MATAYO 13

1Ha kiro eki Yesu akaruga omunju, yagenda yaikarra ha musa gw' enyanja. 2Ebitebe bingi byamwesoroolezaaho; nukwo kutemba omu bwato, yabwikarramu, kandi ekitebe kyona kyayemerra ha musa gw'enyanja. 3Aho yabagambira ebintu bingi omu nfumo ati: Omusigi akatura okusiga. 4Obu akaba naasiga, embibo ezimu zaaragara ha muhanda rubaju, enyonyi zaija, zaazisoma. 5Ezindi zaagwa ha mwandara, nambere hakaba hatali itaka lingi; ahonaaho zaamera. Baitu habw'itaka kutahama, 6omusana obu gwajwire, gwazookya, kandi habw'okutagira mihama zaahotoka. 7N'ezindi zaagwa omu nahwa, amahwa obu gaakuzire, gaazinyoroza. 8Embibo ezindi zaagwa omwitaka erirungi, zaayana; ezimu zaayana kikumi, ezindi nkaaga, n'ezindi makumi asatu. 9Nukwo Yesu kugamba ati: “Anyakwina amatu, ahurre!” 10Nubwo abeegesebwa baija baamukaguza bati: “Habwaki oikara noobaliza abantu omu nfumo?” 11Yesu yabagarukamu ati: “Inywe mukaheebwa okumanya ensita z'obukama bw'omwiguru, baitu bbo eki batakiheebwe. 12Habwokuba weena anyakwina alyongerwaho, atunge bingi; baitu anyakwina ebike, n'ebi ainabyo birimwihwaho. 13Kinu nikyo mbagambirirra omu nfumo: habwokuba obu barora, tibahweza; n'obu bahurra, basisa abatahulire; kandi n'okwetegereza tibeetegereza. 14Mazimakwo Isaaya eki yarangire nikihikirra hali bo obu yagambire ati: ‘Mazimakwo okuhurra mulihurra, baitu timuhwituka, okurora mulirora, baitu timulihweza. 15Habwokuba emitima y'abantu banu egaraihire, n'amatu gaabo nigahurra kubi, n'amaiso gaabo bagazibiriize. Habw'amaiso gaabo okutarora, n'amatu gaabo okutahurra, n'emitima yabo okuteetegereza, nikyo bayangiire okumpindukira mbakize.’ 16Amaiso ganyu g'omugisa habwokuba nigarora, n'amatu ganyu habwokuba nigahurra. 17Mazimakwo nimbagambira nti: Abarangi baingi n'abahikiriire bakeegomba kurora ebi murukurora, baitu batabirole, n'okuhurra ebi murukuhurra, baitu batabihurre.” 18Muhurre nu orufumo rw'omusigi: 19Omuntu weena obu ahurra ekigambo ky'obukama bwa Ruhanga atakyetegeriize, omubi aija asahura ekigambo ekisigirwe omu mutima gwe; egi niyo mbibo eyaragaire omu muhanda. 20Kandi eyaragaire ha itaka erya ha mwandara, nuwe muntu anyakuhurra ekigambo, ahonaaho akiikiriza n'okusemererwa; 21baitu yo habw'okutahama omu mutima gwe, agumiisiriza akasumi kake; obu habaho emihito rundi okuhiiganizibwa habw'ekigambo eki, ahonaaho agwa. 22Kandi egi eyaragaire omu mahwa, nuwe ogu anyakuhurra ekigambo, baitu habw'okumaliza omutima ha by'ensi, n'okutwalirizibwa obuguuda, binyoroza ekigambo eki, tikyaana bijuma. 23Kandi embibo eyasigirwe omwitaka erirungi, nuwe muntu anyakuhurra ekigambo akakikenga; hanyuma akakora ebikorwa ebirungi: omu kukira ha kikumi, ondi nkaaga, n'ondi makumi asatu. 24Yesu akabaganikiza oruganikyo orundi ati: “Obukama bw'omwiguru nibusisanizibwa nk'omuntu ayasigire embibo nungi omu musiri gwe. 25Ekiro, abantu obu bakaba bagwijagiire, omunyanzigwa akaija yasiga emberya omu buro, yayegendera. 26Oburo obu bwakuzire butandikire kutungurra, emberya nayo yazookamu. 27Abakozi ba nyineeka nukwo kwija baamukaguza bati: ‘Waitu, omu musiri gwawe otasigemu embibo nungi? Kandi emberya iziremu eta?’ 28Yabagarukamu ati: ‘Omunyanzigwa nuwe yakozire kinu.’ Nubwo abakozi baamukagwize bati: ‘Noogonza tugende tugyomberemu?’ 29Nandiki nyineeka ati: ‘Nangwa, habwokuba obu muraaba nimwomberamu emberya, timwikara kutwarranizaamu oburo. 