesebwa be kutagambiraho muntu n'omu nkooku ali Kristo. 21Okuruga obu Yesu yatandika kumanyisa abeegesebwa be nkooku ali w'okugenda Yerusaalemu kubonabonesibwa muno bakuru b'abantu, abanyakatagara abakuru, n'abeegesa b'ebiragiro; n'okwitwa kandi ahumbuurwe haahingwireho ebiro bisatu. 22Petero yamugarra ha rubaju, yatandika kumuhana ati: “MUKAMA wange, eki nikikafuuhe! Tikirukwija kukubaho.” 23Baitu Yesu yahinduka, yagambira Petero ati: “Ngaruka enyuma iwe Sitaani! Onfookiire muhingo, habwokuba ebi orukuteekereza tibiri bya Ruhanga, baitu by'abantu.” 24Nubwo Yesu yagambiire abeegesebwa be ati: “Weena anyakugonza kumpondera, ayehwemu wenka, ahimbe omusaraba gwe, ampondere. 25Weena anyakutaatira obwomeezi bwe, alibufeerwa; kandi weena anyakuhayo obwomeezi bwe habwange, alibutunga. 26Omuntu kirimugasira ki okulya ensi yoona, baitu akafeerwa obwomeezi bwe? Rundi kintu ki omuntu eki alihayo kucungura obwomeezi bwe? 27Omwana w'omuntu aliija n'abamalaika be omu kitiinisa kya Ise, nubwo alisasura buli muntu naasigikira ha bikorwa bye. 28Mali mali nimbagambira nti: Haroho abeemeriire hanu abatalihikwaho rufu batakarozire Omwana w'omuntu naizira omu bukama bwe.”

will be added

X\