MATAYO 10

1Yesu akeeta abeegesebwa be ikumi na babiri, yabaha obusobozi obw'okubinga emyoyo emibi, n'okukiza endwara zoona n'obusaasi bwona. 2Amabara g'abakwenda ikumi na babiri nugo ganu: ow'okubanza Simooni arukwetwa Petero, na mugenzi we Andereya; Yakobbo mutabani wa Zebedaayo na Yohaana owanyina; 3Filipo na Batolomayo; Tomasi na Matayo, omusorooza w'omusoro; Yakobbo mutabani w'Alifaayo, na Tadeo; 4Simooni omurwanirizi w'ihanga lye na Yuda Isikalyota ayamugobiize. 5Ikumi na babiri abo, Yesu akabatuma naabaragira ati: “Mutaligenda hoona mu Banyamahanga, kandi mutalitaaha omu rubuga rwona orw'Abasamaliya. 6Haakire mugende omu bantu ba Isirairi abarukusisana entaama ezaabuzire. 7Obu muraabaga nimugenda, murangirre muti: ‘Obukama bw'omu iguru bwiriire haihi.’ 8Mukize abarwaire, muhumbuule abafiire, mukize abagenge, mubinge emyoyo emibi. Mukaheerwa busa, na inywe muheere busa. 9Mutalitwara ezaabbu n'efeeza, noobu zaakuba sente omu ndyanga zanyu; 10mutalitwara ensaho omu rugendo rwanyu, rundi esaati ibiri, rundi enkaito, noobu gwakuba omwigo. Habwokuba omukozi naasemerra kuheebwa empeera ye. 11“Orubuga rwona rundi ekyaro ha muraataahaga, muserremuga omuntu anyakusemeriire, mwikale nawe okuhika obu mulirugayo. 12Obu muraabaga nimutaaha omunju, abarumu mubagondeze obusinge. 13Enju egi obu eraaba esemeriire, obusinge bwanyu buligiikaraho; baitu obu eraaba etasemeriire, obusinge bwanyu bulibagarukira. 14Kakuba omuntu weena atabatangirra rundi akanga kuhuliiriza ebigambo byanyu, muruge omunju egi rundi omu rubuga oru nimuteeraterra ecuucu y'omu bigere byanyu. 15Mazimakwo nimbagambira nti: Ha kiro ky'okucwerwa omusango, ensi ya Sodomu na Gomora eriganyirwa kukira abantu b'omu rubuga oru.” 16“Dora nimbatuma nk'entaama ezirukugenda omu myaaga hagati; nahabweki mube b'amagezi nk'enjoka, kandi abataina kabi nk'amaiba. 17“Mwerindege abantu; habwokuba balibahayo omu nkurato, balibateeza enkoba omu masorrokaniro gaabu, 18Kandi balibatwara kubatonganiza omu maiso g'abalemi abakuru n'ag'abakama habwange, mube bakaiso bange hali bo na hali Abanyamahanga. 19Obu baraabahayoga, mutalitunturra ebi muligamba, rundi nkooku mulitongana; baitu omu kasumi ako muliheebwa ebi muligamba. 20Habwokuba tibali inywe abalyetonganirra, baitu Mwoyo wa Isiinywe nuwe aligambira omuli inywe. 21“Omuntu alihayo owanyina aitwe, na isemwana alihayo omwana we, kandi abaana baliimukirra abazaire baabo babaise; 22na inywe mulinobwa boona habwange. Baitu ogu aligumiisiriza okuhika ha mpero, nuwe alijunwa. 23Obu balibahiiganiza omu rubuga orumu, mwirukire omu rundi. Mazima nimbagambira nti: Timulimarayo embuga zoona eza Isirairi, Omwana w'omuntu atakaizire. 24“Omwegesebwa takira mwegesa we, n'omuheereza takira mukama we; 25nikihika omwegesebwa okusisana nk'omwegesa we, n'omuheereza kusisana nka mukama we. Nyineeka obu baraaba bamwesire mukuru w'emyoyo emibi, balisura ki hali ab'omu ka ye?” 26“Nahabweki muleke kubatiina, habwokuba busaho ekiswekeriirwe ekitalisuukurwa, rundi ekiserekerwe ekitalimanywa. 27Eki ndukubagambira omu nsita, mukigambe bbwa; kandi eki muhurra omu bihwa, mukyamirirre ha mutwe gw'enju. 28Muleke kutiina abo abaita omubiri, abatasobora kwita omwoyo; haakire mutiine Ogu anyakuhwerekereza byombi: omubiri n'omwoyo omu murro ogutaraara. 29Ebisirya bibiri tibigurwa sente ikumi? Busaho na kimu halibyo ekigwa hansi Isiinywe ow'omwiguru ataikiriize. 30Nangwa n'isoke erya ha mitwe yanyu libazirwe. 31Nahabweki muleke kutiina; inywe muli b'omuhendo kukira ebisirya bingi.” 32“Weena alinyatura omumaiso g'abantu, na nyowe ndimwatura omumaiso ga Isenyowe anyakuli omwiguru; 33baitu weena alinyehakana omumaiso g'abantu, na nyowe ndimwehakana omu maiso ga Isenyowe anyakuli omwiguru. 34“Mutateekereza ngu, nkaija kuleeta obusinge omu nsi. Ntaije kuleeta obusinge, baitu empirima. 35Nkaija kwahukaniza omwana na ise, omwisiki na nyina, mukamwana na nyinazaara; 36habwokuba abanyanzigwa b'omuntu nubo ab'omu ka ye. 37Anyakugonza ise rundi nyina okukira nyowe, tansemeriire; n'ogu anyakugonza mutabani we rundi muhara we okukira nyowe, tansemeriire; 38n'ogu ateetweka musaraba gwe akampondera, tansemeriire. 39Weena anyakutaatira obwomeezi bwe, alibufeerwa; baitu weena alihayo obwomeezi bwe habwange, alibutunga.” 40“Weena anyakujwahukirra inywe, buli ajwahukiriire nyowe; kandi anyakujwahukirra nyowe, buli ajwahukiriire Ogu ayantumire. 41Weena anyakujwahukirra omurangi habwokuba murangi, ogu aliheebwa empeera y'omurangi; kandi weena anyakujwahukirra omuhikiriire habwokuba muhikiriire, ogu aliheebwa empeera y'omuhikiriire. 42Weena anyakuha omu ha bato abo ekikopo ky'amaizi agarukufuka habwokuba mwegesebwa wange, mazimakwo talisubwa mpeera ye.”

will be added

X\