30Muleke byombi bikurre hamu okuhika ha igesa; omu kasumi k'igesa, ndigambira abagesi nti: Mubanze musorooze emberya, mugibohe enganda, eyokebwe; baitu oburo bwo mubuhunike omu nguli yange.’ ” 31Yesu akabacwera orufumo orundi ati: “Obukama bw'omwiguru nibusisanizibwa nk'akasigo ka karadaali, omuntu aka yatwaire yasiga omu musiri gwe; 32ko kaba katoito okukira embibo zoona, baitu obu kakura, kanyeeta okukira ebisaka byona, kafooka muti, kandi enyonyi ziija zoombeka ebiju omu mataagi gaagwo.” 33Akabacwera orufumo orundi ati: “Obukama bw'omwiguru nibusisanizibwa nk'ekitumbisa omukazi eki yatwaire yajwanganiza omu bihi bisatu by'ensaano, okuhika ensaano yoona obu yatumbire.” 34Ebigambo ebi byona Yesu yabigambiraga ebitebe by'abantu nabirabya omu nfumo; busaho kigambo kyona eki yabagambiraga atacwire rufumo. 35Kinu kikahikiriza omurangi eki yagambire ati: “Ndaabaza omu nfumo, nyatule ebyaserekerwe kuruga ha kuhangwa kw'ensi.” 36Hanyuma Yesu yaruga omu kitebe yataaha omu nju. Abeegesebwa be baija nambere ali nibasaba bati: “Tusoborre orufumo rw'emberya y'omu musiri.” 37Yabagarukamu ati: “Ogu anyakusiga embibo enungi, nuwe Mwana w'omuntu; 38omusiri niyo ensi; embibo enungi nubo baana b'engoma y'omwiguru; emberya nubo baana b'Omubi; 39kandi omunyanzigwa ayagisigire omu musiri nuwe Sitaani. Igesa niyo mpero y'ensi, kandi abagesi nubo bamalaika. 40Emberya nkooku esoroozibwa kwokebwa omu murro, nukwo kiriba kiti ha mpero y'ensi. 41Omwana w'omuntu alituma bamalaika be, baihe omu bukama bwe byona ebirukwesiitaza n'enkozi z'ebibi zoona, 42babanage omu kikoomi ky'omurro; oku nuho abantu balirirra banene ensaya. 43Obu nubwo abahikiriire balyangasana nk'izooba omu bukama bwa Isebo. Anyakwina amatu, ahurre.” 44“Obukama bw'omwiguru nibusisana nk'itungo eryaserekerwe omu musiri, omuntu eri yagwireho; nawe yaliswekerra. Habw'okusemererwa yagenda yatunda byona ebi akaba ainabyo, yagura omusiri ogu.” 45“Kandi obukama bw'omwiguru nibusisana nk'omusuubuzi arukuserra amabaale amarungi ag'omuhendo. 46Obu yazoireho limu ery'omuhendo mwingi, akagenda yatunda byona ebi akaba ainabyo, yaligura.” 47“Kandi obukama bw'omu iguru nibusisanizibwa nk'akatimba akaategerwe omu nyanja, kaakwata encu eza buli mulingo; 48obu kaijwire, abantu baakacundamu, baakata ha bwerre, baikarra, baakomorramu encu enungi, baazita omu bigega byabo, baitu embi baazinaga. 49Nukwo kiriba kiti ha mpero y'ensi. Abamalaika baliija baihe abantu ababi omu bahikiriire, 50nukwo ababi babanage omu kikoomi ky'omurro; oku nuho abantu balirirra kandi bakanena ensaya. 51“Ebigambo binu byona mubyetegeriize?” Baamugarukamu bati: “Ego.” 52Uwe yabagambira ati: “Nahabweki buli mwegesa w'ebiragiro anyakutendekerwe habw'obukama bw'omwiguru, naasisana nyineeka anyakwiha omu lyahurro lye ebintu ebihyaka n'ebikuru.” 53Yesu obu yamazire kubacwera enfumo ezi, yarugayo, 54kandi obu yahikire omunsi y'owaabu, yabeegesa omu isorrokaniro lyabo. Abaamuhuliire bakahunirra nibakaguzangana bati: “Omuntu onu, amagezi ganu n'ebyamahano binu, akabiiha nkaha? 55Onu tinuwe mutabani w'omubaizi? Nyina tinuwe Mariya? Kandi Yakobbo, Yosefu, Simooni na Yuda tinubo bagenzi be? 56Banyaanya boona tibali owaitu hanu? Binu byona akabiiha nkaha?” 57Nukwo kumwanga. Baitu Yesu yabagambira ati: “Omurangi aheebwa ekitiinisa hoona hoona, okwihaho omunsi y'owaabu n'omu ka ye.” 58Oku, Yesu atakorreyo byamahano bingi habw'okutaikiriza kwabo.

will be added

X\