MARIKO 8

1Omu biro ebi, ekitebe ky'abantu obu kyagarukire kwesorooza, kandi bataina kyokulya, Yesu yayeta abeegesebwa be, yabagambira ati: 2“Ninganyira abantu banu, habwokuba bamazire na nyowe ebiro bisatu, bataina eki barukulya; 3obu ndabaraga kugaruka owaabubo bataliire, nibaija kugwa ensazi omu muhanda; kandi abamu omuli bo barugire hara.” 4Abeegesebwa be baamugarukamu bati: “Nikisoboka kita omuntu kutungira abantu banu boona ebyokulya omuirungu munu?” 5Nawe nukwo kubakaguza ati: “Mwinaho emigaati ingaha?” Nandiki bbo bati: “Musanju.” 6Yaragira ekitebe ky'abantu kwikarra hansi; yakwata emigaati musanju, obu yamazire kusiima, yagicwamu, yagiha abeegesebwa be kugigabira abantu; baagibagabira. 7Kandi bakaba bainaho obucu buke; nabwo yabusiimira, yaragira babugabire abantu. 8Baalya, baiguta. Baasorooza oburagalika obwasigaireho, bwaijuza ebigega musanju. 9Abaaliire baahikaga nk'enkumi ina. 10Yabaraga; ahonaaho yagwerra omu bwato hamu n'abeegesebwa be, yagenda omu nsi ya Dalmanuta. 11Abafalisaayo bakaija baatandika kumuteeza empaka, nibamusaba ekihuniriza ekirukuruga hali Ruhanga, nibamulenga. 12Uwe yasinda n'agamba ati: “Habwaki ab'ebiro binu nibasaba ekihuniriza? Mazimakwo nimbagambira nti: Busaho kihuniriza ekiriheebwa ab'ebiro binu.” 13Yabasigaho, yagaruka yagwerra omu bwato, yayambuka nseeri. 14Abeegesebwa bakaba beeberwe kutwara entanda, kyonka omu bwato bakaba bainamu omugaati gumu gwonka. 15Uwe yabahabura ati: “Barungi bange, mwerinde ekitumbisa ky'Abafalisaayo n'ekya Herode.” 16Nukwo bbo kutandika kukaguzangana bati: “Ekirukumugambisa kiti, habwokuba titwina mugaati.” 17Yesu obu yakyetegeriize, yabakaguza ati: “Eky'okutaba na mugaati nimukibalizaho ki? Timukamanyire rundi timukeetegeriize? Emitima yanyu tekahwitukire? 18Ka mwina amaiso, timurukurora? Ka mwina amatu, timurukuhurra? Rundi timurukwijuka? 19Obu naacwire emigaati etaano nagiriisa abantu enkumi itaano, oburagalika obu mwasoroize bukaijuza ebigega bingaha?” Baamugarukamu bati: “Ikumi na bibiri.” 20“Kandi obu nacwire emigaati musanju nagiriisa abantu enkumi ina, oburagalika obu mwasoroize bukaijuza ebigega bingaha?” Baamugarukamu bati: “Musanju.” 21Yabakaguza ati: “Nabwo timukeetegeriize?” 22Baahika Betisaida. Abantu abamu baamuleetera omufu w'amaiso, baamwesengereza amukwateho. 23Yakwata omufu w'amaiso ha mukono, yamwiha omu kyaro eki; obu yamazire kumucwa amacwanta ha maiso, amutaireho n'emikono, yamukaguza ati: “Oina eki orukurora?” 24Omusaija ogu yainunuka, yagarukamu ati: “Nindora abantu; baitu nibasisana nk'emiti erukugenda.” 25Yesu yayongera yamuta engaro ha maiso. Uwe yahweza, yakira, yarora kurungi ebintu byona. 26Yamwohereza kutaaha owaabu, naamugambira ati: “Otahunguka noobu haakuba omu kyaro kinu.” 27Yesu yayongera kugenda omu byaro bya Kaisaariya Filipi aina abeegesebwa be; obu bakaba nibagenda, yabakaguza ati: “Abantu baanyeta bata?” 28Baamugarukamu bati: “Abamu bagamba ngu: Yohaana Omubatiza; abandi ngu: Eriya; n'abandi ngu: Omu ha barangi.” 29Nandiki uwe ati: “Baitu inywe munyeta muta?” Petero yamugarukamu ati: “Niiwe Kristo.” 30Yabateererra ati: “Eki mummanyireho, mutakigambira muntu.” 31Akatandika kubamanyisa Omwana w'omuntu nkooku asemeriire kubonabonesibwa omu bintu bingi n'okwangwa abakuru b'abantu, n'abanyakatagara abakuru n'abeegesa b'ebiragiro, n'okwitwa kandi ahumburwe haahingwireho ebiro bisatu. 32Ebi byona akabigamba bbwa. Nubwo Petero yatwaire Yesu ha rubaju, yatandika kumuhana. 33Baitu Yesu obu yahindukire, arozire abeegesebwa be, yacoomera Petero ati: “Ngaruka enyuma iwe Sitaani! Habwokuba ebi orukuteekereza tibiri bya Ruhanga, baitu by'abantu.” 34Yayeta ekitebe ky'abantu hamu n'abeegesebwa be, yabagambira ati: “Weena anyakugonza kumpondera, ayehwemu wenka, ahimbe omusaraba gwe, ampondere. 35Habwokuba weena anyakutaatira obwomeezi bwe, alibufeerwa; kandi weena anyakuhayo obwomeezi bwe habwange na habw'Amakuru Amarungi, alibujuna. 36Baitu omuntu nikimugasa ki okutunga ensi yoona, kandi akafeerwa obwomeezi bwe? 37Kintu ki omuntu eki asobora kuhayo okucungura obwomeezi bwe? 38Baitu weena arukunkwatirwa ensoni rundi akaikwatirwa ebigambo byange omu businge bunu obuhabire kandi obubi, Omwana w'omuntu nawe alimukwatirwa ensoni obu aliija aina ekitiinisa kya Ise, asendekeriziibwe abamalaika be abahikiriire.”

will be added

X\